1 Añetehápe Che haʼe peẽme che angirũnguéra, ani pekyhyje, taiñangahypy pene korasõ; héẽ, pevyʼa tapiáke, ha pemeʼẽ aguyje opa mbaʼépe;

2 Pehaʼarõvo Ñandejárape pyʼaguapýpe, umi peneñemboʼe oikégui Señor de Sabaot apysápe, ha ojehai ko séllo ha testimónio reheve—Ñandejára oñeʼẽmeʼẽkuri ha heʼivaʼekue oñemeʼẽtaha.

3 Upévare, haʼe omeʼẽ peẽme ko promésa, peteĩ konvénio iñambueʼỹva reheve, koʼãva oñekumplitaha; ha opa mbaʼe penderekoʼasyvaʼekue oikóta pene ñeimeporãrã, ha che réra gloriarã, heʼi Ñandejára.

4 Ha koʼág̃a, añetehápe Che haʼe peẽme, umi tetã léire, che aipota che tavayguakuéra tojapo opa mbaʼe Che amandáva chupekuéra.

5 Ha pe tetãgua léi, haʼéva constitucional, oipytyvõva upe libertad principio-pe, umi derécho ha priviléhio ñemantéme, haʼe opa yvypóra mbaʼe, ha ojehustifikakuaa che renondépe.

6 Upévare, Che, Ñandejára, pohustifika, ha pendejoykeʼykuéra che tupaoguápe, peipytyvõvo upe léi haʼéva tetãmegua léi constitucional;

7 Ha yvypóra léi reheguápe, oimeraẽ heta térã saʼivéva kóvagui, añágui ou.

8 Che, Tupã Ñandejára, pomosãso; upévare, añetehápe penesasõ; ha pe léi penemosãso avei.

9 Upevére, umi iñañáva oisãmbyhýramo, tavayguakuéra ojaheʼo.

10 Upévare, ojehekavaʼerã jesarekópe kuimbaʼe ndaijapúiva ha iñarandúva, ha kuimbaʼekuéra imarangatu ha iñarandúvape peñehaʼãvaʼerã peipytyvõ; upeichaʼỹramo, oimeraẽ heta térã saʼive kóvagui añágui ou.

11 Ha Che ameʼẽ peẽme peteĩ tembiapoukapy, tapeheja opa mbaʼevai ha pejoaju opa mbaʼeporãre, peiko hag̃ua opa ñeʼẽ Tupã jurúgui osẽvagui.

12 Haʼe omeʼẽtagui ijeroviarekóvape saʼi saʼi, mboʼepy mboʼepy ári; ha kóvape Che poipyʼaraʼãta ha pohaʼãta.

13 Ha pe omeʼẽva hekove cherehehápe, che rérare, ojuhujeýta, jepeve tekove ijapyraʼỹva.

14 Upévare, ani pekyhyje umi pende rayhuʼỹhágui, Che haʼégui che korasõme, heʼi Ñandejára, poipyʼaraʼãtaha opa mbaʼépe, ahecha hag̃ua pepytápa che konvéniope, jepe ñemano meve, pejejuhu hag̃ua tekojojápe.

15 Ndapepytáirõ che konvéniope, napenderekojojái chéve g̃uarã.

16 Upévare, peheja ñorairõguasu ha pemomarandu pyʼaguapy, ha peñehaʼãmbaite pembojere hag̃ua taʼyrakuéra korasõ tuvakuérare, ha tuvakuéra korasõ taʼyrakuérare;

17 Ha avei, hudiokuéra korasõ profetakuérare, ha profetakuéra hudiokuérare; ani Che aju ha aipyʼajopy opa pe yvy peteĩ ñeʼẽngái reheve, ha opa toʼo toñehundi che renondépe.

18 Ani ojepyʼapy pene korasõ, che Ru rógape oĩgui heta ogaguasu, ha Che ambosakoʼíkuri tenda peẽme g̃uarã; ha Che ha che Ru roimeháme, avei peẽ upépe peiméta.

