1 Pejapysaka Jesucristo ñeʼẽre, pene Redentor, pe Tuicha Che Haʼe, pe ijyva poriahuvereko oexpiavaʼekue pene angaipakuéra;

2 Máva ombyatýtava itavayguakuéra, jepe ryguasu ombyatyháicha iryguasuraʼykuéra umi ipepo guýpe, heẽ, opa ohendúvape che ñeʼẽ ha oñemomirĩva che renondépe, ha ojeruréva chéve ñemboʼe mbaretépe.

3 Péina ápe, añetehápe, añetehápe, che haʼe peẽme, koʼág̃a oñeperdonaha peẽme pene angaipakuéra, upévare, pehupyty koʼã mbaʼe; ha katu penemanduʼáke anive pejapo angaipa, ani hag̃ua ou pende ári mbaʼe vai.

4 Añetehápe, che haʼe peẽme pejeiporavoha múndo apytépegui pemomarandu hag̃ua che evanhélio vyʼapavẽ púpe, turu ñeʼẽpupeguáicha.

5 Pemopuʼã pene korasõ ha pevyʼa, che aimégui penembytépe, ha che haʼe penderehe ojeruréva Túva renondépe; ha haʼe hembipota porã omeʼẽ peẽme pe rréino.

6 Ha ojehaiháicha—Oimeraẽ mbaʼe jeroviápe pejeruréva, pehupytýta, pejoajúramo ñemboʼépe, che apoukapýpe heʼiháicha.

7 Ha peñehenói pejapo hag̃ua umi aiporavovaʼekue ñembyaty; umi aiporavovaʼekue ohendúgui che ñeʼẽ ha nomohatãi ikorasõkuéra;

8 Upévare, Túvagui ouvaʼekue apoukapy oñembyatytaha chupekuéra peteĩ tendápe añónte ko yvy ape ári, ombosakoʼi hag̃ua ikorasõkuéra ha oñembosakoʼi hag̃ua hikuái opa mbaʼépe, ára oñeñohẽtahápe jehasaʼasy ha ñehundi umi iñañáva ári.

9 Pe aravo hiʼaguĩmagui, ha oguahẽmbotáma ára pe yvy hiʼajútama; ha opa oñembotuicháva ha umi hembiapoñañáva haʼéta ñana pirúicha; ha ahapypáta chupekuéra, heʼi pe Señor de los Ejércitos, ani hag̃ua oĩ tekoñaña ko yvýpe;

10 Pe aravo hiʼaguĩmagui, ha umi che apóstol oñeʼẽvaʼekue oñekumplivaʼerã; haʼekuéra heʼihaichaite ojehútagui;

11 Puʼaka ha tuicha glória reheve ajehechaukáta haguére yvága guive, opa tekoveʼaty ndive, ha aikóta tekojojápe yvyporakuéra ndive pe yvy ári mil ary, ha umi iñañáva ndogueropuʼakamoʼãi.

12 Ha avei, añetehápe, añetehápe, che haʼe peẽme, ha osẽkuri ñemomarandu mbarete ramo, pe Túva rembipota rupi, che apóstol-kuéra, umi Doce oĩvaʼekue chendive che ministério aja Jesuralén-pe, oĩta che akãtúape, ára aju vove peteĩ pilar tataguigua ryepýpe, oñemondévo tekojoja ao reheve, koróna reheve iñakã arikuéra, glóriape chéicha jepeve, ohusga hag̃ua opa Israel rogayguápe, heẽ, opa umi cherayhu ha oñongatuvaʼekue che rembiapoukapykuéra, ha avave ambuévape.

13 Peteĩ turu ipúta rupi, ipuku ha hatãporã, jepeve Monte Sinaí-peicha, ha opa pe yvy oryrýita, ha osẽta hikuái—heẽ, jepeve umi che pype omanovaʼekue, ohupyty hag̃ua peteĩ tekojoja koróna, ha oñemonde hag̃ua, chechaite jepe, oĩ hag̃ua chendive, roñemopeteĩ hag̃ua ore.

14 Ha katu, péina ápe, che haʼe peẽme ko ára guasu og̃uahẽ mboyve, pe kuarahy iñypytũta, ha pe jasýgui oikóta tuguy; ha umi mbyja hoʼáta yvágagui, ha oĩta techaukaha tuichavéva yvate yvágape ha yvýpe yvyʼári;

15 Ha oĩta tasẽ ha jaheʼo yvypóra atykuéra apytépe;

16 Ha oñemboúta peteĩ yvytu vai guasu amandáu reheve ohundi hag̃ua yvyʼarigua ñemitỹnguéra.

17 Ha ojehúta, pe múndo rembiapoaña rupi, añevengáta umi iñañávare, haʼekuéra noñearrepentírigui; che pochykue kópa henyhẽmágui; ha péina ápe, che ruguy nomopotĩmoʼãi chupekuéra nacherendúiramo.

