Li winq li ki’aatinak rik’in li Jehova
Ki’osob’tesiik laj Jose Smith “re naq tixk’ojob’ roso’jik li kutan,” ut usilanb’ilo xb’aan naq kixb’aanu li k’anjel a’an.
Li wajom anajwan ut junelik a’an xch’olob’ankil chirix li Jesukristo, naq a’an li Ralal li Dios, laj Yo’ob’tesinel ut laj Kolol re li ruchich’och’, laj Ach’ab’anel qe ut laj Tojol qix. Xb’aan naq “li xb’eenileb’ na’leb’ re li qapaab’aal, a’an lix nawomeb’ li profeet ut li apostol chirix li Jesukristo,” anajwan nawaj tinye lin nawom laa’in chirix li Kolonel, li kikawob’resiik xb’aan xyu’am ut xk’utum jun li apostol ut profeet.
Xtiklajik li chaab’il na’leb’
Chiru jun li ch’ina-usil eq’la sa’ 1820, laj Jose Smith, kaalaju chihab’ wan chaq re, ki’ok sa’ jun li k’iche’ nach’ wan wi’ chaq li rochoch, re tijok chirix lix maak ut xpatz’b’al b’ar wan li iglees taapaab’anq wi’. Lix tij chi anchal xmetz’ew ut rik’in paab’aal li ink’a’ na’eek’an kixtoch’ xch’ooleb’ lix ninqal ru wankilal re chixjunil li ruchich’och’, a’an ajwi’ li Yuwa’b’ej ut li Alalb’ej. Jo’ ajwi’ laj tza. Chixjunileb’ ke’wan jun rajom chirix li tij a’an ut chirix li saaj winq a’an.
Naq li profeet kixk’ul li Xb’een K’utb’esink chirix naq kitijok, xtikla xk’ojob’ankil wi’chik chixjunil li k’a’aq re ru sa’ xraqikeb’ li kutan. A’b’an xtikla ajwi’ li k’a’ru wan xwankil ka’ajwi’ choq’ re laj Jose, ut li taakawresinq re. Laj Jose yal kiraj xkuyb’al xmaak ut xb’eresinkil. Li Qaawa’ kixk’e a’an. Li taql naq “maajun reheb’ [li iglees] tixjunaji’ wi’ rib’,” a’an jun xb’eresinkil. Li aatin “kuyb’il aamaak,” naxye resil li tojb’al-ix.
Wankeb’ naab’al li na’leb’ naru naqaxok chirix li Xb’een K’utb’esink, a’b’an maare li jwal nim xwankil choq’ re laj Jose, a’an a’in, “Ak kintaw naq yaal lix ch’olob’ahom laj Santiago—naq jun winq li moko tz’aqal ta xna’leb’ taaruuq chi tz’aamank re li Dios, ut chi k’uluk.”
Chan jun aj tzolonel: “Li na’leb’ li toj wan xwankil anajwan chirix li Xb’een K’utb’esink, a’an naq ak re li Dios naq tixk’e xna’leb’ li ani moko tz’aqal ta xna’leb’. … Li Dios li kixk’ut rib’ chiru laj Jose Smith sa’ li loq’laj k’iche’, a’an jun Dios li naxsumeheb’ li saaj li yookeb’ chixnumsinkil li yale’k.”
Li kiril laj Jose sa’ li loq’laj k’iche’ kixk’e xmetz’ew re xpatz’b’al xkuyb’al lix maak ut xb’eresinkil chiru chixjunil lix yu’am. Li kixk’ul aj Jose naxk’e ajwi’ inmetz’ew laa’in re xpatz’b’al inkuyb’al ut inb’eresinkil chiru chixjunil lin yu’am.
Xjalb’al li qak’a’uxl rajlal
Sa’ li 21 re septiembre, 1823, laj Jose kitijok chi anchal xch’ool re xpatz’b’al xkuyb’al lix maak, ut xb’aan li ak kixk’ul sa’ k’iche’ oxib’ chihab’ chaq, wan xpaab’aal naq li choxa tixsume wi’chik lix tij. Ut chi jo’kan kik’ulman. Li Qaawa’ kixtaqla jun li anjel, laj Moroni, re xkawresinkil laj Jose ut re xyeeb’al resil jun li najter hu li tixjaltesi ru rik’in lix maatan ut lix wankil li Dios—a’an lix Hu laj Mormon.
