Sección 17
Rrevelasiõ oñemeʼẽvaʼekue José Smith, pe Proféta rupive, Oliver Cowdery, David Whitmer ha Martin Harris-pe, Fayette, Nueva York, Junio 1829-pe, ohecha mboyve hikuái umi planchapegua jehai, oguerekóva Mormón Kuatiañeʼẽ jehaipyre. José ha pe chupe g̃uarã ohaíva, Oliver Cowdery, oikuaákuri, Mormón Kuatiañeʼẽ pláncha ñembohasa rupi, oñemoĩtaha mbohapy testígo ijojahaʼỹva. (tojehecha Éter 5:2–4; 2 Nefi 11:3; 27:12). Oliver Cowdery, David Whitmer, ha Martin Harris oñeñandu inspirádo haʼe hag̃ua umi mbohapy testígo ijojahaʼỹva. Proféta oporandu Ñandejárape, ha oñemeʼẽ ko rrevelasiõ, ñembohovái ramo, Urim ha Tumim rupive.
1–4, Jerovia rupive, umi Mbohapy Testígo ohecháta umi plancha ha ambue mbaʼe imarangatúva; 5–9, Cristo omeʼẽ testimónio Mormón Kuatiañeʼẽ idivinoha.
1 Péina ápe, haʼe peẽme pejeroviavaʼerã che ñeʼẽre, ha pejapóramo korasõ añete reheve, pehecháta umi pláncha, ha avei pe pytiʼamoʼãha, pe Labán kysepuku, upe Urim ha Tumim oñemeʼẽvaʼekue upe yvytýpe Jared joykeʼýpe, haʼe oñeʼẽrõ guare ojohováre Ñandejára ndive, ha umi sambyhyha milagróso oñemeʼẽvaʼekue Lehi-pe oĩ aja taveʼỹme, Mar Rojo jere rembeʼýpe.
2 Ha jerovia peguerekóva rupive ojehejáta peẽme pehecha umíva, jepeve jerovia oguerekovaʼekue profetakuéra ymaguare rupive.
3 Ha pehupyty rire upe jerovia, ha pehecha rire pende resa reheve, petestifikáta umívare, Tupã puʼaka rupive.
4 Ha péva pejapóta che rembiaguái, José Smith, pe taʼýra, ani hag̃ua oñehundi, ajapo hag̃ua ko tembiapópe umi che propósito ijojáva yvypóra raʼykuérape g̃uarã.
5 Ha petestifikáta pehechahague, che rembiguái José Smith, pe taʼýra, ohecha haguéicha jepe; che puʼaka rupive haʼe ohechágui umíva, ha oguereko rupi jerovia.
6 Ha ombohasákuri pe kuatiañeʼẽ, pe pehẽngue che amandavaʼekue chupe jepe, ha oikoveháicha pene Ñandejára ha pene Tupã haʼe añetegua.
7 Upévare, peẽme oñemeʼẽkuri upéichagua puʼaka, upéichagua jerovia, ha upéichagua don chupe oñemeʼẽvaʼekue;
8 Ha pejapóramo koʼã che rembiapoukapy paha, ameʼẽvaʼekue peẽme, umi añaretã rokẽ ndaʼipuʼakamoʼãi penderehe; che grásia iporãntema haguére peẽme g̃uarã, ha peñemopuʼãta pe ára pahápe.
9 Ha che, Jesucristo, pene Ñandejára ha pene Tupã, añeʼẽkuri peẽme, ikatu hag̃ua ajapo umi che propósito ijojáva yvypóra raʼykuéra ndive g̃uarã. Amén.