Sección 77
Rrevelasiõ oñemeʼẽvaʼekue José Smith, upe Profétape, Hiram, Ohio-pe, marzo 1832-pe. José Smith rembiasakue heʼi, “Umi Escritura ñembohasa reheve, oñemeʼẽvaʼekue chéve ko ñemyesakã San Juan Rrevelasiõgui”.
1–4, Mymbakuéra oreko espíritu ha oikóta vyʼapavẽ apyraʼỹme; 5–7, Ko yvy oreko 7.000 ary ijeiko temporal-pe; 8–10, Heta anhelkuéra omoĩjey evanhélio ha oministra yvy ári; 11, Umi 144.000 sellamiento; 12–14, Cristo oúta siéte mil ary milénio ñepyrũme; 15, Oñemopuʼãta mokõi proféta hudiokuéra retãme g̃uarã.
1 Porandu. Mbaʼépa pe yguasu vidrioguigua, Juan oñeñeʼẽva rehe, Apocalipsis capítulo 4, versículo 6-pe?Mbohovái. Haʼe pe yvy iñeime marangatu, manokuaaʼỹ ha ijapyraʼỹvape.
2 P. Mbaʼépa ñaikũmbyvaʼerã umi irundy mymba, ko versículo oñeʼẽva rehe?M. Koʼãva haʼe ñeʼẽ mbojoguáva, oiporúva Juan, upe Rrevelador, omombeʼúvo umi yvága rehegua, Tupã paraíso, yvypóra vyʼapavẽ, ha umi mymbakuéra, ha otyryrýva, ha guyra yvyturegua; haʼévo umi espiritual-va temporal-chagua; ha umi temporal-va espiritual-chagua; pe yvypóra espíritu hekovechagua, ha avei mymbakuéra espíritu, ha mayma ambue tekove Tupã ojapoʼakue.
3 P. Omohaʼangápa koʼã irundy mymba peteĩ mymba añóme, térã umívapa omohaʼanga aty térã ñemohendakuéra?M. Koʼãva omohaʼanga irundy mymba añóme, ojehechaukáva Juan-pe, oñemohaʼanga hag̃ua umi tekove atykuéra glória, iñemohenda ñemoĩmbyrépe térã tenda ojejapo ypy haguépe, ovyʼávo iñeime vyʼapavẽ apyraʼỹme.
4 P. Mbaʼépa ñaikũmbyvaʼerã umi mymbakuéra resa ha pepo orekoʼakue rehe?M. Umi hesa omohaʼanga tesape ha kuaapy, péva heʼise, henyhẽ hikuái kuaapýgui; ha umi ipepo omohaʼanga pokatu, okuʼe hag̃ua, ojapo hag̃ua, ha ambue.
5 P. Mbaʼépa ñaikũmbyvaʼerã umi veinticuatro élder, Juan oñeʼẽva rehe?M. Ñaikũmbyvaʼerã koʼã elder, Juan ohechavaʼekue, haʼeha elder-kuéra ijeroviarekoʼakue ministério rembiapópe, ha omanomavaʼekue; haʼekuéra haʼékuri umi siéte tupaogua, ha upérõ oĩkuri Tupã paraísope.
6 P. Mbaʼépa ñaikũmbyvaʼerã kuatiañeʼẽ Juan ohechavaʼekuére, ojeselláva okáguio siéte séllo reheve?M. Ñaikũmbyvaʼerã orekoha Tupã rembipota, umi iñemimby ha umi hembiapokuéra ohechaukáva; umi mbaʼe ñemi iñeisãmbyhygua, ko yvy reheguáva, umi siéte mil ary oĩ aja, térã, hiʼára temporal aja.
7 P. Mbaʼépa ñaikũmbyvaʼerã umi siéte séllo ojesellávare?M. Ñaikũmbyvaʼerã pe séllo peteĩha orekoha umi mbaʼe peteĩha mil arykuéra ñepyrũ; pe mokõiha oreko mokõiha mil arykuéra oúva, ha péicha séptimo peve.
8 P. Mbaʼépa ñaikũmbyvaʼerã umi irundy anhelkuéra oñeñeʼẽvare Apocalipsis capítulo 7, versículo 1-pe?M. Ñaikũmbyvaʼerã koʼãva haʼeha irundy anhelkuéra Tupãre oñemboúva, oñemeʼẽvape pokatu umi irundy yvy renda ári, osalva hag̃ua tekove ha ohundi hag̃ua; koʼãva haʼe umi orekóva evanhélio opaveʼỹva, omeʼẽ hag̃ua opa tetãnguéra, avaretãnguéra, ñeʼẽnguéra ha tavayguakuérape; oguerekóvo puʼaka omboty hag̃ua umi yvága, osella hag̃ua tekovépe g̃uarã, térã oity hag̃ua iguýpe umi tenda pytũmbyguápe.
