Sección 35
Rrevelasiõ oñemeʼẽvaʼekue José Smith, pe Proféta, ha Sidney Rigdon-pe, Fayette, Nueva York, térã aguĩ upégui, Diciembre 7, 1830-pe. Umi ára, pe Proféta ohasa haimete ára ha ára, ojapóvo peteĩ ñembohasa pe Biblia-gui. Oñemoñepyrũ upe ñembohasa Junio 1830-pe, ha mokõive, Oliver Cowdery ha John Whitmer, oipytyvõkuri haiháramo. Upe jave oñehenóigui chupekuéra ambue tembiaporãme, oñehenóikuri Sidney Rigdon-pe, ñehenói marangatu rupive, oipytyvõ hag̃ua Profétape, haihára ramo ko tembiapópe, (tojehecha verso 20). Ko rrevelasiõ jehaipyre moñepyrũ ramo, José Smith rembiasakuépe heʼi: “Sidney Rigdon ou [Ohio-gui] Diciembre-pe, oporandu hag̃ua Ñandejárape, ha ou hendive Edward Partridge … Koʼã mokõi hermano og̃uahẽ riremi, péicha oñeʼẽkuri Ñandejára”.
1–2, Mbaʼéicha yvyporakuéragui ikatu oiko Tupã raʼy ha rajykuéra; 3–7, Sidney Rigdon oñehenói oporomongarai ha omeʼẽ hag̃ua pe Espíritu Santo; 8–12, Umi techaukaha ha milágro ojejapo jerovia rupive; 13–16, Ñandejára rembiguaikuéra omboykéta yvaraʼỹi kapiʼígui opa tetãme, pe Espíritu pokatu rupive; 17–19, José Smith oguereko ñemimbykuéra lláve; 20–21, Umi ojeiporavopyréva ogueropuʼakáta Ñandejára jeju ára; 22–27, Israel ojesalváta.
1 Pejapysaka Ñandejára pene Tupã ñeʼẽre, jepeve Alfa ha Omega, pe iñepyrũmby ha pe ipaha, hape haʼéva peteĩ jere ijapyraʼỹva, peteĩcha ko árape kuehe guaréicha ha tapiaite g̃uarã.
2 Che haʼe Jesucristo, Tupã Raʼy, pe ajehupivaʼekue kurusúre múndo angaipáre, jepe opa che réra ogueroviávare, oiko hag̃ua chuguikuéra Tupã raʼy ha rajykuéra, peteĩ chepype, che chepeteĩháicha Túvape, Túva peteĩháicha chepype, roñemopeteĩ hag̃ua ore.
3 Péina ápe, añetehápe, añetehápe, che haʼe che rembiguái Sidney-pe, che amaʼẽkuri nde rehe ha ne rembiapóre. Che ahendúkuri umi ne ñemboʼe, ha rombosakoʼivaʼekue peteĩ tembiapo tuichavévape g̃uarã.
4 Rejehovasapyre nde, rejapótagui umi mbaʼe tuicháva. Péina ápe, reñemboúkuri, jepeve Juan-cha, rembosakoʼi hag̃ua pe tape che renonderãme, ha Elías, pe Proféta renonderãme, pe ouvaʼerã, ha ndereikuaákuri.
5 Reporomongaraíkuri ýpe arrepentimientorã, ha katu haʼekuéra nomog̃uahẽi pe Espíritu Santo;
6 Ha katu koʼág̃a ameʼẽ ndéve tambiapoukapy, ýpe remongarai hag̃ua, ha haʼekuéra amog̃uahẽta pe Espíritu Santo po ñemoĩ rupive, jepeve umi apostól ymaguare ojapo haguéicha.
7 Ha ojehu ojejapotaha peteĩ tembiapo guasu, hentilkuéra apytépe jepe, ojehechaukátagui hekotavy ha hembiapokyʼakuéra opa tavayguakuéra resa renondépe.
8 Che haʼégui Tupã, ha che jyva noñemombykýi; ha che ahechaukáta milágro, techaukaha ha techapyrãnguéra, opa umi che réra ogueroviávare.
9 Ha umi jeroviápe che rérape ojeruréva, omosẽta umi aña; omongueráta umi hasýva; ha ojapóta umi ohechaʼỹva tohecha jey, ohenduʼỹva tohendu jey, iñeʼẽngúva toñeʼẽ jey, ha umi ijapáva toguata jey.
