Na te mau tane o te autahuʻaraa

Peresideni Gordon B. Hinckley

Outou e te mau tane te mau nei i teie autahuʻaraa faufaa rahi, a taamu maite i te reira i niʻa i to outou varua. Ia vai tiʻamâ noa outou no te reira i te mau taime atoa e i roto i te mau tumu atoa.

E toʻu mau taeaʻe here, te aʻo atu nei au ma toʻu hinaaro ia tatuturu. Te ani nei au i te Varua o te Fatu ia arataʻi iaʻu.

Te hinaaro nei au e faaite ia outou e ua riro tatou ei Ekalesia rahi roa. E mea rahi ta tatou faanahoraa ohipa e no te mea e mea aano hoʻi te mau melo ia raeʻahiaʼtu e mea huru fifi ïa ia maramarama. Aita te Ekalesia e aufau nei i te feia faatere. E mea faahiahia mau te reira. Ia vai noa teie huru faatereraa. Aita roa tatou e opua nei i te aufau i te feia faatere. Area râ, ua ite tatou e mea teiaha te hopoiʻa i niʻa i te mau episekopo e te mau peresideni tĭtĭ e ia vetahi ê atu. Ua ite matou i te reira e ua faatupu te Peresideniraa Matamua e te Tino Ahuru Ma Piti e rave rahi mau apooraa, vetahi e mea maoro e e mea faufaa e i roto i te reira mau putuputuraa ua tiʻa ia matou ia iriti ê i te Ekalesia e i muri iho a faahoʻi faahou mai ai. Ta matou fâ oia hoʻi, ia hiʻo eaha râ te mau faanahoraa ohipa e tiʻa ia faaore. Area râ, a tuatapapa ai matou, aita roa matou i ite eaha râ te faaore. Ia faaorehia te tahi e au ïa e te faaruʻe nei outou i te hoê o ta outou mau tamarii. Eita e tiʻa i to outou mafatu ia na reira. Te hinaaro nei râ vau ia faaite ia outou e ua ite matou i te teimaha o ta outou mau hopoiʻa e te pau o to outou taime. I roto i teie amuiraa autahuʻaraa te hinaaro nei au ia faaite atu i te tahi mau mea ta matou i tuatapapa maite. Te feruri nei au e, e ite outou e, ua nuu rii te ohipa i mua noaʼtu te iti o te reira.

E aʻo atu vau no niʻa i te mau mea huru rau.

Ua faaoti matou, i te 1 no novema, e vai mana noa te parau faatiʻa no te hiero e piti matahiti te maoro. Na te reira e faaiti i te taime e pau i te mau episekopo e te mau peresideni tĭtĭ e to ratou mau tauturu no te faatupu i te mau uiuiraa no te parau faatiʻa no te hiero. Oia mau, mai te mea e, e hape te hoê melo, e hopoiʻa ïa na te episekopo e aore râ, na te peresideni tĭtĭ ia rave mai i taua parau faatiʻa no te hiero ra.

Ua itehia râ e, e mea varavara te mau ohipa mai teie te huru i tupu. E no reira, teie ïa te hoê faanahoraa apî e te mau taeaʻe. I te mahana matamua no novema, noaʼtu te huru o te taiʻo mahana i papaʻihia i niʻa i te parau faatiʻa no te hiero, e hope te reira i roto e piti matahiti. E faaapîhia ïa te mau parau faatiʻa no te hiero i roto i te mau piti matahiti atoa, eiaha hoê anaʻe matahiti. Te tiʻaturi nei matou e mea maitai te reira.

Teie faahou te tahi parau.

Ua aʻo atu Elder Ballard ia outou no niʻa i te mau misionare. Te paturu nei au i toʼna manaʻo. Te tiʻaturi nei au e farii to tatou mau feia apî tane e feia apî vahine i te mau mea taʼna i aʻo atu. E mea tiʻa roa ia tatou ia faateitei atu â i te mau faatureraa o te tiʻamâraa o te mau misionare o te tonohia nei na roto i te ao nei ei mau tiʻa no te Fatu ra o Iesu Mesia.

