Sección 119
Rrevelasiõ oñemeʼẽvaʼekue José Smith upe Proféta rupive, Far West, Misuri-pe, julio 8, 1838-pe, oñembohováivo jerureʼasy: “O Ñandejára! Ehechauka ne rembiguaikuérape mboýpa rejerure, diezmo-ramo, nde tavayguakuéra mbaʼerepykuéragui”. Diezmo léi, ko árape ojeikuaaháicha, noñemeʼẽikuri Tupaópe ko rrevelasiõ mboyve. Pe ñeʼẽ diezmo, ojeporúva ko ñemboʼe ojeʼeramóvape, ha péicha avei, rrevelasiõ upe mboyveguápe (64:23; 85:33; 97:11), oñeʼẽkuri ndahaʼéi pe désima párterente, ha katu opa ofrénda voluntáriare, térã donasiõre, Tupao fondokuéragui. Ñandejára omeʼẽkuri Tupaópe upe mboyve pe konsagrasiõ léi, ha mbaʼerepykuérare majordomía, umi miembro (koʼýte umi elder oisãmbyhýva) oikévape peteĩ konvénio rupive, opaveʼỹvaʼerãha. Oĩgui heta nokumplíriva upe konvénio, Ñandejára oipeʼákuri sapyʼa ha uperãngue omeʼẽ pe diezmo léi opa Tupaópe. Proféta oporandu Ñandejárape mboýpa imbaʼerepykuéragui Haʼe ojerure umi propósito sagradorã. Upe ñembohovái haʼékuri ko rrevelasiõ.
1–5, Santokuéra omeʼẽvaʼerã imbaʼerepykuéragui hembýva, ha uperire, omeʼẽ diézmo-ramo, désima párte oganávagui káda áño; 6–7, Koichagua tembiapo osantifikáta Sion retã.
1 Añetehápe, péicha heʼi Ñandejára, Che ajerure opa imbaʼerepykuéragui hembýva toñemoĩ che tupao obispo pópe Sion-pe,
2 Oñemopuʼã hag̃ua che róga, ha oñemoĩ hag̃ua Sion ñemopyenda, ha sacerdocio-pe g̃uarã, ha che tupao Presidencia devehakuérarã.
3 Ha kóva haʼéta che tavayguakuéra diézmo ñepyrũmby.
4 Ha péva rire, opa umi omeʼẽvaʼekue ko diézmo, ohepymeʼẽta pe désima párte iganansiakuéragui káda áño; ha kóva haʼéta chupekuéra léi oñemovaʼỹva akoiete g̃uarã, che santo sacerdocio-pe g̃uarã, heʼi Ñandejára.
5 Añetehápe Che haʼe peẽme, ojehúta opa umi oñembyatýva Sion retãme oñediesmáta opa imbaʼerepykuéra rembyrégui, ha oñongatúta ko léi, térã ndojejuhumoʼãi hikuái hekojojávaramo oiko hag̃ua pende apytépe.
6 Ha Che haʼe peẽme, che tavayguakuéra naiñeʼẽrendúirõ ko léire, oñongatu marangatu hag̃ua, ni nosantifikái chéve g̃uarã Sion retã ko léi rupive, oñeñongatu hag̃ua ipype che apoukapykuéra ha che huisiokuéra, haʼe hag̃ua imarangatuvéva, péina ápe, añetehápe Che haʼe peẽme, ndahaʼemoʼãi peẽme g̃uarã Sion retã.
7 Ha kóva haʼéta apopyrã opa Sion estakakuérape. Taupéicha. Amén.