Sección 11
Rrevelasiõ oñemeʼẽvaʼekue Josẽ Smith, pe Proféta rupive, hykeʼy Hyrum Smith-pe, Harmony, Pensilvania, Mayo 1829-pe. Ko rrevelasiõ oñemeʼẽvaʼekue Urim ha Tumim rupive, oñembohovái hag̃ua José ñeporandu ha jerureʼasy. José Smith rembiasakuépe ojeʼe ko rrevelasiõ oñemeʼẽhague pe Sacerdocio Aarónico ñemoĩjey rire.
1–6, Parraltýpe ombaʼapóva ohupytýta salvasiõ; 7–14, Eheka arandu, erosapukái arrepentimiento, ejerovia pe Espíriture; 15–22, Eñongatu umi tembiapoukapy, ha eñemoarandu Ñandejára ñeʼẽme; 23–27, Ani renega pe espíritu rrevelasiõ ha profesía rehegua; 28–30, Umi Cristo-pe omog̃uahẽvagui oikóta Tupã raʼy ha rajykuéra.
1 Peteĩ tembiapo tuicha ha hechapyrãva oĩ osẽ hag̃uáicha yvypóra raʼykuéra apytépe.
2 Péina ápe, che haʼe Tupã; ehendu che ñeʼẽ oikove ha ipuʼakapáva, haimbevéva kysepuku haimbejováivagui, oikéva ombojaʼo peve umi kangue joajuha ha karaku; upévare, ehendu che ñeʼẽ.
3 Péina ápe, pe ñu morotĩma ñemonoʼõrã; upévare, máva omonoʼõséva, tomoinge ikysekarapã imbarete reheve, ha tomonoʼõ ára ipuku aja, oñongatu hag̃ua hiʼángape g̃uarã salvasiõ opaveʼỹva Tupã rréinope.
4 Heẽ, oimeraẽva omoingéva ikysekarapã ha omonoʼõva, péva oñehenói Tupãgui.
5 Upévare, pejeruréramo chéve, oñemeʼẽta peẽme; pembotáramo ojepeʼáta peẽme.
6 Koʼág̃a, rejerure haguére, péina ápe, haʼe ndéve, eñongatu umi che rembiapoukapy, ha eñehaʼã emopuʼã ha emombarete Sion káusa.
7 Ani reheka rrikésa ha katu arandu, ha péina ápe, umi Tupã ñemimby ojeikaaukáta ndéve, ha upérõ nderríkota. Péina ápe, pe oguerekóva tekove ijapyraʼỹva irríko.
8 Añetehápe, añetehápe haʼe ndéve, jepe reipotaháicha chehegui, oñemeʼẽta ndéve; ha reipotáramo, nde haʼéta tembipuru rejapo hag̃ua heta mbaʼe porã ko ñemoñareatýpe.
9 Ani remboʼe mbaʼeve ko ñemoñareatýpe, ndahaʼéiramo arrepentimiento. Eñongatu umi cherembiapoukapy, ha eipytyvõ tojejapo che rembiapo, che rembiapoukapýpe oĩháicha, ha rejehovasáta.
10 Péina ápe, reguereko peteĩ don, térã reguerekóta peteĩ don, jerovia reheve chehegui reipotáramo, korasõ ijapuʼỹva reheve, regueroviávo Jesucristo puʼaka, térã che puʼaka oñeʼẽva ndéve;
11 Ha péina ápe, che ningo pe añeʼẽva; péina ápe, che haʼe pe tesape pytũmbýpe omimbíva, ha che pokatu rupive che ameʼẽ ndéve koʼã ñeʼẽ.
12 Ha koʼág̃a, añetehápe, añetehápe, haʼe ndéve, emoĩ nde jerovia pe Espíritu, mbaʼe porã apoukaha—heẽ, ijojáva ojejapo hag̃ua, teko mirĩme ojeiko hag̃ua, tekojojápe ojehusga hag̃ua; ha kóva haʼe che Espíritu.
13 Añetehápe, añetehápe, haʼe ndéve, ameʼẽtaha ndéve che Espíritu-gui, omyesakãtava ne akã ha omyenyhẽtava ne ánga vyʼapavẽgui;
14 Ha upérõ reikuaáta, térã péva rupi reikuaáta, opa mbaʼe chehegui reipotáva, haʼéva tekojoja rehegua, jerovia reheve, chéve chegueroviávo rehupytytaha.
15 Péina ápe, che ajapouka ndéve ani hag̃ua reimoʼã reñehenoiha remboʼe hag̃ua, térã reñehenói peve.
16 Ehaʼarõve sapyʼami, reguereko peve che ñeʼẽ, che ita, che tupao, ha che evanhélio, reikuaaporã hag̃ua che doctrina.
17 Ha upérõ, péina ápe, nde reipotaháicha, heẽ, rejeroviaháicha jepe, ojehúta nendive.
18 Eñongatu che rembiapoukapykuéra; eñemokirirĩ; eheka che Espíritu;
19 Heẽ, ejejoko cherehe ne korasõite guive, reipytyvõ hag̃ua oñeguenohẽ umi mbaʼe oñeñeʼẽhague—heẽ, che rembiapo ñembohasa; ehaʼarõmi rehupyty peve.
20 Péina ápe, kóva haʼe ne rembiaporã, eñongatu che rembiapoukapykuéra, heẽ, opa nde puʼaka, ne akãmegua ha ne mbarete reheve.
21 Ani reñehaʼã remombeʼu che ñeʼẽ, eñehaʼã uvei rehupyty raẽ hag̃ua che ñeʼẽ, ha upérõ, ne kũ ojeráta; ha upéi, reipotáramo, reguerekóta che Espíritu ha che ñeʼẽ, heẽ, Tupã puʼaka reroviauka hag̃ua yvyporakuérape.
22 Ha katu koʼág̃a eñemokirirĩ; eñemoarandu che ñeʼẽme, osẽvaʼekue yvypóra raʼykuéra apytépe, ha eñemoarandu avei che ñeʼe osẽtava yvypóra raʼykuéra apytépe, térã pe koʼág̃a oñembohasáva hina, heẽ, rehupyty peve opa mbaʼe ameʼẽtava yvypóra raʼykuérape ko ñemoñareatýpe, ha upérõ oñemoĩta opa mbaʼe koʼãva ndive.
23 Péina ápe, nde haʼe Hyrum, che raʼy; eheka pe Tupã rréino, ha opa mbaʼe oñemoĩvéta ijojaháicha.
24 Emopuʼã che ita ári, haʼéva upe che evanhélio.
25 Ani renega pe espíritu rrevelasiõ rehegua, ni pe espíritu profesía rehegua, ái pe máva koʼã mbaʼe onegávagui.
26 Upévare, eñongatu ne korasõme, oguahẽ meve ára che arandúpe, resẽvaʼerãha.
27 Péina ápe, añeʼẽ opavavépe ojaposéva iporãva, ha omoingéva ikysekarapã omonoʼõ hag̃ua.
28 Péina ápe, che haʼe Jesucristo, Tupã Raʼy. Che haʼe pe múndo resape ha rekove.
29 Chete pe ajuvaʼekue umi chembaʼévape, ha umi chembaʼéva nachemoguahẽi;
30 Ha katu añetehápe, añetehápe, haʼe ndéve, mayma chemog̃uahẽvape ameʼẽta puʼaka haʼe hag̃ua Tupã raʼy ha rajykuéra, umi che réra ogueroviávape jepe. Amén.