1 ’A ha’apa’o mai na ’o ’outou e te mau peresibutero nō tā’u nei ’ēkālesia, ’e ’a fa’aro’o mai tō ’outou tari’a i te mau parau tā’u e parau atu ia ’outou na.

2 Inaha ho’i, ’oia mau, ’oia mau, tē parau atu nei au ia ’outou na ē, ’ua fāri’i ’outou i te hō’ē fa’auera’a ’ei ture nō tā’u nei ’ēkālesia, nā roto iāna ’o tā’u i mā’iti nō ’outou, ’ia fāri’i i te mau fa’auera’a ’e te mau heheura’a nō ’ō mai i tō’u nei rima.

3 ’E e ’ite pāpū ’outou i teie—’aita atu e ta’ata i mā’itihia nō ’outou nō te fāri’i i te mau fa’auera’a ’e te mau heheura’a ē tae noa atu i te taime ’oia e rave-’ē-hia atu ai, mai te mea e fa’aea noa mai ’oia iā’u nei.

4 ’Āre’a rā, ’oia mau, ’oia mau, tē parau atu nei au ia ’outou na, e ’ore roa te tahi ta’ata ’ē atu e mā’itihia nō teie nei hōro’a maori rā ’ia nā-reira-hia nā roto iāna ; nō te mea ē ’āhiri e rave-’ē-hia atu te reira iāna, ’aita ïa tōna e mana maori rā ’ia mā’iti i te tahi ’ei mono nōna.

5 ’E e riro teie ture nā ’outou, ’oia ho’i ’ia ’ore ’outou ’ia fāri’i i tā te hō’ē ta’ata mau ha’api’ira’a ’o tē tae mai i mua ia ’outou na ’ei mau heheura’a ’e ’aore rā ’ei mau fa’auera’a ;

6 ’E tē fa’a’ite atu nei au i teie ia ’outou na ’ia ’ore ’outou ’ia vare, ’ia ’ite ho’i ’outou ē, e ’ere nā’u nei te reira mau mea.

7 Nō te mea ’oia mau tē parau atu nei au ia ’outou na, ’o ’oia ’o tei fa’atōro’ahia e au nei, e tomo mai ïa ’oia nā te ’ūputa ’e ’ia fa’atōro’ahia ho’i mai te au i tā’u i fa’a’ite ’ē na ia ’outou, nō te ha’api’i atu i terā mau heheura’a ’o tā ’outou i fāri’i ’e ’o tā ’outou ho’i e fāri’i nā roto iāna ’o tā’u i mā’iti ra.

8 ’E i teienei, inaha, tē hōro’a atu nei au i te hō’ē fa’auera’a ia ’outou, ’oia ho’i, ’ia ha’aputuputuhia mai ’outou, e ha’api’i ’e e pāturu ïa ’outou te tahi i te tahi, ’ia ’ite ’outou i te rāve’a nō te fa’atere i tā’u nei ’ēkālesia, e nāhea ’ia fa’a’ohipa i te mau fa’ata’ara’a nō tā’u nei ture ’e nō tā’u nei mau fa’auera’a, tā’u i hōro’a atu.

9 ’E nā roto i te reira e ha’api’ihia ai ’outou i te ture nō tā’u nei ’ēkālesia, ’e e ha’amo’ahia ho’i e te mea tā ’outou i fāri’i ra, ’e e fafau ho’i ’outou ’ia rave i te ’ohipa mo’a ana’e i mua iā’u nei—

10 ’E mai te mea e nā reira ’outou i te rave i teie nei mau mea, e ’āmuihia mai te hanahana i te bāsileia tā ’outou i fāri’i ra. ’E mai te mea ē ’aita ’outou e rave i te reira, e rave-’ē-hia atu te reira, ’oia ho’i te mau mea tā ’outou i fāri’i.

11 ’A tāmā na ’outou i te ’ino rahi e vai nei i rotopū ia ’outou na ; ’a ha’amo’a ho’i ’outou ia ’outou iho i mua iā’u nei ;

12 ’E mai te mea tē hina’aro na ’outou i te mau hanahana nō te bāsileia ra, ’a mā’iti ïa ’outou i tō’u nei tāvini ra ia Iosepha Semita, tamaiti, ’e ’a turu ho’i iāna i mua iā’u nei nā roto i te pure fa’aro’o.

