1 ’A fa’aro’o mai na, ’o ’outou e te mau peresibutero nō tā’u nei ’ēkālesia, tē nā reira mai nei te Fatu ra ’o tō ’outou Atua, ’o tei ha’aputuputu mai ia ’outou iho i te vāhi hō’ē mai te au i tā’u mau fa’auera’a, i teie nei fenua, ’oia ho’i te fenua nō Missouri, te fenua tā’u i fa’ata’a e i ha’amo’a ho’i nō te ha’aputuputura’a o te feiā mo’a.

2 Nō reira, ’o teie ho’i te fenua i fafauhia ra, ’e te vāhi nō te ’oire nō Ziona.

3 ’E tē nā ’ō atu nei te Fatu ’o tō ’outou Atua, mai te mea e fāri’i ’outou i te pa’ari, ’o teie ho’i ïa te pa’ari. Inaha, te vāhi i parauhia i teie nei ’o Independence ra, ’o te vāhi pū ïa ; te vāhi nō te hiero ra tei te pae o te tō’o’a o te rā ïa, i ni’a iho i te hō’ē fenua ’aita i te mea ātea i te fare ha’avāra’a ra.

4 Nō reira, e mea tano ïa ’ia ho’ohia mai te fenua e te feiā mo’a, ’e te mau tufa’a ato’a o te fenua i te pae nō te tō’o’a o te rā, ē tae noa atu i te ’ōti’a mau i rōpū i te ’āti Iuda ’e te ’Ētene ra ;

5 E te mau tufa’a fenua ato’a e tāpiri i te mau fenua āteatea ra, i tei fa’ati’ahia i tā’u mau pipi ’ia ho’o mai i te fenua ra. Inaha, e pa’ari ho’i teie, ’ia noa’a mai te reira ia rātou ’ei ’āi’a ē a muri noa atu.

6 ’E ’a tu’u atu i tō’u tāvini ra ia Sidney Gilbert ’ia ti’a i roto i te tōro’a tā’u i fa’ata’a nōna ra, ’ia fāri’i ho’i i te moni, ’ia riro ho’i ’ei ta’ata ha’apa’o i te ’ēkālesia, ’ia ho’o mai i te fenua i te mau retioni ato’a ē ’ati noa a’e, ’o tē noa’a mai nā roto i te parauti’a ra, ’e ’ia au i te pa’ari.

7 ’E ’a tu’u atu i tō’u tāvini ra ia Edward Partridge ’ia ti’a i roto i te tōro’a tā’u i fa’ata’a nōna ra, ’e ’ia tātufa’a ’oia nō te feiā mo’a tō rātou ra ’āi’a mai tā’u i fa’aue ra, nō rātou ato’a ’o tāna i fa’ata’a nō te tauturu iāna.

8 ’E teie fa’ahou ā, ’oia mau tē parau atu nei au ia ’outou na, ’a tu’u atu i tō’u tāvini ra ia Sidney Gilbert ’ia fa’atumu iāna iho i teie nei vāhi, ’e ’ia fa’ati’a i te hō’ē fare toa, ’ia ti’a iāna ’ia ho’o atu i te tao’a ma te ’eiā ’ore, ’ia noa’a mai iāna te moni nō te ho’o mai i te mau fenua ’ei maita’i nō te feiā mo’a, ’e ’ia roa’a ato’a ho’i iāna te mau mea ato’a tā te mau pipi i hina’aro nō te fa’atumura’a ia rātou i roto i tō rātou ra ’āi’a.

9 ’E ’a tu’u atu i tō’u tāvini ra ia Sidney Gilbert ’ia fāri’i mai i te hō’ē pātana—inaha, e pa’ari teie, ’e ’o ’oia ’o tē tai’o ra, ’ia māramarama ïa ’oia—’ia ti’a ato’a iāna ’ia hāpono atu i te mau tao’a i te mau ta’ata, nā te rima nō te mau ta’ata tāna e fa’aau ’ei ho’o tao’a i roto i tāna ’ohipa ;

10 ’E nā roto i te reira e ha’aputu ai i te faufa’a nā tō’u feiā mo’a nei, ’ia poro-haere-hia tā’u nei ’evanelia ia rātou ’o tē pārahi nei i roto i te pōiri ’e i roto i te retioni ’e te marumaru ho’i nō te pohe.

11 ’E teie fa’ahou ā, ’oia mau tē parau atu nei au ia ’outou na, ’ia fa’atumuhia tō’u tāvini ra ’o William W. Phelps i teie nei vāhi, ’e ’ia fa’arirohia ’ei nene’i parau nō te ’ēkālesia.

12 ’E inaha, mai te mea e fāri’i mai tō te ao nei i tāna mau pāpa’ira’a—inaha, tei ’ō nei te pa’ari—’ia noa’a ho’i iāna tei ti’a nā roto i te parauti’a ra, ’ei faufa’a nā te feiā mo’a ra.

13 ’E ’a tu’u atu i tō’u tāvini ra ia Oliver Cowdery ’ia tauturu iāna, mai te au ho’i i tā’u i fa’aue ra, i te vāhi ato’a tā’u e fa’ata’a nōna ra, ’ia pāpa’i i te parau, ’ia fa’atano ’e ’ia mā’iti ho’i i te reira, ’ia ti’a te mau mea ato’a i mua iā’u nei, mai te au i te ha’apāpūhia atu e te Vārua nā roto iāna ra.

14 ’E ’a tu’u atu i te feiā tā’u i parau iho nei ’ia fa’atumuhia i roto i te fenua ra nō Ziona, ma te vitiviti roa, rātou ’e tō rātou ’utuāfare ato’a, ’ia rave i taua mau mea ra mai te au ho’i i tā’u i parau ra.

15 ’E i teienei nō ni’a i te ha’aputuputura’a—’A tu’u atu i te ’episekōpo ’e te ta’ata ha’apa’o ’ohipa ’ia rave i te mau fa’aineinera’a nō taua mau ’utuāfare ra ’o tei fa’auehia ’ia haere mai i teie nei fenua, ma te vitiviti, ’e ’ia fa’atumu ho’i ia rātou i roto i tō rātou ra ’āi’a.

16 ’E e hōro’ahia i te toe’a o te mau peresibutero ’e te mau melo ato’a te tahi atu ā mau arata’ira’a a muri atu ra. ’Oia ïa. ’Āmene.