Xkanab’ankil qib’ sa’ ruq’ li qaYuwa’
Li Dios naab’al sut nokoxkanab’ chixsik’b’al ru li b’e taqak’am, ut sa’ chixjunil li k’a’aq re ru, naxpatz’ naq taqakanab’ qib’ sa’ ruq’ a’an.
Sa’ li 1 xb’e li po junio, 1843, laj Addison Pratt kixchap chaq xb’e aran Nauvoo, Illinois, re xik chixjultikankil li evangelio aran Hawaii, ut kixkanab’ li rixaqil, a’ li xLuisa Barnes Pratt, re rilb’aleb’ lix junkab’al.
Naq kiniman li rahob’tesiik aran Nauvoo, ut eb’ laj santil paab’anel ke’mine’ ru chi elk chaq aran, ut moqon aran Winter Quarters naq ke’xkawresi rib’ chi xik toj arin Lago Salado, ki’ajman ru naq li xLuisa kixsik’ ru ma taaxik malaj ink’a’. Moko ch’a’aj ta raj choq’ re a’an naq taakanaaq raj ut taaroyb’eni laj Addison, ut naq ink’a’ raj tixchap xb’e xjunes.
Sa’ li wiib’ sut a’an, kixsik’ xna’leb’ rik’in li profeet aj Brigham Young, ut a’an kixye re naq us naq taaxik. Us ta mas ch’a’aj a’an, ut xraj raj naq taakanaaq, a’an kiru chi elk chi uub’ej sa’ lix b’e.
Sa’ xtiklajik, li xLuisa ink’a’ xwulak chiru li b’eek. A’b’anan, sa’ junpaat ki’ok chirilb’al lix raxil li pach’aya’ sa’ li yamyookil ch’och’, eb’ li utz’u’uj, ut li ch’och’ li wankeb’ chire li nima’. “Li aak’ab’ sa’ lin k’a’uxl timil timil ki’oso’,” chan a’an, “ut maak’a’ junaq chik ixq li sa wi’chik xch’ool sa’ chixjunil li ch’uutil tenamit.”
Li seraq’ a’in chirix li xLuisa mas nawulak chiwu. Naxsachob’resi inch’ool naq a’an kiwan xch’ool chixkanab’ankil li k’a’ru naraj a’an, ut chixkanab’ankil rib’ sa’ ruq’ li Dios, ut chan ru naq chirix xk’anjelankil lix paab’aal, kijalano’ lix na’leb’ chirix li k’a’aq re ru.
A’an naxk’e chinnaw naq wan jun li qaYuwa’ sa’ Choxa, li nak’oxlank qe yalaq ta b’ar wanko, ut naru naqakanab’ qib’ sa’ ruq’ a’an chi mas wi’chik chiru anihaq chik.
Li roqechal li yaal
Li Dios naab’al sut nokoxkanab’ chixsik’b’al ru li b’e taqak’am, ut sa’ chixjunil li k’a’aq re ru, naxpatz’ naq taqakanab’ qib’ sa’ ruq’ a’an. Wan naq ch’a’aj a’in wi li k’a’ru naqak’oxla, malaj li k’a’ru neke’xk’oxla li kristiaan, jalan rik’in li rajom a’an choq’ reheb’ li ralal xk’ajol.
Wankeb’ li neke’k’oxlank re naq tento xjalb’al li na’leb’ chirix k’a’ru li us ut k’a’ru li ink’a’ us, xb’aan naq neke’xye naq li yaal naru najale’, naq li k’a’aq re ru wan jo’ chanru naq wan, ut naq sa’ xk’ab’a’ naq chaab’il xch’ool li Dios, a’an ink’a’ tixk’oxla li k’a’ru naqab’aanu laa’o.
