Te hoê vahine no te faaroo
Te hoê vahine faaroo e tiʻaturi oia i te Atua… Ua ite oia i Toʼna maitai i roto i toʼna oraraa. Ua ite oia e ua ite te Atua iaʼna. Ua here oia i Taʼna mau parau e ua inu i te pape ora.
Ua here au i te Fatu ia Iesu Mesia e i Taʼna Ekalesia, o tei faahoʻihia mai i niʻa i te fenua nei i teie anotau. E mea faufaa roa iaʻu te mau haapiiraa no Toʼna oraraa moʻa mai toʼna aiûraa e tae roa mai i toʼna tiʻa-faahou-raa ei Tamaiti na te Atua.
A taiʻo ai au i te mau api o te Bibilia, e au ra e te ite ra vau Iaʼna, i te « tupuraa i te rahi e te paari, e te herehia mai e te Atua e te taata atoa1. » I toʻu taiʻoraa, e au mau ra e tei reira vau i Toʼna tiʻaraa mai te pohe mai. Ua faaora Oia i te feia maʻi, ua faaamu e 5.000 taata, ua afaʻi mai i te tamahanahanaraa e te tiʻaturi e te hau i roto i te ao nei o Taʼna i hamani. Ua faaore Oia i te hapa a te feia i faaroo, i hamani ino e i faasatauro Iaʼna – aita hoʻi ratou i ite i ta ratou i rave. Ua ite au i Toʼna here e Toʼna aroha i Toʼna metua vahine noaʼtu tei roto Toʼna iho tino i te mamae rahi. Ua vî te pohe Iaʼna ia tiʻa ia tatou ia na reira atoa. Ua faaineine Oia i te hoê parahiraa no tatou i te raʻi i pihai iho i to tatou Metua Mure Ore. Ua haapii Oia ia tatou i te opuaraa no te oaoa e ua horoʻa mai i te orama no te pee i te reira. Ua riro Toʼna oraraa ei hiʻoraa no te tusia e no te taviniraa no te faatupu i te opuaraa a te Atua, Toʼna Metua.
Te mau vahine no te Mau Mahana Hopea Nei o tei pee i te hiʻoraa o te Mesia i roto i toʼna oraraa o te mau mahana atoa ua haamata ïa i te faatupu i te opuaraa a to tatou Metua i te Ao ra i faanaho noʼna. Na roto i te raveraa i te reira e nehenehe oia e riro ei mana puai no te maitai i roto i te ao nei i teie mahana e ia faaoti i te mau opuaraa no te tahuti. Ua ite au i taua mau huru vahine ra, e ua riro ei mori arataʻi noʻu. Te mau vahine no te Mau Mahana Hopea Nei o tei pee i te hiʻoraa o te Mesia e mau vahine faaroo ïa i roto i te hiʻoraa o te ao nei. E vahine oia no te faaroo o tei tiʻaturi i te Atua e e vahine faaroo e te itoito hoʻi.
Te hoê vahine faaroo e tiʻaturi oia i te Atua e e patoʻi oia i te enemi. Ua ite oia i Toʼna maitai i roto i toʼna oraraa. Ua ite oia e ua ite te Atua iaʼna. Ua here oia i Taʼna mau parau e ua inu i te pape ora. Ua mauruuru oia no te peropheta o ta te Atua i tono mai i teie mau mahana hopea nei, e ua tiʻaturi oia i Taʼna mau parau e ua haapaʻo i te reira, no te mea ua ite oia e ia na reira oia e farii oia i te hau. E pure oia no te farii i te tautururaa a to tatou Metua i te Ao ra. Ia pure oia, e faaroo oia – ma te tiaʻi i te pahonoraa. E tiʻaturi oia e, na roto i Taʼna raveʻa mărû, e arataʻi Oia iaʼna, e e pahono Oia i taʼna mau pure2.
Te hoê vahine te vai ra toʼna faaroo, eita oia e feaa no te mea ua taa maitai oia i te opuaraa hanahana a to tatou Metua i te Ao ra no te haamaitai i te taata. Ua ite oia e riro taʼna mau faatusiaraa ei mea mure ore. Ua ite oia eaha te faatusiaraa na roto i te iteraa i te oraraa o te Faaora. Ua ite oia e mea iti taʼna faatusiaraa, e ua ite hoʻi to tatou Metua i te Ao ra i taʼna i rave no te haapuai i toʼna nohoraa e i toʼna utuafare e te ao o taʼna e ora nei. E tupu rahi toʼna tiʻaturi no te mea e mea parau-tiʻa oia, e ua hau atu to te reira faufaa i te nehenehe. E mea parau-tiʻa taʼna opuaraa. Tei roto iaʼna te here, te mărû e te maitai. Ua tiʻaturi taʼna tane e taʼna mau tamarii iaʼna3. Oia atoa te mau tamarii, te feia apî e te mau vahine i piihia no te haapii, no te arataʻi, no te tavini e no te here – ua haafatata mai ratou iaʼna na roto i te hoê varua taaê. O te hohoʻa o te Atua tei mau i niʻa i toʼna hohoʻa mata, e mea au e e mea faufaa rahi4. Ua ite oia e te tauturu ra taʼna mau peu e taʼna mau ohipa iaʼna ia tiʻa atu i mua i te aro o toʼna Metua i te Ao ra. E tiʻa iaʼna ia rave i teie mau mea no te mea ua ite oia e, no reira mai oia, e ua ite te Atua iaʼna e ua here hoʻi iaʼna e ua poihere noa iaʼna e a muri noaʼtu.
