1 Tē nā ’ō mai ra te Fatu, ’oia mau, ’oia mau tē parau atu nei au ia ’oe, e tā’u tamaiti, ’ua fa’a’orehia tā ’oe nā mau hara, mai te au i tā ’oe ra tītaura’a, nō te mea ’ua tae mai tā ’oe mau pure ’e te mau pure ho’i a tō ’oe nā mau taea’e i ni’a, i tō’u nei tari’a.

2 Nō reira, ’ua ha’amaita’ihia ’oe mai teie taime atu ā, ’o ’oe tei mau i te mau tāviri nō te bāsileia i hōro’ahia ia ’oe na ; ’o te bāsileia ïa ’o tē fa’ati’ahia nō te taime hope’a.

3 ’Oia mau tē parau atu nei au ia ’oe na, e ’ore roa te mau tāviri nō teie bāsileia e rave-’ē-hia atu ia ’oe, ’a vai noa ai ’oe i ni’a i te ao nei, e ’ore roa ato’a ho’i i roto i te ao a muri atu ;

4 Noa atu rā i te reira, nā roto ia ’oe te mau heheura’a e hōro’ahia atu ai i te tahi ra, ’oia ïa, i te ’ēkālesia.

5 ’E ’o rātou ato’a ’o tē fāri’i i te mau heheura’a nō ’ō mai i te Atua, ’ia ara māite rātou i te huru nō tā rātou ha’apa’ora’a i te reira, ’o te ferurihia taua mau mea ’ei mea faufa’a ’ore, e fa’ahapahia ai rātou, ’e e turori e hi’a atu ho’i ’ia farara mai te mau vero, ’e ’ia tupu mai te mau mata’i rarahi, ’e ’ia topa mai te mau ua, ’e ’ia tūpa’i ho’i i ni’a i tō rātou ra fare.

6 ’E teie fa’ahou ā, ’oia mau tē parau atu nei au i tō ’oe nā taea’e ra ia Sidney Rigdon ’e ia Frederick G. Williams, ’ua fa’a’ore-ato’a-hia tā rāua mau hara, ’e ’ua ’aifāito rāua ia ’oe i te maura’a i te mau tāviri nō teie bāsileia hope’a nei ;

7 ’Oia ato’a, nā roto i tā ’oe fa’aterera’a te mau tāviri nō te fare ha’api’ira’a a te mau peropheta, ’o tā’u i fa’aue atu ’ia fa’anahonahohia ;

8 ’E nā roto i te reira rāua e maita’i roa ai i roto i tā rāua ’ohipa nō te fa’aorara’a i tō Ziona, ’e tō te mau nūna’a nō ’Īserā’ela, ’e tō te mau ’Ētene ho’i, ’e te feiā ato’a ’o tē ti’aturi mai ;

9 ’E nā roto i tā ’oe fa’aterera’a rāua e fāri’i ai i te parau, ’e nā roto ho’i i tā rāua ra fa’aterera’a te parau e ha’apararehia atu ai i te mau hope’a o te ao nei, i te mau ’Ētene nā mua, ’e i muri a’e, inaha, e fāriu atu rāua i te mau ’āti Iuda ra.

10 ’E i reira e tae mai ai te mahana e fa’a’itehia mai ai te rima o te Fatu nā roto i te mana, i te fa’a’ite-pāpū-ra’a mai i te mau nūna’a, te mau nūna’a ’ētene, ’e te ’utuāfare o Iosepha, i te ’evanelia nō tō rātou fa’aorara’a.

11 I te mea ho’i ē a muri a’era, i taua mahana ra, e fa’aro’o te mau ta’ata ato’a i te ’īra’a nō te ’evanelia nā roto i tōna iho reo, ’e i tāna iho parau, nā roto ia rātou ’o tei fa’atōro’ahia i teie nei mana, nā roto i te fa’aterera’a a te Fa’aa’o, i nīni’ihia mai i ni’a ia rātou nō te heheura’a a Iesu Mesia.

12 ’E i teienei, ’oia mau tē parau atu nei au ia ’oe, tē hōro’a atu nei au i te hō’ē fa’auera’a ia ’oe ’ia tāmau noa ’oe i roto i te ’ohipa mo’a ’e nō te peresidenira’a.

13 ’E ’ia oti ia ’oe te ’īritira’a i te mau buka a te mau peropheta, mai reira atu ïa ’oe i te peresideni i ni’a i te mau ’ohipa nō te ’ēkālesia ’e nō te fare ha’api’ira’a ho’i ;

14 ’E i terā taime ’e i terā taime, mai te au i te fa’a’itehia mai e te Fa’aa’o ra, ’ia fāri’i i te mau heheura’a nō te tātara i te mau parau ’aro nō te bāsileia ;

15 ’E ’ia fa’a’āfaro i te mau ’ēkālesia, ’e ’ia ha’api’i mai ’e ’ia noa’a mai te ’ite, ’e ’ia mataro i te mau buka maita’i ato’a, ’e te mau reo, ’e te mau parau ’e’ē, ’e te mau ta’ata ato’a.

16 ’E teie tā ’outou ’ohipa ’e tō ’outou tōro’a i roto i tō ’outou orara’a tā’āto’a, ’ia peresideni i roto i te mau ’āpo’ora’a, ’e ’ia fa’a’āfaro noa i te mau ’ohipa ato’a nō teie nei ’ēkālesia ’e te bāsileia ho’i.

17 ’Eiaha ’outou e ha’amā, ’eiaha ato’a ’ia tāfifihia ; ’ia a’ohia rā ’outou i tō ’outou ’ā’au teitei ’e te te’ote’o ho’i, nō te mea nā te reira e ha’amau atu i te mārei i ni’a i tō ’outou vārua ta’ata.

