Tufa’a 49
E heheura’a tei hōro’ahia mai nā roto ia Iosepha Semita te peropheta, ia Sidney Rigdon, Parley P. Pratt ’e Leman Copley, i Kirtland, i Ohio, i te 7 nō Mē 1831. ’Ua fāri’i Leman Copley i te ’evanelia, ’ua tāpe’a noa rā ’oia i te tahi mau ha’api’ira’a a te mau Shakers (United Society of Believers in Christ’s Second Appearing [Sōtaiete ’āmui nō te feiā e ti’aturi ra i te Tae-Piti-Ra’a Mai o te Mesia]) ’e e melo ho’i ’oia nō te reira i te mātāmua. Te tahi mau ti’aturira’a o te mau Shakers, ’oia ho’i, ’ua tupu a’ena te Tae-Piti-Ra’a mai o te Mesia ’e ’ua fā mai ’oia ’ei vahine, ’o Ana Lee. ’Aita te bāpetizora’a i te pape i fa’arirohia ’ei mea faufa’a rahi. ’Ua pāto’i rātou i te fa’aipoipora’a ma te ti’aturi ho’i i roto i te orara’a fa’aipoipo ’ore ’e te ’ōtahi noa. ’Ua ’ōpani ato’a te tahi feiā Shakers i te ’amura’a i te pua’a. ’Ei parau ’ōmuara’a nō teie heheura’a, tē fa’ati’a ra te ’ā’amu nō Iosepha Semita ē, « Nō te fāri’i i te tahi atu ā māramarama pāpū maita’i nō ni’a i teie nei tumu parau, ’ua ani atu vau i te Fatu, ’e ’ua fāri’i au i teie mau mea i muri nei ». Tē fa’ahapa ra teie heheura’a i te tahi mau mana’o o teie pupu Shakers. ’Ua ’āfa’i atu teie mau taea’e ’o tei fa’a’itehia tō rātou i’oa i ni’a nei i te parau nō teie heheura’a i roto i te ’oire o te mau Shakers (tāpiri mai ia Cleveland, i Ohio) ’e ’ua tai’o atu i te tā’āto’ara’a nō te reira ia rātou, ’āre’a rā ’ua pāto’i mai rātou.
1–7, ’Aita roa te mahana ’e te hora nō te ho’ira’a mai o te Mesia e ’itehia ē tae roa i te taime ’oia e ho’i mai ai ; 8–14, E mea ti’a roa i te ta’ata ’ia tātarahapa, ’ia ti’aturi i te ’evanelia, ’e ’ia ha’apa’o i te mau ’ōro’a nō te fāri’i i te fa’aorara’a ; 15–16, ’Ua ha’apa’ohia te fa’aipoipora’a e te Atua ; 17–21, ’Ua fa’ati’ahia ’ia ’amu i te ’i’o ’ānimara ; 22–28, E ruperupe Ziona ’e e ruperupe te mau ’āti Lamana mai te rōti nā mua i te Tae-Piti-Ra’a mai.
1 ’A fa’aro’o mai na i tā’u parau, e tō’u mau tāvini e Sidney, e Parley, ’e e Leman ; ’e inaha, ’oia mau tē parau atu nei au ia ’outou na, tē hōro’a atu nei au i te hō’ē fa’auera’a ia ’outou ’ia haere atu ’outou ’e ’ia poro haere i tā’u nei ’evanelia tā ’outou i fāri’i, mai te au ho’i i tā ’outou i fāri’i i te reira, i te mau Shakers ra.
2 Inaha, tē parau atu nei au ia ’outou na ē, ’ua hina’aro rātou ’ia ’ite i te hō’ē tufa’a nō te parau mau, ’eiaha rā te tā’āto’ara’a, nō te mea ’aita rātou i ti’a i mua iā’u nei, ’e ’ia tātarahapa rātou e ti’a ai.
3 Nō reira, tē tono atu nei au ia ’ōrua, e tō’u nā tāvini e Sidney ’e e Parley, ’ia poro haere i te ’evanelia ia rātou ra.
