Sección 74
Rrevelasiõ oñemeʼẽvaʼekue José Smith upe Profétape, Wayne kondádo, Nueva York-pe, 1830 ramo. Jepeve Tupao oñemohenda mboyve, oĩkuri porandu mbaʼéichapa oĩ porã ojejapo ñemongarai, ha upéva rupi, Proféta oporandu upe mbaʼe rehegua. José Smith rembiasakuépe ojeʼe, ko rrevelasiõ haʼeha peteĩ ñemyesakã 1 Corintios 7:14-gui, peteĩ escritura pasáhe pyʼỹi ojeporuʼakue ojehustifika hag̃ua umi mitã michĩ ñemongarai.
1–5, Pablo oñemoñeʼẽ Tupao hiʼaraguápe ani hag̃ua ojapo Moisés léi; 6–7, Mitã michĩva imarangatu ha oñesantifika Expiasiõ rupive.
1 Pe ména ogueroviaʼỹva oñesantifika hembireko rupive, ha pe kuña ogueroviaʼỹva oñesantifika iména rupive; upeichaʼỹrõ, pene mitãkuéra naipotĩrivaʼerãmoʼãi, koʼág̃a katu sántoma hikuái.
2 Koʼág̃a, apóstol-kuéra árape, oñeñongatuʼakue sirkunsisiõ léi, mayma hudiokuéra ogueroviaʼỹva Jesucristo evanhélio apytépe.
3 Ha ojehúkuri oiko tuicha joavy tavayguakuéra apytépe, sirkunsisiõ léire, pe ména ogueroviaʼỹva oipotágui imitãkuéra oñesirkunsida, ha toñongatu Moisés léi, oñekumplimaʼakue.
4 Ha ojehúkuri umi mitã, oñemongakuaávo Moisés léi ñeñongatu guýpe, ojereraha ituvakuéra jepokuaaháre, ha ndogueroviái Cristo evanhélio, ha upéva rupi naimarangatúi hikuái.
5 Upévare, kóva rupi pe apóstol ohaiʼakue tupaoguakuérape, omeʼẽvo chupekuéra peteĩ tembiapoukapy, ndahaʼéi Ñandejáragui, ha katu ijehegui, pe ogueroviáva ani hag̃ua ojoaju peteĩ ogueroviaʼỹvare; ndahaʼéiramo oñembopa Moisés léi ijapytepekuéra.
6 Imitãkuéra opyta hag̃ua oñesirkunsidaʼỹre; ha oñembopa hag̃ua jepokuaaha heʼíva, umi mitã michĩ naimarangatuiha; oĩguikuri umíva hudiokuéra apytépe;
7 Ha katu umi mitã michĩva haʼe sánto, oñesantifikágui Jesucristo expiasiõ rupive; ha kóva haʼe umi escritura heʼiséva.