1 ’Oia mau, tē nā ’ō mai ra te Fatu : A muri a’era, te vārua ta’ata tāta’itahi ato’a ’o tē fa’aru’e i tāna ra mau hara ’e ’o tē haere mai iā’u nei, ’e ’o tē ti’aoro mai i tō’u nei i’oa, ’e ’o tē ha’apa’o i tō’u nei reo, ’e ’o tē ha’apa’o ho’i i tā’u mau fa’auera’a, e ’ite mai ïa rātou i tō’u nei mata ’e e ’ite ho’i rātou ē, tē vai nei au ;

2 ’E ’o vau nei ïa te māramarama mau ’o tē ha’amāramarama nei i te mau ta’ata ato’a ’o tē tae mai i roto i te ao nei ;

3 ’E tei roto vau i te Metua, ’e tei roto ho’i te Metua iā’u nei, ’e te Metua ’e ’o vau nei ’ua hō’ē ïa—

4 Te Metua nō te mea ’ua hōro’a mai ’oia iā’u i te tahi tufa’a nō tōna ra ’īra’a, ’e te Tamaiti ho’i nō te mea i vai na vau i roto i te ao nei ’e ’ua fa’ariro vau i te tino tāhuti nei ’ei sēkene nō’u, ’e ’ua pārahi ho’i i rotopū i te mau tamaiti a te ta’ata nei.

5 I vai na ho’i au i roto i te ao nei ’e ’ua fāri’i mai au i tā tō’u ra Metua, ’e ’ua fa’a’ite-pāpū-hia mai tāna ra mau ’ohipa.

6 ’E ’ua ’ite Ioane ’e ’ua fa’a’ite pāpū mai ho’i nō ni’a i te ’īra’a o tō’u ra hanahana, ’e e fa’a’itehia mai ho’i te ’īra’a nō tā Ioane ra parau fa’a’ite a muri atu.

7 ’E ’ua fa’a’ite pāpū mai ra ’oia, i te nā-’ō-ra’a mai ē : ’Ua ’ite au i tōna hanahana, ’e i vai na ho’i ’oia i te mātāmua ra, hou roa te ao nei i vai mai ai ;

8 Nō reira, i te ha’amatara’a i vai na ho’i te Parau, ’e ’o ’oia ho’i te Parau, ’oia ho’i te ve’a nō te ora—

9 Te māramarama ’e te Tāra’ehara o te ao nei, te Vārua nō te parau mau, ’o tei tae mai i roto i te ao nei, nō te mea i hāmanihia na te ao nei e ana, ’e tei roto iāna te ora o te ta’ata ’e te māramarama ho’i o te ta’ata nei.

10 Nāna te mau ao i hāmani ; nāna te mau ta’ata i hāmani, nāna te mau mea ato’a i hāmani, ’e nā roto iāna, ’e nōna ho’i.

11 ’E tē fa’a’ite pāpū nei au, ’o Ioane ē, ’ua ’ite au i tōna hanahana, ’oia ho’i te hanahana o te Fānau tahi a te Metua, tei ’ī i te aroha ’e te parau mau, ’oia i te Vārua o te parau mau, ’o tei haere mai ’e ’o tei pārahi ho’i i roto i te tino nei, ’e ’o tei fa’aea i rotopū ia tātou.

12 ’E ’ua ’ite atu ra vau, ’o Ioane ē, ’aore ’oia i fāri’i i te īra’a i te mātāmua, ’ua fāri’i rā i te maita’i i muri a’e i te maita’i ;

13 ’E ’aore ’oia i fāri’i i te ’īra’a i te mātāmua, ’ua haere noa mai rā te maita’i i muri a’e i te maita’i, ē tae noa atu i te taime ’oia i fāri’i ai i te ’īra’a ;

14 ’E nō reira ’oia i parauhia ai te Tamaiti a te Atua, nō te mea ’aore ’oia i fāri’i i te ’īra’a i te mātāmua.

