1 ’Oia mau tē nā ’ō mai nei te Fatu i tō’u tāvini ra ia William Marks, ’e i tō’u tāvini ato’a ra ia Newel K. Whitney, ’ia fa’aoti ’oi’oi rāua i tā rāua ’ohipa ’e ’ia tere atu mai te fenua nō Kirtland atu, hou vau, ’o te Fatu, e fa’atae fa’ahou ai i te mau hiona i ni’a i te fenua nei.

2 ’Ia ara mai rāua, ’e ’ia ti’a mai i ni’a, ’e ’ia haere mai ho’i, ’e ’eiaha ’ia ha’amarirau, nō te mea tē fa’aue nei au, ’o te Fatu, i te reira.

3 Nō reira, mai te mea e ha’amarirau rāua, e ’ore roa rāua e manuia.

4 ’Ia tātarahapa rāua i tā rāua mau hara ato’a, ’e i tō rāua mau hina’aro nounou, i mua iā’u nei, tē nā reira mai nei te Fatu ; nō te mea e aha ho’i tō te reira faufa’a iā’u nei ? tē nā reira mai nei te Fatu.

5 ’A tu’u atu i te mau faufa’a nō Kirtland ’ia ho’ohia nō te ’aufau i te mau tārahu, tē nā reira mai nei te Fatu. ’A tu’u atu i taua mau mea ra ’ia riro atu, tē nā reira mai nei te Fatu, ’e te mea e toe mai, ’ia tāpe’a-noa-hia te reira i roto i tō ’outou rima, tē nā reira mai nei te Fatu.

6 Nō te mea e ’ere ānei nā’u te mau manu o te reva, ’e te i’a ato’a o te miti, ’e te mau ’ānimara ’āvae maha nō te mou’a ra ? E ’ere ānei nā’u te fenua nei i hāmani ? E ’ere ānei tei iā’u nei te hope’a nō te mau nu’u fa’ehau ato’a o te mau nūna’a o te fenua nei ?

7 Nō reira, e ’ere ānei nā’u e fa’atupu mai i te mau vāhi pāpāmarō ’ia ’ōteo mai ’e ’ia tiarehia, ’e ’ia fa’ahotu fa’arahi mai ? tē nā reira mai nei te Fatu.

8 ’Aita ānei e nava’i te vāhi i ni’a i te mau mou’a nō Adam-ondi-Ahman, ’e i ni’a i te mau fenua pāpū nō Olaha Shinehah, ’oia ho’i te fenua i pārahihia e Adamu ra, ’e e aha te faufa’a ’ia nounou ’outou i te mea ri’i noa, ’a ha’apa’o ’ore atu ai i te mau mea faufa’a rahi a’e ?

9 Nō reira, ’a haere mai na i ni’a, i te fenua nō tō’u mau ta’ata, ’oia ho’i ’o Ziona nei.

10 ’Ia ha’apa’o maita’i tō’u tāvini ra ’o William Marks i te tahi mau mea ri’i, e riro ’oia ’ei fa’atere i ni’a i te mau mea e rave rahi ra. ’Ia peresideni ’oia i rotopū i tō’u mau ta’ata i te ’oire nō Far West, ’e ’ia ha’amaita’ihia ’oia i te mau ha’amaita’ira’a nō tō’u mau ta’ata.

11 ’A tu’u atu i tō’u tāvini ra ia Newel K. Whitney ’ia ha’amā i te pupu nō Nicolaitane ’e i tā rātou mau ’ohipa huna ato’a ’e te ’ino rahi, ’e te na’ina’i o tōna ’ā’au i mua iā’u nei, tē nā reira mai nei te Fatu, ’e ’ia haere mai ho’i ’oia i te fenua nō Adam-ondi-Ahman, ’e ’ia riro ’ei ’episekōpo i tō’u mau ta’ata, tē nā reira mai nei te Fatu, ’eiaha i te i’oa noa, i te ’ohipa rā, tē nā reira mai nei te Fatu.

12 ’E teie fa’ahou ā, tē parau atu nei au ia ’oe, tē ha’amana’o nei au i tō’u tāvini ia Oliver Granger ; inaha, ’oia mau tē parau atu nei au iāna, e parau-noa-hia tōna i’oa i roto i te ha’amana’ora’a mo’a i terā u’i ’e i terā u’i, ē a muri ē a muri noa atu, tē nā reira mai nei te Fatu.

13 Nō reira, ’ia rave itoito ’oia i te ’ohipa nō te fa’aorara’a i te Peresidenira’a Mātāmua nō tā’u ’Ēkālesia, tē nā reira mai nei te Fatu ; ’e ’ia topa ana’e ’oia, e ti’a fa’ahou mai ’oia i ni’a, nō te mea e riro tāna tusia ’ei mea mo’a a’e iā’u nei i te faufa’a ’āpī tāna e fāri’i, tē nā reira mai nei te Fatu.

14 Nō reira, ’ia haere ’oi’oi mai ’oia i’ō nei, i te fenua nō Ziona ; ’e i te taime au ra e fa’arirohia ’oia ’ei ho’o tao’a nō’u nei, tē nā reira mai nei te Fatu, ’ei maita’i nō tō’u mau ta’ata.

15 Nō reira, ’eiaha te hō’ē noa a’e ta’ata ’ia vahavaha i tō’u tāvini ra ia Oliver Granger, ’ia vai noa rā te mau ha’amaita’ira’a o tō’u mau ta’ata i ni’a iāna ē a muri noa atu.

16 ’E teie fa’ahou ā, ’oia mau tā’u e parau atu nei ia ’outou, ’ia ha’amana’o noa tō’u mau tāvini ato’a i te fenua nō Kirtland i te Fatu tō rātou ra Atua, ’e i tō’u ato’a fare, ’ia ha’apa’o ’e ’ia fa’aherehere noa i te reira ’ei mea mo’a, ’e ’ia ha’amou atu i te feiā taui moni i te taime au iā’u iho nei, tē nā reira mai nei te Fatu. ’Oia mau ïa. ’Āmene.