18 Upévare, che, pe Tupã Ñandejára, omboúta mberu pe yvy ape ári, oñakaramátava umi ipype oikóva rehe, ha hoʼúta hoʼokuéra, ha omongakuaáta umi yso hyepypekuéra;

19 Ha ikũnguéra ojejokuáta ani hag̃ua oñeʼẽvai cherehe; ha umi hoʼo hoʼáta ikanguekuéragui, ha umi hesa ojeíta hendágui.

20 Ha ojehúta umi mymba kaʼaguypegua ha guyra yvyturegua hoʼúta chupekuéra.

21 Ha pe tupao tuicha ha ijejaʼeʼỹvéva, haʼéva hekovaivéva opa yvy ári, ojeitýta tatarendy oporohapývape, ojeʼe haguéicha proféta Ezequiel juru rupi, oñeʼẽvaʼekue koʼã mbaʼére, neʼírava gueteri ojehu, ha katu añetehápe ojehuvaʼerã, che aikoveháicha, umi tembiapokyʼa norreinamoʼãigui.

22 Ha avei, añetehápe, añetehápe, che haʼe peẽme, pe mil ary opa vove, ha yvyporakuéra oñepyrũ jey onega iTupãme, upérõ aperdonáta pe yvy, ha katu ára mbykyminte;

23 Ha oúta pe ipaha, ha pe yvága ha pe yvy oñehundíta ha ndaiporimoʼãvéima, ha oĩta peteĩ yvága pyahu ha peteĩ yvy pyahu.

24 Opa mbaʼe itujáva opátagui, ha opa mbaʼe oñembopyahúta, pe yvága ha pe yvy jepe, ha opa umi ipypegua, mokõive, yvypóra ha mymbakuéra, umi guyra yvyturegua, ha umi pira yguasupegua.

25 Ha ni peteĩ akãrague, ni michĩmi, noñehundimoʼãi, haʼégui che po apopyre.

26 Ha katu, péina ápe, añetehápe che haʼe peẽme, che yvy opa mboyve, Miguel, che arkánhel, ombopúta ituru, ha upérõ opa umi omanovaʼekue opáyta, umi iñeñotỹha jepeʼátagui, ha haʼekuéra osẽta—heẽ, jepe opavave;

27 Ha umi hekojojáva oñembyatýta che akãtúape, tekove ijapyraʼỹvape g̃uarã; ha umi iñañáva che asúpe, atĩtava ahechakuaa chembaʼeha Túva renondépe;

28 Upévare che haʼéta chupekuéra—Pejei che ypýgui, peẽ peñemoñeʼẽngáiva, pe tatarendy opaveʼỹvape, oñembosakoʼivaʼekue pe aña ha hiʼanhelkuérape g̃uarã.

29 Ha koʼág̃a, péina ápe, che haʼe peẽme, arakaʼeve che ndaʼeihague che juru rupi haʼekuéra oujeytaha, pe che aimeháme haʼekuéra ndaikatúigui ou, ndoguerekóigui hikuái puʼaka.

30 Ha katu penemanduʼáke, ndojeikuaaukái yvypórape opa che huisiokuéra; ha umi ñeʼẽ osẽ haguéicha che jurúgui, péicha jepe oñekumplíta, pe itenondéva itapykuéta ha itapykuéva itenondéta, opa mbaʼe ajapovaʼekuépe che pokatu ñeʼẽ rupive, haʼéva che Espíritu pokatu.

31 Che Espíritu pokatu rupive ajapógui umíva; heẽ, opa mbaʼe, mokõive, espiritual ha temporalva:

32 Umi espiritual raẽve, upéi umi temporalva, haʼéva che rembiapo ñepyrũmby; ha avei, umi temporal raẽve ha upéi umi espiritual, haʼéva che rembiapo paha—

33 Añeʼẽvo peẽme tesakãme peikũmby hag̃ua; ha katu chéve g̃uarã che rembiapokuéra ndopái, ni naiñepyrũmbýi; ha katu ameʼẽ peẽme peikũmby hag̃ua, peporandúgui chéve ha peime peteĩ ñeʼẽme.

