Sección 75
Rrevelasiõ oñemeʼẽvaʼekue José Smith upe Proféta rupive, Amherst, Ohio-pe, enero 25, 1832-pe. Ko sección oreko mokõi rrevelasiõ ojueheguaʼỹva (peteĩha oho umi versículo 1 guive 22 peve, ha mokõiháva, umi versículo 23 guive 36 peve), oñemeʼẽʼakue peteĩ diápe. Upe ára haʼékuri peteĩ conferencia, José Smith oñesostene ha oñeordenahague Sumo Sacerdocio Presidente ramo. Oĩkuri elder-kuéra oikuaasevéa hembiaporãnguéra upe javeguáre. Hapykuéri oúkuri koʼã rrevelasiõ.
1–5, Elder-kuéra ijeroviarekóva omboʼéva evanhélio ohupytýta tekove ijapyraʼỹva; 6–12, Peñemboʼe pemog̃uahẽ hag̃ua Moangapyhyhára, omboʼéva opa mbaʼe; 13–22, Elder-kuéra ohusgáta umi imensáhe ombotovévape; 23–36, Umi misionero rogayguakuéra ohupytyvaʼerã pytyvõ Tupaógui.
1 Añetehápe, añetehápe, Che haʼe peẽme, Che, pe añeʼẽva che Espíritu ñeʼẽpu rupive, jepeve Alfa ha Omega, pene Ñandejára ha pende Tupã—
2 Pejapysaka, O peẽ, pemeʼẽvaʼekue umi pende réra pesẽ hag̃ua pemomarandu che evanhélio; ha pehakãʼo che víña.
3 Péina ápe, Che haʼe peẽme, haʼeha che rembipota tapesẽ ha ani pembotapykue, ani hag̃ua peime rei, ha katu pembaʼapo penembarete reheve—
4 Pemopuʼãvo umi pene ñeʼẽpu turu pupeguáicha, pemomarandúvo añetegua, umi rrevelasiõ ha tembiapoukapy, Che ameʼẽvaʼekue peẽmepe heʼiháicha.
5 Ha péicha, pende jeroviarekóramo, oñemyengoviáta peẽme heta monoʼõmbyrekuéra reheve, ha peñekoronáta terakuaporã, ha glória, ha ñemanoveʼỹ ha tekove ijapyraʼỹva reheve.
6 Upévare, añetehápe Che haʼe ndéve, che rembiguái William E. McLellin, Che aipeʼa komisiõ ameʼẽvaʼekue chupe oho hag̃ua umi tenda kuarahyresẽmeguápe;
7 Ha Che ameʼẽ chupe peteĩ misiõ pyahu ha peteĩ tembiapoukapy pyahu, ha upévape, Che, Ñandejára, ajaʼo chupe ikorasõ guyguýre;
8 Ha iñangaipákuri; upevére, Che aperdona chupe ha haʼe jey chupe, Tereho umi tenda sur-guápe.
9 Ha toho hendive che rembiguái Luke Johnson, ha tomomarandu umi mbaʼe Che amandavaʼekue chupekuéra—
10 Ohenóivo Moangapyhyhára Ñandejára rérape, omboʼétava chupekuéra opa mbaʼe oikotevẽva—
11 Akóinte oñemboʼévo ani hag̃ua hoʼa hikuái; ha kóva ojapóramo, Che aiméta hendivekuéra, jepe ipaha peve.
12 Péina ápe, kóva haʼe Ñandejára ñande Tupã rembipota penderehegua. Taupéicha. Amén.
13 Ha avei, añetehápe péicha heʼi Ñandejára, tojeʼói che rembiguái Orson Hyde ha che rembiguái Samuel H. Smith umi tenda kuarahyresẽmegua gotyo, ha tomomarandu umi mbaʼe Che amandavaʼekue chupekuéra; ha ijeroviarekóramo hikuái, péina ápe, Che aiméta hendivekuéra, jepe ipaha peve.
14 Ha avei, añetehápe Che haʼe che rembiguái Lyman Johnson-pe, ha che rembiguái Orson Pratt-pe, ojeʼói hag̃ua avei hikuái umi tenda Kuarahyresẽmegua gotyo; ha péina ápe, upéicha, Che aime avei hendivekuéra, jepeve ipaha peve.
