Sección 57
Rrevelasiõ oñemeʼẽvaʼekue José Smith, upe Proféta rupive, Sion, Jackson kondádo, Misuri-pe, julio 20, 1831-pe. Heʼiháicha Ñandejára rembiapoukapýpe oho hag̃ua Misuri-pe, Haʼe oikuaaukataha “pende yvy jehejapyre” (sección 52), elder-kuéra ojeʼóikuri Ohio-gui, Misuri kuarahyreike rembeʼýpe. José Smith ojepyʼamongeta lamanita-kuéra rekovekuére ha oñeporandu: “Arakaʼépa umi yvyty rrósaicha ipotyjeráta? Arakaʼépa oñemopuʼãta Sion iglóriape, ha moõpa oñemoĩta Ne témplo, outahápe opa tetãnguéra umi ára pahápe?”. Upe rire, oñemeʼẽvaʼekue chupe ko rrevelasiõ.
1–3, Independence, Misuri, haʼe Sion renda ha témplo rendag̃ua; 4–7, Santokuéra ojoguavaʼerã umi yvy ha ohupyty jehejapyre upe tendápe; 8–16, Sidney Gilbert omoĩvaʼerã peteĩ almasẽ, William W. Phelps haʼéta impresor, ha Oliver Cowdery omyatyrõ ha ombosakoʼivaʼerã umi mbaʼe oñeguenohẽ hag̃ua.
1 Pejapysaka, O che tupaogua elder-kuéra, heʼi Ñandejára pene Tupã, peẽ, peñembyatyvaʼekue ko tetãme, heʼiháicha che rembiapoukapýpe, haʼéva Misuri retã, haʼéva tetã Che ahechauka ha akonsagravaʼekue santokuéra ñembyatyrã.
2 Upévare, kóva haʼe pe yvy oñeʼprometevaʼekue, ha tavaguasu Sion rendag̃ua.
3 Ha péicha heʼi Ñandejára pene Tupã, ápe oĩ arandu, pemog̃uahẽséramo. Péina ápe, tenda koʼág̃a ojeheróva Independence haʼe pe tenda mbyte; ha témplo rendag̃ua opyta kuarahyreike gotyo, peteĩ yvy pehẽgue namombyrýiva husgádogui.
4 Upévare, iñarandu santokuéra tojogua pe yvy, ha avei opa terréno kuarahyreike gotyogua, jepe paʼũ ohasáva hudío ha hentilkuéra mbyte rupi.
5 Ha avei opa yvy pehẽngue ñu rembeʼypegua, che rembiguaikuéra ikatuha peve ojogua umi yvy. Péina ápe, kóva iñarandu, ojogua hag̃ua hikuái jehejapyre ijapyraʼỹvaramo.
6 Ha topyta che rembiguái Sidney Gilbert pe ofísio Che ahenói haguépe, ombyaty hag̃ua pirapire, haʼe hag̃ua tupao ahénte, ojogua hag̃ua yvy opa umi tenda jerereguápe, ojejapóma guive tekojojápe, ha arandu ohechaukaháicha.
7 Ha topyta che rembiguái Edward Partridge ofísio Che ahenói haguépe, ha tombojaʼo santokuérape umi ijehejapyre, jepeve Che amanda haguéicha; ha avei umi haʼe ohenoivaʼekue oipytyvõ hag̃ua chupe.
8 Ha avei, añetehápe Che haʼe peẽme, toiko che rembiguái Sidney Gilbert ko tendápe, ha tomoĩ peteĩ almasẽ, ovende hag̃ua temiñemunguéra japuʼỹme, ha ohupyty hag̃ua pirapire, ojogua hag̃ua yvy santokuéra ñeimeporãrã, ha ohupyty hag̃ua opa mbaʼe che discípulo-kuéra oikotevẽva, opyta hag̃ua umi ijehejapyrépe.
9 Ha avei, toguenohẽ peteĩ licencia che rembiguái Sidney Gilbert—péina ápe, kóvape oĩ arandu, ha pe omoñeʼẽva, toikũmby—oguehauka hag̃ua avei temiñemu umi tetãyguápe, jepe umi haʼe heʼíva rupive, mbaʼapohára chupe oipytyvõva ramo;
10 Ha péicha tomeʼẽ che santokuérape g̃uarã, oñemboʼe hag̃ua che evanhélio umi oĩva pytũmbýpe ha tenda ñemanoʼãme.
11 Ha avei, añetehápe Che haʼe peẽme, toiko ko tendápe che rembiguái William W. Phelps, ha toñemoĩ tupaopegua impresor ramo.
12 Ha péicha, múndo omog̃uahẽramo umi haʼe ohaíva—kóvape oĩ arandu—tohupyty tekojojápe upe haʼe ikatúva, santokuéra ñeimeporãrã.
13 Ha toipytyvõ chupe che rembiguái Oliver Cowdery, jepeve Che amanda haguéicha, oimeraẽ tenda Che haʼehápe chupe, okopia, omyatyrõ ha oiporavo hag̃ua, opa mbaʼe ijoja hag̃ua che renondépe, Espíritu ohechaukaháicha haʼe rupive.
14 Ha péicha tou toiko Sion retãme umi Che añeʼẽ haguégui, pyaʼe ikatuháicha, hogayguakuéra ndive, ojapo hag̃ua koʼã mbaʼe, jepe Che añeʼe haguéicha.
15 Ha koʼág̃a, upe ñembyatyrãre—Pe obispo ha upe ahénte tojapo ñembosakoʼi umi ogayguakuéra ojeʼevaʼekuépe ou hag̃ua ko tetãme, ikatumi vovénte, ha toñemoĩ chupekuéra ijehejapyrépe.
16 Ha tenondeve oñemeʼẽvéta tekomboʼe elder ha miembro-kuéra rembyrépe. Taupéicha. Amén.