Tufa’a 73
E heheura’a tei hōro’ahia mai ia Iosepha Semita te peropheta ’e Sidney Rigdon, i Hiram, i Ohio, i te 10 nō Tēnuare 1832. Mai te pae mātāmua nō te ’āva’e Tītema nā mua atu ’ua rave noa te peropheta ’e Sidney i te ’ohipa porora’a ’evanelia, ’e nā roto i teie rāve’a, e rave rahi te mau mea i manuia nō te fa’aiti i te mau mana’o au ’ore i tupu nō ni’a i te ’Ēkālesia (’a hi’o i te upo’o parau nō te tufa’a 71.)
1–2, ’Ua tītauhia te mau peresibutero ’ia tāmau noa i te poro i te ’evanelia ; 3–6, ’Ua tītauhia Iosepha Semita ’e Sidney Rigdon ’ia tāmau noa i te ’īriti i te Bibilia ē tae noa atu ’ua oti te reira.
1 Nō te mea ’oia mau ïa, tē nā ’ō mai nei te Fatu, e mea ti’a ïa iā’u nei ’ia tāmau noa rātou i te poro haere i te ’evanelia, ’e i te a’ora’a i te mau ’ēkālesia i te mau retioni ē ’ati noa a’e, ē tae noa atu i te taime nō te ’āmuira’a ;
2 ’E i reira, inaha, e fa’a’itehia atu ia rātou, nā roto i te reo o te ’āmuira’a, tā rātou mau misiōni e rave rahi.
3 I teienei, ’oia mau tē parau atu nei au ia ’ōrua, e tō’u nā tāvini e Iosepha Semita, tamaiti, ’e e Sidney Rigdon, tē nā ’ō mai ra te Fatu, e mea ti’a ïa ia ’ōrua ’ia ’īriti fa’ahou i te parau ;
4 ’E, mai te mea e ti’a ’ia nā reira, ’ua ti’a roa ïa ia ’ōrua ’ia poro haere i te ’evanelia i roto i te mau retioni ē ’ati noa a’e ē tae noa atu i te taime nō te ’āmuira’a ; ’e i muri iho i te reira e mea ti’a ïa ia ’ōrua ’ia rave ā i te ’ohipa ’īritira’a parau ē tae noa atu i te taime ’ua oti te reira.
5 ’E ’a tu’u atu i teie ’ei hi’ora’a nā te mau peresibutero ē tae noa atu i te taime e hōro’a-fa’ahou-hia mai ai te tahi atu ā ’ite, mai te au i tei pāpa’ihia ra.
6 I teienei, e ’ore au e hōro’a fa’ahou atu ā i te tahi atu ā mau mea ia ’ōrua i teie nei taime. ’A tātua na i tō ’ōrua tau’upu, ’e ’ia pāpū roa ho’i te ferurira’a. ’Oia ïa. ’Āmene.