1 Peteĩ tembiapo tuicha ha hechapyrãva oĩ osẽ hag̃uáicha yvypóra raʼykuéra apytépe.

2 Péina ápe, che haʼe Tupã; ehendu che ñeʼẽ, oikove ha ipuʼakáva, haimbevéva kysepuku haimbejováivagui, ombojaʼóva kangue joajuha ha karaku; upévare, ehendu che ñeʼẽnguéra.

3 Péina ápe, pe ñu morotĩma ñemonoʼõrã; upévare, máva omonoʼõséva, tomoinge ikysekarapã imbarete reheve, ha tomonoʼõ ára puku aja, oñongatu hag̃ua hiʼángape g̃uarã salvasiõ opaʼỹva Tupã rréinope.

4 Heẽ, oimeraẽva omoingéva ikysekarapã ha omonoʼõ, péva oñehenói Tupãgui.

5 Upévare, pejeruréramo chéve, oñemeʼẽta peẽme; pembotáramo ojepeʼáta peẽme.

6 Koʼág̃a, pejerurégui, péina ápe, che haʼe peẽme, peñongatu umi che rembiapoukapy, ha peñehaʼã pemopuʼã ha pemombarete Sion káusa.

7 Ani peheka rrikésa ha katu arandu, ha péina ápe, umi Tupã ñemimby ojeikuaaukáta peẽme, ha upérõ pende rríkota. Péina ápe, irríko pe oguerekóva tekove ijapyraʼỹva.

8 Añehápe, añetehápe haʼe ndéve, chehegui reipotaháicha jepe oñemeʼẽta ndéve; ha reipotáramo, haʼéta tembiporu ejapo hag̃ua heta mbaʼe porã ko ñemoñareatýpe.

9 Ani remboʼe mbaʼeve ko ñemoñareatýpe ndahaʼéirõ arrepentimiento; eñongatu umi che rembiapoukapy, ha eipytyvõ tosẽ tesakãme che rembiapo, che rembiapoukapýpe oĩháicha, ha rejehovasáta.

10 Péina ápe, reguereko peteĩ don, ha rejehovasapyre ne don rupive. Nemanduʼáke imarangatu ha yvatégui ouha—

11 Ha reporandúramo, reikuaáta ñemimby tuicha ha hechapyrãva; upévare, reiporúta ne don rejuhu hag̃ua umi ñemimby, hetápe reikuaauka hag̃ua pe añetegua, heẽ, regueroviauka hag̃ua chupekuéra umi hape oĩvaívagui.

12 Ani reikuaauka ne don avavépe, ỹramo umi nde fe reheguápe. Ani remombaʼeʼi umi mbaʼe imarangatúva.

13 Rejapóramo pe iporãva, heẽ, ha ndejeroviapy meme ipahaite peve, rejesalváta Tupã rréinope, haʼéva opa Tupã don-gui pe tuichaitéva; ndaipórigui don tuichavéva pe salvasiõ don-gui.

14 Añetehápe, añetehápe che haʼe ndéve, rejehovasapyre nde pe rejapovaʼekuére; reporandúgui chéve, ha péina ápe, opa ára reporandu jave, oñemeʼẽvaʼekue ndéve ñemoarandu che Espíritu-gui. Ndaupéichai rire, nereg̃uahẽivaʼerãmoʼã tenda ko ára reiháme.

15 Péina ápe, nde reikuaa reporanduhague chéve ha che amyesakã ne akãmegua; ha koʼág̃a che haʼe ndéve koʼã mbaʼe reikuaa hag̃ua reñemysakãhague pe añetegua Espíritu-re;

16 Heẽ, che haʼe ndéve, reikuaa hag̃ua ndaiporiha oikuaáva umi neremiandu ha nekorasõ oipotáva, ndahaʼéiramo Tupã.

17 Che haʼe ndéve koʼã mbaʼe testimónio ramo ndéve g̃uarã—umi ñeʼẽ ha tembiapo rehaivaʼekue hína añeteguaha.

18 Upévare, ejesarekóke; eipytyvõ che rembiguái José, jeroviarekópe, oimeraẽ jejopy vai ojejuhúvape upe ñeʼẽ rupi.

19 Eñemoñeʼẽ chupe ojavy jave, ha emog̃uahẽ avei ñemoñeʼẽ chugui. Ndepyʼaguapy; ne akãguapy; nderekoporã; ereguereko pyʼaguapy, fe, ñehaʼarõkuaa ha karida.