Naq naqak’e qach’ool chixtawb’al ru ut chixk’ulub’ankil li rajom xch’ool li Dios, us naq taajultiko’q qe naq moko qe ta laa’o xyeeb’al b’ar wan li us ut li ink’a’ us. A’ li Dios nayehok re a’an, a’ yaal jo’ chanru li yaalil na’leb’, re qatenq’ankil ut re qosob’tesinkil.
Chiru naab’al chihab’ wankeb’ li neke’xyal xq’e chixjalb’al li yaalil na’leb’ k’eeb’il xb’aan li Dios. Kitikla a’in rub’elaj xyo’lajik li ruchich’och’, naq laj Satanas kixpo’ xch’ool chirix lix k’uub’anb’il na’leb’ li Dios, ut kixsik’ xsachb’al lix taql xch’ool li winq. Eb’ li kristiaan jo’ laj Xerem, laj Nehor, ut laj Korihor ke’xtaaqe ajwi’ li na’leb’ a’in, ut ke’xye naq li paab’aal maak’a’ rajb’al, naq maak’a’ xwankil li k’utb’esinb’il na’leb’, ut naq yalaq k’a’ru naqaj xb’aanunkil, a’an chaab’il. A’ut eb’ li na’leb’ a’in li neke’xjalb’ehi rib’ rik’in lix yaalil na’leb’ li Dios, neke’xk’am chaq nimla rahil ch’oolejil.
Wan k’a’ru naxjal rib’ a’ yaal li kutan wanko wi’, a’ut moko chixjunil ta. Li Awa’b’ej Russell M. Nelson xk’ut k’iila sut naq li yaalil na’leb’ k’utb’il xb’aan li Dios ink’a’ naxjal rib’, ut a’ li Dios nak’ehok re a’an.
Tento taqasik’ ru li qab’e
Jun na’leb’ mas nim xwankil tento taqasik’ ru, a’an ani taqapaab’. Li rey aj Benjamin kixye reheb’ lix tenamit, “Paab’omaq li Dios; paab’omaq naq a’an wan … ; paab’omaq naq a’an wan chixjunil lix chaab’ilal xna’leb’ … ; paab’omaq naq li winq moko naxtaw ta xyaalal chixjunil li k’a’aq re ru naru li Qaawa’ chixtawb’al xyaalal.”
Us naq wan qik’in eb’ li loq’laj hu ut lix na’leb’eb’ li yo’yookil profeet re qatenq’ankil chixtawb’al ru lix yaalil na’leb’ li Dios. Wi naqaj ru mas wi’chik li na’leb’ chiru li ak wan, li Dios naxk’e rik’in xtz’uumaleb’ re lix profeet. Ut a’an tixsumeheb’ li qatij rik’in li Santil Musiq’ej, naq naqasik’ xtawb’aleb’ ru li yaalil na’leb’ li maji’ naqanaw chi us.
Li Elder Neil L. Andersen kixye, “Misach eech’ool wi wan naq li k’a’ru nekeroyb’eni ink’a’ jayalinb’ileb’ chi tz’aqal rik’ineb’ lix k’utum lix profeet li Qaawa’. A’aneb’ b’an hoonal re tzolok,” chan, “re tuulanil, b’ar wi’ naqawiq’ib’ qib’ chi tijok. Nokob’eek chi uub’ej rik’in paab’aal, rik’in xnawb’al naq chirix xnumik li hoonal taqak’ul musiq’ejil sumeek rik’in li qaChoxahil Yuwa’.”
Junelik aajel ru naq taajultiko’q qe li raatin laj Alma, naq li Dios naxk’e li raatin a’ yaal chan ru naqak’e qach’ool chixpaab’ankil. Wi noko’ab’in chiru li raatin li Dios, taqak’ul chik li raatin; wi ink’a’ noko’ab’in chiru, ka’ch’in wi’chik taqak’ul toj reetal naq maak’a’ li raatin qik’in. Lix sachik li aatin ink’a’ naraj naxye naq moko yaal ta a’an, naraj b’an naxye naq maak’a’ chik qawankil chixtawb’al ru.