15 Ha avei, Che haʼe che rembiguái Asa Dodds-pe, ha che rembiguái Calves Wilson-pe, ojeʼói hag̃ua avei hikuái umi tenda kuarahyreiképe, ha tomomarandu che evanhélio, jepe Che amanda haguéicha chupekuéra.
16 Ha pe ijeroviarekóva ogueropuʼakáta opa mbaʼe, ha oñemopuʼãta ára pahápe.
17 Ha avei, Che haʼe che rembiguái Major N. Ashley-pe, ha che rembiguái Burr Riggs-pe, tojeʼói avei hikuái sur renda gotyo.
18 Héẽ, tojeʼói opa koʼãva, Che amanda haguéicha chupekuéra, ohóvo peteĩ ógagui ambue ógape, ha peteĩ víllagui ambue víllape, ha peteĩ tavaguasúgui ambue tavaguasúpe.
19 Ha oimeraẽ óga peikehápe, ha penemog̃uahẽ hikuái, peheja pende jehovasa upe ógape.
20 Ha oimeraẽ óga peikehápe, ha napenemog̃uahẽi hikuái, pyaʼe pesẽta upe ógagui, ha peityvyróta pe yvytimbo pende pýgui, testimónio ramo hesekuéra.
21 Ha penerenyhẽta tory ha vyʼágui; ha peikuaa kóva, pe huísio árape, peẽ haʼéta upe óga hue, ha pekondenáta chupekuéra;
22 Ha ivevyivéta pagánope g̃uarã huísio árape, upe ógape g̃uarãgui; upévare, pejekuʼa jokua ha pendejeroviareko, ha pegueropuʼakáta opa mbaʼe, ha peñemopuʼãta ára pahápe. Taupéicha. Amén.
23 Ha avei, péicha heʼi peẽme Ñandejára, O che tupaogua elder-kuéra, pemeʼẽʼakue pende réra peikuaa hag̃ua hembipota penderehegua—
24 Péina ápe, Che haʼe peẽme, tupao rembiaporã haʼeha oipytyvõ hag̃ua oñangareko koʼãva rogayguakuérare, ha avei oñangareko hag̃ua umi oñehenóiva ha oñembouvaʼerã múndore omomarandu hag̃ua evanhélio múndope rogaykuakuérare.
25 Upévare, Che, Ñandejára, ameʼẽ peẽme ko tembiapoukapy, pehupyty hag̃ua tenda pende rogayguakuérape g̃uarã, pende joykeʼykuéra ikatuha peve omohuʼũ ikorasõkuéra.
26 Ha opa ikatúva ohupyty umi tenda hogayguakuérape g̃uarã, ha tupao pytyvõ chupekuéra g̃uarã, ani peheja múndore jeho, tahaʼe kuarahyresẽ gotyo térã kuarahyreike gotyo, norte térã sur gotyo.
27 Pejerure ha oñemeʼẽta peẽme, pembota ha ojepeʼáta peẽme, ha ojeikaaukáta peẽme yvatégui, jepe Moangapyhyhára rupive, moõpa pehovaʼerã.
28 Ha avei, añetehápe Che haʼe peẽme, opa kuimbaʼe orekóva obligasiõ omantene hag̃ua hogayguakuéra, tomeʼẽ, ha mbaʼevéicharõ ndopytamoʼãi ikorónaʼỹre; ha tombaʼapo tupaópe.
29 Mayma kuimbaʼe tojesareko opa mbaʼépe. Ha pe hekoreíva ndoguerekomoʼãi hendag̃ua tupaópe, ndahaʼéirõ oñearrepenti ha omyatyrõ umi ijepokuaa.
30 Upévare, tojoaju ministériope che rembiguaikuéra Simeon Carter ha Emer Harris;
31 Ha avei che rembiguái Ezra Thayse, ha che rembiguái Thomas B. Marsh;
32 Avei che rembiguái Hyrum Smith, ha che rembiguái Reynolds Cahoon;
33 Avei che rembiguái Daniel Stanton, ha che rembiguái Seymour Brunson;
34 Ha avei che rembiguái Sylvester Smith, ha che rembiguái Gideon Carter;
35 Ha avei che rembiguái Ruggles Eames, ha che rembiguái Stephen Burnett;
36 Ha avei che rembiguái Micah B. Welton, ha avei che rembiguái Eden Smith. Taupéicha. Amén.