Tufa’a 85
E heheura’a tei hōro’ahia mai nā roto ia Iosepha Semita te peropheta, i Kirtland, i Ohio, i te 27 nō Novema 1832. Teie tufa’a nō te heheura’a e tufa’a ïa nō te hō’ē rata a te peropheta ia William W. Phelps, ’o tē ora ra i Independence, i Missouri. E pāhono te reira i te mau uira’a nō ni’a i te feiā mo’a i fa’anu’u atu i Ziona tei ’ore rā i pe’e i te fa’auera’a ’ia ha’amo’a i tā rātou mau faufa’a ’āi’a ’e nō reira, ’aita rātou i fāri’i i tō rātou mau ’āi’a mai te au i te fa’anahora’a fa’atumuhia i roto i te ’Ēkālesia.
1–5, E fāri’ihia te mau ’āi’a i Ziona nā roto i te ha’amo’ara’a ; 6–12, Nā te hō’ē ta’ata mana ’e te pūai e hōro’a i te feiā mo’a tō rātou ’āi’a i Ziona.
1 E ’ohipa nā te pāpa’i parau o te Fatu, ’o tāna i fa’ata’a, ’ia ha’apa’o i te ’ā’amu, ’e te pāpa’a parau ho’i nō te ’ēkālesia nō te mau mea ato’a tē tupu i Ziona, ’e nō rātou ato’a ho’i ’o tē ha’amo’a i te mau faufa’a, ’e ’o tē fāri’i ho’i i te mau ’āi’a mai te au i te ture nō ’ō mai i te ’episekōpo ra ;
2 ’E nō te huru ato’a ho’i nō tō rātou orara’a, tō rātou fa’aro’o, ’e tā rātou mau ’ohipa ; ’e ’oia ato’a nō te mau ta’ata tāiva ’o tē tāiva ’ē atu i muri iho i te fāri’ira’a i tō rātou ra mau ’āi’a.
3 ’Aita i ti’a i te hina’aro ’e te fa’auera’a a te Atua ia rātou ’o tē ’ore e fāri’i i tō rātou ’āi’a nā roto i te ha’amo’ara’a, mai te au i tāna ture, tāna i hōro’a mai, ’ia ti’a iāna ’ia tītau atu i te tufa’a ’ahuru i tōna mau ta’ata, nō te fa’aineine ia rātou nō te mahana nō te tāho’ora’a ’e te pau auahi, ’ia pāpa’ihia tō rātou i’oa i pīha’i iho i te i’oa o te mau ta’ata o te Atua.
4 E ’ore ato’a e ti’a ’ia ha’apa’ohia tō rātou tuatāpapara’a tupuna ’e ’aore rā ’ia tāpe’ahia i te vāhi e ’itehia ai i ni’a i te hō’ē o te mau pāpa’a parau ’e ’aore rā ’ā’amu nō te ’ēkālesia.
5 ’Eiaha tō rātou mau i’oa ’ia ’itehia, ’eiaha ato’a te mau i’oa o te mau metua tāne, ’eiaha ato’a te mau i’oa o te mau tamari’i ’ia pāpa’ihia i roto i te buka nō te ture a te Atua, tē nā reira mai ra te Fatu Sabaota ra.
6 ’Oia ïa, tē nā ’ō mai ra te reo iti ha’iha’i, ’o tei parau marū noa mai nā roto ’e ’o tei ha’aputa ho’i i te mau mea ato’a, ’e ’ua fa’arurutaina pinepine te reira i tō’u mau ivi ’a fa’a’ite mai ai te reira, i te nā-’ō-ra’a mai ē :
7 ’E a muri a’era, e tono atu vau, ’o te Fatu ’o te Atua, i te hō’ē ma te pūai ’e te itoito, i te tāpe’ara’a i te sēpeta nō te mana i roto i tōna ra rima, ma te fa’a’ahuhia i te māramarama ’ei tāpo’i nōna, ’e ma te fa’ahiti tōna ra vaha i te mau parau, ’oia te mau parau mure ’ore ; e riro ho’i tōna ’ā’au ’ei pape piha’a nō te parau mau, nō te fa’anahonaho pāpū i te fare o te Atua, ’e nō te fa’aineine i te mau tufa’a fenua ’ei mau ’āi’a nō te feiā mo’a ’o tei ’itehia tō rātou mau i’oa, ’e te mau i’oa o tō rātou mau metua, ’e tō tā rātou mau tamari’i ho’i i roto i te buka nō te ture a te Atua ;
8 ’E ’o te reira ta’ata ’o tei pi’ihia e te Atua ’e ’ua fa’ata’ahia ho’i, ’o tē fa’atoro atu i tōna ra rima nō te turuturu i te ’āfata a te Atua, e topa iho ā ’oia i te te’a nō te pohe, mai te tumu rā’au ’o tei tano i te pāti’ara’a nō te uira ’anapa roa ra.
9 ’E ’o rātou ato’a ’o tei ’ore i tāpa’ohia i roto i te buka ha’amana’ora’a, e ’ore ho’i rātou e fāri’i i te ’āi’a i te reira mahana, e tāpū-’ē-hia atu rā rātou, ’e e fa’ata’ahia tā rātou tufa’a i rotopū i te feiā ti’aturi ’ore, tei reira te ’auēra’a ’e te ’au’aura’a niho ra.
10 E ’ere nā’u iho teie mau mea tā’u e parau nei ; nō reira, mai te au i tā te Fatu e parau mai ra, e nā reira ato’a ’oia i te fa’atupu.
11 ’E ’o rātou ’o tei mau i te Autahu’ara’a teitei, ’e ’aita tō rātou mau i’oa i pāpa’ihia i roto i te buka nō te ture, ’e ’aore rā ’o tei ’itehia ē ’ua tāiva ’e ’aore rā ’ua tāpū-’ē-hia atu mai roto atu i te ’ēkālesia, ’e rātou ato’a ’o tei mau ato’a i te autahu’ara’a iti, ’e te mau melo noa, i te reira mahana e ’ore roa rātou e fāri’i i te ’āi’a i rotopū i te feiā mo’a o Tei Teitei Roa ra ;
12 Nō reira, e ravehia ïa ia rātou ra mai tei ravehia i te mau tamari’i a te tahu’a, mai te au i te ’itehia ’e i te pāpa’ihia i roto i te pene piti ’e te ’īrava ono ’ahuru ma hō’ē ’e ma piti nō Ezera.