Ilok wan wi’ li Kolonel
Aran Kapernaum, li Kolonel kixk’ut ani a’an, ut k’a’ru lix k’anjel. Wankeb’ naab’al li ke’xtaw naq ch’a’aj rab’inkil li raatin, ut ke’xb’alq’usi rib’ ut “ink’a’ chik neke’b’eek rik’in a’an.”
K’a’ut naq ke’risi rib’?
Xb’aan naq ink’a’ nawulak chiruheb’ li k’a’ru naxye. Ke’xkanab’ rib’ sa’ ruq’ tz’aqal lix na’leb’eb’, ut kerisi rib’ chiru a’an, ut kisach chiruheb’ li osob’tesihom li ke’xk’ul raj wi ta ke’kana.
Naru naq li qaq’etq’etil naxram li yaalil na’leb’ chiqu. Wi wan k’a’ru ink’a’ naqataw ru, naru naqach’anab’ qib’, naqak’oxla chi chaab’il, ut chirix a’an taqasik’ ru k’a’ru taaqab’aanu. Li Kolonel kixye qe, “Chex’iloq wankin wi’ sa’ li junjunq eek’oxlahom; miwiib’an eech’ool, mexxuwak.” Naq naqajayali qib’ rik’in li Kolonel, li qapaab’aal na’ok chi numtaak sa’ xb’een li qak’a’uxl.
Li Awa’b’ej Dieter F. Uchtdorf kixye qe: “Ninpatz’ eere, xb’een chiwiib’anq eech’ool chirix lix kab’ rix eech’ool rub’elaj lee paab’aal. Maajun wa taqak’ulub’a naq lix wiib’al rix ch’oolej tooxk’e chi preexil ut tixram chiqu li rahok, li tuqtuukilal ut eb’ li choxahil maatan neke’chal rik’in li paab’aal chirix li Qaawa’ Jesukristo.”
Nachal li osob’tesihom reheb’ li ani neke’kana
Naq eb’ li tzolom ke’risi rib’ rik’in li Kolonel sa’ li kutan a’an, a’an kixye reheb’ li Kab’laju, “Ma teeraj ajwi’ xik laa’ex?”
Laj Pedro kichaq’ok ut kixye:
“Qaawa’, ani aj-ik’in tooxik? Aawik’in wank li aatin nak’ehok li junelik yu’am.
“Ut laa’o naqapaab’ ut naqanaw naq laa’at li Kristo, li Ralal li Yo’yookil Dios.”
Anajwan ut, eb’ li apostol a’an ke’wan sa’ ruchich’och’, ut ke’xnumsi li na’leb’ chi juntaq’eet rik’ineb’ li tzolom li ke’risi rib’. A’ut sa’ li hoonal a’an, eb’ a’an ke’xsik’ ru li paab’aal, ut ke’xkanab’ rib’ sa’ ruq’ li Dios, ut ke’ru chixk’ulb’al li osob’tesihom naxk’e li Dios reheb’ li ani neke’kana.
Maare laa’at, jo’ laa’in, wan naq nakataw aawib’ chi kab’ rix laa ch’ool chirix a’in. Naq naqataw naq ch’a’aj chiqu xtawb’al ru ut xk’ulub’ankil li rajom li Dios, us naq taajultiko’q qe naq a’an nokoxra, maak’a’ naxye aniho ut b’ar wanko. Ut wan k’a’ru mas chaab’il wi’chik li tixk’e qe. Wi nokotz’aaman chiru a’an, a’an tooxtenq’a.
Wan naq ch’a’aj xk’eeb’al qib’ sa’ ruq’ a’an, jo’ chanru li yuwa’b’ej li kiraj naq taak’iirtesiiq li ralal, ut li Kolonel kixye re, “Wi tatruhanq [chi paab’ank], chixjunil taaruuq choq’ re li wank xpaab’aal.” Sa’ xyi li qach’a’ajkilal, wan naq laa’o ajwi’ naqatz’aama, “chatenq’a xmaak’a’il li qapaab’aal.”
