Sección 54
Rrevelasiõ oñemeʼẽvaʼekue José Smith upe Proféta rupive, Newel Knight-pe, Kirtland, Ohio-pe, junio 10, 1831-pe. Tupao miembro-kuéra oikóva Thompson, Ohio-pe, noĩri peteĩ ñeʼẽme mbaʼerepykuéra ñekonsagra reheguápe. Ojehechauka ijupejehayhu ha takateʼỹ. Imisiõ rire temblador-kuérape (tojehecha sección 49 moñepyrũ), Leman Copley ojapyharákuri ikonvénio okonsagra hag̃ua igránha guasu tenda jehejapyre ramo, Santokuéra og̃uahẽvape g̃uarã Collesvile, Nueva York-gui. Upéva rupi, Newel knight (Thompson-gua miembro-kuéra líder), ha ambue elder-kuéra, ou Proféta rendápe oporandúvo chupe mbaʼéichapa ojapovaʼerã. Proféta oporandu Ñandejárape ha ohupyty ko rrevelasiõ, oñemandávape Thompson-gua miembro-kuérape oheja hag̃ua Lemon Copley rráncho, ha ojeʼói hag̃ua Misuri-pe.
1–6, Santokuéra oñongatuvaʼerã evanhélio konvénio ohupyty hag̃ua poriahuvereko; 7–10, Ohaʼarõkuaavaʼerã hikuái jehasaʼasýpe.
1 Péina ápe, péicha heʼi Ñandejára, jepe upe Alfa ha Omega, pe ñepyrũmby ha ipaha, jepe pe ojehupivaʼekue kurusúre múndo angaipáre—
2 Péina ápe, añetehápe, añetehápe, Che haʼe ndéve, che rembiguái Newel Knight, repytavaʼerã ñemovaʼỹme pe llamamiénto Che rohenói haguépe.
3 Ha ne hermano-kuéra okañyséramo ihayhuʼỹhakuéragui, toñearrepenti hikuái opa iñangaipágui ha añetehápe toñemomirĩ ha toñembyasy cherenondépe.
4 Ha ojejapyharágui upe konvénio haʼekuéra ojapovaʼekue chendive, koʼág̃a upéva opytarei ha ndahaʼéi mbaʼeve.
5 Ha áina pe oúva rupi ko tembiapovai, iporãveʼerãmoʼã chupe oñapymi rire yguasu ruguápe.
6 Ha katu ojehovasapyre umi oñongatuvaʼekue pe konvénio ha ojapo pe tembiapoukapy, haʼekuéra ohupytýtagui poriahuvereko.
7 Upévare, pepuʼã koʼág̃a ha pekañy upe tetãgui, ani ou pende ári umi penderayhuʼỹva; ha tapeho, ha pehenói máva peipotávape pende líder-rã, ha tomeʼẽ pirapire penderehe.
8 Ha péicha pejeʼóita umi tenda oĩva kuarahyreike gotyo, Misuri retãme, Lamanita-kuéra retã rembeʼýpe.
9 Ha opa rire upe jeʼói, péina ápe, Che haʼe peẽme, pegana penderekovépe g̃uarã kuimbaʼe ojapoháicha, Che ambosakoʼi peve peteĩ tenda peẽme g̃uarã.
10 Ha avei, pehaʼarõkuaa jehasaʼasýpe Che aju peve; ha péina ápe, Che ajupotáma, ha che jopói oĩ chendive, ha umi voi cherekavaʼekue ojuhúta pytuʼu hiʼangakuérape g̃uarã. Taupéicha. Amén.