Tufa’a 16
E heheura’a tei hōro’ahia mai nā roto ia Iosepha Semita te peropheta, ’ia Peter Whitmer, tamaiti, i Fayette, i New York, i te ’āva’e Tiunu, 1829 (hi’o i te upo’o parau nō te tufa’a 14). ’Ua riro Peter Whitmer, tamaiti, ’ei hō’ē o nā ’ite to’ova’u nō te Buka a Moromona i muri iho.
1–2, ’Ua fa’atoro mai te Fatu i tōna rima i ni’a i te mau ta’ata ato’a ; 3–6, Te porora’a i te ’evanelia ’e te fa’aorara’a i te mau vārua ’o te hō’ē ïa mea faufa’a rahi roa a’e.
1 ’A ha’apa’o mai na, e tō’u tāvini e Peter, ’e ’a fa’aro’o mai na i te mau parau a Iesu Mesia, tō ’oe Fatu ’e tō ’oe ho’i Tāra’ehara.
2 Inaha ho’i, tē parau ’ū’ana atu nei au ia ’oe ’e ma te mana ho’i, nō te mea tei ni’a a’e tō’u rima i te ao pā’āto’a nei.
3 ’E e fa’a’ite atu vau ia ’oe i te mau mea ’aore i ’itea i te hō’ē ta’ata, maori rā ia tāua ana’e—
4 ’Ua ani pinepine mai ho’i ’oe iā’u nei ’ia ’ite ’oe i te mea ’o tē riro ’ei mea faufa’a rahi roa ia ’oe na.
5 Inaha, e ao tō ’oe nō teie nei mea, ’e nō te paraura’a atu i tā’u mau parau tā’u i hōro’a atu ia ’oe mai te au i tā’u mau fa’auera’a.
6 ’E i teienei, inaha, tē parau atu nei au ia ’oe na ē, te mea faufa’a rahi roa a’e ia ’oe na, ’o te paraura’a ïa i te parau tātarahapa i teie nei feiā, ’ia fa’afāriu mai ’oe i te mau vārua iā’u nei, ’ia ti’a ia ’oe ’ia fa’aea i pīha’i iho ia rātou i roto i te bāsileia o tō’u Metua. ’Āmene.