Tufa’a 67
E heheura’a tei hōro’ahia mai nā roto ia Iosepha Semita te peropheta, i Hiram, i Ohio, i te ’ōmuara’a nō Novema 1831. Te taime teie nō te hō’ē ’āmuira’a rahi ta’a ’ē, ’e ’ua ferurihia ’e ’ua fa’aotihia te nene’ira’a i te mau heheura’a i fāri’i-’ē-hia mai nō ’ō mai i te Fatu nā roto ia Iosepha Semita te peropheta (’a hi’o i te upo’o parau nō te tufa’a 1). Nō ha’amau noa a’enei William W. Phelps i te fare nene’ira’a a te ’Ēkālesia i Independence, i Missouri. ’Ua fa’aoti te ’āmuira’a e ha’apaparare i te mau heheura’a i roto i te Book of Commandments (Buka nō te mau fa’auera’a) ’e ’ia nene’i e 10 000 buka (tei ha’atopahia i ni’a i te fāito 3 000 buka nō te tahi mau fifi ’ite-’ore-hia). E rave rahi te mau taea’e ’o tei fa’a’ite pāpū mai ē, e parau mau roa te mau heheura’a i fa’aineinehia nō te nene’ira’a i taua taime ra, mai te au i tei fa’a’itehia mai ia rātou e te Vārua Maita’i, tei nīni’ihia mai i ni’a ia rātou ra. Tē fa’a’ite nei te ’ā’amu nō Iosepha Semita ē, i muri a’e i te fāri’ira’ahia te heheura’a tei ’itehia i roto i te tufa’a 1, ’ua tupu mai ra te tahi ’āparaura’a nō ni’a i te huru paraparaura’a tei fa’a’ohipahia i roto i te mau heheura’a. ’Ua hōro’ahia mai teie nei heheura’a i muri iho.
1–3, Tē fa’aro’o nei te Fatu i te mau pure ’e tē pāruru nei ’oia i tōna mau peresibutero ; 4–9, ’Ua tāmata ’oia i te ta’ata ’aravihi roa a’e ’ia pāpa’i i te hō’ē heheura’a ’o tei ’aifāito i te hō’ē o te mau heheura’a iti roa a’e nāna ; 10–14, ’Ua fa’ahuru-’ē-hia te mau peresibutero ha’apa’o maita’i e te Vārua ’e ’ua ’ite rātou i te mata o te Atua.
1 Inaha, ’e ’a fa’aro’o mai ho’i, ’o ’outou e te mau peresibutero nō tā’u nei ’ēkālesia, ’o tei ha’aputuputu ’āmui mai ia ’outou iho, ’e ’ua fa’aro’ohia e au tā ’outou mau pure, ’e ’ua ’itea iā’u tō ’outou ’ā’au, ’e ’ua tae mai ho’i tō ’outou mau hina’aro i ni’a i mua iā’u nei.
2 Inaha, ’e ’a hi’o mai na, tei ni’a tō’u mata ia ’outou na, ’e tei roto te mau ra’i ’e te fenua nei i tō’u nei rima, ’e nā’u ho’i te mau tao’a rahi nō te ao mure ’ore e hōro’a atu.
3 ’Ua fa’aitoito ’outou i te ti’aturi ē e fāri’i ’outou i te ha’amaita’ira’a ’o tei fa’a’itehia atu ia ’outou na ; terā rā, ’e inaha, ’oia mau tē parau atu nei au ia ’outou na, i vai na ho’i te mata’u i roto i tō ’outou ’ā’au, ’e ’oia mau ïa, ’o teie ho’i te tumu ’aore ’outou i fāri’i.
4 ’E i teienei, tē hōro’a atu nei au, ’o te Fatu, ’ia ’outou i te ’itera’a pāpū i te parau mau nō teie nei mau fa’auera’a e vai nei i mua ia ’outou na.