10 Ha pyaʼetéma ou pe aravo, tuicha mbaʼe ojehechaukataha yvypóra raʼykuérape;
11 Ha katu jeroviaʼỹre, mbaʼevete ndojehechaukamoʼãi, ndahaʼéiramo umi ñehundi Babilonia ári, ojapóva umi tetãme toyʼu hembiapovaikuéra ñekoʼõi vínogui.
12 Ha ndaipóri avave ojapóva iporãva, ndahaʼéiramo umi oñembosakoʼipyrémava omog̃uahẽ hag̃ua che evanhélio plenitu, che ambouvaʼekue ko ñemoñareatýpe.
13 Upévare, che ahenói mundogua ikangývape, umi iñaranduʼỹva ha ojehayhuʼỹvape, omboyke hag̃ua imarangatúva iñañávagui umi tetãnguérape, che Espíritu puʼaka rupive;
14 Ha ijyva haʼéta che jyva, ha che haʼéta ipytiʼamoʼãha ha ijyva moʼãha; ha ajokuáta umi ilómo, ha kuimbaʼéicha oñorairõta cherehehápe; ha ihayhuʼỹhakuéra oĩta ipyguypekuéra; ha ajapóta toʼa pe kysepuku hesehapekuéra, ha che pochy rata rupive añongatúta chupekuéra.
15 Ha umi imboriahu ha hekomarangatúvape oñemboʼéta che evanhélio, ha haʼekuéra ohaʼarõta hína che jeju aravo, hiʼaguĩmagui—
16 Ha oikuaáta hikuái pe ñeʼẽ mbojoja igomáta rehegua, jepeve koʼág̃aite, pe arahaku og̃uahẽmbotámagui.
17 Ha che amboúkuri che evanhélio plenitu che rembiguái José rupive; ha hekokanguýpe ahovasákuri chupe;
18 Ha che ameʼẽvaʼekue chupe umi mbaʼe ojesellavaʼekue ñemimby llavekuéra, jepe umi mbaʼe oĩmavaʼekue pe múndo oñemopuʼã ypývo guare, ha umi mbaʼe oútava ko ára guive, ára che aju jey peve, opytáramo chendive; ha nahániri ramo, che amoĩta ambuéva hendaguépe.
19 Upévare, peñangareko hese ani hag̃ua ikangy ijerovia, ha Moangapyhyhára rupive oñemeʼẽta, pe Espíritu Santo, opa mbaʼe oikuaapáva.
20 Ha peteĩ tembiapoukapy che ameʼẽ ndéve—chupe g̃uarã rehai hag̃ua; ha oñemeʼẽta umi escritura, jepeve chepype oĩramoguáicha, umi che aiporavopyre ojesalva hag̃ua;
21 Ohendútagui haʼekuéra che ñeʼẽ, ha che recháta, ha ndokemoʼãi, ha ogueropuʼakáta che jeju ára; imarãʼỹtagui hikuái, jepeve Che che marãʼỹháicha.
22 Ha koʼág̃a che haʼe ndéve, epyta hendive, ha haʼe ojeʼóita nendive; ani reheja chupe haʼeño, ha añetete oñekumplíta koʼã mbaʼe.
23 Ha ára nde nderehaíri aja, péina ápe, ojehejáta chupe toprofetisa; ha nde remboʼéta che evanhélio ha reñeʼẽta umi proféta marangatúre, remoañete hag̃ua umi iñeʼẽ, chupe oñemeʼẽháicha.
24 Peñongatúke opa tembiapoukapy ha konveniokuéra pejejopývape; ha che aityvyróta umi yvága pene ñeimeporãrã, ha Satana oryrýita ha Sion ovyʼáta umi yvyty ári, ha ipotýta;
25 Ha Israel ojesalváta che árape; ha oñeisãmbyhýta umi lláve che ameʼẽvaʼekue rehe, arakaʼeve noñemoapañuãvéima hag̃ua.
26 Pemopuʼã pene korasõ ha pe vyʼa, pene rredensiõ hiʼag̃uíma.
27 Ani pekyhyje, ovechaʼatymi, pene mbaʼe pe rréino che aju peve. Péina ápe, che ajupotaitéma. Taʼupéicha. Amén.