1 Roaguyjemeʼẽ nde rérape, O Ñandejára, Israel Tupã, reñongatúva konveniokuéra ha rehechaukáva poriahuvereko ne rembiguaikuérare, tekojojápe oikóva ne renondépe, opa ikorasõkuéra reheve—

2 Nde remandavaʼekue ne rembiguaikuérape tomopuʼã peteĩ óga nde rérape ko tendápe [Kirtland].

3 Ha koʼág̃a rehecha, O Ñandejára, ne rembiguaikuéra ojapohague ne rembiapoukapýpe oĩháicha.

4 Ha koʼág̃a rojerure ndéve, Túva Marangatu, Jesucristo rérape, Taʼýra nde ykeregua, hérape añónte ikatúva oñeadministra yvypóra raʼykuéra salvasiõ, rojerure ndéve, O Ñandejára, emboaje hag̃ua ko óga, ore, ne rembiguaikuéra po rembiapokue, remandavaʼekue oréve romopuʼã hag̃ua.

5 Nde reikuaágui rojapohague ko tembiapo tuicha jehasaʼasy paʼũme; ha ore mboriahúramo jepe romeʼẽvaʼekue ore mbaʼerepykuéragui oñemopuʼã hag̃ua peteĩ óga nde rérape, pe Kuimbaʼe Raʼy oreko hag̃ua peteĩ tenda ojehechauka hag̃ua itavayguakuérape.

6 Ha ere haguéicha peteĩ rrevelasiõme, oñemeʼẽvaʼekue oréve, ore renoihápe ne angirũnguéra, erévo—Pehenói pene asamblea solemne, Che amanda haguéicha peẽme;

7 Ha opavave ndojeroviáigui, peheka jesarekópe ha peñomboʼe ojupe umi arandu ñeʼẽ; héẽ, peheka arandu ñeʼẽ umi aranduka iporãvévagui; peheka kuaapy, jepeve ñemoarandu ha jerovia rupive;

8 Peñemohenda; pembosakoʼi opa mbaʼe tekotevẽva; ha pemoĩ peteĩ óga, héẽ, peteĩ ñemboʼe róga, peteĩ ajúno róga, peteĩ jerovia róga, peteĩ ñehekomboʼe róga, peteĩ glória róga, peteĩ orden róga, peteĩ Tupã róga;

9 Umi pende jeike haʼe hag̃ua Ñandejára rérape; pende ñesẽ haʼe hag̃ua Ñandejára rérape; ha opa pene ñemomaitei haʼe hag̃ua Ñandejára rérape, po jehupi reheve pe Ijyvatevéva gotyo—

10 Ha koʼág̃a Túva Marangatu, rojerure ndéve orepytyvõ hag̃ua ore, nde tavayguakuérape, nde grásia reheve, rohenóivo ore asamblea solemne, ojejapo hag̃ua ndererakuãporãme g̃uarã ha ndejeguerohory divinorã;

11 Ha peteĩ rojejuhu hag̃uáicha tekojojápe, nde resa renondépe, ojehupyty hag̃ua umi promésa ñekumpli, ojejapovaʼekue ore, nde tavayguakuérape, umi rrevelasiõ remeʼẽvaʼekuépe oréve;

12 Nde glória opytuʼu hag̃ua nde tavayguakuéra ári, ha ko nde róga ári, rodedikáva ndéve koʼág̃a, oñesantifika ha oñekonsagra hag̃ua, ha ne ñeime marangatu oĩ meme hag̃ua ko ógape;

13 Ha opavave oikéva Ñandejára róga rokẽme oñandu hag̃ua nde pokatu ha toñemyaña ohechakuaa hag̃ua nde resantifikahague, ha haʼeha nde róga, peteĩ ne santida renda.

