1 ’Oia ïa tē nā ’ō mai ra te Fatu ra te Atua, tei Pūai Rahi nō ’Īserā’ela : Inaha, tē parau atu nei au ia ’oe, e tō’u tāvini e Edward, e ao tō ’oe, ’e ’ua fa’a’orehia tā ’oe ra mau hara, ’e ’ua pi’ihia ’oe nō te a’o atu i tā’u nei ’evanelia mai te ’otora’a o te hō’ē ra pū ;

2 ’E e tu’u atu vau i tō’u nei rima i ni’a iho ia ’oe na nā roto i te rima o tō’u tāvini ra ’o Sidney Rigdon, ’e e fāri’i ’oe i tō’u nei Vārua, te Vārua Maita’i, ’oia te Fa’aa’o, ’o tē ha’api’i atu ia ’oe i te mau mea hau nō te bāsileia ;

3 ’E e poro atu ’oe i te reira ma te reo pūai, i te nā-’ō-ra’a atu ē : Hosana, ’ia ha’amaita’ihia te i’oa o te Atua teitei roa.

4 ’E i teienei o teie te pi’ira’a ’e te fa’auera’a tā’u e hōro’a atu ia ’oe nō ni’a i te mau ta’ata ato’a—

5 ’O rātou ato’a ’o tē haere mai i mua i te aro o tō’u ra nā tāvini ’o Sidney Rigdon ’e Iosepha Semita, tamaiti, ma te mau māite i teie nei pi’ira’a ’e fa’auera’a, e fa’atōro’ahia ïa rātou ’e e tonohia atu ho’i nō te poro i te ’evanelia mure ’ore i rotopū i te mau nūna’a—

6 Ma te ti’aoro atu i te parau nō te tātarahapa, i te nā-’ō-ra’a atu ē : ’A fa’aora mai ia ’outou iho i teie nei u’i ha’apa’o ’ore, ’e ’a haere mai i rāpae i te auahi, ma te au ’ore atu i te mau ’ahu i pōra’ohia i te ’i’o ra.

7 ’E e hōro’ahia atu teie nei fa’auera’a i te mau peresibutero nō tā’u nei ’ēkālesia, ’ia ti’a ia rātou ato’a ’o tē fāri’i mai i te reira ma te ’ā’au rōtahi, ’ia fa’atōro’ahia ’e ’ia tonohia atu, mai te au i tā’u i parau ra.

8 ’O Iesu Mesia vau, te Tamaiti a te Atua ; nō reira, ’a tātua na i tō ’oe tau’upu ’e e tae ’oi’oi atu vau i tō’u ra hiero. ’Oia ïa. ’Āmene.