13 chihab’ chirix a’an, laj Jose ut laj Oliver Cowdery ke’wiq’la ut ke’ch’ana re naq te’tijoq sa’ li santil ochoch re Kirtland. Ink’a’ naqanaw k’a’ru ke’xtz’aama sa’ lix tij, a’b’an maare a’an xkuyb’al lix maak, xb’aan naq chirix naq ke’xaqli, li Kolonel kik’utun ut kixye: “K’ehomaq reetal, kuyb’il lee maak; laa’ex ch’ajb’ilex chiwu.”
Chirix naq ke’xk’ul chi jo’kan, laj Jose ut laj Oliver toj te’maakob’q wi’chik. Ut k’iila sut wi’chik. A’b’an sa’ li hoonal a’an, ut ka’ajwi’ sa’ li hoonal a’an, re xsumenkileb’ lix tz’aam ut re xkawresinkileb’ chixk’ulb’al li loq’laj laaw re li tijonelil, li Jesus kixkanab’eb’ chi maak’a’eb’ xmaak.
Rik’in naq kiwan li jalb’a-k’a’uxlej sa’ xyu’am laj Jose rajlal, nintaw inmetz’ew re naq tinjiloq “chi tuqtuuq inch’ool rub’el roq wan wi’ li usilal; [re naq] chi jo’kan tink’ul li ruxtaan.” Laa’in ak ninnaw chik naq li Jesukristo wan “rajom re kuyuk.” Lix k’anjel ut li rajom, a’an maawa’ li tz’eqtaanank. Kichal choq’ re li kolok.
Xsik’b’al qana’leb’ rik’in li Qaawaʼ
Sa’ lix “k’ojob’ankil wi’chik chixjunil li k’a’aq re ru,” li Qaawa’, rik’in xtenq’ laj Jose Smith, kirisi chi kutankil lix Hu laj Mormon ut naab’al chik li k’a’ru naxk’ut lix evangelio sa’ xtz’aqalil. Naq laj Jose kixpatz’ rajlal xna’leb’ rik’in li Qaawa’, timil timil wankeb’ li na’leb’ li ke’saqenob’resiik ru ut tz’aqal wi’chik xe’kana. K’e reetal eb’ li na’leb’ a’in:
-
Li Yuwa’b’ej ut li Ralal wankeb’ xxaqalil li naru “nach’e’man jo’ chanru li re li winq.”
-
Li Jesus kixk’ul sa’ xb’een moko ka’aj ta wi’ li qamaak; kixk’ul aj b’an wi’ li qayajel, li qarahilal, ut li qamajelal.
-
Jwal ra lix tojb’al rix li maak xb’aanu, toj reetal naq ki’el xtiqob’ jo’ kik’.
-
Nokokole’ sa’ xk’ab’a’ li rusilal li Jesus, “chirix chixjunil li nokoru chixb’aanunkil laa’o.”
-
Wan k’a’ru tento taqab’aanu re xk’ulb’al li ruxtaan li Kristo.
-
Naq nokochal rik’in li Kristo, a’an moko ka’aj ta wi’ tixkuy qamaak, tixjal b’an ajwi’ li qaam, ut chi jo’kan “maak’a’aq chik qajom re xb’aanunkil li maa’usilal.”
-
Chalen chalen, li Kristo naxtaqla lix tenamit naq te’xkab’la li santil ochoch, b’ar wi’ naxk’ut rib’ chiruheb’ ut naxtiqib’eb’ rik’in xwankilal li choxa.
Ninch’olob’ xyaalal naq tz’aqal yaal ut aajeleb’ ru li na’leb’ a’in. A’aneb’ yal jun xraqal li k’a’ru kixk’ut li Jesukristo chi ak’il chiru laj Jose Smith naq laj Jose rajlal naxpatz’ lix b’eresinkil rik’in li Dios.
Xtololinkil li Awa’b’ejihom a’in
Sa’ 1842, laj Jose kixtz’iib’a chirix chixjunil li taak’ulmanq sa’eb’ li roso’jikeb’ li kutan. Kixye naq sa’ qakutankil, “Li choxahil tijonelil tixjunaji rib’ rik’in li tijonelil sa’ ruchich’och’ re xtz’aqob’resinkileb’ ru li xninqal ru k’anjel a’an; ut naq junajinb’ilo sa’ jun ajwi’ li k’anjel re xtololinkil chi uub’ej li rawa’b’ejihom li Dios, eb’ li choxahil aj tij ink’a’ yal neke’hilan jo’ aj ka’yanel.”