13 ’E tē parau fa’ahou atu nei au ia ’outou na ē, mai te mea ’ua hina’aro ’outou i te mau parau ’aro nō te bāsileia ra, ’a ha’aputu i te mā’a nāna ’e te ’ahu nōna, ’e te mau mea ato’a ho’i ’o tē au iāna nō te fa’aotira’a i te ’ohipa tā’u i fa’aue atu iāna ra ;

14 ’E ’ia ’ore ’outou ’ia rave i te reira, e fa’aea noa ’oia ia rātou ra ’o tei fāri’i iāna ra, ’ia ti’a iā’u ’ia fa’ata’a nō’u iho i te hō’ē nūna’a ta’ata vi’ivi’i ’ore i mua iā’u nei.

15 ’E tē parau fa’ahou atu nei au, ’a ha’apa’o mai na ’o ’outou e te mau peresibutero nō tā’u nei ’ēkālesia, ’o tā’u i mā’iti : ’Aita ho’i ’outou i tonohia atu ’ia ha’api’ihia mai, ’ia ha’api’i atu rā i te mau tamari’i a te ta’ata nei i te mau mea tā’u i tu’u atu i roto i tō ’outou rima nā roto i te mana o tō’u nei Vārua ;

16 ’E e riro ’outou i te ha’api’ihia mai ni’a mai ra. ’A ha’amo’a na ’outou ia ’outou iho ’e e hōro’ahia mai te mana ia ’outou, ’ia ti’a ia ’outou ’ia hōro’a mai te au i tā’u i parau ra.

17 ’A fa’aro’o mai na ’outou, nō te mea, inaha, tē fātata mai nei te mahana rahi o te Fatu ra.

18 Tē tae mai nei ho’i te mahana e parau mai ai te reo o te Fatu mai roto mai i te ra’i ra ; e ’āueue te mau ra’i ’e e rurutaina ho’i te fenua nei, ’e e ’oto maoro mai te pū a te Atua ma te pūai, ’e e parau atu ho’i i te mau nūna’a e ta’oto ra ē : ’O ’outou te feiā mo’a, ’a ti’a mai i ni’a ’e ’a ora ; ’o ’outou te feiā hara, ’a fa’aea noa ’e ’a ta’oto, ē tae noa atu i te taime au e parau fa’ahou atu ai.

19 Nō reira, ’a tātua na i tō ’outou tau’upu ’ia ’ore ’outou ’ia ’itehia i rotopū i te feiā parauti’a ’ore.

20 ’A fa’ateitei mai na i tō ’outou reo i ni’a ’e ’eiaha e tāpe’a atu. ’A ti’aoro atu i te mau nūna’a ’ia tātarahapa, te feiā pa’ari ’e te feiā ’āpī ato’a ho’i, te tītī ’e tei ti’amā ho’i, i te nā-’ō-ra’a atu ē : ’A fa’aineine ’outou ia ’outou iho nō te mahana rahi roa o te Fatu ra ;

21 Mai te mea ho’i e fa’ateitei au, ’o vau nei ho’i e ta’ata, i tō’u nei reo i te ti’aorora’a ia ’outou ’ia tātarahapa, ’e e au ’ore mai ’outou iā’u nei, e aha atu ra ïa tā ’outou e parau mai ’ia tae i te mahana e haruru mai ai te mau pātiri mai roto mai i te mau hope’a o te fenua nei, i te paraura’a atu i te tari’a o te feiā ato’a e ora ra, i te nā-’ō-ra’a atu ē—’A tātarahapa, ’e ’a fa’aineine nō te mahana rahi roa o te Fatu ?

22 ’Oia ïa, ’e teie fa’ahou ā, ’ia ’anapa mai te mau uira mai te hiti’a o te rā ē tae noa atu i te tō’o’a o te rā ra, ’e e parau mai ho’i i tō rātou reo ia rātou ato’a ’o tē ora ra, ’e ’ia ha’ama’ero i te tari’a o te ta’ata ato’a ’o tē fa’aro’o mai, i te nā-’ō-ra’a atu i teie nei mau parau—’A tātarahapa na ’outou, ’ua tae mai ho’i te mahana rahi o te Fatu ?

