Sección 81
Rrevelasiõ oñemeʼẽvaʼekue José Smith upe Proféta rupive, Hiram, Ohio-pe, marzo 15, 1832-pe. Frederick G. Williams oñehenói haʼe hag̃ua sumo sacerdote ha konsehéro, Sumo Sacerdocio Presidencia-pe. Umi tembiasakue jehaipy ohechauka, ko rrevelasiõ ojehutytỹrõ guare, marzo 1832-pe, oñehenoihague Jesse Gause-pe José Smith konsehéro oficio-pe, Presidencia-pe. Upevére, haʼe ojavývo ha oho memévo ko ñehenóime, oñembohasa upe llamamiento Frederick G. Williams-pe. Upe rrevelasiõ, (ojehaíva marzo 1832-pe), ojehechavaʼerã peteĩ jehasa ramo, Primera Presidencia ñemohenda porãmba gotyo, oñeikotevẽhápe upe konsehéro ofísio, upéva upe atýpe, ha oñemohesakã haguépe upe ñehenói mbaʼeguasu. Hermano Gause oserviʼimiʼakue, ha katu oñemosẽ Tupaógui 1832-pe. Hermano Williams oñeordevaʼekue upéva upe oficio-pe, marzo 8, 1833-pe.
1–2, Primera Presidencia akóinte oguereko rreinogua llavekuéra; 3–7, Frederick G. Williams ijeroviarekóramo iministériope, ohupytýta tekove ijapyraʼỹva.
1 Añetehápe, añetehápe Che haʼe ndéve, che rembiguái Frederick G. Williams: Ehendu upe oñeʼẽva ñeʼẽpu, Ñandejára nde Tupã ñeʼẽ, ha ejesarekóke llamamiento reñehenóivape, haʼéva haʼe hag̃ua che tupaogua sumo sacerdote, ha che rembiguái José Smith, upe taʼýra, konsehéro;
2 Upe Che ameʼẽvaʼekuépe rreinogua llavekuéra, akóinte haʼe Sumo Sacerdocio Presidencia-gua:
3 Upévare, añetehápe Che ahechakuaa chupe ha avei ahovasáta chupe, ha avei ndéve, konséhope ndejeroviarekóramo, oficio Che rohenói haguépe, akóinte reñemboʼévo ayvúpe ha ne korasõme, atýpe ha ne año; ha avei ne ministériope, remomarandúvo pe evanhélio umi oikovéva retãme, ha nde joykeʼykuéra apytépe.
4 Ha koʼã mbaʼe rejapóvo, rejapóta tuichavéva mbaʼeporã nde rapichakuérape g̃uarã, ha remotenondéta, pe haʼéva ne Ñandejára glória.
5 Upévare, ndejeroviarekóke; embaʼapo pe oficio Che rohenói haguépe; eipytyvõ umi ikangývape, emopuʼã umi ipo hoʼáva, ha emombarete umi tenypyʼã ikangýva.
6 Ha ndejeroviarekóramo ipahaite peve, rehupytýta peteĩ ñemanokuaaʼỹ koróna, ha tekove ijapyraʼỹva umi mansiõ Che ambosakoʼiʼakue che Ru rógape.
7 Péina ápe, péicha koʼãva haʼe pe Alfa ha Omega ñeʼẽ, jepe Jesucristo. Amén.