1 ’A fa’aro’o mai na i te reo nō Iesu Mesia, tō ’outou Tāra’ehara, ’o Te Vai Nei Au Rahi. Nā tōna rima aroha i ’aufau i te utu’a nō tā ’outou mau hara ;

2 Nāna e ha’aputuputu mai i tōna ra mau ta’ata mai tā te moa e ha’aputuputu i tōna mau fanau’a i raro a’e i tōna pererau, ē tae noa atu i te mau ta’ata ato’a ’o tē ha’apa’o i tō’u nei reo, ’e ’o te fa’aha’eha’a ia rātou iho i mua iā’u nei, ’e ’o tē ti’aoro mai iā’u nā roto i te pure ’ū’ana.

3 Inaha, ’oia mau, ’oia mau, tē parau atu nei au ia ’outou na, ’e i teie nei taime ’ua fa’a’orehia tā ’outou ra mau hara, nō reira ’outou e fāri’i ai i teie nei mau mea ; terā rā ’a ha’amana’o ē ’eiaha e rave fa’ahou i te hara, ’o te tae mai te mau ’ati i ni’a ia ’outou.

4 ’Oia mau, tē parau atu nei au ia ’outou na ē, ’ua mā’itihia ’outou nō roto mai i te ao nei nō te poro i tā’u nei ’evanelia ma te reo ’oa’oa, ’ia au ho’i i te reo o te pū ra.

5 ’A poupou tō ’outou ’ā’au ’e ’a ’oa’oa, nō te mea tei rotopū vau ia ’outou na, ’e ’o vau nei tō ’outou ti’a i mua i te Metua ; ’e ’o tōna ho’i ïa hina’aro maita’i ’ia hōro’a atu i te bāsileia ia ’outou.

6 ’E mai te au i tei pāpa’ihia ra—’O tā ’outou e ani mai nā roto i te fa’aro’o, ma te tāhō’ēhia i te pure mai te au i tā’u ra fa’auera’a, e fāri’i ïa ’outou i te reira.

7 ’E ’ua mā’itihia ’outou nō te fa’atupu i te ha’aputuputura’a o tō’u ra feiā i mā’itihia ; nō te mea e fa’aro’o tō’u nei feiā i mā’itihia i tō’u nei reo ma te fa’a’eta’eta ’ore i tō rātou ra ’ā’au ;

8 Nō reira, ’ua tae atu na te fa’auera’a mana nō ’ō mai i te Metua ra ’ia ha’aputuputuhia mai rātou i te vāhi hō’ē i ni’a i teie nei fenua, nō te fa’aineine i tō rātou ra ’ā’au ’e ’ia fa’aineinehia nō ni’a i te mau mea ato’a ra nō te mahana e tu’uhia atu ai te ’ati rahi ’e te fa’aanora’a i ni’a i te feiā parauti’a ’ore.

9 Nō te mea ’ua fātata roa te hora ’e e tae ’oi’oi mai te mahana e ’auhune ai tō te ao nei ; ’e e riro ai te feiā te’ote’o ’e te feiā parauti’a ’ore ato’a ra mai te ’aihere ; ’e nā’u e tūtu’i ia rātou i te auahi, tē nā reira mai nei te Fatu Sabaota ra, ’ia ’ore te parauti’a ’ore ’ia vai noa i ni’a i te fenua nei ;

10 ’Ua fātata mai ho’i te hora, ’e ’ia fa’atupuhia te mau mea i parauhia e tā’u ra mau ’āpōsetolo e ti’a ai ; ’e mai te au i tā rātou i parau ra, ’o te reira iho ā ïa tē tupu ;

11 E fa’a’ite atu ho’i au iā’u iho mai te ra’i mai ra, ma te mana ’e te hanahana rahi, ’e ma te mau nu’u ato’a ho’i nō reira, ’e e pārahi au ma te parauti’a i rotopū i te ta’ata nei i ni’a i te ao nei, ’e ’ia hō’ē a’e tauatini matahiti, ’e ’aita e ti’a i te feiā parauti’a ’ore ’ia fa’a’oroma’i.

12 ’E teie fa’ahou ā, ’oia mau, ’oia mau, tē parau atu nei au ia ’outou na, ’e ’ua fa’a’ite-’ē-hia na, nā roto i te hō’ē fa’auera’a mana, nā roto ho’i i te hina’aro o te Metua, ’oia ho’i e ti’a tā’u mau ’āpōsetolo, te Tino ’Ahuru Ma Piti, ’o tei rave i te ’ohipa mo’a i pīha’i iho iā’u i Ierusalema, i tō’u rima ’atau i te mahana nō tō’u haerera’a mai i roto i te hō’ē pou auahi, ma te fa’a’ahuhia i te ’ahu roa nō te parauti’a ra ’e ma te korona i ni’a i tō rātou ra upo’o, ’e ’ei roto rātou i te hanahana mai iā’u ato’a nei. Nā rātou e ha’avā atu i te ’utuāfare pā’āto’a o ’Īserā’ela, ’ia rātou ho’i ’o tei here mai iā’u nei ’e ’o tei ha’apa’o i tā’u mau fa’auera’a, ’e ’o rātou ana’e ra.

