Tufa’a 35
E heheura’a tei hōro’ahia mai ia Iosepha Semita te peropheta ’e ia Sidney Rigdon, i Fayette, i New York, ’e ’aore rā tāpiri noa mai i reira, i te 7 nō Tītema 1830. I teie taime, fātata i te mau mahana ato’a, tē rave ra te peropheta i te ’ohipa ’īritira’a i te Bibilia. ’Ua ha’amatahia te ’ohipa ’īritira’a parau i te ’āva’e Tiunu 1830, ’e ’ua riro Oliver Cowdery ’e John Whitmer ’ei nā pāpa’i parau. ’E nō te mea ’ua pi’ihia rāua i teienei nō te rave i te tahi atu mau ’ohipa, ’ua pi’ihia Sidney Rigdon i teienei nā roto i te fa’aurura’a ’ia tāvini ’ei pāpa’i parau nō te peropheta i roto i teie ’ohipa (’a hi’o i te ’īrava 20). ’Ei ’ōmuara’a parau nō te pāpa’a parau nō teie heheura’a, teie ïa tā te ’ā’amu nō Iosepha Semita e parau nei : « I te ’āva’e Tītema, ’ua haere mai ra ’o Sidney Rigdon [mai Ohio] mai nō te ani atu i te Fatu, ’e ’ua haere ato’a mai ’o Edward Partridge… I muri noa iho i te taera’a mai teie nā taea’e, ’ua paraparau mai te Fatu ».
1–2, Nāhea te ta’ata e riro ai ’ei mau tamari’i tamāroa nā te Atua ; 3–7, ’Ua pi’ihia Sidney Rigdon nō te bāpetizo ’e nō te hōro’a i te Vārua Maita’i ; 8–12, nā roto i te fa’aro’o e tupu mai ai te mau tāpa’o ’e te mau semeio ; 13–16, E tā’iri te mau tāvini o te Fatu i te mau nūna’a nā roto i te mana o te Vārua ; 17–19, ’Ua fāri’i Iosepha Semita i te mau tāviri nō te mau parau ’aro ; 20–21, E ora noa te feiā mā’itihia i te mahana nō te taera’a mai o te Fatu ; 22–27, E fa’aorahia ’Īserā’ela.
1 ’A fa’aro’o mai na i te reo o te Fatu ra tō ’outou Atua, ’oia ’o Alepha ’e ’o Omega, te ha’amatara’a ’e te fa’ahope’a. Tōna haerera’a ra e mea mure ’ore ïa, hō’ē ā i teie nei mahana, inanahi, ē a muri noa atu.
2 ’O Iesu Mesia vau, te Tamaiti a te Atua, ’o tei fa’asātaurohia nō te mau hara a tō te ao nei, nō rātou ato’a ’o tē ti’aturi i tō’u nei i’oa, ’ia riro rātou ’ei mau tamari’i tamāroa nā te Atua, ’oia ’ia hō’ē i roto iā’u nei, mai iā’u nei i hō’ē i roto i te Metua ra, ’e mai te Metua ho’i i hō’ē i roto iā’u nei, ’ia riro tātou ato’a ’ei hō’ē ra.
3 Inaha, ’oia mau, ’oia mau, tē parau atu nei au i tō’u tāvini ra ia Sidney, ’ua hi’o atu vau ia ’oe ’e i tā ’oe ra mau ’ohipa. ’Ua fa’aro’o vau i tā ’oe ra mau pure, ’e ’ua fa’aineine ho’i ia ’oe nō te hō’ē ’ohipa rahi a’e.
4 E ao tō ’oe, nō te mea e rave ’oe i te mau ’ohipa faufa’a rahi. Inaha, ’ua tonohia atu ’oe, mai ia Ioane ato’a ra, nō te fa’aineine i te ’ē’a nā mua iā’u nei, ’e nā mua ato’a ho’i ia Eliaha te peropheta ’o tē tae mai, ’e ’aita ho’i ’oe i ’ite i te reira.
5 ’Ua bāpetizo ’oe i te ta’ata i te pape, nō te tātarahapa, ’aita rā rātou i fāri’i i te Vārua Maita’i ;
6 ’Āre’a rā i teienei tē hōro’a atu nei au i te hō’ē fa’auera’a ia ’oe, ’ia bāpetizo i te pape, ’e e fāri’i rātou i te Vārua Maita’i nā roto i te tu’ura’a rima, mai tā te mau ’āpōsetolo i tahito ato’a ra.
7 ’E a muri a’era e tupu te hō’ē ’ohipa rahi i ni’a i te fenua nei, i rotopū ho’i i te mau ’Ētene, ’e e ’ite-pāpū-hia tō rātou ra ma’ama’a ’e tā rātou ra ho’i mau ’ohipa vi’ivi’i i mua i te mata o te mau ta’ata ato’a.
8 ’O vau ho’i te Atua, ’e ’aita tō’u nei rima i ha’apotohia ; ’e e fa’a’ite atu vau i te mau semeio, te mau tāpa’o ’e te mau mea ’ūmere ho’i, ’ia rātou ato’a ’o tē ti’aturi i tō’u nei i’oa.
9 ’E ’o rātou ’o tē ani mai nā roto i tō’u nei i’oa ma te fa’aro’o, e ti’avaru ’ē atu ïa rātou i te mau diabolo ; e fa’aora rātou i te feiā ma’i ; ’e nā roto ia rātou te feiā matapō e ’ite ai, ’e te feiā tari’a turi e fa’aro’o ai, ’e te feiā vāvā e parau ai, ’e te feiā piri’o’i e haere ai.
