Sección 52
Rrevelasiõ oñemeʼẽvaʼekue José Smith, upe Proféta rupive, Tupaogua elder-kuérape, Kirtland, Ohio-pe, junio 06, 1831-pe. Ojejapókuri peteĩ Conferencia Kirtland-pe, oñepyrũvaʼekue junio 3-pe ha opa ára 6-pe. Upe conferencia-pe, ojejapókuri peteĩha ordenansakuéra sumo sacerdote oficio-guávape, ha ojehechakuaákuri ha ojehavirákuri umi espíritu japu ha oporombotavýva rechaukakuéra.
1–2, Ojeʼe ojejapotaha ambue conferencia Misuri-pe; 3–8, Oñehenói elder-kuéra ojeʼói hag̃ua oñondive; 9–11, Elder-kuéra omboʼevaʼerã apóstol ha profetakuéra ohaivaʼekue; 12–21, Umi Espíritu rehe ojehesapéva ohechauka ñemomorã ha arandu; 22–44, Oñehenói heta elder-kuérape omboʼe hag̃ua evanhélio ojeʼói aja Misuri-pe oho hag̃ua conferencia-hápe.
1 Péina ápe, péicha heʼi Ñandejára elder-kuéra ohenoiʼakue ha oiporavo koʼã ára pahápe, Ijespíritu ñeʼẽpu rupive—
2 Heʼívo: Che, Ñandejára, aikuaaukáta peẽme mbaʼépa aipota pejapo koʼág̃a guive ambue conferencia peve, oikótava Misuri-pe, pe yvy Che akonsagrátava ári che tavayguakuérape g̃uarã, haʼéva peteĩ Jacob rembyre, ha umi ohupytýtava ijehejapyre konvénio rupi.
3 Upévare, añetehápe Che haʼe peẽme, tojeʼói che rembiguaikuéra José Smith, upe taʼýra ha Sidney Rigdon, oñembosakoʼipa vovénte hógagui osẽ hag̃ua, ha toho Misuri retã gotyo.
4 Ha ijeroviarekóramo chendive, ojeikuaaukáta chupekuéra mbaʼépa ojapovaʼerã.
5 Ha avei, ijeroviarekóramo hikuái, ojeikaaukáta chupekuéra pende yvy jehejapyrerã.
6 Ha ndaijeroviarekóiramo hikuái, ojepeʼáta chupekuéra, jepeve Che aipotaháicha, ha chéve oĩporãháicha.
7 Ha avei, añetehápe Che haʼe peẽme, pyaʼe tojeʼói che rembiguái Lyman Wight ha che rembiguái John Corrill;
8 Ha tojeʼói avei che rembiguái John Murdock, ha che rembiguái Hyrum Smith upéva upe tenda gotyo, ohóvo Detroit rupi.
9 Ha tojeʼói hikuái upe guive, omboʼévo pe ñeʼẽ tapére, heʼívo umi mbaʼe proféta ha apostolkuéra ohaivaʼekue añónte, ha umi mbaʼe pe Moangapyhyhára omboʼéva chupekuéra ñemboʼe jerovia rupive.
10 Ha toho hikuái mokõi mokõi, ha péicha tomboʼe hikuái tapére opa atýpe, oporomongaraívo ýpe, ha okã ári po ñemoĩme upe y rembeʼýpe.
11 Péicha heʼígui Ñandejára, Che amombykýta che rembiapo tekojojápe, oúgui ára Che amboutaha huísio ojehupyty peve jegueropuʼaka.
12 Ha tojesarekóke che rembiguái Lyman Wight, Satana oityvyroségui chupe avatimirĩ pirekue yrupẽmeguáicha.
13 Ha péina ápe, pe ijeroviarekóva oñemoĩta sãmbyhyháramo heta mbaʼe ári.
14 Ha avei, Che ameʼẽta peẽme peteĩ apoukapy opa mbaʼépe, ani hag̃ua avave penembotavy; Satana oikógui yvy ári, ombotavývo tetãnguérape—
15 Upévare, pe oñemboʼéva, ijespíritu oñembyasýva, upévape che amboaje, iñeʼẽrendúrõ che ordenansakuérare.
16 Pe oñeʼẽva, ijespíritu oñembyasýva, imirĩva iñeʼẽme ha oporomopuʼãva, upéva haʼe Tupã ndivegua, iñeʼẽrendúrõ che ordenansakuérare.
17 Ha avei, che pokatu guýpe oryrýiva oñemombaretéta, ha ohechaukáta ñemomorã ha arandu, umi rrevelasiõ ha añetegua Che ameʼẽ haguéicha peẽme.