14 Ha eheja, Túva Marangatu, opavave otupãitũva ko ógape toikuaa arandu ñeʼẽ aranduka iporãvévagui, ha toheka hikuái kuaapy, jepe ñemoarandu, ha avei jerovia rupive, nde ere haguéicha;

15 Ha tokakuaa nendive, ha tohupyty upe Espíritu Santo plenitu, ha toñemohenda nde léipe heʼiháicha, ha toñembosakoʼi ohupyty hag̃ua opa mbaʼe tekotevẽva;

16 Ha tahaʼe kóva peteĩ ñemboʼe róga, peteĩ ajúno róga, peteĩ jerovia róga, peteĩ glória róga ha Tupã róga, héẽ, nde róga;

17 Opa nde tavayguakuéra jeike, ko ógape, tahaʼe Ñandejára rérape;

18 Opa umi iñesẽ ko ógagui tahaʼe Ñandejára rérape;

19 Opa iñemomaitei tahaʼe Ñandejára rérape, po marangatu reheve, ojehupíva upe Ijyvatevéva gotyo;

20 Ha ani ojeheja oike nde rógape mbaʼevéichagua mbaʼe kyʼa ombyai hag̃ua kóva;

21 Ha nde tavayguakuéra ojapyhara vove, tahaʼe haʼéva, pyaʼe toñearrepenti ha toujey ndéve, ha tojuhu grásia nde resa renondépe, ha toñemeʼẽjey chupe umi jehovasa nde erevaʼekue toñeñohẽ umi nde rógape nemombaʼeguasúva ári.

22 Rojerure ndéve, Túva Marangatu, ne rembiguaikuéra osẽ hag̃ua ko ógagui oguerekóvo nde pokatu, ha toĩ nde réra hiʼarikuéra, ha nde glória tojere hesekuéra, ha umi ne ánhel toñongareko hesekuéra;

23 Ha ko tendágui togueraha hikuái umi mbaʼeporã pyahu tuichaite ha igloriosovéva, añetehápe, pe yvy paha peve, oikuaa hag̃ua hikuái kóva haʼeha ne rembiapo, ha reipysohague nde po rekumpli hag̃ua pe reñeʼẽvaʼekue profetakuéra juru rupive, ára pahakuéra rehegua.

24 Rojerure ndéve, Túva Marangatu, remoĩmbarete hag̃ua tavayguakuéra otupãitũtava, ha terakuãporãme orekótava peteĩ téra ha peteĩ tenda ko nde rógape, opa ñemoñareaty ha ára apyraʼỹ meve;

25 Mbaʼevéichagua árma ojejapóva oñemopuʼã hag̃ua hesekuéra ani oñakãrapuʼã; ha toʼa ijyvykuápe upe chupekuéra g̃uarã ojoʼovaʼekue;

26 Mbaʼevéichagua tembiapoñaña joaju ani oreko puʼaka opuʼã hag̃ua ha ipuʼaka nde tavayguakuérare, umi oñemoĩtava ári nde réra ko ógape;

27 Ha oimeraẽ tavaygua opuʼãramo ko tavayguakuérare, tahendy nde pochy hesekuéra;

28 Ha ojopýramo hikuái ko tavayguakuérape, nde rejopýta chupekuéra; nde reñorairõta nde tavayguakuérare rejapo haguéicha ñorairõ árape, isãso hag̃ua hikuái opa ihayhuʼỹhakuéra pógui.

29 Rojerure ndéve Túva Marangatu, emoapañuãi, emopirĩmba ha egueru hag̃ua ñemotĩ ha ñemoapañuãi opa umi omosarambivaʼekuépe ñeʼẽjapu ko múndo rupi, nde rembiguái térã nde rembiguaikuéra rehe, noñearrepentíriramo hikuái oñemomarandu vove pe evanhélio opaveʼỹva ijapysapekuéra;

30 Ha opa hembiapokuéra toñemonguʼi ha toʼa hiʼári amandáu ha umi huísio remboútavare hiʼarikuéra nde pochýpe, toñembopaha umi japu ha ñeʼẽrei nde tavyaguakuéra rehe.

31 Nde reikuaágui, O Ñandejára, nde rembiguaikuéra iñangaipaʼĩhague ne renondépe otestifikávo nde réragui, ha kóvare ohasákuri hikuái koʼã mbaʼe.

32 Upévare, rojerureʼasy ne renondépe peteĩ ñemosãso henyhẽva ha oĩmbaitéva ko júgogui;

33 Eipeʼa, O Ñandejára; eipeʼa ne rembiguaikuéra ajúragui, nde pokatu rupive, ropuʼã hag̃ua ko ñemoñareaty paʼũme ha rojapo ne rembiapo.

34 O Jehová, eiporiahuvereko ko tavayguakuérape, ha opa tekove iñangaipágui, eperdona nde tavayguakuéra jejapyhara, ha toñembogue umíva tapiaite g̃uarã.

