Chejayali eerib’ rik’in li Jesukristo ut rik’in lix evangelio
Naq ink’a’ naqak’e xna’aj li k’a’ru najalb’ehin re li qak’a’uxl sa’ li ruchich’och’, ut naqajayali b’an qib’ rik’in li Kristo ut lix evangelio, nak’ojob’aman choq’ qe naq toowulaq wi’chik chi najt.
Sa’ 1996, li seleccion de futbol re Nigeria kixket li oor sa’ li Juegos Olimpicos kib’aanuman aran Atlanta, Estados Unidos. Naq kiraqe’ li b’atz’unk, ke’el li kristiaan chirix kab’l sa’ li junjunq chi tenamit ut k’aleb’aal aran Nigeria; li tenamit a’in b’ar wi’ wankeb’ numenaq 200 millon chi kristiaan ke’ok chi ninq’ehik chalen 2 hoor re saqew! Kiwan li sahil ch’oolejil, sahilal, ut chaab’ilal naq eb’ li komon neke’wa’ak, neke’b’ichan, ut neke’xajok. Sa’ li hoonal a’an, kijunajo’ ru Nigeria ut chixjunileb’ laj Nigeria saheb’ xch’ool naq a’aneb’ aj Nigeria.
Rub’elaj xtiklajik li Juegos Olimpicos, li ch’uut aj b’atz’unel kixnumsi naab’al li ch’a’ajkilal. Naq kitikla li yalok-u, kik’osman xk’ihal li tumin re xtenq’ankileb’. Ke’ilok chi uub’ej chi maak’a’eb’ lix k’anjeleb’aal li ajb’il ru, li na’ajej re te’xkawresi rib’, xtzakemqeb’, ut xpuch’b’al lix t’ikreb’.
Jerome Prevost/Getty Images
Sa’ jun hoonal, haye’ ke’isiik sa’ li yalok-u, a’b’an laj Nigeria ke’nume’ chi uub’ej chi maa’ani nayo’onin re. A’in kixjal li k’a’ru neke’xk’oxla. Chi jalb’il chik lix k’a’uxleb’, ut rik’in kawil k’anjelak, sa’ junjunqal ut sa’ junajil, ut rik’in ajom re xik chi uub’ej, ke’xkanab’ li k’a’ru wan chi ixb’ej ut ke’xjayali rib’ chi elk chi uub’ej. Li jayalink-ib’ a’in kixtenq’aheb’ chixketb’al li medalla re oor, ut eb’ laj Nigeria ke’xk’ab’a’iheb’ jo’ li “Dream Team.” Toj sa’ li kutan a’in, li Dream Team sa’ li Juegos Olimpicos re 1996 a’an li najultikaman wi’ li deporte Nigeriano.
David Cannon/Allsport/Getty Images
Naq li ch’uut aj b’atz’unel ke’xtzol xkanab’ankil chi ixb’ej li k’a’ru najalb’ehin re lix k’a’uxleb’ ut ke’xjayali rib’ sa’ li rajomeb’, ke’wulak chi najt wi’chik chiru li ke’xk’oxla, ut k’a’jo’ naq ke’saho’ xch’ool. (Jo’ ajwi’ chiqajunilo chik laa’o aran Nigeria!)
Chi jo’kan ut, naq ink’a’ naqak’e xna’aj li k’a’ru najalb’ehin re li qak’a’uxl sa’ li ruchich’och’, ut naqajayali b’an qib’ rik’in li Kristo ut lix evangelio, nak’ojob’aman choq’ qe naq toowulaq wi’chik chi najt chiru li naqak’oxla, ut naru taqeek’a xnimal xsahil qach’ool. Li Awa’b’ej Russell M. Nelson kixye, “Naq naqajayali li qayu’am rik’in … li Jesukristo ut lix evangelio, naru naqeek’a xsahil qach’ool, maak’a’ naxye li k’a’ru nak’ulman—malaj li ink’a’ nak’ulman—sa’ li qayu’am.”
Nintz’aama naq li Santil Musiq’ej tooxtenq’a chixk’eeb’al qaxik chirab’inkil lix b’oqom li Awa’a’bej Nelson re xjayalinkil li qayu’am rik’in li “Jesukristo ut lix evangelio” re naq taasaho’q qach’ool rik’in li Kristo, “maak’a’ naxye li k’a’ru nak’ulman—malaj li ink’a’ nak’ulman—sa’ li qayu’am.”
Sa’ lix Hu laj Mormon wankeb’ naab’al li seraq’ chirixeb’ li ke’xjal xyu’am naq ke’xjayali rib’ rik’in li Jesukristo ut lix evangelio.
