Sección 7
Rrevelasiõ oñemeʼẽvaʼekue proféta José Smith ha Oliver Cowdery-pe, Harmony, Pensilvania, Abril 1829-pe, oporandúvo guare Urim ha Tumim rupive, Juan, pe discípulo ojehayhuetéva, opytápa raʼe hetépe térã omano. Upe rrevelasiõ haʼe peteĩ versiõ oñembohasapyre, pe ñemombeʼu Juan ohaivaʼekuégui peteĩ pergamíno-pe, ha haʼete oñomivaʼekue.
1–3, Juan pe Ojehayhuetéva oikovéta Ñandejára ou peve; 4–8, Pedro, Santiago ha Juan oguereko evanhélio llavekuéra.
1 Ha Ñandejára heʼi chéve: Juan, pe ahayhuetéva, mbaʼe reipota? Pe rejeruréva, oñemeʼẽtagui ndéve.
2 Ha che haʼe chupe: Ñandejára, emeʼẽ chéve puʼaka ñemano ári, aikove ha ogueru hag̃ua ndéve umi ánga.
3 Ha Ñandejára heʼi chéve: Añetehápe, añetehápe, haʼe ndéve, kóva reipota haguére, repytáta che aju peve che glóriape, ha reprofetisáta tatãnguéra, avaretã, ñeʼẽ ha tavayguakuéra renondépe.
4 Ha upévare Ñandejára heʼi Pedro-pe: Aipotáramo haʼe opyta che aju peve, mbaʼéiko ndéve upéva? Haʼe ogueruségui angakuéra chéve g̃uarã, ha nde katu pyaʼe rejuséma che rendápe che rréinope.
5 Haʼe ndéve, Pedro, kóva haʼékuri potapy porã; ha katu pe ahayhuetéva ojaposevékuri, térã, peteĩ tembiapo tuichavéva jepe yvypóra apytépe, upe koʼág̃a peve ojapovaʼekuégui.
6 Heẽ, haʼe omotenonde peteĩ tembiapo tuichavéva; upévare, ajapóta chugui tata rendýicha ha peteĩ ánhel ministrante ramo; haʼe oministráta umi salvasiõ ohupytýtava ñeimeporãrã, umi yvy ári oikovéva.
7 Che ajapoukáta nde tereministra haʼe ha nde joykeʼy Santiago ñeimeporãrã; ha peẽ mbohapýpe ameʼẽta ko puʼaka ha ko ministério llavekuéra che aju peve.
8 Añetehápe haʼe peẽme, mokõivévape oñemeʼẽta peipotaháicha, mokõivéva pevyʼágui umi peipotavaʼekuépe.