Li raatin li Kristo ut li Santil Musiqʼej teʼxkʼam qabʼe toj saʼ li yaal
Li qanawom chirix li nimla k’uub’anb’il na’leb’ a’in tooxtenq’a chixnawb’al naq laa’o ralal xk’ajol li Dios ut naq naru nokowulak jo’ chanru a’an.
Li Dios a’an li qaYuwa’ sa’ Choxa. Laa’o li ralal xk’ajol, yo’ob’tesinb’ilo jo’ chanru xjalam-uuch. Jo’kan ut naq chiqajunilo, jo’ ralal xk’ajol li Dios, naru nokowulak jo’ chanru a’an.
Koowan rik’in a’an jo’ musiq’ej naq maji’ nokochal sa’ li ruchich’och’. Li qaChoxahil Yuwa’ nokoxra, naraj naq too’usaaq, ut kixkawresi li b’e taqak’ul wi’ li rosob’tesihom q’axal nim, li koleʼk chiru li kamk ut li junelik yuʼam. A’an kixk’uub’ naq laa’o, jo’ musiq’ejil alalb’ej k’ajolb’ej, taak’ehe’q xtaql qach’ool re xsik’b’al ru xtaaqenkil. Naq toochalq sa’ li ruchich’och’, too’elq chaq rik’in li Dios, taasachq sa’ qach’ool b’ar koochal chaq, taqak’ul li qajunxaqalil tibʼ ut bʼaq okenaq, taqataw li qana’leb’, ut taqak’anjela li qapaab’aal. Rik’in li qajunxaqalil tibʼ ut bʼaq okenaq, jo’ ruchich’och’il winq, toomaakob’q, tootz’ajno’q, ut toonajtob’resiiq rik’in li Dios, ut ink’a tooruuq chik chi q’ajk chiru lix santil ilob’aal. K’a’jo’ naq nokoxra li qaChoxahil Yuwa’, jo’kan naq kixtaqla li Jesukristo, li Ralal Xbʼeen Yoʼlajenaq, re qakolb’al. Rik’in lix mayej re xtojb’al rix li maak, li Jesukristo kixte li b’e re truuq taatoje’q qix chiru li qamaak ut toowakliiq chi yo’yo ut taqak’ul li junelik yu’am.
Jwal ninb’antioxiheb’ li na’leb’ a’in ninqeb’ xloq’al—li naqak’ab’a’i lix k’uub’anb’il na’leb’ li Dios re li kolb’a-ib’, re uxtaan, malaj re sahil ch’oolejil. Li xtawb’al ruheb’ li na’leb’ a’in nikinixtenq’a chixnawb’al anihin chi yaal ut li ninqi osob’tesink re li taqenaqil loq’al ut li junelik yu’am xkawresi li Dios choq’ qe. Li profeet aj Nefi kixk’ut chiqu chan ru: “Joʼkan ut, … teetzeka xsahil li raatin li Kristo; xb’aan naq k’ehomaq reetal, li raatin li Kristo tixye eere chixjunil li k’a’aq re ru tento teebaanu.” Kixye ajwi’, “Wi texʼok chiru li bʼe, ut teekʼul li Santil Musiqʼej, aʼan tixkʼut cheru chixjunil li kʼaʼaq re ru tento teebʼaanu.” Anajwan nawaj xwotzb’al chan ru naq li raatin li Kristo ut li Santil Musiq’ej kine’xtenq’a chixtawb’aleb’ li na’leb’ a’in sa’ inch’ajomil.
Li raatin li Kristo tixye eere chixjunil li k’a’aq re ru tento teeb’aanu
Jo’ kixye laj Nefi sa’ xtiklajik li hu 1 Nefi, laa’in ajwi’ “kinyoʼla chaq rikʼin chaabʼil naʼbʼej yuwaʼbʼej.” Kinyo’la aran Nagano, Japon, sa’ jun junkab’al waklesinb’il wi’ xmaak’a’il li b’alaq, li yalok q’e, ut li tuulanil, ut naqataaqe chi tiik li najteril na’leb’. Lin yuwa’ jwal napaab’an. Kiwil a’an chi tijok chiruheb’ li artal aj sintoista ut aj budista rajlal eq’la rajlal ewu. Us ta ink’a’ kinnaw ani ut k’a’ru natijok wi’, kinpaab’ naq wan junaq wankilal malaj Dios moko ilb’il ta ru li “kaw xmetzʼew chiqakolb’al” malaj chiqatenq’ankil wi tootijoq chi anchal ch’oolej.
Jo’ chixjunileb’ li ch’ajom, naab’aleb’ lin ch’a’ajkilal. Kinch’a’ajko’ chixk’oxlankil naq li yu’am moko tiik ta ut jwal ch’a’aj. Kiweek’a naq sachenaqin ut maak’a’ inb’e. Kiweek’a naq yal aj numel li yu’am xb’aan naq taaraqe’q naq tinkamq. Li yu’am chi maak’a’ innawom chirix li k’uub’anb’il na’leb’ re li kolb’a-ib’ jwal kixsach inna’leb’.