19 Péina ápe, Che, Ñandejára, ndacherorypái heta umi Kirtland tupaoguándi;

20 Ndohejáigui hikuái iñangaipakuéra, ni ijepokuaavaikuéra, ni ikorasõkuéra orgúllo, ha ipotapy ha imbaʼekuéra jejaʼeʼỹvéva, iñeʼẽrendu hag̃ua umi ñeʼẽ arandu ha tekove ijapyraʼỹvare, Che ameʼẽvaʼekue chupekuéra.

21 Añetehápe Che haʼe peẽme, Che, Ñandejára, ahekomboʼéta chupekuéra ha ajapóta oirameraẽ Che aipotáva, noñearrentíriramo hikuái ha ojapo opa mbaʼe Che haʼevaʼekue chupekuéra.

22 Ha Che haʼe jey peẽme, peñehaʼãramo pejapo oimeraẽ mbaʼe Che amandáva peẽme, Che, Ñandejára, ambopáta opa ñekoʼõi ha pochykue pendehegui, ha umi añaretã rokẽ ndaipuʼakamoʼãi pende rehe.

23 Koʼág̃a, Che añeʼẽ peẽme pende rogayguakuérare—oimeraẽ tapicha pendejopýrõ peẽme térã penderogayguápe peteĩ jey, ha pegueropuʼaka pyʼaguapýpe, peñevaiʼỹre hesekuéra, ni pehekaʼỹre vengánsa, peñembojopóita;

24 Ha katu ndapegueropuʼakáirõ pyʼaguapýpe, ojeipapáta peẽme medída jojávaramo.

25 Ha avei, umi penderayhuʼỹha pendejopýrõ mokõiha jey, ha napeñeʼẽvaíri upe penderayhuʼỹvare, ha katu pegueropuʼaka pyʼaguapýpe, pende jopói hetavéta cien jeyvégui;

26 Ha avei, pendejopýramo mbohapyha jeyve, ha pegueropuʼaka pyʼaguapýpe, pende jopói oñembohetáta irundy jeyve;

27 Ha koʼã mbohapy testimónio opytáta pende rayhuʼỹha rehe noñearrepentíriramo, ha noñemboguemoʼãi.

28 Ha koʼág̃a, añetehápe Che haʼe peẽme, upe oporohayhuʼỹva ojeíramo che vengánsagui, ha ndojeguerúi huísiope che renondépe, upérõ pemomarandúta chupe che rérape anive hag̃ua ou pende ári, ni penderogayguakuéra ári, ni pende raʼykuéra raʼy ári mbohapyha ñemoñareaty peve jepe.

29 Ha upérõ, oúramo pende ári térã pende raʼykuéra ári, térã pende raʼy raʼykuéra ári mbohapyha térã irundyha ñemoñareaty peve, Che amoĩta upe pende raʼyhuʼỹha pende pópe;

30 Ha peperdonárõ chupe upérõ, peñembojopóita pende rekojoja haguére; ha avei pende raʼykuéra ha pende raʼy raʼykuéra, mbohapyha ha irundyha ñemoñareaty peve.

31 Upevére, opyta pende pópe; ha pemyengoviárõ chupe ojapo haguéicha, pejehustifika; oipeʼasẽrõkuri pende rekove, ha oĩ vaírõ pende rekove ikáusare, upe pende rayhuʼỹha oĩ pende pópe ha pejehustifika.

32 Péina ápe, kóva haʼe léi Che ameʼẽvaʼekue che rembiguái Nefi-pe, ha nde rukuéra José ha Jacob-pe, ha Isaac ha Abraham-pe, ha opa che proféta ha apóstol ymáme.