Jun reheb’ a’an laj Alma, alalb’ej. A’an kixpo’ xch’ool ut kixyal xq’e chixpleetinkil li Iglees. Laj Alma, lix yuwa’, kitijok ut kixkuy xsa’. Jun li anjel kixk’utb’esi rib’ ut kixb’oq laj Alma, alalb’ej, sa’ li jalb’a-k’a’uxlej. Sa’ li hoonal a’an, laj Alma kixtikib’ xk’ulb’al xrahil “jun li aamej li k’eeb’il sa’ tojb’a-maak.” Sa’eb’ li moymoy ruhil hoonal a’an, kixjultika lix yuwa’ naq a’an kixk’ut naq li Kristo taachalq chixtojb’al rix lix maak li ruchich’och’. Naq kixjayali rib’ lix k’a’uxl sa’ li na’leb’ a’an, kixtz’aama uxtaan chiru li Dios. Kixk’ul xsahil xch’ool, jun xsahil ch’oolej li kixye naq k’a’jo’ xsahil! Laj Alma kixk’ul li uxtaan ut li sahil ch’oolejil xb’aan naq a’an ut lix yuwa’ ke’xjayali li Kolonel.
Choq’ reheb’ li na’b’ej yuwa’b’ej li wankeb’ ralal li xe’xnajtob’resi rib’, waklesihomaq eech’ol! Sa’ xna’aj xpatz’b’al k’a’ut naq ink’a’ nachal junaq li anjel chixtenq’ankil lee ralal chixjalb’al xk’a’uxl, tento teenaw naq li Qaawa’ ak xk’e jun li anjel sa’ li ruchich’och’ a’in sa’ lix b’eheb’: a’ li obiisp, junaq chik aj jolominel, malaj jun aj ilol komon winq malaj ixq. Wi ink’a’ teekanab’ kuyuk sa’ ut tijok, wi ink’a’ nekexaqab’ junaq hoonal choq’ re li Dios, ut wi teepaab’ naq a’an yoo chixye’b’al li ruq’ re, jo’kan ut—anajwan malaj chi seeb’—teek’e reetal naq li Dios tixtoch’ xch’ool lee ralal naq a’an naxk’e xch’ool chi ab’ink. Nak’ulman a’in xb’aan naq li Kristo a’an sahil ch’oolejil—li Kristo a’an yo’onihom; a’an li “yeechi’inb’il sahilal chalel.” Jo’kan ut, kanab’omaq eerib’ sa’ ruq’ li Jesukristo eerochb’een lee ralal, xb’aan naq a’an lix kawilal li na’b’ej yuwa’b’ej, choq’ re li junjunq chi alalb’ej.
Naq kireek’a li sahil ch’oolej rik’in li Kristo, laj Alma, alalb’ej, kikana rik’in li sahil ch’oolejil a’an. A’ut chan ru naq kikana li sahil ch’oolejil a’an sa’ xyanqeb’ li ch’a’ajkilal ut li yale’k-ix? Naxye:
“Chirix li hoonal a’an chalen toj anajwan ink’a’ kinkanab’ k’anjelak, re naq maare tinruuq chixk’amb’aleb’ li aamej sa’ li jalb’a-k’a’uxlej; re naq taaruuq teb’ink’am chixyalb’al xnumtajenaqil li sahil ch’oolejil li xinyal laa’in. …
“… Ut … li Qaawa’ naxk’e chi numtajenaq xsahil inch’ool rik’in li ruuchinihom ink’anjel. …
“Ut laa’in kinkawresiik sa’ li jar paay chi yalok-ix ut chi rahilal xinnumsi.”
Li sahil ch’oolejil rik’in li Kristo kitikla choq’ re laj Alma naq kixk’anjela lix paab’aal ut naq kixtz’aama li uxtaan. Chirix a’an, laj Alma kixk’anjela lix paab’aal chirix li Kristo naq nak’anjelak re xtenq’ankileb’ li ras riitz’in chixyalb’al ajwi’ li sahil ch’oolejil a’an. Li k’anjel a’an kixk’e xnimal xsahil xch’ool laj Alma, sa’ xyanq lix yalb’al rix ut lix k’iila ch’a’ajkilal. Jo’ nekeril, “li Qaawa’ naraj naq taqayal qaq’e” ut li yalok q’e li najayaliman rik’in a’an naxk’am chaq li osob’tesihom. Toj reetal naq li yale’k-ix li tz’aqal kaweb’ naru “neke’sub’e’ sa’ li sahil ch’oolejil chirix li Kristo.”
Jun ch’uut chik sa’ lix Hu laj Mormon li ke’xk’e li Jesukristo ut lix evangelio sa’ xyi lix yu’ameb’ ut ke’xtaw xsahil xch’ool a’aneb’ li ke’k’ojob’an re li tenamit Helam—jun na’ajej b’ar wi’ ke’ru chixk’iiresinkileb’ li ralal xk’ajol ut ke’ru chixyu’aminkil lix paab’aaleb’ chi ach’ab’anb’ileb’. Eb’ li tiikil kristiaan a’in ke’k’ehe’ chi preexil xb’aan jun ch’uut chi aj maqʼonel ut ke’maq’e lix k’ulub’ re xyu’aminkil lix paab’aaleb’. Wan naq eb’ li chaab’il kristiaan neke’xk’ul rahilal:
“Li Qaawaʼ naxkʼoxla naq us xqʼusbʼalebʼ lix tenamit; relik chi yaal, naxyal rix lix kuyumebʼ ut lix paabʼaalebʼ.