35 Eheja ne ministro-kuéra unsiõ tojesella hiʼarikuéra yvategua pokatu reheve.

36 Toñekumpli hiʼarikuéra, ojejapo haguéicha umi Pentecostés árape; toñeñohẽ nde tavayguakuéra ári ñeʼẽ rehegua don, héẽ, umi ñeʼẽ oñemyasãiva tatáicha, ha avei iñehesaʼỹijo.

37 Ha tahenyhẽ nde róga nde glória reheve, peteĩ yvytu atã oipeju mbaretévaicha.

38 Emoĩ ne rembiguaikuéra ári upe konvénio testimónio, osẽvo hikuái omombeʼu hag̃ua ne ñeʼẽ tosella hikuái upe léi, ha tombosakoʼi ne santokuéra korasõ opa umi huisiorã rembou potámava nde pochýpe yvy ari oikovéva ári, ijejapyharakuéra rupi, ani hag̃ua nde tavayguakuéra ikangy jejopyvai árape.

39 Ha oimeraẽ táva ne rembiguaikuéra oikehápe, ha umi oikóva upépe omog̃uahẽrõ itestimoniokuéra, nde pyʼaguapy ha ne salvasiõ topyta ko táva ári; ombyaty hag̃ua hikuái umi hekojojáva upe távagui, oho hag̃ua hikuái Sion térã ijestakakuérape, umi tenda nde reiporavopyrévape, vyʼapavẽ opaveʼỹva purahéi reheve;

40 Ha kóva oñekumpli peve, ani reheja hoʼa nde huisiokuéra ko táva ári.

41 Ha oimeraẽ táva ne rembiguaikuéra oikehápe, ha pe tavagua tekovekuéra nomog̃uahẽirõ ne rembiguaikuéra testimónio, ha ne rembiguaikuéra oñemoñeʼẽramo chupekuéra ojesalva hag̃ua ko ñemoñareaty rembiapovaígui, toiko ko távare nde reñeʼẽ haguéicha nde profetakuéra juru rupi.

42 Ha katu rojerure ndéve, O Jehová, emosãso hag̃ua umi ne rembiguái ipoguikuéra ha emopotĩ chupekuéra huguýgui.

43 O Ñandejára, ore ndoroguerohorýi ore rapichakuéra ñehundi; hepyete hiʼangakuéra ne renondépe;

44 Ha katu ne ñeʼẽ oñekumplivaʼerã. Eipytyvõ ne rembiguaikuérape heʼi hag̃ua, nde grásia oipytyvõme chupekuéra: Tojejapo ne rembipota, O Ñandejára, ha ani ore mbaʼéva.

45 Roikuaa nde profetakuéra juru rupive nde reñeʼẽhague mbaʼe ivaietéva iñañávare umi ára paha reheguáre—reñohẽtaha nde huisiokuéra medídaʼỹre;

46 Upévare, O Ñandejára, esalva nde tavayguakuérape umi iñañáva mbaʼevaietégui; eheja ne rembiguaikuéra tosella upe léi, ha tojokua pe testimónio, oĩ hag̃ua ñembosakoʼípe jehapy árape.

47 Rojerure ndéve, Túva Marangatu, nemanduʼa hag̃ua umi oñemosẽvaʼekuére ijyvy jehejapyrégui, Jackson kondádope oikóvare, Misuri-gua. Eipeʼa, O Ñandejára, ko jehasaʼasy ñemosã oñemoĩvaʼekue hiʼarikuéra.

48 Nde reikuaa, O Ñandejára, tuicha ojejopy ha oñembohasaʼasyhague hikuái tekove iñañávare; ha ore korasõ henyhẽ vyʼaʼỹgui ikárga pohyikuéra rupi.

49 O Ñandejára, mboy áraiko rehejáta ko tavayguakuéra ogueropuʼaka ko jehasaʼasy, ha umi ijapyteguikuéra iñangaipaʼỹva rasẽ tog̃uahẽ nde apysápe, ha huguykuéra topuʼã testimónio ramo ne renondépe, rehechaukaʼỹre ne testimónio hesekuéra?