13 E ’oto mai ho’i te hō’ē pū i te hō’ē ’otora’a maoro ’e te pūai ho’i, mai tei ni’a i te Mou’a ra i Sinai, ’e e ’āueue te fenua tā’āto’a, ’e e ti’afa’ahou mai rātou—’oia ho’i, te feiā pohe ’o tei pohe i roto iā’u nei, ’e e fāri’i rātou i te korona nō te parauti’a, ’e e fa’a’ahuhia rātou, mai iā’u ato’a nei, ’e e pārahi noa rātou i pīha’i iho iā’u nei, ’ia riro mātou ’ei hō’ē.

14 ’E, inaha, tē parau atu nei au ia ’outou na, e nā mua a’e i te taera’a mai o te reira mahana rahi, e ha’apōirihia te rā, ’e e fa’arirohia te marama mai te toto ra, ’e e ma’iri mai ho’i te mau feti’a nō ni’a mai i te ra’i, ’e e rahi atu ā te mau tāpa’o i ni’a i te ra’i ’e i raro i te fenua ;

15 ’E e tupu te ’oto e te ’auēra’a i rotopū i te mau nu’u o te ta’ata nei ;

16 ’E e fa’ataehia mai te hō’ē vero rahi ua pa’ari nō te ha’amou i te mau mā’a tupu o te fenua nei.

17 ’E a muri a’era, nō te parauti’a ’ore o tō te ao nei, e tāho’o atu vau i te feiā parauti’a ’ore, nō te mea ’aita rātou e tātarahapa ; ’ua ’ī roa ho’i te ’āu’a nō tō’u nei au ’ore rahi ; ’e inaha, e’ita tō’u nei toto e tāmā ia rātou ’ia ’ore ana’e rātou e fa’aro’o mai i tā’u nei parau.

18 Nō reira, e fa’atae atu vau te Fatu ra te Atua, i te mau ra’o i ni’a i te ’ā’anora’a o te fenua nei, ’o te tau ho’i i ni’a iho i te ta’ata nei, ’e e ’amu rātou i tō rātou ra ’i’o ; ’e e fa’atupu ho’i i te to’e i ni’a ia rātou ;

19 ’E e tāpe’ahia tō rātou ra arero, ’ia ’ore rātou ’ia fa’a’ino mai iā’u nei ; ’e e ma’iri atu tō rātou ra ’i’o mai ni’a mai i tō rātou ra mau ivi, ’e tō rātou mata mai roto mai i te ’āpo’o mata ;

20 ’E a muri a’era, nā te mau ’ānimara ’āvae maha o te uru rā’au ’e te mau manu o te reva e ’amu ha’apau roa ia rātou ra.

21 ’E ’o te ’ēkālesia rahi ’e te vi’ivi’i ra, ’oia ho’i te vahine tai’ata nō tō te ao pā’āto’a nei, e hurihia ïa i raro i te auahi ’ama ra, mai te au i tei parauhia e te vaha o Ezekiela te peropheta, ’o tei parau mai nō ni’a i teie nei mau mea, ’o tei ’ore ā i tupu, ’ia tupu mau ā rā e ti’a ai, mai iā’u e ora nei, e ’ore roa te mau ’ohipa vi’ivi’i e upo’oti’a.

22 ’E teie fa’ahou ā, ’oia mau, ’oia mau, tē parau atu nei au ia ’outou na, ’e ’ia hope roa te mau matahiti hō’ē tauatini ra, ’e ’ia ha’amata fa’ahou te mau ta’ata i te huna i tō rātou ra Atua, ’ei reira vau e fa’aherehere ai i te fenua nei nō te hō’ē tau poto noa ;

23 ’E e tae mai ho’i te hope’a, ’e e ha’amouhia te ra’i ’e te fenua nei, ’e e reva ’ē atu ho’i ïa, ’e e tupu mai te ra’i ’āpī ’e te fenua ’āpī ho’i.

24 E fa’a’orehia ho’i te mau mea tahito ato’a ra, ’e e fa’a’āpīhia ho’i te mau mea ato’a nei, ’oia te ra’i ’e te fenua nei, ’e te ’īra’a ho’i nō te reira, te ta’ata nei ’e te mau ’ānimara ’āvae maha ato’a, te mau manu o te reva, ’e te mau i’a o te tai ;

25 E ’ore roa te hō’ē rouru ’e te hō’ē mea iti noa atu e mo’e, nō te mea e ’ohipa te reira nā tō’u nei rima.

26 Terā rā, inaha, ’oia mau tē parau atu nei au ia ’outou na, hou te fenua nei e fa’a’orehia ai, e fa’a’oto Mihaela, tā’u melahi rahi, i tāna ra pū, ’e i reira te feiā ato’a i pohe ra e ara mai ai, nō te mea e ’īritihia tō rātou ra mēnema, ’e e haere mai rātou i rāpae—’oia ïa, ’o rātou pā’āto’a.