“Aʼbʼanan—ani naxkanabʼ ribʼ chiru, aʼan taawaklesiiq saʼ rosoʼjik li kutan. Relik chi yaal, ut chi joʼkan naq kiwan rikʼin li tenamit aʼin.”
Chan ru naq li tenamit a’in ke’xyal xq’e sa’ lix yalb’aleb’ rix ut sa’ lix rahilaleb’? Ke’xjayali rib’ rik’in li Kristo ut lix evangelio. Lix ch’a’ajkilaleb’ ink’a’ kixk’ojob’ aniheb’ a’an; li junjunq b’an reheb’ a’an kixsutq’isi rib’ rik’in li Dios xb’aan naq neke’xnaw naq a’aneb’ ralal xk’ajol li Dios, ralal xk’ajol li sumwank, ut xmoos li Jesukristo. Naq ke’xjultika aniheb’ a’an ut naq ke’tz’aaman chiru li Dios, ke’k’ojob’aak xch’ool, ke’k’ehe’ xkawilal, toj reetal naq ke’xk’ul xsahil xch’ool rik’in li Kristo:
“Laj Alma ut lix tenamit … ke’xhoy li raameb’ chiru [li Dios]; ut a’an kixnaw lix k’oxlahomeb’ xch’ool.
“Ut kikʼulman naq lix yaabʼ xkux li Qaawaʼ kichal rikʼinebʼ saʼ lix chʼaʼajkilalebʼ, ut kixye: Taqsihomaq lee jolom ut kʼojkʼooq chi chaabʼil eechʼool, xbʼaan naq ninnaw li sumwank li xekʼuubʼ chiwu; ut laaʼin tinʼok saʼ sumwank rikʼin lin tenamit, ut tebʼinkol chiru li moosil.”
Re xsumenkileb’, li Qaawa’ “kixkotz li iiq li k’eeb’il sa’ xb’een lix tel. … Relik chi yaal, li Qaawaʼ kixkʼehebʼ xmetzʼew re naq moko chʼaʼaj ta chiruhebʼ xkʼambʼal li riiqebʼ, ut keʼxqʼaxtesi ribʼ chi sahebʼ saʼ xchʼool ut rikʼin kuyuk chiru chixjunil li rajom li Qaawaʼ.” K’ehomaq reetal naq eb’ laj santil paab’anel a’in ke’xkanab’ lix ch’a’ajkilal, lix rahilal, ut lix yalb’aleb’ rix sa’ lix sahilal li Kristo! Chirix a’an, sa’ tz’aqal lix hoonal, kixk’ut chiru laj Alma li b’e re eelelik, ut laj Alma—jun xprofeet li Dios—kixk’ameb’ sa’ jun na’ajej kolb’il rix.
Naq naqajayali qib’ rik’in li Kristo ut naqataaqe lix profeet, toob’eresiiq ajwi’ rik’in li Kristo ut sa’ lix sahilal lix evangelio. Li Awa’b’ej Nelson kixye: “Li sahil ch’oolejil jwal nim xwankil ut xk’eeb’al qib’ sa’ xyi a’an naxb’aanu naq lix wankil li Dios taawulaq sa’ li qayu’am. Jo’ sa’ chixjunil, li Jesukristo a’an xnimal ru aj k’amol qab’e, “li ani, xb’aan li sahil ch’oolej wan chiru, kixk’ul rahilal sa’ li krus” [Hebreos 12:2].”
Lin na’ kikam toje’; k’a’jo’ naq kixsach inch’ool a’an. Ninra lin na’ ut ink’a’ xink’oxla naq chi seeb’ ta raj taaxik. A’b’an sa’ lix kamik, lin junkab’al ut laa’in naqataw xrahil jo’ ajwi’ xsahil qach’ool. Ninnaw naq sa’ xk’ab’a’ li Kristo, moko kamenaq ta a’an—yo’yo b’an! Ut ninnaw naq sa’ xk’ab’a’ li Kristo ut lix laawil li tijonelil li k’ojob’anb’ileb’ wi’chik rik’in li profeet aj Jose Smith, toxinwanq wi’chik rik’in a’an. Lix rahilal xxikik lin na’ na’sub’e’ sa’ li sahil ch’oolejil rik’in li Kristo! Yookin chixtzolb’al naq “xk’oxlankil li k’a’ru re choxa” ut xkanab’ankil “chi numtaak li Dios” a’an ajwi’ xjayalinkil wib’ sa’ li sahil ch’oolejil li wan rik’in li Kristo.
A’an nokoxb’oq rik’in rahok, “Chalqex wik’in chejunilex li lub’luukex ut tawajenaqex xb’aan lee riiq, ut laa’in texinhiltasi.” Sa’ xk’ab’a’ li Jesukristo, amen.