23 ’E teie fa’ahou ā, e parau mai te Fatu i tōna ra reo mai roto mai i te ra’i, i te nā-’ō-ra’a mai ē : ’A ha’apa’o mai na, e te mau nūna’a ato’a o te ao nei, ’e ’a fa’aro’o mai ho’i i te parau a te Atua ’o tei hāmani ia ’outou na.

24 ’Auē, ’outou e te mau nūna’a ato’a o te ao nei, e mea pinepine roa tō’u hina’aro ’ia ha’aputuputu mai ia ’outou mai te moa e ha’aputuputu i tōna fanau’a i raro a’e i tōna pererau, ’aita rā i ti’a ia ’outou !

25 Ahia a’enei taime tā’u i pi’i atu ia ’outou nā roto i te vaha o tō’u nei mau tāvini, ’e nā roto ho’i i te utuutura’a a te mau melahi ra, ’e nā roto ho’i i tō’u iho nei reo, ’e nā roto i te reo o te mau pātiri, ’e nā roto i te reo o te mau uira, ’e nā roto i te reo o te mau vero, ’e nā roto i te reo o te mau ’āueuera’a fenua, ’e te ua pa’ari rarahi, ’e nā roto i te reo o te mau o’e ’e te mau huru ma’i pohe ato’a, ’e nā roto i te ’oto rahi o te pū, ’e nā roto i te reo o te ha’avāra’a, ’e nā roto ho’i i te reo aroha ē hope noa atu te mahana, ’e nā roto i te reo nō te hanahana ’e te tura ’e te mau tao’a rahi o te ora mure ’ore ra, ’e ’ua fa’aora ho’i ia ’outou i te fa’aorara’a mure ’ore, terā rā ’aita i ti’a ia ’outou !

26 Inaha, ’ua tae mai te mahana, i ’ī ai te ’āu’a nō te riri ’ū’ana o tō’u nei au ’ore rahi.

27 Inaha, ’oia mau tē parau atu nei au ia ’outou na, ’o teie ïa te mau parau a te Fatu ra o tō ’outou Atua.

28 Nō reira, ’a rave ’outou, ’a rave ’outou i te ’ohipa i roto i tā’u nei ’ō vine nō te taime hope’a ra—nō te taime hope’a ra ’a poro atu i te porora’a hope’a i te mau ta’ata o te fenua.

29 Nō te mea i te tau e ha’apa’ohia e au ra, e tae atu ai au i ni’a i te ao nei nō te ha’avāra’a, ’e e fa’aorahia mai tō’u iho mau ta’ata, ’e e fa’atere ari’i rātou i pīha’i iho iā’u i ni’a i te fenua nei.

30 Nō te mea e tae mai ïa te Mileniuma rahi, ’o tā’u i parau atu nā roto i te vaha o tō’u mau tāvini.

31 E ru’uru’uhia ho’i ’o Sātane, ’e ’ia tu’u-fa’ahou-hia atu ’oia ra, e fa’atere noa ïa ’oia nō te hō’ē tau poto noa, ’e ’ei reira te hope’a o te ao nei e tae mai ai.

32 ’E ’o ’oia ’o tē ora ra i roto i te parauti’a ra, e fa’ahuru-’ē-hia ’oia mai te ’amora’a mata te vitiviti, ’e e mou roa atu te ao nei mai te au i te ’amara’a o te auahi ra.

33 ’E e haere ’ē atu te feiā parauti’a ’ore i roto i te auahi pohe ’ore ra, ’e tō rātou ra hope’a, ’aore hō’ē ta’ata i ni’a i te fenua nei i ’ite i te reira, ’e ’aita ho’i e ’ite, ē tae noa atu i te taime rātou e tae mai ai i mua iā’u nei nō te ha’avāra’a ra.

34 ’A ha’apa’o mai na ’outou i teie nei mau parau. Inaha, ’o Iesu Mesia vau, te Fa’aora nō te ao nei. ’A tāpe’a māite i teie nei mau mea i roto i tō ’outou ’ā’au, ’e ’ia vai noa te mau mea hōhonu roa nō te tau mure ’ore i roto i tō ’outou ferurira’a.

35 ’A ha’apa’o maita’i. ’A ha’apa’o i tā’u mau fa’auera’a ato’a. ’Oia ïa. ’Āmene.