1 ’Oia mau tē nā ’ō mai nei te Fatu ia ’oe, e tō’u tāvini e Iosepha Semita, tamaiti, ’e i tō’u tāvini ia Sidney Rigdon, ’e i tō’u tāvini ia Hyrum Smith ato’a, ’e i tō ’oe nā tauturu ’o tei fa’ata’ahia na, ’e ’o tē fa’ata’ahia ho’i a muri atu ;

2 ’E ’ia ’oe ato’a, e tō’u tāvini e Edward Partridge, ’e tō ’oe nā tauturu ;

3 ’E i tō’u mau tāvini ha’apa’o maita’i ato’a nō te ’āpo’ora’a teitei nō tā’u ’ēkālesia i Ziona, ’e e parauhia ïa mai te reira, ’e i te mau peresibutero ato’a ’e te mau ta’ata ho’i nō tā’u ’Ēkālesia a Iesu Mesia i te Feiā Mo’a i te mau Mahana Hope’a nei, i ha’apurara-haere-hia nā roto i te ao pā’āto’a nei ;

4 ’O teie ho’i te i’oa ’o tē topahia i ni’a i tā’u ’ēkālesia i te mau mahana hope’a nei, ’oia ho’i Te ’Ēkālesia a Iesu Mesia i te Feiā Mo’a i te mau Mahana Hope’a nei.

5 ’Oia mau tē parau atu nei au ia ’outou pā’āto’a : ’A ti’a mai i ni’a ’e ’ia ’ana’ana atu, ’ia riro tō ’outou māramarama ’ei hi’ora’a nā te mau nūna’a ;

6 ’E ’ia riro te ha’aputuputura’a i te fenua nō Ziona, ’e i tōna mau titi, ’ei pārurura’a, ’e ’ei ha’apūra’a i te vero, ’e i te riri ’ū’ana, ’ia tae i te taime te reira e nīni’i-pūai-hia atu ai i ni’a i te ao pā’āto’a nei.

7 ’Ia riro te ’oire, Far West, ’ei fenua mo’a ’e te ha’amaita’ihia iā’u nei ; ’e e parauhia te reira ’ei mea mo’a roa, nō te mea e mea mo’a te fenua tā ’oe e ti’a na.

8 Nō reira, tē fa’aue atu nei au ia ’outou ’ia patu i te hō’ē fare nō’u nei, nō te ha’aputuputu-’āmui-ra’a o tō’u feiā mo’a, ’ia ti’a ia rātou ’ia ha’amori mai iā’u nei.

9 ’E ’ia ha’amatahia teie nei ’ohipa, ’e te niu, ’e te ’ohipa fa’aineinera’a, ’ia tae i te tau māhanahana i muri nei ;

10 ’E ’ia ha’amatahia ïa i te maha nō Tiurai i mua nei ; ’e mai te reira taime atu ā, ’ia rave itoito tō’u mau ta’ata i te ’ohipa nō te patu i te fare i tō’u nei i’oa ;

11 ’E hō’ē matahiti ti’a mai teie atu nei mahana, ’ia ha’amata fa’ahou rātou i te patu i te niu nō tō’u fare.

12 ’Ia nā reira rātou i te rave itoito i te ’ohipa mai te reira taime atu ā ē tae noa atu i te taime te reira e fa’aotihia ai, mai te ’ōfa’i tihi ē tae noa atu i te tāpo’i nō te reira, ē tae noa atu i te taime ’ua oti te mau mea tā’āto’a.

13 ’Oia mau tē parau atu nei au ia ’outou na, ’eiaha tō’u tāvini ’o Iosepha, ’eiaha ato’a tō’u tāvini ’o Sidney, ’eiaha ato’a tō’u tāvini ’o Hyrum ’ia ro’o-fa’ahou-hia i te tārahu nō te patura’a i te fare i tō’u nei i’oa ;

14 Terā rā, ’ia patuhia te fare i tō’u nei i’oa mai te au i te hōho’a tā’u e fa’a’ite atu ia rātou ra.

15 ’E mai te mea ’aita tō’u mau ta’ata e patu i te reira mai te au i te hōho’a tā’u e fa’a’ite atu i tō rātou peresidenira’a, ’aita roa ïa vau e fāri’i i te reira i tō rātou ra rima.

16 Terā rā, mai te mea e patu tō’u mau ta’ata i te reira mai te au i te hōho’a tā’u e fa’a’ite atu i tō rātou peresidenira’a, ’oia ho’i i tō’u tāvini ia Iosepha ’e tōna nā tauturu, ’ei reira vau e fāri’i ai i te reira i te rima o tō’u mau ta’ata.

17 ’E teie fa’ahou ā, ’oia mau tē parau atu nei au ia ’outou na, ’o tō’u ïa hina’aro ’ia fa’ati’a-’oi’oi-hia te ’oire nō Far West nā roto i te ha’aputuputura’a o tō’u feiā mo’a ;

18 ’E teie ato’a, ’ia fa’ata’ahia te tahi atu ā mau vāhi ’ei mau titi i te mau retioni ē ’ati noa a’era, mai te au i te fa’a’itehia atu i tō’u tāvini ia Iosepha i terā taime ’e i terā taime.

19 Inaha ho’i, ’ei pīha’i iho vau iāna, ’e e ha’amo’a vau iāna i mua i te mau ta’ata ; nō te mea ’ua hōro’a vau i te mau tāviri nō teie nei bāsileia ’e nō te ’ohipa ho’i iāna ra. ’Oia ïa. ’Āmene.