“Laaʼin ajwi’ aʼan”
Lix rahom li Kristo—li tz’aqal naxpaab’ rajom li Dios—kikuyuk ut toj nakuyuk anajwan.
Wanko sa’ li hilob’aal kutan, ut xooch’utla re naq too’aatinaq chirix li Kristo, a’ li k’eeb’il chiru krus. Ninnaw naq yoʼyo lin Kolonel.
K’oxlahomaq a’in li kixk’ul li Jesus naq yal jun xamaan chik wan re sa’ ruchich’och’. Xch’utla jun li molam ut wankeb’ aj pleet aj Romano li xe’xk’am chaq li ch’iich’ ut li che’ re pleetik. Jolominb’ileb’ xb’aaneb’ laj tij li xe’xloch lix che’ rik’in xam, a’b’an ink’a’ xikeb’ re chixpleetinkil jun li tenamit. Yookeb’ b’an chixsik’b’al yal jun ajwi’ li winq, li ink’a’ naxk’am junaq xpleetleb’, li ink’a’ k’aytesinb’il sa’ zoon, ut maajun sut sa’ xyu’am na’oken sa’ pleetik.
Naq xe’k’ulun aj pleet, li Jesus kiraj xkolb’aleb’ xtzolom, jo’kan naq kiwulak rik’ineb’ aj pleet ut kixpatz’, “Ani nekesik’?” Ke’xsume, “li Jesus aj Nazaret.” Chan li Jesus, “Laa’in ajwi’ a’an. … Naq li Jesus kixye reheb’, “Laa’in ajwi’ a’an,” ke’q’aj chirixeb’, ut ke’t’ane’ sa’ ch’och’.”
Choq’ we laa’in, a’an jun reheb’ li aatin sa’ loq’laj hu li jwal naxtoch’ li ch’oolej. Naxk’ut chiwu naq yal wank chiru li Ralal li Dios—li xnimal ru Jehova re li Najter Chaq’rab’ ut li Chaab’il aj Ilol Karneer re li Ak’, li maajun xpleetleb’ wan—ut naq yal rab’inkil xyaab’ xkux laj Kolonel chiru li Kaq-sut-iq’, li Awaʼbʼej re Tuqtuukilal, naru naxtaqlaheb’ aj xik’ ilonel chi t’ane’k sa’ eelelik, chi b’alq’usinb’ileb’ sa’ tub’tu, toj reetal naq xe’raj naq xe’taqlaak raj chi k’anjelak sa’ cociin chiru li kutan a’an.
Yal wiib’ oxib’ kutan chaq, naq li Jesus ki’ok sa’ li tenamit chi nimanb’il xloq’al, “ke’ok xk’a’uxl” aj Jerusalen, chan li loq’laj hu, ut ke’xye “Ani a’in?” Nink’oxla naq a’an ajwi’ yookeb’ chixpatz’b’al aj pleet a’in li jwal sachsookeb’ xch’ool anajwan!
Lix sumenkil li patz’om a’an ink’a’ raj xtawman yal sa’ rilob’aal li Jesus, xb’aan naq laj Isaias kixye wuqub’ cient chihab’ chaq junxil naq “moko wan ta xxaqalil chi moko xchaq’al ru; ut naq taqil, maajun ch’ina-usil wan, re naq taqara.” Maamin xtawman sa’ junaq xchaab’il t’ikr, chi moko junaq xb’ihomal, xb’aan naq maak’a’ li re a’an. Ink’a’ ajwi’ xtawman sa’ junaq xtzolb’al li kixk’ul sa’eb’ li sinagoga, xb’aan naq maajun esilal naxye qe naq li Jesus kitzolok aran, us ta sa’ xsaajil kiru chixsachb’al xna’leb’eb’ laj tz’iib’ ut aj nawol chaq’rab’ li jwal tzolb’ileb’, ut jwal ke’sach xch’ool xb’aan naq kixk’ut li na’leb’ “jo’ li ani k’eeb’il xwankil.”
Chalen chaq naq kik’utuk sa’ li santil ochoch toj reetal naq ki’ok sa’ li tenamit chi nimanb’il xloq’al ut kichape’ us ta maak’a’ xmaak, li Jesus kixnumsiheb’ li na’leb’ jwal ch’a’aj malaj lix k’anjeleb’ aj b’alaq’ li seeb’ xk’a’uxl, a’ut junelik kinumta li Jesus—ut ch’olch’o naq kinumta xb’aan naq a’an li Ralal li Dios.