15 ’E tē fa’a’ite pāpū nei au, ’o Ioane, ’e inaha, vētea a’era te mau ra’i, ’e ’ua pou mai ra te Vārua Maita’i i ni’a iho iāna mai te hōho’a o te ’ū’upa ra, ’e ’ua tau mai ra i ni’a iho iāna, ’e ’ua tae mai ra te hō’ē reo nō te ra’i mai i te nā-’ō-ra’a mai ē : ’O tā’u Tamaiti here teie.

16 ’E tē fa’a’ite atu nei au, ’o Ioane ē, ’ua fāri’i ’oia i te ’īra’a o te hanahana o te Metua ;

17 ’E ’ua fāri’i ’oia i te tā’āto’ara’a o te mana, i tō te ao ra ’e i tō ni’a i te fenua nei, ’e tei iāna te hanahana o te Metua, nō te mea i pārahi na ’oia iāna.

18 ’E a muri a’era, mai te mea e ha’apa’o maita’i noa ’outou, e fāri’i ’outou i te ’īra’a nō te pāpa’a parau a Ioane.

19 Tē hōro’a atu nei au i teie mau parau ia ’outou ’ia māramarama ’outou ’e ’ia ’ite ho’i nāhea ’ia ha’amori, ’e ’ia ’ite e aha tā ’outou e ha’amori, ’ia ti’a ia ’outou ’ia haere mai i te Metua i roto i tō’u nei i’oa, ’e ’ia fāri’i i tōna ’īra’a i te tau i ha’apa’ohia.

20 Nō te mea ’ia ha’apa’o ’outou i tā’u mau fa’auera’a e fāri’i ïa ’outou i tōna ra īra’a, ’e e fa’ahanahanahia ho’i i roto iā’u mai iā’u nei ho’i i roto i te Metua ; nō reira, tē parau atu nei au ia ’outou, e fāri’i ’outou i te maita’i i muri a’e i te maita’i.

21 ’E i teienei, ’oia mau tē parau atu nei au ia ’outou na, i te Metua ra vau i te mātāmua, ’e ’o vau te Matahiapo ;

22 ’E ’o rātou ato’a ’o tei fānauhia mai nā roto iā’u nei e tufa’a ïa tā rātou nō te hanahana o te reira, ’e nō te ’ēkālesia rātou a te Matahiapo ra.

23 Tei te Metua ato’a ra ho’i ’outou i te ha’amatara’a ; e Vārua ato’a ho’i, ’oia ho’i te Vārua nō te parau mau ;

24 ’E te parau mau ra ’o te ’ite ïa i te mau mea i tō rātou huru mau i teienei, i te mātāmua ra, ’e a muri atu ;

25 ’E ’o tei hau a’e ’e ’aore rā ’o tei iti a’e i teie, ’o te vārua ïa nō taua ta’ata ’ino ra ’o tei ha’avare mai te mātāmua mai ā.

26 Te Vārua nō te parau mau ra nō te Atua ïa. ’O vau nei te Vārua nō te parau mau, ’e ’ua fa’a’ite pāpū Ioane i te parau nō’u, i te nā-’ō-ra’a mai ē : ’Ua fāri’i ’oia i te ’īra’a nō te parau mau, ’oia ïa, i te tā’āto’ara’a o te parau mau ;

27 ’Aore roa te hō’ē ta’ata e fāri’i i te ’īra’a maori rā ’ia ha’apa’o ’oia i tāna mau fa’auera’a.

28 ’O ’oia ’o tē ha’apa’o i tāna mau fa’auera’a e fāri’i ïa i te parau mau ’e te māramarama, ē tae noa atu i te taime ’oia e fa’ahanahanahia ai i roto i te parau mau ’e e ’ite ai ho’i i te mau mea ato’a.

29 I vai ato’a na ho’i te ta’ata nei i te Atua i te mātāmua ra. Te ’ite, ’oia ho’i te māramarama nō te parau mau, e ’ere ïa i te mea i hāmanihia, e ’ore roa ato’a e ti’a ’ia hāmanihia.