27 ’E e ha’aputuputuhia te feiā parauti’a i tō’u rima ’atau nō te fāri’i i te ora mure ’ore ; ’e te feiā parauti’a ’ore i tō’u rima ’aui, e ha’amā ïa vau ’ia fāri’i ia rātou i mua i te aro nō te Metua ;

28 Nō reira, e parau atu vau ia rātou—’A haere ’ē atu mai mua atu iā’u nei, ’o ’outou tei fa’ahapa-roa-hia, i roto i te auahi mure ’ore, ’o tei fa’aineinehia nō te diabolo ’e tāna ra mau melahi.

29 ’E i teienei, inaha, tē parau atu nei au ia ’outou na ē, ’aita ā vau i parau a’enei nā roto i tō’u iho nei vaha ē e ho’i mai rātou, nō te mea ’aita roa e ti’a ia rātou ’ia haere mai i te vāhi tā’u e pārahi nei, nō te mea ’aita tō rātou e mana.

30 ’A ha’amana’o rā ē ’aita te tā’āto’ara’a o tā’u mau fa’autu’ara’a i fa’a’itehia i te ta’ata nei ; ’e mai te au i te mau parau i reva atu mai roto atu i tō’u nei vaha, e nā reira-ato’a-hia ïa i te fa’atupuhia, tō mua ra e riro ïa nō muri, ’e tō muri ra, e riro ïa nō mua, i rotopū i te mau mea ato’a tā’u i hāmani nā roto i te parau nō tō’u nei mana, ’o te mana ho’i ïa o tō’u nei Vārua.

31 Nā roto ho’i i te mana o tō’u nei Vārua vau i hāmani ai i taua mau mea nei ; ’oia ïa, te mau mea ato’a nō te pae vārua ’e nō te pae tāhuti—

32 Nā mua i te pae vārua, ’e i te piti ra, i te pae tāhuti nei, ’o te ha’amatara’a ïa o tā’u nei ’ohipa ; ’e teie fa’ahou ā, nā mua tō te pae tāhuti noa, ’e i te piti ra, tō te pae vārua, ’o te reira te hope’a o tā’u nei ’ohipa—

33 Tē parauhia atu nei ’outou mai te reira te huru, ’ia ta’a ’ōhie ia ’outou ; ’āre’a rā iā’u iho nei, ’aita ïa tō tā’u mau ’ohipa e hope’a, ’aita ho’i e ha’amatara’a ; ’ua tu’uhia atu rā teie mau mea ’ia ta’a ia ’outou, nō te mea ’ua ani mai ’outou iā’u nei ma te tāhō’ē.

34 Nō reira, ’oia mau tē parau atu nei au ia ’outou na ē, nō te pae vārua te mau mea ato’a iā’u nei, ’aita vau i hōro’a atu ia ’outou i te hō’ē ture tāhuti noa nei ; ’aita ato’a ho’i i te hō’ē ta’ata, ’e i te mau tamari’i a te ta’ata nei ; ’aita ato’a ia Adamu, tō ’outou metua, ’o tā’u i hāmani ra.

35 Inaha, ’ua fa’ati’a vau iāna ’ia ha’apa’o iāna iho ; ’e ’ua hōro’a atu vau i te fa’auera’a iāna, ’aita rā vau i hōro’a atu i te hō’ē fa’auera’a tāhuti noa iāna, nō te mea nō te pae vārua tā’u mau fa’auera’a ; e ’ere te reira i te mea tupu noa, e ’ere ho’i i te mea tāhuti noa, e ’ere ho’i nō te pae tino ’e ’aore rā nō te ha’apa’ora’a ti’a ’ore o te tino.

36 ’E i muri a’era ’ua fa’ahemahia Adamu e te diabolo—’e, inaha, ’ua ti’a atu te diabolo i mua ia Adamu, ’e ’ua ’ōrurehau ho’i ’oia iā’u nei, i te nā-’ō-ra’a mai ē, ’A hōro’a mai iā’u nei tō ’oe hanahana, ’o tō’u ïa mana ; ’e ’ua fa’afāriu ’ē ato’a atu ’oia i te toru o te tufa’a o te mau nu’u o te ra’i mai iā’u atu nei nō te mea tē vai ra tō rātou ti’amāra’a ;

37 ’E ’ua hurihia atu rātou i raro, ’e nā roto i te reira, i tae mai ai te diabolo ’e tāna ra mau melahi ;

38 ’E inaha, tē vai ra te vāhi tei fa’aineinehia nō rātou mai te mātāmua mai ā, ’e ’o taua vāhi ra ’o hade ïa.