Chalen chalen, wankeb’ ajwi’ naab’al li neke’raj xk’osb’al ru malaj xk’utb’al naq jo’maajo’il a’an ut lix ch’olob’ahom chirix ani a’an. Neke’raj xyeeb’al naq lix tiikilal li Jesus, a’an yal po’e’k xb’aan ch’ina maak, malaj yal josq’il, ut naq li ruxtaan, a’an yal xkanab’ankil naq toomaakob’q. Ink’a’ raj taqapaab’ li aatin chirix li Jesus li yal naxye ch’ina kok’ na’leb’ chirix, re naq ink’a’ tooxb’oq chixk’oxlankil li k’a’ru ch’a’aj. Wankeb’ ajwi’ li “ch’ina kok’ na’leb’” chirix lix chaab’ilal jwal nim, a’ lix rahom.
Naq yoo chi k’anjelak sa’ ruchich’och’, li Jesus kixye naq wankeb’ wiib’ xnimal ru taqlahom. Xe’k’utman sa’ li ch’utub’aj-ib’ a’in ut junelik te’k’utmanq: “Taara li Qaawa’ laa Dios [ut] taara laa was aawiitz’in jo’ naq nakara aawib’ laa’at.” Wi taqaj xtaaqenkil li Kolonel sa’ li wiib’ chi chaq’rab’ a’in, li laq’lookeb’ chi tz’aqal, tento taqachap tz’aqal li aatin kixye. Tz’aqal li aatin kixye, a’an a’in: “Wi nikineera, teepab’ lin chaq’rab’.” Sa’ li kutan ajwi’ a’an, kixye naq “chera eerib’ cherib’il eerib’, jo’ naq xexinra laa’in.”
Sa’ li aatin a’an, aajel ru xk’eeb’al reetal li ch’olob’aal aatin li naxk’ut chan ru tz’aqal xrahom li Kristo—a’an ajwi’ li tzʼaqal rahok.
K’a’ru neke’xye? Chan ru kirahok li Jesus?
Xb’een, kirahok “chi anchal xch’ool, xmetz’ew, xk’a’uxl ut xkawilal,” re naq taaruuq chixk’irtesinkil li rahilal jwal nim, ut chixyeeb’al li yaal jwal kaw. Relik chi yaal, li Jesus kiru chi uxtaanak jo’ ajwi’ chixyeeb’al li tz’aqal yaal. Chan ajwi’ laj Lehi naq kirosob’tesi li ralal laj Jakob, “Li tojb’al-ix nachal rik’in, ut sa’ xk’ab’a’ li Santil Mesias; xb’aan naq a’an nujenaq chi usilal ut chi yaal.” Li rusilal li Jesus naxk’ojob’ qach’ool rik’in li qaq’alunkil, naq a’an li na’ajman, ut naxk’e li k’ahil sek naq na’ajman xnuq’b’al. Naqayal qaq’e chi rahok—chi anchal qach’ool, qametz’ew, qak’a’uxl, ut qakawilal—xb’aan naq chi jo’kan nokoxra li Jesus.
Xkab’, li Jesus narahok rik’in xpaab’ankil li junjunq chi aatin li x’el sa’ xtz’uumal re li Dios, ut junelik naxb’eresi rajom xch’ool rik’in li k’a’ru naraj lix Choxahil Yuwa’.
Naq kik’ulun sa’ li ch’och’ a’in chirix lix waklijik chi yo’yo, li Kristo kixye reheb’ laj Nefita: “K’ehomaq reetal, laa’in li Jesukristo. … Kin’uk’ak chire li k’ahil sek’ a’an li kixk’e chaq we li Yuwa’b’ej, … sa’ li kinnumsi wi’ li rajom li Yuwa’b’ej … chalen chaq sa’ xtiklajik.”
K’iila paay ru xyeeb’al rib’ kiru raj xb’aanunkil li Jesus, a’b’an kixb’aanu rik’in xyeeb’al naq naxpaab’ rajom li Yuwa’b’ej us ta toje’ kiwan sa’ xhoonalil lix rahilal q’axal nim, ut jo’ li K’ajolb’ej Junaj Chirib’il chiru li Yuwa’b’ej, kireek’a naq xkana sa’ junaatal, chi kanab’anb’il xb’aan lix Yuwa’. Lix rahom li Kristo—li tz’aqal naxpaab’ rajom li Dios—kikuyuk ut toj nakuyuk anajwan, moko ka’ajwi’ ta chiru li hoonal moko ch’a’aj ta, a’b’an chiru ajwi’ li hoonal jwal ch’a’aj ut q’ojyin ru.
Chan li loq’laj hu, li Jesus a’an “jun winq re rahil ch’oolejil.” A’an kixnumsi li rahilal, li tawaak, li majelal, ut li junaatal q’axal ra. Sa’ li hoonal a’an ut chi junelik, lix rahom li Jesus ink’a’ na’oso’, chi moko lix rahom lix Yuwa’. Rik’in li rahok a’an—li naxk’ut chiqu li chaab’il, li naxk’e qawankil ut qatenq’ankil—ink’a’ ajwi’ taa’oso’q li qarahom laa’o.