Chirix naq kin’ok chixtzolb’al li Ingles sa’ li tzoleb’aal, chixjunileb’ laj tzolonel ke’xk’ul jun Ak’ Chaq’rab’. Us ta toje’ naqatikib’ xtzolb’al li Ingles, laj k’utunel kixye naq tento taqil a’an re xtzolb’al li Ingles. Kinte ut kintz’il rix xsa’. Jwal ch’a’ajeb’ li aatin keb’intaw sa’ li Ak’ Chaq’rab’. Ut li aatin sa’ Japones ch’a’aj ajwi’. A’b’an, kink’e reetal jun xtusulaleb’ li aatin ut li patz’om li xtiqman sa’ xtiklajik li Santil Hu a’in—li patz’om chirix li junaatalil, li xiw, xsachik li na’leb’, xnumsinkil xch’a’ajkilal li yu’am, ut wankeb’ chik xkomon. Chirix li junjunq chi na’leb’ tz’iib’anb’ileb’ li raqal ut perel sa’ li Ak’ Chaq’rab’. Kixik chi yaal inch’ool rik’in li aatin “Naq lub’luukat.” Li tz’iib’anb’il chirix kinixk’am toj sa’ Mateo 11:28–30, b’ar wi’ naxye li Jesus reheb’ lix tzolom:
“Chalqex wik’in chejunilex li lub’luukex ut tawajenaqex xb’aan lee riiq, ut laa’in texinhiltasi.
“K’ulumaq lin iiqleb’ sa’ eeb’een ut tzolomaq eerib’ wik’in, xb’aan naq tuulanin ut q’un lin ch’ool, ut teetaw xhilob’aal eeraam.
“Xb’aan naq moko ra ta lin iiqleb’, ut li nink’e cheriiqani moko aal ta.”
A’an li xb’een wa nanaq sa’ inch’ool naq kiwil li raatin li Jesukristo. Us ta ink’a’ kintaw ru chixjunil li kixye, li raatin kixk’ojob’ inch’ool, kixwaklesi li waam, ut kixk’e inyo’onihom. Naq kiwil xkomon chik li raatin, kiweek’a naq tento tinyal xchaabʼilal li raatin. Maajun wa week’ahom jo’ sa’ li kutan a’an. Kiweek’a naq raab’ilin. Kiweek’a naq ninnaw ru li Jesukristo.
Naq kintzolok, kiweek’a naq a’an yoo chi aatinak tz’aqal wik’in naq kixye, “Us xaq reheb’ li neke’tz’okaak ut neke’chaqik re, chixsik’b’al li tiikilal, xb’aan naq eb’ a’an te’k’ojlaaq xch’ool.”
Li raatin kixnujob’resi li waam, us ta maji’ ninnaw xch’olob’ankil li naweek’a sa’ li kutan a’an. Li Jesukristo kiwan xyu’am k’iila cient chihab’ chaq sa’ jun najtil tenamit ink’a’ ninnaw ru, a’ut kink’oxla naq naru tinpaab’ li raatin chi anchal inch’ool. Kiwoyb’eni naq sa’ junaq kutan chalel tintzol xkomon chik li na’leb’ chirix li Jesukristo.
Li Santil Musiq’ej tixye eere chixjunil li k’a’aq re ru tento teeb’aanu
Li kutan a’an kichal chirix xnumik wiib’ oxib’ chihab’. Kinnaweb’ ru li saaj aj misioneer re Lix Iglees li Jesukristo reheb’ laj Santil Paab’anel sa’ Roso’jikeb’ li Kutan. Chirix chik a’an kinnaweb’ ru jun ch’ina ch’uut aj santil paab’anel q’uneb’ ut saheb’ xch’ool, li neke’xyal xq’e chixtaaqenkil li Jesukristo. Us ta ink’a’ ninpaab’eb’ re sa’ xtiklajik, kintaw sa’ li evangelio li k’ojob’anb’il wi’chik li k’a’ru ninsik’ naq yookin chaq chixzolb’al li Ak’ Chaq’rab’—li raatin li Jesukristo ut li yo’onink ut tuqtuukilal naxk’e.
Jwal loq’ chaq li hoonal naq eb’ li misioneer ke’xk’ut li tijok chiwu. Kintzol naq tento taqapatz’ xk’ab’a’ li Dios. Naq nokotijok, tento taqaye k’a’ru wan sa’ li qaam, k’a’ru nokob’antioxin wi’, ut k’a’ru naqoyb’eni ut naqasik’. Chirix naq naqaye chixjunil li naqaj, naqaraq li qatij “sa’ xk’ab’a’ li Jesukristo, amen.” Naqab’aanu a’in xb’aan naq li Jesus kooxtaqla chi tijok sa’ lix k’ab’a’ a’an. Li tijok chiru lin Choxahil Yuwa’ kinixtenq’a chixnawb’al ani a’an ut anihin laa’in—naq laa’in lix musiq’ejil alal raarookin xb’aan. Kintaw ru naq xb’aan naq lin Choxahil Yuwa’ naxnaw wu ut nikinixra, a’an taa’aatinaq wik’in sa’ junesal, ut jo’ chanru tintaw ru rik’in li Santil Musiq’ej.