39 ’E ’ia fa’ahema te diabolo i te tamari’i a te ta’ata nei e ti’a ai, ’āhiri ’aita rā ’aita ïa e ti’a ia rātou ’ia ha’apa’o ia rātou iho ; nō te mea ’āhiri ’aita rātou e ’amu i te mea ’ava’ava, ’aita ïa e ti’a ia rātou ’ia ’ite i te mea monamona—

40 Nō reira, i muri a’era, ’ua fa’ahema ihora te diabolo ia Adamu, ’e ’ua ’amu ihora ’oia i te mā’a i rāhuihia ra, ’e ’ua ’ōfati atu ra i te fa’auera’a, ’e nā roto i te reira i riro ai ’oia i te hina’aro o te diabolo, nō te mea ’ua topa ’oia i roto i te fa’ahemara’a.

41 Nō reira, vau, te Fatu ra te Atua, i fa’aue ai ’ia hurihia atu ’oia i rāpae i te ’ō i Edene, mai mua atu i tō’u nei aro, nō tāna ’ōfatira’a i te fa’auera’a, ’e nā roto i te reira i pohe ai ’oia i te pohe pae vārua, ’oia ho’i te pohe mātāmua, te reira ato’a ho’i te pohe ’o tē riro ’ei pohe hope’a, ’oia ho’i te pohe pae vārua ’o tē fa’ahitihia atu i ni’a i te feiā parauti’a ’ore ’a parau atu ai au ē : ’A haere ’ē atu, ’outou ’o tei fa’ahapa-roa-hia ra.

42 Inaha rā, tē parau atu nei au ia ’outou na ē, ’ua hōro’a atu vau, te Fatu ra te Atua, ia Adamu ’e tōna ra hua’ai, ’ia ’ore rātou ’ia pohe atu i te pohera’a tāhuti nei, ē tae noa atu i te taime au, te Fatu ra te Atua, e tono atu ai i te mau melahi ’ia fa’a’ite atu ia rātou i te parau nō te tātarahapa ’e te fa’aorara’a, nā roto i te fa’aro’o i te i’oa nō tā’u ra Tamaiti fānau tahi.

43 ’E ’ua nā reira vau, te Fatu ra te Atua, i te fa’ata’ara’a atu i te mau mahana nō tō te ta’ata nei tāmatara’ahia—’e nā roto i tōna pohera’a i te tino nei e ti’a ai iāna ’ia fa’ati’ahia mai i ni’a i roto i te tāhuti ’ore ē tae atu ai i te ora mure ’ore, ’o rātou noa atu tē ti’aturi ;

44 ’E ia rātou ato’a ’o tē ’ore e ti’aturi i te fa’ahapara’a mure ’ore ïa ; ’e ’aita roa e ti’a ia rātou ’ia fa’aorahia mai i tō rātou ra hi’ara’a pae vārua, nō te mea ’aita roa rātou e tātarahapa ;

45 E mea au a’e ho’i nā rātou te pōiri i te māramarama, ’e e mea ’ino roa tā rātou ra mau ’ohipa, ’e tē fāri’i ra rātou i te utu’a nō ’ō mai iāna ra ’o tā rātou i hina’aro i te ha’apa’o.

46 ’E inaha rā, tē parau atu nei au ia ’outou na ē, ’ua fa’aorahia mai te mau tamari’i ri’i mai te fa’atumura’ahia mai o te ao nei nā roto i tā’u ra Fānau tahi ;

47 Nō reira, ’aita e ti’a ia rātou ’ia rave i te hara, nō te mea ’aita te mana i hōro’ahia atu ia Sātane ’ia fa’ahema i te mau tamari’i ri’i, ē tae noa atu i te taime ’ua ’ite rātou i te ha’apa’ora’a i mua iā’u nei ;

48 Nō te mea ’ua hōro’ahia atu te reira ia rātou mai te au i tō’u nei hina’aro, mai te au ho’i i tō’u iho nei mana’o, ’ia ti’a ’ia tītauhia te mau mea rarahi i te rima o tō rātou ra mau metua tāne.

49 ’E tē parau fa’ahou atu nei au ia ’outou na ē, ’o vai ho’i ’o tei noa’a ia rātou te ’ite, tā’u i ’ore i fa’aue atu ’ia tātarahapa ?

50 ’E te ta’ata ’aita tōna e ’ite ra, tei iā’u nei ā ïa te ha’apa’o atu iāna mai te au i tei pāpa’ihia ra. ’E i teienei, ’aita atu e mea tā’u e fa’a’ite atu ia ’outou i teie taime. ’Āmene.