20 Péina ápe, nde haʼe Oliver, ha añeʼẽ ndéve potapy reguerekóva rupi; upévare, eñongatu mbaʼerepýicha koʼã ñeʼẽ ne korasõme. Ejeroviarekóke ha ejesareko eñongatúvo Tupã rembiapoukapykuéra, ha roañuãta che mborayhu jyvápe.

21 Péina ápe, che haʼe Jesucristo, Tupã Raʼy. Chete ningo pe ajuvaʼekue umi che mbaʼévape, ha umi chembaʼéva nachemog̃uahẽi. Che haʼe pe tesape omimbíva pytũmbýpe, ha umi pytũmby ndaipuʼakái hese.

22 Añetehápe, añetehápe, haʼe ndéve, eipotavéramo testimónio, epensa upe pyharére ejerureʼasýrõ guare ne korasõme, reikuaa hag̃ua pe añetegua koʼã mbaʼe rehegua.

23 Nañeʼẽi piko pyʼaguapy ne akãme upe mbaʼére? Mbaʼe testimónio tuichavéva ikatu reguereko Tupãgui?

24 Ha koʼág̃a, péina ápe, rehupytýkuri peteĩ testimónio; ha haʼégui ndéve umi mbaʼe avave oikuaaʼỹva, nderehupytýi piko péicharõ peteĩ testimónio?

25 Ha, péina ápe, reipotáramo chehegui, ameʼẽta ndéve peteĩ don, rembohasa hag̃ua, che rembiguái Joséicha jepeve.

26 Añetehápe, añetehápe, haʼe ndéve, oĩ umi jehaipyre oguerekóva heta che evanhélio rehegua, ojejokovaʼekue tavayguakuéra rembiapoaña rupi;

27 Ha koʼág̃a haʼe ndéve rejapo hag̃ua, nerembipota porãramo—rembyatyséramo umi mbaʼehepy ndejupe g̃uarã yvágape—upéicharõ reipytyvõta, ne don reheve, osẽ hag̃ua tesakãme umi che escritura pehẽngue oñeñomivaʼekue tembiapovai rupi.

28 Ha koʼág̃a, péina ápe, ameʼẽ peẽme, ha che rembiguái José-pe avei, ko don llavekuéra, oguenohẽtava tesakãme ko ministério; ha mokõi térã mbohapy testígo juru rupi, oñemoĩta opa ñeʼẽ.

29 Añetehápe, añetehápe, haʼe peẽme, ombotovéramo hikuái che ñeʼẽnguéra ha ko che evanhélio ha ministério pehẽngue, pejehovasapyre, ndaikatúigui haʼekuéra ojapove penderehe, cherehe ojapovaʼekuégui.

30 Ha ojapóramo jepe penderehe cherehe ojapo haguéicha, pejehovasapyre, peikótagui chendive glóriape.

31 Ha katu nombotovéiramo hikuái umi che ñeʼẽ oñemoĩtava testimónio oñemeʼẽtava rupive, ojehovasapyre hikuái, ha upéramo, peguerekóta vyʼapavẽ umi penerembiapokuére.

32 Añetehápe, añetehápe, che haʼe peẽme, haʼe haguéicha che discípulo-kuérape, oĩháme mokõi térã mbohapy ijatýva che rérape, peteĩ mbaʼére, péina ápe, aiméta che imbytepekuéra—penembytépe che aimeháicha.

33 Ani pekyhyje, che raʼykuéra, pejapo hag̃ua iporãva, tahaʼe haʼe peñemitỹva, upévaite pemonoʼõtagui. Upévare, peñotỹramo iporãva, pemonoʼõta avei iporãva penerepymeʼẽrã.

34 Upévare, ani pekyhyje, ovechaʼatymi; pejapo iporãva; pe yvy ha añaretã ojoajúramo jepe oñemoĩ hag̃ua pende rehe, oiméramo pemopuʼã che itaguasu ári, ndaipuʼakamoʼãi pende rehe.

35 Péina ápe, napokondenái; tapeho ha anive peñemoangaipa; pejapo hekópe pe tembiapo che amandavaʼekue peẽme.

36 Pemaʼẽ cherehe opa temiandúpe; ani pendepyʼaheta, ani pekyhyje.

37 Pemaʼẽ umi jekutu che yke oikytĩvaʼekue, ha avei umi klávo rendague che po ha che pýpe; pejerovia, peñongatu che rembiapoukapykuéra, ha oñemeʼẽta peẽme yvága rréino. Amén.