Te vai nei te hoê peu tei matarohia i roto i te Ekalesia. Te faatupuhia nei te hoê fariiraa no te mau misionare e reva ra. Te riro nei te reira ei fifi i roto i te tahi mau paroita. No te rahi o te mau misionare e reva nei e o te hoʻi mai nei, e pau noa te rahiraa o te mau pureraa oroʻa i te Sabati i taua mau fariiraa ra no te revaraa e no te hoʻiraa mai.

Aita te tahi atu mau taata i roto i te Ekalesia e faariihia nei ia piihia ratou i roto i te hoê ohipa. Aita tatou e faatupu nei i te hoê fariiraa no te hoê episekopo tei pii-apî-hia, no te hoê peresideni tĭtĭ, no te hoê peresideni Sotaiete Tauturu, no te hoê Hui Mana Faatere Rahi, e aore râ, no te tahi atu huru taata. Eaha ïa tatou e faatupu ai i te mau fariiraa misionare ?

Ua faaoti te Peresideniraa Matamua e te Tino Ahuru Ma Piti e, ma te feruri maite e na roto i te pure, ia tauihia te faanahoraa fariiraa misionare.

E horoʻahia te taime i te hoê misionare e reva ra, no te paraparau i roto i te hoê pureraa oroʻa 15 e aore râ, 20 minuti. Eiaha râ te mau metua e te fetii ia anihia ia paraparau atoa. E riro paha e, e piti e aore râ, hau atu i te piti misionare te paraparau i roto i taua pureraa ra. Na te episekopo e faanahonaho i te tereraa o taua pureraa ra, eiaha râ na te utuafare. Aita e faaterehia te tahi mau pehe taaê e aore râ, te tahi atu huru ohipa mai te reira te huru.

Ua ite matou e, e rave rahi mau utuafare e inoino i teie faaotiraa. I mua ra, e amui te metua vahine e te metua tane, te mau taeaʻe e te mau tuahine, te mau hoa i roto i teie faanahoraa. Te ani nei matou ia farii mai outou i teie faaotiraa. Mai te mea râ e, ua faataahia te hoê faariiraa e ua faatiʻahia, a rave faaoti roa ïa i te reira. Eiaha râ teie huru faanahoraa faahou i te mau taime i muri nei. Ua ite papu matou e, ia tauʻahia te mau tufaa atoa o teie parau, e faaotiraa paari teie. A farii mai i te reira, e toʻu mau taeaʻe here. Te faatae atoa nei au i teie aniraa i te mau tuahine, outou hoa râ e te mau metua vahine.

Te tiʻaturi atoa nei matou e, eita atoa e faatupuhia te mau faariiraa i muri aʻe i te pureraa oroʻa i reira hoʻi te misionare e paraparau ai. E hinaaro paha te mau melo no te utuafare ia amui ratou. Eita matou e opani i te reira. Tera râ, te ani nei matou eiaha ia faatupuhia te mau fariiraa ma te titau i te mau taata e rave rahi ia haere mai.

Ua riro te ohipa misionare ei ohipa faahiahia roa, e haamaitairaa rahi to roto i te reira. E ia tae i te taime e hoʻi mai te hoê misionare i roto i toʼna utuafare e i taʼna paroita, e horoʻa-faahou-hia te hoê taime iaʼna no te paraparau i roto i te hoê pureraa oroʻa.

Te ohipa no muri iho.

Te hinaaro nei au e faaite poto noaʼtu ia outou i te parau no te Tufaa Moni no te Haapiiraa Tamau o tei haamauhia a tahi matahiti e te afa i teie nei i roto i te amuiraa no eperera ra. Te tere maitai nei teie faanahoraa i teie nei. E moni rahi tei noaa ia tatou na roto i te mau ô a te Feia Moʻa f aaroo o te mau Mahana Hopea nei. Te tiʻaturi nei matou e, e rahi atu â te faufaa e roaa mai no te tautururaa e rave rahi atu â mau taata te tiʻa ia tauturuhia.

