Sección 51
Rrevelasiõ oñemeʼẽvaʼekue José Smith, upe Proféta rupive, Thompson, Ohio-pe, mayo 20, 1831-pe. Umi árape oñepyrũkuri og̃uahẽ Ohio-pe, Santokuéra oúva umi estado Este-gui, ha tekotevẽkuri oñemohenda porã chupekuéra oiko hag̃ua upépe. Ko tembiapo haʼe rupi obispo oficio, obispo Edward Partridge ojerure ñehekomboʼe upéva rehegua, ha Proféta oporandu Ñandejárape.
1–8, Edward Partridge oñehenói oisãmbyhy hag̃ua umi majordomía ha mbaʼerepykuéra; 9–12, Santokuéra oikovaʼerã japuʼỹme ha peteĩchapa ohupytyvaʼerã; 13–15, Haʼekuéra orekovaʼerã peteĩ obispo almasẽ ha omohenda umi mbaʼerepykuéra Ñandejára léipe heʼiháicha; 16–20, Ohio haʼéta peteĩ tenda ñembyatyrã sapyʼami.
1 Pejapysaka cherehe, heʼi Ñandejára pene Tupã, ha Che añeʼẽta che rembiguái Edward Partridge-pe ha ameʼẽta chupe ojapovaʼerã; tekotevẽgui mante haʼẽ ohupyty mbaʼe ojapovaʼerã omohendakuaa hag̃ua ko tavayguakuérape.
2 Tekotevẽgui oñemohenda chupekuéra che leikuérape heʼiháicha; upéichaʼỹro, ojeipeʼáta chupekuéra.
3 Upévare, che rembiguái Edward Partridge ha umi haʼe oiporavoʼakue, umi Che cheroryetévandi, tohechauka ko tavayguakuérape, pehẽngue chupekuéra g̃uarãva, peteĩchapa, mayma tekove hogayguápe oĩháicha, haʼe ikatuháicha ha umi haʼe orekoʼỹva ha oikotevẽháicha.
4 Ha che rembiguái Edward Partridge, ohechauka vove peteĩ tekovépe imbaʼerãva, tomeʼẽ chupe peteĩ kuatiahai chupe g̃uarãite hag̃ua pe imbaʼéva, ikatu hag̃ua oñongatu, héẽ, ko derécho ha jehejapyre tupaópe, ojapyhara peve, ha tupao ñeʼẽpu rupive, ko tupao léi ha konveniokuérape heʼiháicha, ojehecha chupe ndahekojojaveimaha, haʼe hag̃ua tupaogua.
5 Ha ojapyharárõ, ha ndahekojojavéima haʼe hag̃ua tupaogua, ndaikatumoʼãi ojerure umi mbaʼe obispo-pe okonsagravaʼekue, che tupaogua imboriahu ha oikotevẽvape g̃uarã; upévare, ndoguerekomoʼãvéima pe omeʼẽvaʼekue, ha katu oguerekóta derécho pe mbaʼe ohupytyvaʼekue kuatiahai rupive añorente.
6 Ha péicha ojeaseguráta opa mbaʼe, tetã leikuérape heʼiháicha.
7 Ha toñemeʼẽ ko tavayguápe, ko tavaygua mbaʼéva.
8 Ha pirapire hembýva ko tavayguápe—toñehenói peteĩ ahénte ko tavayguakuérape g̃uarã, ojapyhýtava pe pirapire omeʼẽ hag̃ua tembiʼu ha ao, ko tavaygua oikotevẽháicha.
9 Ha opa tekove toiko oñondive japuʼỹme, ha tapeteĩchapa hikuái ko tavaygua apytépe, ha peteĩchapa tohupyty, peñemopeteĩ hag̃ua, jepeve Che amanda haguéicha peẽme.
10 Ha ani peheja ojeipeʼa ko tavayguágui imbaʼéva ha oñemeʼẽ ambue tupaoguápe.
11 Upévare, ambue tupao oipotárõ pirapire ko tupaógui, tohepymeʼẽ jey hikuái ko tupaópe oñomongeta haguéicha;
12 Ha kóva ojejapóta pe obispo térã pe ahénte rupive, oñehenóitava tupao ñeʼẽpu rupive.
13 Ha avei, tomoĩ upe obispo peteĩ almasẽ ko tupaópe; ha toñeñongatu obispo pópe opa mbaʼe, pirapire ha hiʼupy, hetavéva ko tavayguakuéra oikotevẽvagui.
14 Ha toheja avei ijupe g̃uarã pe haʼe oikotevẽháicha, ha hogayguakuéra oikotevẽháicha, ombaʼapo aja ko tembiapópe.
15 Ha péicha Che ameʼẽ mbaʼeporã ko tavayguápe oñemohenda hag̃ua che leikuérape heʼiháicha.
16 Ha Che akonsagra chupekuéra g̃uarã ko tetã ára mbyky aja, Che, Ñandejára, haʼe peve ambuéicha, ha amanda chupekuéra tosẽ koʼágui;
17 Ha noñemeʼẽi chupekuéra aravo ni ára; upévare, topyta hikuái ko tetãme oikotaramoguáicha ipype heta ary, ha upéva ouporãta chupekuéra.
18 Péina ápe, kóva haʼéta techaukarã ramo che rembiguái Edward Partridge-pe ambue tendápe g̃uarã, opa tupaópe.
19 Ha pe ojejuhúva majordómo ijeroviarekóva, hekojoja ha añarandúva, oikéta Iñandejára vyʼapavẽme, ha ohupytýta jehejapyre ramo tekove ijapyraʼỹva.
20 Añetehápe, Che haʼe peẽme, Che haʼe Jesucristo, pyaʼe ajúva, aravo pehaʼarõʼỹvape. Taupéicha. Amén.