30 ’O te tā’āto’ara’a o te parau mau ra, ’ua vai ti’amā noa ïa i roto i te reira ao tā te Atua i tu’u atu, ’ia ha’apa’o noa i tāna iho, mai te tahi atu ho’i ’ite tā’āto’a ; ’āhiri ’aita rā, ’aore ïa e orara’a.

31 Inaha, ’o teie ïa te ti’amāra’a o te ta’ata nei, ’e ’o teie ïa te fa’ahapara’a o te ta’ata nei ; nō te mea ’o te mau mea ato’a ’o tei vai noa na mai te mātāmua mai ā, ’ua fa’a’ite-pāpū-hia atu ïa ia rātou na, ’e e ’ore roa ho’i rātou e fāri’i i te māramarama.

32 ’E te ta’ata tāta’itahi ato’a ’o tei ’ore tōna vārua i fāri’i i te māramarama ra tei raro a’e ïa i te fa’ahapara’a.

33 E vārua ho’i te ta’ata nei. E mea mure ’ore te mau mea ri’i tumu, ’e te vārua ’e te mau mea ri’i tumu ra, ’ia tā’atihia ma te fa’ata’a-’ore-hia ra, e fāri’i ïa i te ’īra’a nō te ’oa’oa.

34 ’E ’ia fa’ata’a-’ē-hia ra, e ’ore roa ïa e ti’a i te ta’ata nei ’ia fāri’i i te ’īra’a nō te ’oa’oa.

35 ’O te mau mea ri’i tumu ra, ’o te sēkene ïa nō te Atua ; ’oia ïa, ’o te ta’ata nei ho’i, ’o te sēkene ïa nō te Atua, ’oia te mau hiero ; ’e ’o te hiero ’o tē ha’avi’ivi’ihia ra, nā te Atua ïa e ha’amou atu i taua hiero ra.

36 Te hanahana o te Atua ra, ’o te ’ite ïa, ’oia ho’i, te māramarama ’e te parau mau.

37 E fa’aru’e roa te māramarama ’e te parau mau i taua vārua ’ino ra.

38 E mea hara ’ore te mau vārua ato’a o te ta’ata nei i te ha’amatara’a ; ’e nō tō te Atua fa’aorara’a i te ta’ata nei i te hi’ara’a ra, ’ua riro fa’ahou ihora te ta’ata i te huru ’aru’arura’a, ’ei mea hara ’ore i mua i te Atua ra.

39 ’E ’ua haere mai ra taua vārua ’ino ra ’e ’ua ’āfa’i ’ē atu i te māramarama ’e te parau mau, nā roto i te ha’apa’o ’ore, mai roto atu i te mau tamari’i a te ta’ata nei, ’e nā roto ho’i i te peu tumu a tō rātou ra mau metua.

40 ’Ua fa’aue rā vau ia ’outou ’ia ha’api’i atu i tā ’outou mau tamari’i i roto i te māramarama ’e te parau mau.

41 Terā rā ’oia mau tē parau atu nei au ia ’oe, e tō’u tāvini e Frederick G. Williams, ’ua vai noa ’oe i raro a’e i teie nei fa’ahapara’a ;

42 ’Aita ho’i ’oe i ha’api’i atu i tā ’oe mau tamari’i i te māramarama ’e te parau mau, mai te au i te mau fa’auera’a ; ’e e mana ho’i tō taua vārua ’ino ra, i teienei ā, i ni’a ia ’oe, ’e ’o teie ho’i te tumu nō tō ’oe ’ati rahi.

43 ’E i teienei tē hōro’a atu nei au i te hō’ē fa’auera’a ia ’oe—mai te mea e hina’aro ’oe ’ia fa’aorahia mai, ’ia fa’a’āfaro ïa ’oe i tō ’oe iho ’utuāfare e ti’a ai, nō te mea e rave rahi te mau mea ti’a ’ore i roto i tō ’oe ’utuāfare.