I teie mahana, e 5.000 tane e te vahine, te rahiraa e feia apî anaʻe, o te haere nei i te haapiiraa e aore râ, aita. A feruri na i te hopearaa no te reira. Te farii nei teie Feia Moʻa faaroo no te Mau Mahana Hopea nei i te hoê eʻa e tiʻaʼi ia ratou ia mahuti i rapae i te hoê oraraa veve i orahia na e ratou e to ratou ra mau metua. Ua maeʻa papu to tatou aravihi no te imiraa i te faufaa. Ua maitai to ratou tiʻaraa taata faarere. Ua riro ratou ei mau tane e ei mau vahine maitai aʻe, ei mau melo no te Ekalesia o te faahaere i te faanahoraa a te Ekalesia i mua ma te maere.

E horoʻa atu vau i te hoê hiʻoraa ia outou. Te tamahine matamua tei farii i te hoê tauturu moni, ua hope ïa taʼna hoê matahiti haapiipiiraa, e ua ani faahou oia i te moni tauturu no taʼna matahiti haapiipiiraa hopea. Te haere nei oia i te haapiiraa toroʻa tauturu taote niho.

Na muaʼtu, e rave oia i te ohipa i roto i te fare tamaaraa, e te roaa ra iaʼna 130 tara Marite i te avaʻe. E te ferurihia ra e, ua fatata roa taʼna tau haapiipiiraa i te hope, i reira oia e aufauhia ai e 650 tara Marite i te avaʻe no te haamataraa – e farii ïa oia 500 i niʻa i te hanere haamaeʻaraa. E maeʻa noa te reira i roto i te roaraa o te mau matahiti.

Aue ïa taa-ê-raa maere ta te tahi noa tau toata rii e faatupu ia faaohipa-maitai-anaʻe-hia te reira. I teie nei, na roto i teie hohoʻa, a numera na i taʼna moni e 5.000 aʻe taime. E ohipa faahiahia mau ia hiʻohia. Te haapii nei te mau piahi ia riro ratou ei feia tataʻi matini, faatere matini rorouira, feia no te faanahoraa faataaraa ohipa, e utuutu maʻi, e tataʻi matini rorouira, e haapaʻo tamarii, e rave ohipa i roto i te fare maʻi, e feia hamani rorouira, e papaʻi hohoʻa ahu, e haapaʻo faufaa, e tataʻi uira, e haapii reo Marite, e hamani faraoa, e faatere hotera, e papaʻi hohoʻa fare, e tuhaa iti noa teie.

Aita e hopearaa to te mau mea e tiʻa ia ravehia, e te ohipa e tupu nei o te hoê ïa ohipa nehenehe roa e te hoê semeio hoʻi.

Te ohipa i muri iho taʻu e hinaaro nei e parau atu, o te pô utuafare ïa. Te taiâ nei matou i te mea e, te morohi atu ra teie faanahoraa faufaa rahi roa i te mau fenua e rave rahi. E te mau taeaʻe, aitaʼtu e ohipa hau atu i te faufaa maori râ, to outou utuafare. Ua haamatahia teie faanahoraa i te matahiti 1915, e 87 matahiti i mairi aʻe nei, ua faaitoito te peresideni Joseph F. Smith i te Feia Moʻa i te mau Mahana Hopea nei ia faataa i te hoê pô i roto i te hepetoma ei pô taaê no te utuafare. E taime ïa no te haapiiraa, no te taiʻoraa i te mau papaʻiraa moʻa, no te faatupuraa i te mau taleni, no te aparauraa i te mau mea no te utuafare. E ere ïa i te hoê taime no te haereraa e mataʻitaʻi i te mau ohipa faaʻetaʻetaraa tino, e aore râ, te tahi atu mau ohipa mai te reira te huru. Oia mau, mai te mea e, e faatupuhia te hoê ohipa mai te reira te huru no te tahi maa taime iti no te utuafare, ua tano ïa. Tera râ, i roto i to tatou nei oraraa aehuehu, e mea faufaa ia parahi te metua tane e te metua vahine e ta raua mau tamarii, ia amui ratou i roto i te pure, ia haapii ia ratou i te haereʻa o te Fatu, ia hiʻopoʻa i te mau fifi o te utuafare, e ia vaiiho i te mau tamarii ia faaite i ta ratou mau taleni. Ua mauruuru vau i te mea e, ua horoʻahia mai teie faanahoraa na roto i te heheuraa a te Fatu, ei pahonoraa i te titauraa e vaira i roto i te mau utuafare o te Ekalesia.

