Samuel, Ang Propeta sa Daang Tugon
Ang anak nga lalaki ni Elcana ug Hannah, si Samuel natawo agi og tubag sa mga pag-ampo sa iyang inahan (1 Sam. 1). Sa bata pa siya gibutang sa pag-amuma ni Eli, usa ka halangdon nga pari sa tabernakulo sa Shilo (1 Sam. 2:11; 3:1). Ang Ginoo mitawag ni Samuel sa linghod pa ang panuigon aron mahimo nga usa ka propeta (1 Sam. 3). Human sa kamatayon ni Eli, si Samuel nahimo nga usa ka bantugan nga propeta ug maghuhukom sa Israel ug gipahiuli ang balaod, kahusay, ug naandan nga relihiyoso nga pagsimba dinhi sa yuta (1 Sam. 4:15–18; 7:3–17).
1 Samuel 28:5–20 naglakip sa asoy ni Samuel nga gidala pagbalik gikan sa mga patay, pinaagi sa usa ka barangan sa Endor sa hangyo ni Hari Saul. Kini dili mahinabo nga usa ka panan-awon nga gikan sa Dios, tungod kay ang usa ka barangan o lain nga espirituhanon nga paagi dili makaimpluwensya sa usa ka propeta sa pagpakita sa iyang hangyo (1 Sam. 28:20; 31:1–4).
Ang mga basahon 1 ug 2 ni Samuel
Diha sa pipila ka mga biblia, ang mga basahon 1 ug 2 ni Samuel mao ang usa ka basahon. Sa uban sila mga duha ka mga basahon. Ang mga basahon naglakip sa panahon sa 130 ka mga tuig, sukad sa pagkatawo ni Samuel hangtud nga wala pa ang kamatayon ni Hari David.
Ang basahon sa 1Â Samuel
Mga kapitulo 1–4 naghulagway nga ang Ginoo nagtunglo ug nagsilot sa banay ni Eli ug gitawag si Samuel nga usa ka halangdon nga pari ug maghuhukom. Mga kapitulo 4–6 nagsulti ngano nga ang arka sa pakigsaad mahulog ngadto sa mga kamot sa mga Filistehanon. Mga kapitulo 7–8 nagtala sa mga pasidaan ni Samuel mahitungod sa mga mini nga dios ug sa usa ka hari nga dautan. Mga kapitulo 9–15 naghulagway sa pagkorona ni Saul ug sa iyang pagmando ingon nga usa ka hari. Mga kapitulo 16–31 nagsaysay sa kasaysayan ni David ug sa iyang pag-angkon og gahum—Si Samuel midihog ni David kinsa mao ang nakapatay ni Goliath. Si Saul nagdumot ni David, apan si David midumili sa pagpatay ni Saul bisan siya adunay kahigayunan sa pagbuhat sa ingon.
Ang basahon sa 2Â Samuel
Ang basahon naglakip sa mga detalya sa pagmando ni David nga usa ka hari sa Juda ug sa katapusan sa tibuok Israel. Mga kapitulo 1–4 nagpakita sa usa ka dugay nga pakigbisog tali sa mga sumusunod ni David, human sa iyang pagkorona diha sa Juda, ug sa mga sumusunod ni Saul. Mga kapitulo 5–10 nagpakita nga si David nahimo nga gamhanan sa tibuok nga mga yuta. Mga kapitulo 11–21 nagpakita sa pagkunhod sa espirituhanon nga kalig-on ni David tungod sa iyang mga sala ug mga pagsukol diha sa iyang kaugalingon nga banay. Mga kapitulo 22–24 naghulagway sa mga tinguha ni David sa paghimo og panaghiusa uban sa Ginoo.