18 ’A fa’a’āfaro na ’outou i tō ’outou mau ’utuāfare ; ’a fa’aātea ’ē roa atu i te fa’atau ’e te vi’ivi’i ia ’outou.

19 I teienei, ’oia mau tē parau atu nei au ia ’oe na, ’ia fa’aineine-’oi’oi-hia te hō’ē vāhi nō te ’utuāfare o tō ’oe tauturu ’e te pāpa’i parau ho’i, ’oia ’o Frederick G. Williams.

20 ’E ’ia fa’aea noa tō’u tāvini pa’ari ra ’o Iosepha Semita, metua, ’e tōna ra ’utuāfare i te vāhi i pārahihia e ana i teienei ; ’e ’eiaha te reira ’ia ho’ohia atu ē tae noa atu i te taime te vaha o te Fatu e fa’ata’a mai ai.

21 ’E ’ia fa’aea noa tō’u tauturu, ’oia ’o Sidney Rigdon, i te vāhi i pārahihia e ana i teienei ē tae noa atu i te taime te vaha o te Fatu e fa’ata’a mai ai.

22 ’E ’ia ’imi itoito te ’episekōpo i te hō’ē ta’ata ha’apa’o, ’ei ta’ata e tao’a rahi tāna e pu’e noa ra—’ei ta’ata nō te Atua, ’e te fa’aro’o pūai ho’i—

23 ’E nā roto i te reira e ti’a ai iāna ’ia ’aufau i te mau tārahu ato’a ; ’ia ’ore te fare vaira’a tao’a a te Fatu ’ia fa’a’inohia i mua i te mata o te ta’ata.

24 ’A ’imi itoito noa, ’a pure noa i te mau taime ato’a, ’e ’a ti’aturi noa ho’i, ’e e ’āmuihia mai te mau mea ato’a ’ei maita’i nō ’outou, mai te mea e haere tītī’aifaro noa ’outou ma te ha’amana’o i te fafaura’a tā ’outou i fafau, te tahi i te tahi ra.

25 ’Ia fa’aiti-noa-hia tō ’outou mau ’utuāfare, ’oia mau ā te ’utuāfare o tō’u tāvini pa’ari ra ’o Iosepha Semita, metua, tē parauhia nei ho’i nō rātou e ’ere i te melo nō tō ’outou mau ’utuāfare ;

26 ’Ia ’ore te mau mea ’o tei fa’ata’ahia nā ’outou, nō te fa’atupu i tā’u nei ’ohipa, ’ia rave-’ē-hia atu ia ’outou na, ’a hōro’ahia atu ai ia rātou ’o tē ’ore e tano ’ia fāri’i—

27 ’E nā roto i te reira ’outou e tāfifihia ai i te ravera’a i taua mau mea ra ’o tā’u i fa’aue atu ia ’outou na.

28 ’E teie fa’ahou ā, ’oia mau tē parau atu nei au ia ’oe na, ’o tō’u ïa hina’aro ’ia fāri’i tō’u tāvini vahine ra, ’o Vienna Jaques, i te moni nō tāna ra mau ha’amāu’ara’a, ’e ’ia haere atu ’oia i ni’a i te fenua ra nō Ziona ;

29 ’E e mea ti’a ïa ’ia ha’amo’ahia mai te toe’a o te moni iā’u nei, ’e e fa’arahihia tāna i te taime e ha’apa’ohia e au ra.

30 ’Oia mau tē parau atu nei au ia ’oe na, e mea ti’a ïa i mua i tō’u nei mata ’ia haere atu ’oia i te fenua nō Ziona, ’e ’ia fāri’i i te ’āi’a nō ’ō mai i te rima o te ’episekōpo ;

31 ’Ia ti’a iāna ’ia fa’aea ma te hau, mai te mea e ha’apa’o maita’i noa ’oia, ’e ’ia ’ore ho’i ’oia ’ia fa’aea noa ma te ’ohipa ’ore i tōna mau mahana mai te reira taime atu ā.

32 ’E inaha, ’oia mau tē parau atu nei au ia ’oe na, e pāpa’i ’oe i teie nei fa’auera’a, ’e ’a parau atu i tō ’oe mau taea’e i Ziona, nā roto i te here ’e te aroha, ’ua mā’iti ato’a vau ia ’oe ’ia peresideni i ni’a ia Ziona i te taime i ha’apa’ohia e au ra.

33 Nō reira ’ia fa’aea rātou i te fa’arohirohi iā’u nei nō ni’a i teie nei mea.

34 Inaha, tē parau atu nei au ia ’oe na, tē ha’amata nei tō ’oe mau taea’e i Ziona i te tātarahapa mai, ’e tē ’oa’oa nei te mau melahi ia rātou.

35 Noa atu rā i te reira, ’aita vau i māuruuru i te mau mea e rave rahi ; ’e ’aita ho’i au i māuruuru i tō’u tāvini ra ia William E. McLellin, ’aore ato’a ho’i i tō’u tāvini ra ia Sidney Gilbert ; ’e i te ’episekōpo ato’a, ’e te tahi atu ā mau ta’ata ato’a ho’i, e rave rahi te mau mea i tītauhia ia rātou ’ia tātarahapa.

36 Terā rā, ’oia mau tē parau atu nei au ia ’oe na, e mārō atu vau, ’o te Fatu, ia Ziona, ’e e tītau onoono atu ho’i i tōna mau ta’ata pūai, ’e e fa’autu’a atu iāna ē tae noa atu i te taime ’oia e upo’oti’a ai ’e e mā ai ho’i i mua iā’u nei.

37 E ’ore roa ho’i ’oia e ’īriti-’ē-hia atu i tōna ra vāhi. ’O vau ho’i, ’o te Fatu, tei parau i te reira. ’Āmene.