Sección 24
Rrevelasiõ oñemeʼẽvaʼekue José Smith, pe Proféta ha Oliver Cowdery-pe, Harmony, Pensilvania, Julio 1830-pe. Ohasa mboyve irundyha jasyho pe Tupao oñemohendahague, pe ñemuña imbaretevéma ohóvo, ha umi líder ohekámante ñemoʼã oñemomombyrývo sapyʼami. Koʼã mbohapy rrevelasiõ oñemeʼẽvaʼekue ko árape, omombarete, amokyreʼỹ ha ohekomboʼe hag̃ua chupekuéra.
1–9, José Smith oñehenói ombohasa, omboʼe ha omyesakã hag̃ua escritura-kuéra; 10–12, Oliver Cowdery oñehenói omboʼe hag̃ua pe evanhélio; 13–19, Ojerrevela leikuéra umi milágro, ñeʼẽngái, yvytimbo pýgui jetyvyro ha vosa ha vakapire atiʼyreguaʼỹre ñese.
1 Péina ápe, reñehenói ha rejeporavókuri rehai hag̃ua Mormón Kuatiañeʼẽ, ha che ministériope; ha che aipeʼavaʼekue nde jehasaʼasy ha añemoñeʼẽvaʼekue ndéve, ha romosãso opa umi nderayhuʼỹvagui, ha reñemosãso Satana puʼakágui ha umi pytũmbýgui.
2 Upevére, ndaipóri hustifikasiõ ne rembiapovaípe g̃uarã; upevére, tereho ha anive rejapo angaipa.
3 Emagnifika nde oficio; ha reñemitỹ ha remoʼã rire umi ne ñu, pyaʼe tereho tupao oĩva Colesville, Fayette, ha Manchester-pe, ha haʼekuéra oñangarekóta nderehe; ha ahovasáta chupekuéra, mokõive, espiritual ha temporalmente;
4 Ha katu nanemog̃uahẽiramo hikuái, amboúta hiʼarikuéra ñeʼẽngái jehovasa rãngue.
5 Ha nde rehenói meméta Tupãme che rérape, ha rehai meméta umi mbaʼe oñemeʼẽtava ndéve pe Moangapyhyhára rupive, ha remyesakã memévo tupaópe opa escritura-kuéra.
6 Ha ára reikotevẽte javete oñemeʼẽta ndéve upe mbaʼe erevaʼerã ha ehaivaʼerã, ha haʼekuéra ohendúta, térã amboúta chupekuéra ñeʼẽngái jehovasa rãngue.
7 Remeʼẽtagui opa ne pytyvõ Sion-pe; ha kóvape ne mbaretéta.
8 Ehaʼarõkuaa umi jehasaʼasy mbytépe, heta reguerekóta rupi; ha katu egueropuʼaka umíva, ha péina ápe, che aime nendive, jepeve nde ára pahaite peve.
9 Ha yvyʼarigua tembiapópe ndeguerekomoʼãi mbarete, kóva ndahaʼéigui ne llamamiento. Ejesareko ne llamamiento-re ha reguerekóta reikotevẽva remagnifika hag̃ua nde oficio, ha remyesakã hag̃ua opa escritura-kuéra, ha emoĩ memévo nde po ha ekonfirmávo umi tupao.
10 Ha nde joykeʼy Oliver ogueraha meméta che réra múndo renondépe, ha tupaópe avei. Ha noimoʼãivaʼerã haʼe heʼipaitemaha che káusa rehe; ha péina ápe, che aime hendive ipahaite peve.
11 Chepype oguerekóta glória, ha ndahaʼéi ijehegui, tahaʼe kangy térã mbaretépe, tahaʼe ñeñapytĩ térã sãsome;
12 Ha opa ára, ha opa tendápe, haʼe oipeʼáta ijuru ha omomarandúta che evanhélio turu ñeʼẽmeguáicha, mokõive, arakue ha pyharekue. Ha ameʼẽta chupe mbarete yvypóra apytépe ojeikuaaʼỹháicha.
13 Ani pejerure milágro, ndahaʼéiramo che amandáva peẽme, ndahaʼéiramo peguenohẽ hag̃ua aña, pemonguera hag̃ua hasývape, ha pegueropuʼaka hag̃ua mbói ipopĩava ha venéno oporojukakuaáva.
14 Ha ndapejapomoʼãi koʼã mbaʼe, ndahaʼéiramo ojeruréva peẽme umi oipotáva, oñekumpli hag̃ua escritura-kuéra; pejapótagui pe ojehaiháicha.
15 Ha oimeraẽva tenda peikehápe, ha napenemog̃uahẽi hikuái che rérape, pehejáta ñeʼẽngái jehovasa rãngue, peityvyróvo umi yvytimbo pende pýgui, hovakekuéra, testimónio ramo, ha pemopotĩ pende py pe tapére.
16 Ha ojehu oimeraẽva omoĩva ipo pende ári mbaretépe, pemandáta tojeipyʼajopy che rérape; ha, péina ápe, che aipyʼajopýta chupekuéra peẽ peje haguéicha, che árape.
17 Ha oimeraẽva léi rupive oñemoĩva pende rehe, pe léi oñemoñeʼẽngáita chupe.
18 Ha ndereguerahamoʼãi vosa, ni vakapi atiʼyʼarigua, ni yvyra puku popegua, ni mokõi ao; pe tupao omeʼẽtagui peẽme, aravo peikotevẽte jave, tembiʼu ha ao, sapatu, pirepire ha vakapi atiʼyʼarigua.
19 Reñehenóigui rekopi mbarete hag̃ua che parralty, heẽ, jepeve ipahaite; heẽ, ha opa umi reordenavaʼekue, ha ojapóta hikuái ko apopyrãme oĩháicha. Amén.