Jo’kan naq wi nakayal aaq’e, a’b’an nach’a’ajko’ li b’e chawu; wi nakayal xjalb’al aak’a’uxl chirix laa paaltil, a’b’an nak’ulun k’a’aq re ru li naxwech’ laa paab’aal; wi yookat chi k’anjelak chi anchal aach’ool, a’b’an toj wan naq natam li xiw sa’ laa ch’ool, k’e reetal naq kama’an ajwi’ ke’xk’ul li ani jwal tiikeb’ chi paab’ank sa’ li jun q’e jun q’e kutan. K’e ajwi’ reetal naq wan jun li maa’us aj wankilal li naraj xwech’b’al chixjunil li chaab’il nakayal aaq’e chixb’aanunkil.
Jo’kan naq ma wanko sa’ b’ihomal malaj sa’ neb’a’il, ma oxloq’inb’ilo malaj wech’inb’ilo, rik’in li loq’laj na’leb’ li wan sa’ xk’ojob’ankil wi’chik li evangelio, ut rik’in li qapaaltil li taawanq ajwi’ sa’ li k’anjel a’an, nokoxik chi uub’ej sa’ xk’ojob’ankil ut xpaab’ankil lix Iglees li Jesukristo. K’a’ut? Xb’aan naq, chanchan laj Kolol qe, xqatz’iib’a qib’ choq’ re li tzolok chixjunil—ink’a’ choq’ re yal jun ajwi’ li yale’k-ix sa’ xtiklajik, a’b’an toj sa’ li nimla yale’k-ix sa’ xraqik. Sa li qach’ool sa’ li yale’k-ix a’in xb’aan naq laj K’utunel ak xk’ut chiqu k’a’ru tooxyal wi’ chi rub’elaj ajwi’ li tzolok. Jo’kan ajwi’, wankeb’ naab’al aj tenq’ li rajlal neke’xye qe k’a’ru taqil sa’ li yale’k-ix. A’b’anan, maak’a’ aj-e a’an wi ink’a’ nokowulak sa’ li tzoleb’aal.
“Ani nekesik’?” Chi anchal li qach’ool naqaye, “li Jesus aj Nazaret.” Naq li Jesus naxye, “Laa’in ajwi’ a’an,” nokowiq’la ut naqaye naq a’an li yo’yookil Kristo, naq a’an kixtoj rix qamaak, ut naq xkana chiqapaqoonkil us ta xqak’oxla naq xooxkanab’ chaq. Naq tooxaqliiq chiru ut taqil xyotolal sa’ ruq’ ut sa’ roq, too’ok chixnawb’al k’a’ru naraj naxye naq kiriiqa li qamaak ut kik’ay rik’in li rahil ch’oolej, re naq taa’ab’inq chi tz’aqal chiru lix Yuwa’—sa’ xk’ab’a’ tz’aqal li rahok choq’ qe. Li xk’utb’al chiruheb’ li qas qiitz’in li paab’aal, li jalb’a-k’a’uxlej, li kub’iha’, li maatan re li Santil Musiq’ej, ut xk’ulb’al li qosob’tesinkil sa’ rochoch li Qaawa’—a’aneb’ a’in li “xb’een raqal chi na’leb’ ut k’ojob’anb’il k’anjel” li neke’xk’ut chan ru li qarahom choq’ re li Dios ut li qas qiitz’in, ut chan ru lix tz’aqal Iglees li Jesukristo.
Ex was wiitz’in, ninch’olob’ xyaalal naq Lix Iglees li Jesukristo reheb’ laj Santil Paab’anel sa’ Roso’jikeb’ li Kutan, a’an li b’e kixk’e li Dios re naq taqak’ul li taqenaqil loq’al. Tz’aqal yaal li evangelio li naxk’ut, ut li tijonelil li nak’ehok xwankil a’an aajel ru. Ninch’olob’ xyaalal naq laj Russell M. Nelson, a’an jun lix profeet li qaDios, jo’eb’ li profeet li ke’wan junxil ut li toj te’wanq chalel. Ut sa’ jun kutan, li k’amok b’e xb’aan profeet tixb’eresi jun li tasal tenamit re naq te’ril laj Yehol resil li qakolb’al chi kub’eek jo’ “raq’ kaaq … sa’ releb’aal saq’e,” ut taqaye, “li Jesus aj Nazaret.” Chi ye’b’il li ruq’ junelik, ut rik’in li rahok moko pak’b’il ta, tixye, “Laa’in ajwi’ a’an.” Chi tz’aqal yaal ninye a’an jo’ apostol rik’in xwankilal lix loq’laj k’ab’a’, a’an ajwi’ li Jesukristo, amen.