4 ’E e fa’atōro’ahia tō’u tāvini ra ’o Leman nō teie nei ’ohipa, ’ia ti’a iāna ’ia paraparau ia rātou ra, ’eiaha rā mai te au i tāna i fāri’i i’ō ia rātou ra, mai te au rā i te ha’api’ihia atu iāna e ’ōrua na, e tō’u nā tāvini nei ; ’e nā roto i te ravera’a i te reira e ha’amaita’i ai au iāna, ’ia ’ore rā e ’ore ho’i ’oia e manuia.
5 Tē nā ’ō mai ra te Fatu ; ’o te Atua vau, ’e ’ua tono atu vau i tā’u Tamaiti fānau tahi i te ao nei nō te fa’aora i tō te ao nei, ’e ’ua parau atu ra ho’i au ē ’o ’oia ’o tē fāri’i iāna ra e fa’aorahia ïa, ’e ’o ’oia ’o tē ’ore e fāri’i iāna ra e fa’ahapahia ïa—
6 ’E ’ua rave rātou i te Tamaiti a te Ta’ata nei mai tā rātou i hina’aro ; ’e ’ua rave atu ra ’oia i tōna mana i te rima ’atau nō tōna ra hanahana, ’e tē fa’atere mai ra i roto i te mau ra’i ra i teienei, ’e e fa’atere noa ho’i i reira ē tae noa atu i te taime ’oia e pou mai ai i raro i te fenua nei nō te tu’u atu i tōna ra mau ’enemi i raro a’e i tōna ’āvae, ’e ’ua fātata roa mai te reira tau—
7 Na’u, nā te Fatu te Atua, i parau atu i te reira ; ’āre’a rā te hora ’e te mahana ’aore te ta’ata i ’ite i te reira, ’aore ato’a te mau melahi i te ra’i ra, ’e e’ita ato’a rātou e ’ite ē tae noa atu i te taime ’oia e tae mai ai.
8 Nō reira, ’ua hina’aro vau ’ia tātarahapa te mau ta’ata ato’a, ’ua hara ho’i rātou pā’āto’a, maori rā ’o rātou tā’u i fa’aherehere nō’u iho, e mau ta’ata mo’a ’o tei ’ore roa i ’itea ia ’outou na.
9 Nō reira, tē parau atu nei au ia ’outou na, ’e ’ua fa’atae atu vau i tā’u fafaura’a mure ’ore ia ’outou, ’oia ’o tei vai noa mai te mātāmua mai ā.
10 ’E ’o tā’u i fafau ra ’ua nā reira vau i te fa’atupu i te reira, ’e e tāhopu atu te mau nūna’a o te ao nei i mua i te reira ; ’e, mai te mea e ’ere i tō rātou iho hina’aro, e tāhopu noa atu rātou nō te mea ’o tei fa’ateitei i teienei iāna iho, e fa’aha’eha’ahia ïa i te mana.
11 Nō reira, tē hōro’a atu nei au i te hō’ē fa’auera’a ia ’outou na ’ia haere atu ’outou i rotopū i teie nei feiā, ’e ’ia parau atu ia rātou mai te au i tā tā’u ’āpōsetolo i tahito ra, ’e tōna ra i’oa ’o Petero ïa.
12 ’A ti’aturi na i te i’oa o te Fatu ra ’o Iesu, ’o tei tae ’ē mai na i te ao nei, ’e ’o tē tae fa’ahou mai ā, ’o te ha’amatara’a ’e te fa’ahope’a ;
13 ’A tātarahapa ’e ’ia bāpetizohia i roto i te i’oa o Iesu Mesia, mai te au i te fa’auera’a mo’a ra, nō te ha’amatarara’a i te hara ;
14 ’E ’o tē nā reira e fāri’i ïa ’oia i te hōro’a a te Vārua Maita’i, nā roto i te tu’ura’a rima o te mau peresibutero nō te ’ēkālesia.