Keb’innumsi hoonal naq ink’a’ kinru chixk’eeb’al reetal li Santil Musiq’ej. Ink’a’ kintaw ru, kink’oxla naq ka’ajwi’ tento tintijoq toja’ ut naq taak’ulmanq k’a’ruhaq nim ru. Sa’ jun kutan, naq yookin chi tzolok rik’ineb’ li misioneer, kin’el yal junpaat re k’oxlak. Toj sachso inna’leb’ chirix li tento tinb’aanu raj rik’in lin yu’am wi ta tz’aqal yaal lix evangelio li Jesukristo li k’ojob’anb’il wi’chik.
Q’ajk we sa’ li na’jej wankeb’ wi’ li misioneer naq kiwab’i xyaab’ xkux jun reheb’. Kiwab’i lin k’ab’a’. Ink’a’ kinte li okeb’aal, kiwab’i b’an li xyaab’ kuxej na’aatinak chi junpak’al. Kisach inch’ool. Yookeb’ chi tijok chiru li qaChoxahil Yuwa’. Li yoo chi tijok kixtz’aama chiru li Dios naq a’an taarab’i lin tij. Us ta maji’ naxnaw chi us li Japones, kiq’uno’ li waam naq kiwab’i chi tijok chi anchal xch’ool. Ink’a’ kinnaw k’a’ut naq jwal wan xk’a’uxleb’ chiwix. Toja’ naq kink’e reetal naq lix tijeb’ choq’ we naxk’utb’esi lix rahom li qaChoxahil Yuwa’ ut li Kolonel choq’ we. Li rahok a’an kixk’e inyo’onihom, ut chirix a’an kinpatz’ok re li Dios chi wan inpaab’aal ut chi anchal inch’ool. Naq kinb’aanu, kisaho’ inch’ool ut kituqla li waam naq kiweek’a naq laa’in jun ralal li Dios ut naq wan lin choxahilal eechanihom. Li k’uub’anb’il na’leb’ re li kolb’a-ib’ kinaq sa’ xchamal lin ch’ool.
Li Awa’b’ej Russell M. Nelson kixye, “Li k’a’ru nakak’oxla chawix, a’an taab’eresinq aawe … sa’ chixjunil li k’a’ru taasik’ ru xb’aanunkil.” Tz’aqal yaal a’an choq’ we. Kink’e inch’ool chixtaaqenkil li Kolonel Jesukristo naq kikub’e inha’ ut kink’ul li maatan re li Santil Musiq’ej, ut a’an kirosob’tesi lin yu’am jwal wi’chik chiru li kink’oxla naq taaruuq. Naq noko’ok sa’ li sumwank re li kub’iha’ rik’in li Dios, naqaye naq wan qach’ool chixk’ulb’al sa’ qab’een lix k’ab’a’ li Jesukristo, chixpaab’ankil lix taqlahom li Dios, ut chi k’anjelak chiru a’an toj sa’ xraqik li qayu’am. Li qaChoxahil Yuwa’ naxye qe naq taawanq junelik lix Musiqʼ qik’in—tooxb’eresi rajlal li Santil Musiq’ej.
Nekexinb’oq chixpaab’ankil li kixk’ut laj Nefi chiqu—naq li raatin li Kristo ut li Santil Musiq’ej tixye eere “chixjunil li kʼaʼaq re ru tento teebʼaanu.” Chixjunil! A’an jun xnimal ru maatan naxk’e li Dios.
Ex was wiitz’in, ninb’antioxin chirix lix k’uub’anb’il na’leb’ li qaChoxahil Yuwa’ re li kob’a-ib’. A’an nokoxra, jo’kan naq kixkawresi li b’e li tooruuq wi’ chi q’ajk rik’in a’an sa’ xk’ab’a’ li Jesukristo, li Ralal Junaj Chiribʼil. Li qanawom chirix li nimla k’uub’anb’il na’leb’ a’in tooxtenq’a chixnawb’al naq laa’o ralal xk’ajol li Dios ut naq naru nokowulak jo’ chanru a’an. Ninb’antioxin xb’aan li nimla na’leb’ a’in. Ninch’olob’ xyaalal eere naq li raatin li Jesukristo ut li Santil Musiq’ej tooxb’eresi re taqak’ul li junelik yu’am. Ninnaw naq yaal a’in. Sa’ lix loq’laj k’ab’a’ li Jesukristo, amen.