Sección 9
Rrevelasiõ oñemeʼẽvaʼekue José Smith, pe Proféta rupive, Oliver Cowdery-pe, Harmony, Pensilvania, Abril 1829-pe. Oñeñemoñeʼẽ Oliver-pe ipyʼaguapy hag̃ua ha oñemokyreʼỹ chupe ovyʼa hag̃ua ohaívo, sapyʼami, pe mbohasahára heʼíva chupe, oñehaʼã rãngue ombohasa.
1–6, Oñembohasavaʼerã gueteri ambue jehaipyre yma; 7–14, Mormón Kuatiañeʼẽ oñembohasa ñemoarandu ha konfirmasiõ espiritual rupive.
1 Péina ápe, che haʼe ndéve, che raʼy, nerembohasái haguére pe chehegui reipota haguéicha, ha reñepyrũ jeýgui rehai che rembiguái José Smith, pe taʼýrape g̃uarã, péicha jepeve aipota rejapo meme, rejapopa peve ko jehaipyre chupe ameʼẽvaʼekue.
2 Ha upérõ, péina ápe, ameʼẽta ndéve puʼaka reipytyvõ hag̃ua toñembohasa ambue jehaipyre arekóva.
3 Ehaʼarõkuaáke, che raʼy, haʼégui che arandúpe, ha naiporãi nde rembohasa koʼág̃aite.
4 Péina ápe, tembiapo reñehenóivape haʼe rehai hag̃ua che rembiguái José-pe g̃uarã.
5 Ha péina ápe, nderejapo meméigui reñepyrũrõguaréicha, rembohasa ypyrõguare, aipeʼákuri ndehegui ko priviléhio.
6 Aníke rekaguai, che raʼy, haʼégui che arandúpe péicha ajapohague nendive.
7 Péina ápe, nereikũmbýikuri; reimoʼãkuri che ameʼẽtaha ndéve, ha nerepensái ndahaʼéiramo rejerurénte hag̃ua chéve.
8 Ha katu, péina ápe, haʼe ndéve, ejepyʼamongetavaʼerã hese ne akãme; upérõ eporanduvaʼerã chéve oĩ porãpa, ha oĩ porãrõ, ambyaku asýta ndepytiʼa ndepype; upévare, reñandúta oĩ porãha.
9 Ha noĩporãirõ katu, nereñandumoʼãi upéva, oúta katu peteĩ akã apañuãi nembyesaráitava upe oĩvaíva; upévare, ndakatúi rehai pe imarangatúva ndahaʼéiramo oñemeʼẽ ndéve chehegui.
10 Koʼág̃a, reikuaárire kóva, ikatútakuri embohasa; upevére, naiporãi embohasa koʼág̃a.
11 Péina ápe, reñepyrũrõguare oĩporãkuri; ha katu rejyhyje, ha pe ára ohasáma, ha koʼág̃a naiporãvéima.
12 Ha, nderehechái piko ameʼẽhague che rembiguái José-pe heta mbarete ha péicha rupi koʼãva oñembojoja? Ha avave peẽme napokondenái.
13 Ejapo ko mbaʼe amandavaʼekue ndéve, ha reñakarapuʼãta. Ndejeroviarekóke, ha ani reʼa jeipyʼaraʼãme.
14 Epyta ñemovaʼỹme tembiapo rohenói haguépe, ha ni peteĩ ne akãrague nokañymoʼãi, ha reñemopuʼãta ára pahápe. Amén.