34 Upévare, añetehápe che haʼe peẽme chéve g̃uarã opa mbaʼe haʼeha espiritual; ha arakaʼeve nameʼẽivaʼekue peẽme peteĩ léi haʼéva temporal; ni avave tekovépe, ni umi yvypóra raʼykuérape; ni Adán, pende rúpe, máva che ajopovaʼekue.

35 Péina ápe, che ameʼẽvaʼekue chupe ijehegui isãso hag̃ua; ha ameʼẽvaʼekue chupe tembiapoukapykuéra, ha katu mbaʼeve tembiapoukapy temporal nameʼẽi chupe, che rembiapoukapykuéra haʼégui espiritual; umíva ndahaʼéi natural ni temporal, ni carnal ni sensual.

36 Ha ojehu Adán, oipyraʼãvo chupe pe aña—ha péina ápe, pe aña oikovaʼekue Adán mboyve, oñemoĩgui cherehe, heʼívo, Emeʼẽ chéve ndererakuãporã, haʼéva che puʼaka; ha avei, mbohapyha pehẽngue umi yvagapegua tekoveʼaty omomombyry chehegui, sãso orekóva rupi hikuái oiporavo hag̃ua.

37 Ha oñemombovaʼekue chupekuéra iguýpe, ha péicha oiko chuguikuéra pe aña ha hiʼanhelkuéra;

38 Ha péina ápe, oĩ peteĩ tenda oñembosakoʼivaʼekue chupekuéra g̃uarã iñepyrũmby guive, tenda haʼéva añaretã.

39 Ha tekotevẽ pe aña oipyʼaraʼã umi yvypóra raʼykuérape, térã ndaikatumoʼãi oiporavo hikuái ijehegui; arakaʼeve ndoguerekóiramo pe iróva, ndaikatumoʼãi oikuaa hikuái pe heʼẽva—

40 Upévare, ojehu pe aña oipyʼaraʼã Adán-pe, ha haʼe hoʼu pe yva oñembotovéva ha ojapyhara pe tembiapoukapy, ha péicha opyta aña rembipotaguýpe, oñemeʼẽgui jeipyʼaraʼãme.

41 Upévare, che, Tupã Ñandejára, amosẽuka chupe Jardín de Edén-gui, che renondégui, hembiapovai rupi, ha kóvape haʼe omano espiritualmente, haʼéva ñemano peteĩha, jepeve upéichagua ñemano, haʼéva ñemano paha, haʼéva espiritual, ohupytýtava umi iñañávape, che haʼe vove: Pejei, peẽ oñemoñeʼẽngaivaʼekue.

42 Ha katu, péina ápe, che haʼe peẽme, che pe Tupã Ñandejára, ameʼẽvaʼekue Adán ha iñemoñarépe, ani hag̃ua haʼekuéra omano ñemano temporal reheguápe, che, Tupã Ñandejára ambou peve anhelkuéra omomarandu hag̃ua chupekuéra arrepentimiento ha rredensiõ, ojerovia rupi che Raʼy Unihénito rérare.

43 Ha péicha che, Tupã Ñandejára, ameʼẽ yvypórape ijeipyʼaraʼã ára—iñemano natural rupive opuʼã hag̃ua inmortalidápe tekove ijapyraʼỹvape, heẽ, opavave ogueroviáva jepe;

44 Ha umi ndogueroviáiva, kondenasiõ ijapyraʼỹvape; ndaikatúigui oñerredimi chupekuéra ijeʼa espiritual-gui, noñearrepentíri rupi;

45 Haʼekuéra ohayhuve pytũmby tesapégui, ha hembiapo ñaña hikuái, ha haʼekuéra ohupyty hembiapo repy pe máva oñeʼẽrendusévapegui.

46 Ha katu péina ápe, che haʼe peẽme, umi mitã michĩ oñerredimiha múndo ñepyrũmby guive, che Unihénito rupive;

47 Upévare, haʼekuéra ndaikatúi ojapo angaipa, noñemeʼẽigui puʼaka Satanáme oipyʼaraʼã hag̃ua umi mitã michĩvape, térã oiporavokuaa peve cherenondépe;

48 Oñemeʼẽgui chupekuéra jepe che aipotaháicha, che rembipotápe heʼiháicha, tuicha mbaʼe ojejerure hag̃ua ituvakuéra pógui.

49 Ha avei, che haʼe peẽme, máva umi oguerekóvape kuaapy namandái raʼe che oñearrepenti hag̃ua?

50 Ha pe ndorekóiva ñeikũmby katu, opyta cherehe ajapo hendive ojehaívape heʼiháicha. Ha koʼág̃a ndaʼemoʼãvéima peẽme mbaʼeve ko árape. Amén.