Sección 53
Rrevelasiõ oñemeʼẽvaʼekue José Smith upe Proféta rupive, Algernon Sidney Gilbert-pe, Kirtland, Ohio-pe, junio 08, 1831-pe. Sidney Gilbert ojerure rupi, Proféta oporandu Ñandejárape mbaʼépa Hermano Gilbert rembiapo ha ñehenói Tupaópe.
1–3, Sidney Gilbert llamamiento ha jeporavo Tupaópe haʼe oñeordena hag̃ua chupe elder ramo; 4–7, Haʼe oservivaʼerã avei obispo ahénte ramo.
1 Péina ápe, Che haʼe ndéve, che rembiguái Sidney Gilbert, Che ahenduhague umi ne ñemboʼe; ha cherenóikuri, Ñandejára nde Tupã oikuaauka hag̃ua ndéve, ne llamamiento ha jeporavo rehegua tupaópe, Che, Ñandejára, amopuʼãvaʼekue koʼã ára pahápe.
2 Péina, Che, Ñandejára, ajehupivaʼekue kurusúre múndo angaipáre, ameʼẽ ndéve tembiapoukapy reheja hag̃ua pe múndo.
3 Emoĩ ndejehe che ordenasiõ, jepeve élder-ramo, remboʼe hag̃ua jerovia ha arrepentimiento ha angaipakuéra rremisiõ, che ñeʼẽme heʼiháicha, ha Espíritu Santo ñemog̃uahẽ, poñemoĩ rupive;
4 Ha avei haʼe hag̃ua ko tupao ahénte, tenda obispo ohechaukatahápe, tembiapoukapykuéra tenondeve oñemeʼẽtavape heʼiháicha.
5 Ha avei, añetehápe Che haʼe ndéve, rejeʼoivaʼerãha che rembiguaikuéra José Smith, upe taʼýra, ha Sidney Rigdon ndive.
6 Péina ápe, koʼãva haʼe umi ordenansa peteĩha rehupytýtava; ha hembýva ojeikuaaukáta peteĩ ára oútavape, che víñape rembaʼapoháicha.
7 Ha avei, Che aipota reikuaa pe oñehaʼãmbaitéva ipahaite peve añónte ojesalvaha. Taupéicha. Amén.