Xq’axtesinkil li rajom qach’ool chiru li rajom xch’ool a’an
Li Elder Neal A. Maxwell kixye jun sut naq “lix q’axtesinkil li qajom a’an li jun chi na’leb’ wan qe li naru naqak’e sa’ lix artal li Dios.” Xb’aan a’in naq li rey aj Benjamin kiraj naq eb’ lix tenamit te’wanq “chanchan jun ch’ina al, kub’enaq ratawom, aj kuyunel, nujenaq rik’in rahok, wank xch’ool chixk’eeb’al rib’ rub’el chixjunil li k’a’aq re ru tixk’oxla li Qaawa’ naq us xk’eeb’al sa’ xb’een, jo’ chanru naq jun li ch’ina al naxk’e rib’ rub’el xwankil lix yuwa’.”
Jo’ junelik, a’ li Kolonel li kik’utuk chiqu li k’a’ru tento taqab’aanu. Chi aal lix ch’ool, ut chi ak naxnaw li rahil k’anjel tento tixb’aanu, a’an kixq’axtesi rib’ chiru li rajom lix Yuwa’, ut kixb’aanu lix k’anjel jo’ aj Kolonel, ut kixte xpueertil li choxa chawu laa’at ut chiwu laa’in.
Naq naqasik’ ru xq’axtesinkil li qajom chiru li rajom xch’ool li Dios, a’an jun k’anjel re paab’aal li naxk’ut naq laa’o lix tzolom. Naq naqasik’ ru a’an, naqak’e reetal naq moko k’osb’il ta lix taql li qach’ool; nimob’resinb’il b’an, ut a’an naxk’e chiqak’ul li Santil Musiq’ej, li nachal wi’ chaq xyaalalil li qayu’am, li sahil ch’oolejil, li tuqtuukilal, ut li yo’onink li maab’ar chik naru naqataw.
Wan junjunq po anajwan naq laa’in xwochb’eeni jun awa’b’ej re oqech naq xoowulak sa’ rochoch jun ixq ut li ralal li ak nim chik. Chiru k’iila chihab’ kiwan chi najt rik’in li Iglees, ut yoo chi b’eek sa’eb’ li ch’a’ajkil ut rahil b’e, a’ut ak xsutq’i wi’chik. Naq yooko chi aatinak, xqapatz’ re k’a’ut naq xsutq’i.
“Mas naq xinpo’ chaq inyu’am,” chan a’an, “ut xinnaw b’ar tento raj tinwanq.”
Xinpatz’ re k’a’ru xtzol rik’in li b’e li xk’am.
A’an xyaab’ak b’ayaq, ut xye naq xtzol naq tento taaxik sa’ iglees toj reetal naq ink’a’ chik k’aynaqaq chi kanaak sa’ kab’l, ut tento taakanaaq aran toj reetal naq taaraj wank aran. Ch’a’aj b’ayaq li sutq’iik, a’ut naq kixk’anjela li paab’aal chirix lix k’uub’anb’il na’leb’ li Dios, kireek’a wi’chik li Musiq’ej.
Ut chirix a’an xye, “Ak xink’e reetal naq chaab’il li Dios, ut naq lix b’e a’an us wi’chik chiru lin b’e laa’in.”
Ninch’olob’ xyaalal li Dios, li qaChoxahil Yuwa’, li narahok qe, ut li Ralal, a’ li Jesukristo, li nakolok qe. Eb’ a’an neke’xnaw ru li qarahilal ut li qach’a’ajkilal. Eb’ a’an maajo’q’e toohe’xkanab’ qajunes, ut neke’xnaw chi us chan ru qatenq’ankil. Naru nasaho’ qach’ool, ut naqakanab’ qib’ sa’ ruq’eb’ a’an chi mas wi’chik chiru anihaq chik. Sa’ lix loq’laj k’ab’a’ li Jesukristo, amen.