44 ’Oia mau, tē parau atu nei au i tō’u tāvini ra ia Sidney Rigdon, i roto i te tahi mau mea ’aore ho’i ’oia i ha’apa’o i te mau fa’auera’a nō ni’a i tāna mau tamari’i ; nō reira, nā mua roa ’a fa’a’āfaro i tō ’oe ’utuāfare.

45 ’Oia mau, tē parau atu nei au i tō’u tāvini ra ia Iosepha Semita, tamaiti, ’oia ho’i, e parau vau ia ’outou ’ei mau hoa, nō te mea e mau hoa ho’i ’outou nō’u, ’e e noa’a ia ’outou te hō’ē ’āi’a i pīha’i iho iā’u nei—

46 ’Ua parau vau ia ’outou ’ei mau tāvini ’ei maita’i nō te ao nei, ’e e mau tāvini ho’i ’outou nō rātou ’ei maita’i ho’i nō’u nei—

47 ’E i teienei, ’oia mau tē parau atu nei au ia Iosepha Semita, tamaiti—’Aita ho’i ’oe i ha’apa’o i te mau fa’auera’a ’e ’ua ti’a roa ’ia ’avauhia ’oe i mua i te Fatu ;

48 E mea ti’a roa i tō ’oe ’utuāfare ’ia tātarahapa ’e ’ia ha’apae atu i te tahi mau mea, ’e ’ia ha’apa’o maita’i a’e i tā ’oe mau parau, ’ia ’ore rā e ’īriti-’ē-hia atu rātou i rāpae i tō rātou ti’ara’a.

49 ’O tā’u e parau atu nei i te hō’ē ra, ’o tā’u ato’a ïa e parau atu nei i te tā’āto’ara’a ; ’a pure tāmau noa, ’o te roa’a i taua vārua ’ino ra te mana i roto ia ’outou, ’e ’a ’īriti ’ē atu ai ho’i ia ’outou i rāpae i tō ’outou ti’ara’a.

50 E tō’u tāvini ’o Newel K. Whitney, e ’episekōpo ho’i nō tā’u ’ēkālesia, e mea ti’a iāna ’ia fa’atītī’aifarohia, ’e ’ia fa’a’āfaro ho’i i tōna ra ’utuāfare, ’e ’ia mata na i te fa’aitoito ia rātou ’ia ha’apa’o maita’i i roto i te ’utuāfare, ’e ’ia pure tāmau noa, ’ia ’ore rā e ’īriti-’ē-hia atu rātou i rāpae i tō rātou ra ti’ara’a.

51 I teienei, tē parau atu nei au ia ’outou na, e tō’u mau hoa, ’ia haere atu tō’u tāvini ra ’o Sidney Rigdon i tōna ra tere, ’e ’ia ha’avitiviti, ’e ’ia poro haere ho’i i te matahiti au maita’i o te Fatu, ’e te ’evanelia nō te fa’aorara’a, mai te au i tā’u e hōro’a atu iāna ’ia parau ra ; ’e nā roto i tā ’outou pure fa’aro’o i tāhō’ēhia ra, e turu atu vau iāna ra.

52 ’E ’a tu’u atu i tō’u nā tāvini ra ia Iosepha Semita, tamaiti, ’e ia Frederick G. Williams ’ia ha’avitiviti ato’a, ’e e hōro’ahia atu ia rāua mai te au i te pure fa’aro’o ; ’e mai te mea e ha’apa’o ’ōrua i tā’u mau parau, e ’ore roa ’ōrua e tāfifihia i roto i teie nei ao, e ’ore ato’a i te ao a muri atu.

53 ’E, ’oia mau tē parau atu nei au ia ’outou na, ’o tō’u hina’aro ïa ’ia ha’avitiviti ’outou i te ’īriti i tā’u mau pāpa’ira’a mo’a, ’e ’ia fāri’i ho’i i te ’ite nō te mau parau tuatāpapa, nō te mau fenua, ’e nō te mau bāsileia, ’e te mau ture a te Atua ’e tā te ta’ata nei, ’e teie mau mea ato’a nō te fa’aorara’a ïa o Ziona. ’Āmene.