50 Eiporiahuvereko, O Ñandejára, pe populácho ñaña omosẽvaʼekue nde tavayguakuérape, ombopa hag̃ua hikuái jesakea, oñembyasy hag̃ua iñangaipakuéragui, oĩrõ ñembyasy chupekuéra g̃uarã;

51 Ha katu ndojapóiramo hikuái, ehechauka nde jyva, O Ñandejára, ha erredimi upe erevaʼekue Sion-ramo nde tavayguakuérape g̃uarã.

52 Ha ndaikatúirõ ambue hendáicha, nde tavayguakuéra káusa ani hag̃ua ojavy ne renondépe, tahendy nde pochy, ha toʼa hiʼarikuéra nde pochykue, oñeikytĩ hag̃ua hapo ha hakã yvága guýgui;

53 Ha katu oñearrepentíramo hikuái, nde nembaʼeporã ha ndeporiahuvereko, ha remboykéta ne ñekoʼõi remaʼẽvo ne Ungído rováre.

54 Eiporiahuvereko, O Ñandejára, opa tetãnguéra yvy ariguápe; eiporiahuvereko ore retã sãmbyhyharakuérape; eheja, umi principio ore ypykue omoʼãvaʼekue tekoporã ha pyʼaguasúpe, haʼéva, ore retã Constitución, topyta tapiaite g̃uarã.

55 Nemanduʼáke rreikuéra, príncipe-kuéra ha noble-kuérare, ha yvy arigua mburuvichakuérare, ha opa tavayguakuérare, ha tupaokuérare, opa umi imboriahúvare, umi oikotevẽvare, ha umi yvy arigua oikoʼasývare;

56 Oñemohuʼũ hag̃ua ikorasõkuéra umi ne rembiguái osẽ vove nde rógagui, O Jehová, omeʼẽ hag̃ua testimónio nde réragui; umi javýpe oimoʼã tenondéva hikuái ojei hag̃ua pe añetegua renondépe, ha nde tavayguakuéra ojuhu hag̃ua grásia opavave resa renondépe;

57 Opa yvy paha oikuaa hag̃ua ore, ne rembiguaikuéra, rohenduhague ne ñeʼẽpu, ha nde orembouhague;

58 Umi ne rembiguái, Jacob raʼykuéra, ombyaty hag̃ua ijapyteguikuéra hekojojávape, omopuʼã hag̃ua peteĩ táva nde rérape, nde remanda haguéicha chupekuéra.

59 Rojerure ndéve emeʼẽ hag̃ua Sion-pe ambue estakakuéra, ko rehenoivaʼekuégui, nde tavayguakuéra ñembyaty oñemotenonde hag̃ua tuicha puʼaka ha mahestápe, ha toñemombyky ne rembiapo tekojoja rupive.

60 Koʼág̃a, O Ñandejára, roʼékuri koʼã ñeʼẽ ne renondépe, umi rrevelasiõ ha tembiapoukapy remeʼẽvaʼekuére oréve, hentilkuéra ramo rojekuaáva.

61 Ha katu nde reikuaa reñanduha tuicha mborayhu Jacob raʼykuérare, oñemosarambivaʼekue yvytykuérare heta ára aja, peteĩ ijarai ha iñypypytũva árape.

62 Rojerure ndéve, upévare, eiporiahuvereko hag̃ua Jacob raʼykuéra, ko aravoite guive, Jerusalén oñepyrũ hag̃ua oñerredimi;

63 Ha oñepyrũ hag̃ua oñemondoho tembiguái ñeñapytĩmby David rógagui;

64 Ha Juda raʼykuéra oñepyrũ hag̃ua oujey umi yvy remeʼẽvaʼekuépe, Abraham, ituvakuérape.

65 Ha ejapo umi Jacob rembyre, oñemoñeʼẽngái ha ojeipyʼajopyʼakue ijejapyhara rupi, taiñambue heko ikatuʼỹva oñehekomboʼe ha saitégui, upe evanhélio ijapyraʼỹva plenitúpe;

66 Oheja hag̃ua hikuái hiʼarmakuéra huguypáva, ha ombopaha hag̃ua hekoñemoĩkuéra.

67 Ha eheja opa Israel rembyre isarambíva, oñemuñavaʼekue yvy paha peve, toikuaa upe añetegua, toguerovia Mesías-pe, toñerredimi jejopýgui ha tovyʼa ne renondépe.