10 ’E e tae vave mai te tau e fa’a’itehia mai ai te mau mea māere i te mau tamari’i a te ta’ata nei ;
11 Terā rā ’ia ’ore te fa’aro’o e ’ore roa te hō’ē mea e fa’a’itehia mai, maori rā te mau pau rarahi tē tupu i ni’a i Babulonia, ’o tei fa’ainu i te mau nūna’a ato’a i te uaina nō te riri ’ū’ana nō tāna ra ’ohipa tai’ata.
12 ’E ’aita ho’i e ta’ata ’o tei rave i te maita’i, maori rā ’o rātou ’o tei vai ineine nō te fāri’i i te ’īra’a nō tā’u nei ’evanelia, ’o tā’u i fa’atae atu na i teie nei u’i.
13 Nō reira, tē pi’i atu nei au i te mau mea paruparu o te ao nei, ’ia rātou ’o tei ’ore i ha’api’ihia ’e ’o tei fa’a’inohia ho’i, ’ia tā’iri i te mau nūna’a nā roto i te mana o tō’u nei Vārua ;
14 ’E e riro tō rātou rima ’ei rima nō’u, e riro ho’i au ’ei pāruru ’e ’ei tāpo’i nō rātou ; ’e e tātua ho’i au i tō rātou ra tau’upu, ’e e ’aro pūai roa rātou nō’u ; ’e ’ei raro a’e tō rātou ra mau ’enemi i tō rātou ra ’āvae ; ’e e fa’atopa atu vau i te ’o’e ’ei maita’i nō rātou, ’e nā roto i te auahi o tō’u nei au ’ore rahi e pāruru ai au ia rātou ra.
15 ’E e a’ohia atu ho’i te ’evanelia i te feiā veve ’e te feiā ha’eha’a ho’i, ’e e tīa’i noa ho’i rātou i te taime nō tō’u taera’a mai, nō te mea e mea fātata mai te reira—
16 ’E e ha’api’i rātou i te parabole nō te tumu suke ra, nō te mea tē fātata mai nei te tau māhanahana.
17 ’E ’ua fa’aho’i atu vau i te ’īra’a nō tā’u nei ’evanelia nā roto i te rima o tō’u nei tāvini ’o Iosepha ; ’e ’ua ha’amaita’i au iāna i roto i te paruparu ;
18 ’E ’ua hōro’a atu vau iāna i te mau tāviri nō te parau ’aro nō taua mau mea ’o tei tāpirihia ra, ’e tae noa atu i te mau mea i vai na mai te fa’atumura’ahia mai o teie nei ao, ’e te mau mea ho’i ’o tē tupu mai mai teie taime ē tae noa atu i tō’u taera’a mai, mai te mea e fa’aea noa ’oia i roto iā’u nei, ’e ’ia ’ore rā, e fa’ata’a ïa vau i te tahi ’ē ’ei mono nōna.
19 Nō reira, ’a tīa’i māite ’oe iāna ’ia ’ore tōna fa’aro’o ’ia mure, ’e e hōro’ahia mai te reira nā roto i te Fa’aa’o, ’oia te Vārua Maita’i, ’o tei ’ite i te mau mea ato’a ra.
20 ’E e fa’auera’a tā’u e hōro’a atu ia ’oe—’ia pāpa’i ’oe i te parau nāna ; ’e e hōro’ahia mai te mau pāpa’ira’a mo’a, mai te au i tei vai i roto i tō’u iho nei ’ōuma, nō te fa’aorara’a i tō’u feiā i mā’itihia ra ;
21 E fa’aro’o ho’i rātou i tō’u nei reo, ’e e ’ite mai ho’i iā’u nei, ’e e ’ore ho’i rātou e ma’iri i te ta’oto, ’e e tīa’i māite rātou i te mahana nō tō’u taera’a mai ; ’e e tāmāhia rātou, mai iā’u nei i mā.
22 ’E i teienei tē parau atu nei au ia ’oe, ’a fa’aea ’oe i pīha’i iho iāna, ’e e haere ’oia nā muri iho ia ’oe ; ’eiaha e fa’aru’e ’ē atu iāna, ’e e fa’atupu-mau-hia teie nei mau mea.
23 ’E mai te mea ē ’aita ’oe e pāpa’i ra, inaha, e hōro’ahia ïa iāna ’ia tohu ; ’e e poro haere ’oe i tā’u nei ’evanelia ’e e tītau atu ho’i i te mau peropheta mo’a nō te fa’ati’a mai i tāna mau parau, mai tē hōro’ahia atu iāna ra.
24 ’A ha’apa’o i te mau fa’auera’a ato’a ’e te mau fafaura’a ho’i ’o tē ru’uru’u nei ia ’outou na ; ’e e fa’a’āueue au i te mau ra’i ’ei maita’i nō ’outou, ’e e rurutaina Sātane, ’e e ’oa’oa ho’i ’o Ziona i ni’a i te mau ’āivi, ’e e ruperupe ho’i ;
25 ’E e fa’aorahia ’Īserā’ela i te taime i ha’apa’ohia e au ra ; ’e nā roto i te mau tāviri tā’u i hōro’a atu, e arata’ihia ai rātou, ’e e ’ore roa e ha’ape’ape’a-fa’ahou-hia.
26 ’A poupou tō ’outou ’ā’au ’e ’a ’oa’oa, tē fātata mai nei tō ’outou fa’aorara’a.
27 ’Eiaha e mata’u, e te nana iti ē, nō ’outou ho’i te bāsileia ē tae noa atu ’ua tae mai au. Inaha, e tae ’oi’oi atu vau. ’Oia ïa. ’Āmene.