5 I hi’o na ho’i ’outou i tō’u tāvini ra ia Iosepha Semita, tamaiti, ’e ’ua mātau ho’i ’outou i te huru nō tāna mau pāpa’ira’a, ’e ’ua ’ite ’outou i tāna mau hapa ri’i ; ’e ’ua ’imi ’outou i te ’ite i roto i tō ’outou ’ā’au ’ia ti’a ia ’outou ’ia pāpa’i maita’i a’e i te huru o tāna mau parau ; ’ua ’ite ato’a ho’i ’outou i te reira.
6 I teienei, ’a ’imi ’outou i roto i te Book of Commandments (Buka nō te mau fa’auera’a), i te heheura’a iti a’e i te mau heheura’a ato’a, ’e ’a mā’iti i te hō’ē ta’ata ’o tei hau a’e i te pa’ari i rotopū ia ’outou na ;
7 ’E ’aore rā, mai te mea tē vai ra te hō’ē i rotopū ia ’outou na ’o tē nehenehe ’ia pāpa’i i te hō’ē heheura’a mai te reira, ’ei reira ’outou e ti’a ai i te paraura’a mai ē, ’aore ’outou i ’ite ē e parau mau roa te reira ;
8 Terā rā, mai te mea ’aita e oti te hō’ē ia ’outou ’ia pāpa’i mai te reira te huru, e fa’ahapahia ïa ’outou mai te mea ’aore ’outou e fa’a’ite atu ē, e parau mau roa taua mau mea ra.
9 ’Ua ’ite ho’i ’outou ē, ’aore e mea parauti’a ’ore i roto i taua mau mea ra, ’e nō ni’a mai ho’i te mau mea parauti’a i te haerera’a mai i raro nei, nō ’ō mai na ho’i i te Metua nō te mau māramarama ra.
10 ’E teie fa’ahou ā, ’oia mau tē parau atu nei au ia ’outou na, ’o tō ’outou ïa ti’ara’a, ’e tē hōro’a atu nei au i te fafaura’a ia ’outou ’o tei fa’atōro’ahia nō teie nei ’ohipa mo’a, mai te mea e fa’ata’a ’ē roa ’outou i te fe’i’i ’e te mata’u, ’e e fa’aha’eha’a ho’i ia ’outou iho i mua iā’u nei, nō te mea ’aore ā i nava’i tō ’outou ha’eha’a, e mahae ïa te pāruru ’e e ’ite mata mai ’outou iā’u nei, ’e e ’ite ho’i ’outou ē, tē vai nei au—’eiaha nā roto i te ferurira’a pae tino ’e i te ferurira’a ta’ata noa nei, nā roto rā i tā te vārua ra.
11 ’Aore ho’i te hō’ē ta’ata i roto i te tino noa nei i ’ite mata i te Atua i te hō’ē noa atu taime, maori rā ’ia fa’ahuru-’ē-hia taua ta’ata ra e te Vārua o te Atua.
12 ’Aore ato’a e ti’a i te hō’ē ta’ata noa nei ’ia ti’a i mua i te aro o te Atua, ’eiaha ato’a mai te ferurira’a pae tino nei.
13 ’Aore e ti’a ia ’outou ’ia ti’a i mua i te aro o te Atua i teienei, ’aore ato’a ho’i i mua i te utuutura’a a te mau melahi ; nō reira ’a tāmau noa i te fa’a’oroma’i ē tae noa atu i te taime ’outou e maita’i roa ai.
14 ’Eiaha tō ’outou mau ferurira’a e fāriu atu i muri ; ’e ’ia tae i te tau ’outou e ti’amā ai, i te taime i ha’apa’ohia e au ra, e ’ite mata ai ’e e ’ite pāpū roa ho’i ’outou i te mana tei hōro’ahia atu ia ’outou, nā roto i te rima o tō’u tāvini ra ’o Iosepha Semita, tamaiti. ’Āmene.