Aita te vahine faaroo e mătaʻu. Aita oia e mătaʻu i te ino, no te mea tei pihai iho te Atua iaʼna5. Aita e mea huru ê i roto i toʼna oraraa. E tiʻa iaʼna ia ora i te oraraa maitai no te mea ua haapii oia i te mau haapiiraa a te Fatu. Ua riro oia ei hiʻoraa maitai. E mea iti aʻe toʼna paari, eiaha no te mea aita oia e pee ra i te huru parau-tiʻa o te Mesia, no te mea râ e taata noa oia. E faaatea oia iaʼna i te mau huru ino e te mau ohipa viivii, e mai te liona oia i te parururaa i toʼna mau fanauʻa. Te vai ra te puai i roto i te vahine faaroo no te aparau i taʼna mau tamarii no niʻa i te mau mea o te haamou ia ratou. E ite ratou i toʼna haapaʻo maitai i roto i toʼna oraraa i te mau mahana atoa, na roto i te huru o toʼna mau ahu, te mau mea taʼna e taiʻo nei e e mataʻitaʻi nei, taʼna faaohiparaa i toʼna taime faaoaoaraa, te mea taʼna e here nei e taʼna mau ataraa, e o vai te mau huru taata taʼna e fahoa nei, i roto i te mau mea atoa e i roto i te mau vahi atoa. E faatiʻaraa taaê toʼna mai te haapeuraa mâ, te ieie, te mata oaoa, te pae taata e te maitai. E nehenehe ta tatou mau tamahine naʻinaʻi e ta tatou feia apî tamahine ia tiʻaturi ma te peʻapeʻa ore i toʼna huru. Te pure nei matou ia riro atoa ratou ei mau tamahine mătaʻu ore i roto i ta ratou imiraa e te faahaereraa i mua i te mau mea maitai e te oaoa e te nehenehe, no te mea o ratou to tatou ananahi.
Mauruuru i te raʻi no te mau vahine faaroo i roto i to matou oraraa. Te vahine no te faaroo, e here oia i te Fatu. E hinaaro oia ia ite Oia i te reira na roto i te huru oraraa o taʼna e ora nei, na roto i te mau parau o taʼna e faahiti nei, na roto i te taviniraa o taʼna e ho nei no Taʼna mau tamarii e na roto i taʼna mau ohipa atoa. Ua ite oia e, ua here Oia iaʼna, noaʼtu toʼna paruparu, e e tamau â oia i te riroraa ei mea maitai aʻe. Ua ite oia e, ia faaitoito anaʻe oia i roto i te maitai, ua navaʻi te reira mai ta peresideni Hinckley i parau mai ia tatou6.
Te hoê vahine faaroo, e haamaitaihia oia i roto i toʼna oraraa e te mau tane haapaʻo maitai o tei mau i te autahuʻaraa a te Atua e o tei faatura i te reira : toʼna metua tane, toʼna episekopo, taʼna tane, toʼna mau taeaʻe e taʼna mau tamarii tamaroa. E haafaufaa ratou iaʼna e i te mau horoʻa hanahana i horoʻahia e te Atua no Taʼna tamahine. E paturu e e faaitoito, e e haroʻaroʻa ratou i te misioni rahi o toʼna oraraa, oia hoʻi ei vahine. Ua here ratou iaʼna, e ua haamaitai ratou iaʼna. E haamaitai-atoa-hia ratou e teie vahine no te faaroo, a haere tahoê ai ratou na te eʻa o te oraraa. Ua ite ratou, ia au i te haapiiraa a te Papaʻiraa Moʻa e : « e maitai te taata toopiti i te taata hoê… Ia hiʼa hoʼi te tahi ra, na te hoa e rave e faatiʻa i niʼa7. »
Te faaite nei au i toʻu aau mehara no te mau vahine faahiahia no te faaroo e no te mau tane tura mau e no toʻu utuafare, o tei faateitei iaʻu e o tei faauru iaʻu i roto i toʻu oraraa. Ua riro ratou ei haamaitairaa rahi taaê a rave ai au i te misioni moʻa no o mai i te Fatu ra ei peresideni rahi no te Feia Apî Tamahine.
E te mau taeaʻe e te mau tuahine e, a farii mai i toʻu here no outou, e no toʻu mauruuru i to tatou Metua i te Ao ra e no Taʼna Tamaiti Here, o Iesu Mesia. E faatura, e e tavini au ia Raua ma toʻu aau atoa e amuri noaʼtu e ua mauruuru roa vau no teie fanaʻoraa, I te iʻoa o Iesu Mesia, amene.