68 O Ñandejára, nemanduʼáke ne rembiguái José Smith, upe taʼýrare, ha opa ijeikoʼasykuéra ha iñemuñanguérare—haʼe ojapohague konvénio Jehová-ndi ha ojapoʼakue vóto nendive, O Jacob Tupã Ipuʼakapáva—ha umi tembiapoukapy remeʼẽvaʼekuére chupe ha oñehaʼãhague añetehápe ojapo ne rembipota.

69 Eiporiahuvereko, O Ñandejára, hembireko ha imitãnguérape, ojeʼexalta hag̃ua hikuái nde reimeháme, ha toñemoʼã nde po oporomoʼãvare.

70 Eiporiahuvereko opa ipehẽngue ag̃uíme, oñehundi ha ojepeʼa hag̃ua umi javýpe oimoʼã tenondéva hikuái peteĩ amaguasupeguáicha; iñambue hag̃ua hikuái ha oñerredimi Israel-ndi, ha toikuaa hikuái nde haʼeha Tupã.

71 Nemanduʼáke, O Ñandejára, umi presidente-kuérare, héẽ, opa nde tupaogua presidente-kuérare, ojeʼexalta hag̃ua chupekuéra nde po akatúape, opa hogayguakuéra ha ipehẽnguekuéra ag̃ui ndive, herakuéra ijapyraʼỹ hag̃ua manduʼa opaveʼỹvape, ñemoñareatýgui ñemoñareatýpe.

72 Nemanduʼáke opa nde tupaoguakuérare, O Ñandejára, opa hogayguakuéra ndive, ha opa ipehẽnguekuéra ag̃uíre, opa ijapyteguikuéra hasýva ha oikoʼasývare, opa yvy arigua imboriahúva ha hekomarangatúvare; upe rréino nde remoĩvaʼekuégui, ndahaʼéi po rupive, oiko hag̃ua peteĩ yvyty guasu ha tomyenyhẽ opa pe yvy;

73 Nde tupao osẽ hag̃ua pe taveʼỹ iñypytũvagui, ha tomimbi porã jasýicha, ha tahesakã kuarahýicha, ha toporomondýi ehérsitoicha ipoyviveve reheve;

74 Ha toñembojegua peteĩ tembirekorãicha upe ára reipeʼatahápe yvága vélo ha remboykukáta yvytykuéra ne renondépe, ha oñemboyvate umi yvy ipéva ha oñembojoja umi yvy ijojaʼỹva, nde glória omyenyhẽ hag̃ua ko yvy;

75 Pe turu ohenóivo umi omanóvape, ikatu hag̃ua rojehupi araípe ndéve romog̃uahẽ hag̃ua, akóinte roime hag̃ua Ñandejárandi;

76 Ipotĩ hag̃ua ore aokuéra, ha roñembyao hag̃ua tekojoja ao reheve, pálma ore pópe, ha glória rehegua koróna ore akã ári, ha toromonoʼõ vyʼapavẽ ijapyraʼỹva opa ore jehasaʼasykuérare.

77 O Tupã Ñandejára Ipuʼakapáva, orerendúke ore mbaʼejerurépe, ha orembohovái yvágagui, nde koty marangatu, reguapyhápe nde apyka ári, glória, terakuãporã, pokatu, mahesta, mbarete, puʼakareko, añetegua, hustísia, huísio ha poriahuvereko reheve, ha opaʼỹva plenitúpe, ára opaveʼỹva guive ára opaveʼỹva peve.

78 Orerendu, orerendu, orerendu, O Ñandejára! Embohovái koʼã mbaʼejerure, ha eguerohory ko óga dedikasiõ ndéve g̃uarã, ore po rembiapokue, romopuʼãvaʼekue nde rérape;

79 Ha avei ko tupao, emoĩ hag̃ua hiʼári nde réra. Orepytyvõ nde Espíritu puʼaka rupive, romoirũ hag̃ua ore ñeʼẽpu umi serafin omimbi ha ojajaipávandi nde apykajegua jerére, ñemomorã sapukái reheve, opurahéivo Hosana Tupãme ha Cordero-pe!

80 Ha eheja koʼã, nde reungivaʼekue, toñemonde salvasiõ reheve, ha ne santokuéra tosapukái vyʼágui, Amén ha Amén.