1 ’Oia mau, tē nā ’ō mai ra te Fatu ia ’outou ’o tā’u i here, ’e ’o rātou ’o tā’u i here, e fa’atītī’aifaro ato’a ïa vau ’ia ti’a i tā rātou ra mau hara ’ia fa’a’orehia, nō te mea nā roto i te fa’atītī’aifarora’a e fa’aineine ai au i te rāve’a nō te fa’aora ia rātou i roto i te mau mea ato’a, ’ia ora rātou i te fa’ahemara’a ; ’e ’ua here ho’i au ia ’outou na—

2 Nō reira, ’ia fa’atītī’aifarohia ’outou e ti’a ai ’e ’ia ’avauhia ho’i i mua i tō’u nei aro ;

3 Nō te mea ’ua hara ’outou iā’u nei i te hō’ē hara rahi, i te mea ’aore ’outou i ha’amana’o i te fa’auera’a rahi i roto i te mau mea ato’a, ’o tā’u i hōro’a atu ia ’outou na nō ni’a i te hāmanira’a i tō’u fare ;

4 Nō te fa’aineinera’a ’o tā’u i ’ōpua nō te fa’aineine i tā’u mau ’āpōsetolo nō te tope i tā’u ’ō vine i te topera’a hope’a, ’ia ti’a iā’u nei ’ia fa’atupu i tā’u ’ohipa ta’a ’ē, ’ia ti’a ho’i iā’u nei ’ia nīni’i atu i tō’u nei Vārua i ni’a iho i te mau ta’ata ato’a—

5 Inaha rā, ’oia mau tē parau atu nei au ia ’outou na, e rave rahi ho’i ’o tei fa’atōro’ahia i rotopū ia ’outou na, ’o tā’u i pi’i, e mea iti rā tō rātou ’o tei mā’itihia.

6 ’O rātou ’o tei ’ore i mā’itihia ra, ’ua hara ïa i te hara rahi, i te mea ē tē haere nei rātou i roto i te pōiri i te avatea ti’a ra.

7 ’E ’o teie ho’i te tumu vau i hōro’a atu ai i te fa’auera’a ia ’outou ’ia fa’atupu i tā ’outou ’āmuira’a mo’a, ’ia ti’a i tā ’outou mau ha’apaera’a mā’a ’e tā ’outou ’otora’a ’ia tae mai i te tari’a o te Fatu Sabaota ra, teie te tātarara’a nō te reira parau, tei hāmani i te mahana mātāmua, te ha’amatara’a ’e te hope’a.

8 ’Oia ïa, ’oia mau tē parau atu nei au ia ’outou na, ’ua hōro’a atu vau i te hō’ē fa’auera’a ia ’outou ’ia fa’ati’a i te hō’ē fare, i roto i te reira fare tē ’ōpua nei au ’ia ha’amau i ni’a ia rātou ’o tā’u i mā’iti, te mana nō ni’a mai ra ;

9 ’O teie ho’i te fafaura’a a te Metua ia ’outou na ; nō reira tē fa’aue atu nei au ia ’outou ’ia fa’aea mai, mai tā’u mau ’āpōsetolo i Ierusalema ra.

10 ’Āre’a rā, ’ua hara tō’u mau tāvini i te hara rahi ; ’e ’ua tupu te mārōra’a i roto i te fare ha’api’ira’a a te mau peropheta ; ’o tei riro ’ei mea pe’ape’a rahi iā’u nei, tē nā reira mai nei tō ’outou Fatu ; nō reira ’ua tono atu ra vau ia rātou ’ia fa’atītī’aifarohia.

11 ’Oia mau tē parau atu nei au ia ’outou na, ’o tō’u ïa hina’aro ’ia hāmani ’outou i te hō’ē fare. Mai te mea e ha’apa’o ’outou i tā’u mau fa’auera’a, e noa’a ia ’outou te mana nō te hāmani i te reira.

12 Mai te mea ē ’aita ’outou e ha’apa’o i tā’u mau fa’auera’a, e ’ore roa te here o te Metua e vai tāmau noa i roto ia ’outou, nō reira e haere noa ïa ’outou i roto i te pōiri.

13 I teienei, teie te pa’ari, ’e te ferurira’a o te Fatu—’ia hāmanihia te fare, ’eiaha mai te au i tā tō te ao nei e hāmani, nō te mea ’aita vau e fa’ati’a ia ’outou ’ia ora mai tō te ao nei ;

14 Nō reira, ’ia hāmanihia te reira mai te au i tā’u e fa’a’ite atu ia ’outou e to’otoru na, ’e ’o vai tā ’outou e fa’ata’a ’e e fa’atōro’a ho’i i teie nei mana.

15 ’E te rahi ho’i nō taua fare ra, e pae ’ahuru ma pae ’āvae ïa te ’ā’anora’a, ’e ’ia ono ’ahuru ma pae ’āvae te roara’a, i te piha i roto ra.

16 ’E ’ia ha’amo’ahia te tufa’a i raro, nō te piha i roto ra, iā’u nei nō tā ’outou pūpūra’a ’ōro’a ra, ’e nō tā ’outou a’ora’a, ’e tā ’outou ha’apaera’a mā’a, ’e tā ’outou mau pure, ’e nō te pūpūra’a mai i tō ’outou mau hina’aro mo’a roa iā’u nei, tē nā reira mai nei tō ’outou Fatu.

17 ’E te tufa’a i ni’a, nō te piha i roto ra, ’ia ha’amo’ahia mai ïa iā’u nei nō te ha’api’ira’a a tā’u mau ’āpōsetolo, tē nā reira mai nei Amana Tamaiti ra ; ’oia ho’i, ’o Alepha ; ’e ’aore rā ’o Omega ; ’oia ho’i ’o Iesu Mesia tō ’outou Fatu. ’Āmene.