33 Ha avei, kóva haʼe léi Che ameʼẽvaʼekue che táva ymáme, ani hag̃ua osẽ hikuái ñorairõguasúpe avave tetã, avaretã, ñeʼẽ térã tavaygua rehe, ndahaʼéirõ Che, Ñandejára, amandáva chupekuéra.

34 Ha oĩramo tetã, ñeʼẽ térã tavayguakuéra omomarandúva ñorairõguasu hesekuéra, ohupiraẽvaʼerã hikuái peteĩ pyʼaguapy poyvi upe tavaygua, tetã, térã ñeʼẽme;

35 Ha pe tavaygua ndorohorýiramo pyʼaguapy ñeikuaveʼẽ, ni mokõiha ni mbohapyha jave, ogueruvaʼerã hikuái umi testimónio Ñandejára renondépe;

36 Upérõ Che, Ñandejára, ameʼẽva chupekuéra peteĩ tembiapoukapy, ha ahustifika chupekuéra osẽ hag̃ua oñorairõ upe tetã, ñeʼẽ térã tavaygua rehe.

37 Ha Che, Ñandejára añoirairõva iñorairõnguéra, ha itaʼyrakuéra ñorairõ, ha itaʼýra raʼykuéra ñorairõ, oñevengapa peve hikuái opa ihayhuʼỹhakuéragui, mbohapyha ha irundyha ñemoñareaty peve.

38 Péina ápe, kóva haʼe tembiacharã opa tavayguakuérape, heʼi Ñandejára ne Tupã, oĩ hag̃ua hustifikasiõ che renondépe.

39 Ha avei, añetehápe Che haʼe peẽme, upe penderayhuʼỹha, ou rire pende ári peteĩha jave, oñearrepentíramo ha ou peẽme ojerurévo perdón, peperdonáta chupe, ha napeñongatumoʼãvéima testimónio ramo upe penderayhuʼỹha rehe—

40 Ha péicha mokõiha ha mbohapyha jey peve; ha penderayhuʼỹha oñearrepenti vovénte ojapovai haguére pende rehe, peperdonáta chupe, setenta vése siete peve.

41 Ha ojapovaírõ pende rehe ha noñearrepentíri peteĩha jey, upevére peperdonáta chupe.

42 Ha ojapovaírõ pende rehe mokõiha jave, ha noñearrepentíri, upevére peperdonáta chupe.

43 Ha ojapovaírõ pende rehe mbohapyha jave, ha noñearrepentíri, pe perdonavaʼerã avei chupe.

44 Ha katu ojapovaírõ pende rehe irundyha jave, napeperdonamoʼãi chupe, ha katu peguerúta koʼã testimónio Ñandejára renondépe; ha ndojeipeʼamoʼãi oñearrepenti peve ha omyengovia peẽme irundy tánto opa mbaʼépe haʼe ojapovaihague pende rehe.

45 Ha kóicha haʼe ojapóramo, peperdonáta chupe pendepyʼaite guive; ha haʼe ndojapóirõ, Che, Ñandejára, povengáta pende rayhuʼỹhágui cien jeyve.

46 Ha itaʼyrakuéragui, ha opa umi cherayhuʼỹva raʼy raʼykuéragui, mbohapyha ha irundyha ñemoñareaty peve.

47 Ha katu itaʼyrakuéra oñearrepentírõ, térã itaʼýra raʼykuéra, ha ojere Ñandejára Itupãre opa ikorasõ, hiʼánga, añakãmegua ha imbaretekuéra reheve, ha omyengovia cuatro tanto-pe opa mbaʼe ojapovaiʼakue hikuái pende rehe térã pende rukuéra rehe, térã ituvakuéra túva rehe, upérõ ojeíta chuguikuéra pende pochykue;

48 Ha ndoumoʼãvéima vengánsa hiʼarikuéra, heʼi Ñandejára pene Tupã, ha umi hembiapovaikue arakaʼeve noñemoĩmoʼãvéima testimónio ramo hesekuéra Ñandejára renondépe. Amén.