Sección 85
Rrevelasiõ oñemeʼẽvaʼekue José Smith upe Proféta rupive, Kirtland, Ohio-pe, noviembre 27, 1832-pe. Ko sección oñeguenohẽ kuatiañeʼẽ Proféta ohaivaʼekuégui William W. Phelps-pe, oikoʼakue Independence, Misuri-pe. Ombohovái porandukuéra umi santokuéra reheguáva, ovavaʼekue Sion-pe, ha katu ndojapoivaʼekue tembiapoukapy okonsagra hag̃ua imbaʼerepykuéra ha upévare ndohupytýikuri ijehejapyre Tupao orden-pe oĩháicha.
1–5, Sion-pe, umi jehejapyre ojehupytyvaʼerã konsagrasiõ rupive; 6–12, Peteĩ ipuʼakapáva ha imbaretéva omeʼẽta santokuérape ijehejapyre Sion-pe.
1 Ñandejára secretario rembiaporã, upe haʼe ohenóivape, togueraha peteĩ tembiasa ha tupao registro general opa mbaʼe Sion-pe oikóvagui, ha opa umi okonsagrávagui mbaʼerepykuéra ha legalmente ohupytýva jehejapyrekuéra obispo-gui;
2 Ha avei mbaʼéicha omboguata hikuái hekove, ijerovia ha hembiapokuéra; ha avei umi apóstatagui, ojeíva ohupyty rire umi ijehejapyre.
3 Ombojoavy Tupã rembipota ha tembiapoukapýgui tojehai Tupã tavayguakuéra rérandi umi, konsagrasiõ rupi, ndohupytýiva ijehejapyre rerakuéra, iléipe oĩháicha, haʼe omeʼẽvaʼekue, odiesma hag̃ua itavayguakuérape, ombosakoʼi hag̃ua chupekuéra vengánsa ha jehapy árape g̃uarã.
4 Ni noñeñongatumoʼãi iñemoñareatykuéra, ni ndojejuhumoʼãi mbaʼevéichagua tupao jehaipyre térã rembiasakuépe.
5 Ni umi héra, ni ituvakuéra réra, ni itaʼyrakuéra réra ndojehaimoʼãi Tupã léi arandukápe, heʼi Señor de los Ejércitos.
6 Héẽ, péicha heʼi upe ñeʼẽpu vevuimi ha oguapymíva, opa mbaʼe rupi oñeʼẽmbegue ha oikepypukúva, ha pyʼỹi omboryrýiva umi che kangue ojehechauka aja, heʼívo:
7 Ha ojehúta Che, Tupã Ñandejára, amboúta peteĩ ipuʼakapáva ha imbaretéva, ojapyhývo pokatu vára ipópe, oñeñuvãva tesapépe ahojapeguáicha, ijuru heʼítava ñeʼẽnguéra, umi ñeʼẽ ijapyraʼỹva; ha umi hyepy katu haʼe añetegua yvu, omoĩ hag̃ua hekópe Tupã róga, ha sortéope omeʼẽ hag̃uáicha santokuéra jehejapyre, herakuéra, itúva ha itaʼyrakuéra rérandi, ojehai hag̃ua Tupã léi arandukápe;
8 Ha katu upe kuimbaʼe, Tupãre oñehenoivaʼekue ha oñembohéra, oipysóva ipo ojoko hag̃ua Tupã árka, hoʼáta ñemano dárdo rupive, yvyramáta hoʼaháicha aratiri mimbi mbaretére.
9 Ha opavave umi héra ndojehaíriva manduʼa arandukápe, ndojuhumoʼãi jehejapyre upe árape, ha katu ojepeʼáta hikuái, ha oñemeʼẽta imbaʼerãnguéra umi ogueroviaʼỹva apytépe, oĩháme tasẽ ha tãi pururũ.
10 Che ndaʼéi koʼã mbaʼe chehegui; upévare, Ñandejára oñeʼẽháicha, péicha avei haʼe ojapóta.
11 Ha umi sumo sacerdocio-gua, ha avei sacerdocio menor-gua ha miembro-kuéra, umi héra ndojehaíriva léi arandukápe, térã ojepilla oapostatahague, térã oñemosẽhague tupaógui, ndojuhumoʼãi jehejapyre upe árape, Ijyvatevéva santokuéra apytépe;
12 Upévare, ojejapóta hesekuéra upe sacerdote raʼykuérandicha, ojehaíva Esdras capítulo segundo, versículo setenta y uno ha dos-pe.