18 Ha avei, pe oĩva ipoguýpe ha ndahiʼa porãiva, jepe ko ojehechaukaháicha, ndahaʼéi chembaʼe.
19 Upévare, ko apoukapy rupive pehechakuaáta umi espíritu opa hendáicha, opa yvága guýpe.
20 Ha umi ára og̃uahẽma; tekovekuéra ojeroviaháicha, péicha ojejapóta chupekuéra.
21 Péina ápe, ko tembiapoukapy oñemeʼẽ opa elder-kuéra Che aiporavovaʼekuépe.
22 Ha avei, añetehápe Che haʼe peẽme, tojeʼói avei che rembiguái Thomas B. Marsh ha che rembiguái Ezra Thayre upéva upe tetã gotyo, omboʼévo tapére upe ñeʼẽ.
23 Ha avei, tojeʼói che rembiguái Isaac Morley ha che rembiguái Ezra Booth upéva upe tetã gotyo, omboʼévo avei tapére upe ñeʼẽ.
24 Ha avei, tojeʼói che rembiguaikuéra Edward Partridge ha Martin Harris, che rembiguaikuéra Sidney Rigdon ha José Smith, upe taʼýra ndive.
25 Ha tojeʼói avei che rembiguaikuéra David Whitmer ha Harvey Whitlock upéva upe tetã gotyo, ha tomboʼe tapére.
26 Ha tojeʼói che rembiguaikuéra Parley P. Pratt ha Orson Pratt, jepeve upéva upe tetã gotyo, ha tomboʼe tapére.
27 Ha che rembiguaikuéra Solomon Hancock ha Simeon Carter tojeʼói avei upéva upe tetã gotyo, ha tomboʼe tapére.
28 Tojeʼói avei che rembiguaikuéra Edson Fuller ha Jacob Scott.
29 Tojeʼói avei che rembiguaikuéra Levi W. Hancock ha Zebedee Coltrin.
30 Ha che rembiguaikuéra Reynolds Cahoon ha Samuel H. Smith tojeʼói avei.
31 Tojeʼói avei che rembiguaikuéra Wheeler Baldwin ha William Carter.
32 Ha toñeordena mokõive che rembiguaikuéra, Newel Knight ha Selah J. Griffin, ha tojeʼói avei hikuái.
33 Héẽ, añetehápe Che haʼe, tojeʼói opavave koʼãva upe tenda gotyo, opáichagua tapére, ha peteĩ kuimbaʼe nomopuʼãmoʼãi ambuéva pyenda ári, ni ndoguatamoʼãi hapicha rapére.
34 Ha pe ijeroviarekóva oñemoʼãta ha ojehovasáta heta hiʼa reheve.
35 Ha avei, Che haʼe peẽme, tojeʼói che rembiguaikuéra Joseph Wakefield ha Solomon Humphrey, kuarahyresẽmegua tetãnguéra gotyo;
36 Tombaʼapo hikuái hogayguakuéra apytépe, omombeʼuʼỹre mbaʼeve, ndahaʼéirõ umi proféta ha apóstol-kuéra mbaʼéva, umi haʼekuéra ohecha ha ohenduvaʼekue ha oguerovia añetéva, profesiakuéra oñekumpli hag̃ua.
37 Ojapyhara haguére, tojepeʼa Heman Basset-gui pe oñemeʼẽvaʼekue chupe, ha toñemeʼẽ Simonds Ryder-pe.
38 Ha avei, añetehápe Che haʼe peẽme, toñeʼordena presbítero ramo Jared Carter ha George James-pe.
39 Elder-kuéra opytáva toñangareko tupaóre, ha tomombeʼu upe ñeʼẽ umi tenda ijerereguápe; ha tombaʼapo hikuái ipópe, ani hag̃ua ojejapo taʼangarayhu ni tekoñaña.
40 Ha penemanduʼáke opa mbaʼépe umi imboriahu ha oikotevẽvare, umi hasy ha ohasaʼasývare, upe ndojapóiva koʼã mbaʼe, upéva ndahaʼéi che discípulo.
41 Ha avei, togueraha hendivekuéra che rembiguaikuéra José Smith, upe taʼýra, ha Sidney Rigdon ha Edward Partridge, peteĩ rrekomendasiõ tupaógui. Ha toñemeʼẽ avei peteĩ, che rembiguái Oliver Cowdery-pe g̃uarã.
42 Ha péicha, jepe Che haʼe haguéicha, pende jeroviarekóramo, peñembyatýta pevyʼa hag̃ua Misuri retãme, haʼéva pende yvy jehejapyre, koʼág̃a haʼéva umi pende rayhuʼỹva retã.
43 Ha katu, péina ápe, Che, Ñandejára, ambopyaʼéta upe táva ñemopuʼã hiʼárape, ha arokonáta umi ijeroviarekóvape, vyʼapavẽ ha vyʼa reheve.
44 Péina ápe, Che haʼe Jesucristo, Tupã Raʼy, ha Che amopuʼãta chupekuéra ára pahápe. Taupéicha. Amén.