Arahaba avy aty Vanuatu!

Fantaro ireo zanaky ny Ray any An-danitra manerana izao tontolo izao.

Vanuatu dia nosy firenena tropikaly iray ao amin’ny Ranomasimbe Pasifika. Olona mihoatra ny 3 hetsy no monina any!

Fiteny

Ny fiteny bislama, anglisy, ary frantsay no fiteny ôfisialy. Saika ny rehetra no miteny bislama!

Tangkyu.

Midika hoe “misaotra” Izany amin’ny fiteny Bislama!

Ny bokin’i Môrmôna

Tamin’ny 2004 no voadika tamin’ny fiteny Bislama ny Bokin’i Môrmôna. Hatramin’izay dia olona maherin’ny 8.000 no lasa mpikamban’ny Fiangonana ao Vanuatu!

Nosy tropikaly

Ireo morontsiraka tsara tarehy sy rano manga madio no mampalaza an’i Vanuatu. Ny sasany amin’ireo morontsiraka aza dia ahitana fasika mainty!

Vola maroloko

Miloko marevaka ny vola any Vanuatu izay maneho ireo trangam-piainana eo amin’ireo nosy sy ireo zavamaniry sy biby miaina ao.

Sahanasa

Satroboninahitra voninkazo

Rehefa misy fety na lanonana dia manao satroka voninkazo maroloko ny olona any Vanuatu.

Tapatapaho ny taratasy miloko hanome endrika voninkazo. Asio lavaka kely eo ampovoan’ny voninkazo tsirairay. Manapaha kofehy lava ampy hahodidina ny lohanao. Atsofohy amin’ireo voninkazo taratasy ny kofehy. Avy eo dia afatory miaraka ny tendron’ny kofehy roa. Dia azo anaovana ny satroboninahitrao!

Fomba fahandroan-tsakafo

Mofomamy Voanio

Ny mofomamy voanio dia sakafo malaza any Vanuatu. Indro misy fomba fahandroana izany azonao andramana!

1. Kapohina ao anaty vilia baolina ny siramamy ½ kaopy sy dibera ¾ kaopy .

2. Ampio atody 2 dia afangaroy.

3. Afangaroy ao ny lafarinina ½ kaopy, voanio voakiky 1 kaopy ary vovoka fanova 1 sotrokely.

4. Arotsay ao anaty vilany boribory efa voahosotra menaka ary ataovy anaty lafaoro mandritra ny 20 minitra amin’ny hafanana 300°F (150°C).

Ataovy izay hahazoana fanampiana avy amina olon-dehibe iray!

Sary nataon’i Anna Oldroyd