Sección 39
Rrevelasiõ oñemeʼẽvaʼekue Proféta José Smith rupive James Covel-pe, Fayette, Nueva York-pe, Enero 5, 1831-pe. James Covel, haʼeakue ministro metodista 40 ary puku, ojapovaʼekue konvénio Ñandejára ndive, iñeʼẽrendutaha oimeraẽ tembiapoukapy, Ñandejára omeʼẽvare chupe Proféta José Smith rupive.
1–4, Santokuéra oguereko puʼaka oiko hag̃ua chugui Tupã taʼýra ha tajyrakuéra; 5–6, Ñamog̃uahẽ evanhélio haʼe ñamog̃uahẽ Cristo; 7–14, Oñemanda James Covel-pe toñemongarai ha tombaʼapo Ñandejára parraltýpe; 15–21, Ñandejára remimboʼekuéra omboʼevaʼerã evanhélio pe Jeju Mokõiha mboyve; 22–24, Umi omog̃uahẽva evanhélio oñembyatýta ára ha eternidápe.
1 Ehendu ha ejapysaka upe oikovéva ára apyraʼỹ guive ára apyraʼỹ peve ñeʼẽ, pe tuicha Che Haʼe, jepeve Jesucristo—
2 Múndo rekove ha resape; peteĩ tesape pytũmbýpe omimbíva, ha umi pytũmby ndoikũmbýi.
3 Pe ajuvaʼekue umi ára asaje mbytépe chembaʼévape, ha umi chembaʼéva nachemog̃uahẽi;
4 Ha katu mayma chemog̃uahẽvaʼekuépe, Che ameʼẽ pokatu oiko hag̃ua chugui che raʼy ha rajyrakuéra; ha péicha avei, mayma chemog̃uahẽvape, Che ameʼẽta pokatu oiko hag̃ua chugui che raʼy ha rajyrakuéra.
5 Ha añetehápe, añetehápe, Che haʼe peẽme, pe omog̃uahẽva che evanhélio chéve chemog̃uahẽ; ha pe nomog̃uahẽiva che evanhélio, nachemog̃uahẽi avei chéve.
6 Ha kóva haʼe che evanhélio—arrepentimiento ha ñemongarai ýpe, ha upe rire ou pe ñemongarai tatápe ha Espíritu Santo, pe Moangapyhyhára jepe, ohechaukáva opa mbaʼe, ha ohekomboʼéva umi mbaʼe ñanembopyʼaguapýva rreinopegua.
7 Ha koʼág̃a, péina ápe, Che haʼe ndéve, che rembiguái James, Che ahechavaʼekue umi ne rembiapo ha roikuaa.
8 Ha añetehápe Che haʼe ndéve, koʼág̃a ne korasõ ijoja che renondépe; ha péina ápe, Che amoĩkuri heta jehovasa ne akã ári.
9 Upevére, reikuaavaʼekue heta vyʼaʼỹ, heta ára chembotovégui pe orgúllo rupi ha umi mbaʼe yvy arigua rupi.
10 Ha katu, péina ápe, umi ñemosãso ára og̃uahẽma, rehendúramo che ñeʼẽ heʼíva ndéve: Epuʼã che eñemongarai, ha ejohéi ne angaipakuéra, rehenóivo che réra, ha rehupytýta che Espíritu, ha peteĩ jehovasa tuichavéva opa umi reikuaavaʼekuégui.
11 Ha péva rejapóramo, Che rombosakoʼivaʼekue peteĩ tembiapo tuichavévape g̃uarã. Remboʼéta che evanhélio plenitu, Che ambouvaʼekue koʼã ára pahápe, konvénio Che ambouvaʼekue agueru jey hag̃ua che tavayguakuéra, haʼéva Israel rogaygua.
12 Ha ojehúta pe pokatu opytuʼúta ndeʼári; reguerekóta jerovia tuicha, ha Che aiméta nendive ha aháta nerenonderã.
13 Reñehenói rembaʼapo hag̃ua che parraltýpe, ha emopuʼã hag̃ua che tupao, ha emopuʼã hag̃ua Sion, ovyʼa hag̃ua umi yvyty ári ha ipotyjera hag̃ua.
14 Péina ápe, añetehápe, añetehápe, Che haʼe ndéve, nereñehenóiri reho hag̃ua yvy kuarahyresẽmegua, ha katu reho hag̃ua Ohio-pe.
15 Ha che tavayguakuéra oñembyatýramo Ohio-pe, Che aiporavovaʼekue peteĩ jehovasa ojeikuaaʼỹva yvypóra raʼykuéra apytépe, ha oñeñohẽta iñakã arikuéra. Ha upégui osẽta kuimbaʼe opa tetãme.
16 Péina ápe, añetehápe, añetehápe, che haʼe ndéve, tekove Ohio-pegua ojerure chéve heta jerovia reheve, oimoʼãvo che nomboumoʼãiha che huísio tetãnguéra ári, ha katu ndaikatúi ajevy che ñeʼẽgui.
17 Upévare, embaʼapo ne mbarete reheve ha ehenói mbaʼapohára ijeroviarekóva che parraltýpe, omonoʼõ hag̃ua hikuái ipahaite.
18 Ha oñearrepenti ha omog̃uahẽramo hikuái che evanhélio plenitu, ha oñesantifika, che ajokóta che poguigua huísio.
19 Upévare, pesẽ, pesapukái atã, pejévo: Yvagagua rreinokuéra hiʼag̃uíma; pesapukáivo: Hosanna! Ojehovasapyre pe Tupã Ijyvatevéva réra!
20 Tapeho ha pemongarai ýpe, pembosakoʼívo pe tape che renonderã, che jeju árape g̃uarã;
21 Hiʼaguĩmagui pe ára; mavave tekove ndoikuaái pe ára ni pe aravo; ha katu añetete og̃uahẽta.
22 Ha koʼã mbaʼe omog̃uahẽva chéve chemog̃uahẽ; ha oñembyatýta chendive ko ára ha ára ijapyraʼỹvape.
23 Ha avei, ojehúta mayma umi ýpe remongaraíva, remoĩta nde po iñakã ári ha ohupytýta hikuái pe Espíritu Santo, ha haʼekuéra ohaʼarõta che jeju rechaukahakuéra, ha cheikuaáta.
24 Péina ápe, che ajupotaitéma. Taʼupéicha. Amén.