9 P. Mbaʼépa ñaikũmbyvaʼerã upe ánhel oriente-gui ojupívare, Apocalipsis capítulo 7 ha versículo 2-pe?M. Ñaikũmbyvaʼerã pe ánhel oriente-gui ojupíva haʼeha upe oñemeʼẽvape Tupã oikovéva séllo, umi Israel-gua doce trivu ári; upévare, haʼe osapukái umi irundy ánhel orekóvape evanhélio opaveʼỹva, heʼívo: Ani pejapo ivaíva pe yvýre, ni yguasu, ni yvyramatakuérare, jasella peve isyvakuérare ñande Tupã rembiguaikuérape. Ha, pemog̃uahẽserõ umíva, kóva haʼe Elías, pe ouvaʼerã ombyaty hag̃ua umi Israel-gua trívu ha omoĩjey hag̃ua opa mbaʼe.
10 P. Arakaʼépa oñekumplíta umi mbaʼe oñeñeʼẽvare ko capítulo-pe?M. Umíva oñekumplíta sexto miléniope, térã upe sexto séllo ojepeʼa vove.
11 P. Mbaʼépa ñaikũmbyvaʼerã umi ciento cuarenta y cuatro mil selládo, Israel-gua trívu apyteguiguáre—doce mil káda trívugui?M. Ñaikũmbyvaʼerã umi ojesellavaʼekue haʼeha sumo sacerdote-kuéra, oñeordenáva Tupã orden marangatúpe, oadministra hag̃ua upe evanhélio opaveʼỹva; haʼekuéra haʼégui umi oñeordenáva opa tetãnguéra, avaretãnguéra, ñeʼẽnguéra ha tavayguakuéra apytégui, umi anhelkuéra rupive, oñemeʼẽvape pokatu yvy arigua tetãnguéra ári, ogueru hag̃ua, opavave ousévape, pe Primohénito tupaópe.
12 P. Mbaʼépa ñaikũmbyvaʼerã umi turu pu oñeñeʼẽvare Apocalipsis capítulo 8-pe?M. Ñaikũmbyvaʼerã, Tupã ojapo haguéicha pe yvy séi árape, ha séptimo árape ojapopa hembiapo, ha osantifika upéva, ha avei ojapoʼakue yvypórape yvy timbógui, péicha avei, séptimo milénio ñepyrũmbýpe, Tupã Ñandejára osantifikáta pe yvy, ha ojapopáta yvypóra salvasiõ, ha ohusgáta opa mbaʼe, ha orredimíta opa mbaʼe, ndahaʼéirõ umi haʼe nomoĩrivaʼekue ipokatu guýpe, osellapa vove opa mbaʼe ipahaite peve; ha umi siéte ánhel turukuéra ñembopu, haʼe pe hembiapo ñembosakoʼi ha ñembopaha, séptimo milénio oñepyrũvo—upe tape ñembosakoʼi pe ára ijeju mboyve.
13 P. Arakaʼépa oñekumplíta umi mbaʼe ojehaíva Apocalipsis capítulo 9-pe?M. Umíva oñekumplíta upe séptimo séllo ojepeʼa rire, Cristo jeju mboyve.
14 Mbaʼe ñaikũmbyvaʼerã kuatiañeʼẽʼimi Juan houakue rehe, Apocalipsis capítulo 10-pe ojeʼeháicha?M. Ñaikũmbyvaʼerã péva haʼehague peteĩ misiõ ha peteĩ ordenansa chupe g̃uarã, ombyaty hag̃ua Israel tribu; péina ápe, kóva haʼe Elías, upe, ojehaiháicha, ouvaʼerã ha omoĩjey opa mbaʼe.
15 P. Mbaʼe oñeikũmbyuka umi mokõi testígore, Apocalipsis capítulo 11-pe?M. Umíva haʼe mokõi proféta oñemopuʼãtava hudio retãme g̃uarã ára pahápe, ñemoĩjey árape, ojeprofetisa hag̃ua hudiokuérape, haʼekuéra oñembyaty ha omopuʼã rire Jerusalén táva, ituvakuéra retãme.