Re li ramiiw aj Benjamin Johnson, laj Jose kixye: “At Benjamin, [wi tinkamq], moko najt ta tinwanq aawik’in, ut wi junpak’al li tz’apleb’ t’ikr wankin, toj yooqin raj chi k’anjelak aawochb’een, chi nimanb’il wi’chik inwankil, re taqatololi chi uub’ej li awa’b’ejihom a’in.”
Sa’ li 27 re junio 1844, laj Jose Smith ut li riitz’in aj Hyrum ke’kamsiik. Lix tib’el laj Jose kimuqman, a’b’an li raatin toj na’ab’iman sa’ chixjunil li ruchich’och’ ut sa’ li waam:
“Kiwil jun li matk’; kinnaw a’an, ut kinnaw naq li Dios naxnaw, ut ink’a’ kinru chixtz’eqtaanankil xyaalal.”
“Maajun sut kinye eere naq tz’aqal we wu; a’b’an moko wan ta li sachok na’leb’ sa’ eb’ li k’utb’esinb’il na’leb’ li kink’ut.”
“Li xb’eenileb’ na’leb’ re li qapaab’aal, a’an lix ch’olob’ahomeb’ li apostol ut li profeet chirix li Jesukristo, naq kikam, kimuqe’, kiwakli sa’ rox li kutan, ut kitaqe’ sa’ choxa; ut k’a’aq chik re ru li wan sa’ li qapaab’aal, a’an yal tiqb’il chiru li na’leb’ a’an.”
Li kiyeeman chirix laj Jwan aj Kub’sihom Ha’ naru ajwi’ nayeeman chirix laj Jose Smith: “Kiwan jun winq taqlanbʼil chaq rikʼin li Dios, aj [Jose] xkʼabʼaʼ. … “Moko a’an ta li saqenk, a’an b’an taqlanb’il chaq chixyeeb’al ani tz’aqal li saqenk,” “re naq chixjunileb’ te’paab’anq xb’aan.”
Laa’in ninpaabʼank. Ninpaab’ ut ninnaw naq li Jesus, a’an li Kristo, li Ralal li yo’yookil Dios. Ninch’olob’ xyaalal naq li yo’yookil Dios a’an li qaYuwa’ li nokoxra. Ninnaw xb’aan naq lix yaab’ xkux li Qaawa’ kiyehok we, jo’ ajwi’ lix yaab’ xkuxeb’ lix moos, a’aneb’ li apostol ut li profeet, ut a’an ajwi’ laj Jose Smith, li wan sa’ xtiklajikeb’.
Ninch’olob’ xyaalal naq laj Jose Smith, a’an jun xprofeet li Dios junxil ut anajwan, ut jun aj aatinanel ut moos choq’ re li Qaawa’ Jesukristo. Osob’tesinb’il laj Jose “[re naq tixk’ojob’] roso’jik li kutan,” ut usilanb’ilo xb’aan naq kixb’aanu li k’anjel a’an.
Li Qaawa’ kixtaqla laj Oliver ut kooxtaqla chiqajunilo ajwi’, “Xaqabʼ aawibʼ chixkʼatq lin moos aj Jose, chi xaqxo aachʼool.” Ninch’olob’ xyaalal naq li Qaawa’ xaqxo chixk’atq lix moos aj Jose ut lix k’ojlajik wi’chik li evangelio rik’in.
Laj Jose Smith na’oken chik sa’ li choxahil tijonelil a’an li ki’aatinak chaq wi’. Jo’ kixye re li ramiiw, laj Jose moko najt ta wan qik’in, ut sa’ xjunpak’alil li tz’apleb’ t’ikr, toj yoo ajwi’ chi k’anjelak qochb’een, chi nimanb’il wi’chik xwankilal, re xtololinkil chi uub’ej li awa’b’ejihom a’in. Rik’in sahil ch’oolejil ut b’antioxink, nintaqsi xyaab’ inkux re “xnimankil li winq li ki’aatinak rik’in li Jehova.” Ut jwal ninnima wi’chik li Jehova xb’aan naq ki’aatinak rik’in li winq a’an! Sa’ xk’ab’a’ li Jesukristo, amen.