15 ’E teie fa’ahou ā, ’oia mau tē parau atu nei au ia ’outou na, ’o ’oia ’o tē fa’a’ore i te fa’aipoipora’a ra ’aita ïa i fa’atōro’ahia e te Atua, nō te mea ’ua fa’auehia te fa’aipoipora’a e te Atua nō te ta’ata nei.
16 Nō reira, ’ua ti’a ïa i te ture ’ia rave te ta’ata i te vahine fa’aipoipo hō’ē, ’e ’ia riro rāua to’opiti ’ei hō’ē ; ’e ’o te reira ïa te tumu te ao nei i hāmanihia ai ;
17 ’E ’ia fa’a’īhia te reira i te fāito o te ta’ata, mai te au i tōna hāmanira’ahia hou te ao nei i hāmanihia ai.
18 ’E ’o ’oia ’o tē fa’aue i te ta’ata ’ia ha’apae i te mau huru ’īna’i, ’ia ’ore ’ia ti’a i te ta’ata ’ia ’amu i te reira, ’aore ho’i ’oia i fa’atōro’ahia e te Atua ;
19 Inaha ho’i, ’ua fa’ata’ahia te mau ’ānimara ’āvae maha o te fenua nei ’e te mau manu o te reva, ’e te mau mea ’o tē tupu mai nō roto mai i te repo ra ’ei mā’a nā te ta’ata nei ’e ’ei ’ā’ahu, ’e ’ia nava’i ho’i tāna.
20 ’Aita rā ho’i i hōro’ahia mai ’ia hau tā te tahi ta’ata i tā te tahi ra, nō te reira i vai noa ai te ao nei i roto i te hara.
21 ’E e ’ati ho’i te ta’ata ’o tē ha’amani’i i te toto ’e ’o tē ha’amāu’a i te ’i’o ma te faufa’a ’ore.
22 ’E teie fa’ahou ā, ’oia mau tē parau atu nei au ia ’outou na, e ’ore roa te Tamaiti a te Ta’ata nei e tae mai nā roto i te huru o te vahine, e ’ore ato’a ho’i mai te ta’ata hāhaere noa i ni’a i te fenua nei.
23 Nō reira, ’eiaha ’ia vare, ’a tāmau noa rā i te turori ’ore, ma te hi’ora’a atu i te mau ra’i ’ia fa’a’āueuehia, ’e i te fenua nei ’ia rurutaina ’e ’ia turorirori haere mai te ta’ata ta’ero ’ava ra, ’e i te mau peho ra ’ia fa’ateiteihia, ’e i te mau mou’a ra ’ia fa’aha’eha’ahia, ’e i te mau vāhi pu’upu’u haere ’ia fa’arirohia ’ei vāhi pāpū—e tupu taua mau mea ato’a ra ’ia fa’a’oto te melahi i tāna ra pū.
24 Terā rā, nā mua a’e i te taera’a mai o te mahana rahi o te Fatu ra, e ruperupe Iakoba i roto i te mēdēbara, ’e e ruperupe te ’āti Lamana mai te rōti ra te huru.
25 E ruperupe ’o Ziona i ni’a i te mau ’āivi ’e e ’oa’oa ho’i i ni’a i te mau mou’a, ’e e ha’aputuputuhia atu ’ei hō’ē i te vāhi tā’u i fa’ata’a ra.
26 Inaha, tē parau atu nei au ia ’outou na, ’a haere atu na mai te au i tā’u i fa’aue atu ia ’outou na ; ’a tātarahapa na i tā ’outou mau hara ato’a ; ’a ani mai ’e e fāri’i ïa ’outou ; ’a pātōtō mai ’e e ’īritihia atu ïa ia ’outou.
27 Inaha, e haere au nā mua ia ’outou ’e e riro vau ’ei pāruru nō muri ia ’outou ; ’e ’ei rotopū vau ia ’outou ’e e ’ore roa ’outou e ha’afifihia.
28 Inaha, ’o Iesu Mesia vau, ’e tē haere ’oi’oi atu nei au. ’Oia ïa. ’Āmene.