Mai te mea, ua tupu taua titauraa a 87 matahiti i mairi, e mea papu roa e, ua rahi roaʼtu â ïa te reira titauraa i teie mahana.

Ua faaotihia ia faataa i te Monire ahiahi ei pô no te faaoaoaraa utuafare. I te mau vahi e mea rahi te mau melo no te Ekalesia, ua faatura te feia faatere no te fare haapiiraa e te tahi atu i taua faanahoraa ra, e aita ratou i tabula i te mau ohiparaa no taua pô ra.

I teie nei, mai te mea ra e, te rahi noaʼtu ra te taata e tabula nei i te tahi atu mau ohipa no te pô Monire. Te ani haehaa nei matou i te feia faatere no te mau fare haapiiraa e i te tahi atu mau taata, ia vaiiho mai i teie pô i te hepetoma no te faatereraa i teie peu tumu tahito faufaa roa. Te ani nei matou eiaha ratou ia tabula i te tahi mau ohipa o te titau mai i te taime o te mau tamarii i te pô Monire. Te tiʻaturi nei matou e, e feruri ratou i te faufaa e roaa i te mau utuafare, hoê aʻe taime i te hepetoma, no te haaputuputu ma te haafifi-ore-hia. E oaoa roa matou mai te mea e, e tauturu mai ratou i teie nei ohipa. E te faaitoito uʻana nei matou i te mau metua tane e te mau metua vahine ia tauʻa papu ratou i teie raveʻa e teie titauraa ia faariro i te pô Monire ei taime moʻa no te utuafare.

E rave rahi titauraa manihini tei tae mai iaʻu ia haere atu i roto i tera e tera mau rururaa huiraatira i te pô Monire. Ua patoʻi papu vau i taua mau aniraa ma te haamauruuru e ma te faaite atu e, ua faataa vau i te pô Monire ei taime no te pô utuafare. Te tiʻaturi nei au e, e na reira atoa outou.

Te tahi atu parau.

E au mau taeaʻe e, te faaite uʻana faahou atu nei au i te faufaa rahi no te faaravaʻiraa te melo o te Ekalesia ia ratou iho e tae noaʼtu i te utuafare

Aita hoê o tatou e ite i te taime e tupu mai ai te hoê ati rahi. Te maʻi, te pepe, te ohipa ore, e nehenehe e haafifi ia tatou.

E faanahoraa ohipa totauturu faahiahia ta tatou e te mau fare haaputuraa huero i te mau tufaa fenua e rave rahi. E mea faufaa roa ia rave tatou i te reira. Tera râ, te vahi maitai aʻe no te haaputuraa i te maa e te moni tei roto ïa i to tatou mau fare. Te faanahoraa totauturu maitai roa aʻe o ta tatou iho ïa faanahoraa totauturu. E pae e aore râ, e ono punu sitona i roto i te fare ua ravaʻi ïa i te haaputu i roto i te hoê fare vairaa rahi.

Aita vau e tohu nei e e tupu mai te hoê ati. Te tiʻaturi nei râ vau e, eita te reira e tupu. Tera râ, ia vai ara noa tatou i roto i to tatou oraraa. Te mau taata atoa e fare to ratou, ua ite ratou e, e mea tiʻa ia paruruhia te fare i te ati auahi. Te tiʻaturi nei e te pure nei matou ia ore roa te ati auahi ia tupu. Noaʼtu râ i te reira, e aufau tatou i te moni paruru fare no te paruru ia tatou i te hoê ati rahi ia tupu noaʼtu te reira.

E na reira atoa tatou i roto i te parau no te totauturu.

E haamata tatou na raro roa. E haamata tatou na niʻa i te maa e haaputuhia i te hepetoma, i te avaʻe, e i muri iho e toru avaʻe. Te parau nei au i teie taime i te parau no te maa no te pahono i te mau hinaaro tumu. Mai ta outou i ite, e ere teie aʻo i te aʻo apî. Te mătaʻu nei râ vau o te feruri te mau taata e rave rahi e, eita e maeʻa ia ratou ia haaputu i te maa no te hoê tau roa, e no reira, eita ïa ratou e tutava faahou.

A haamata naʻinaʻi noa, e taʻu mau taeaʻe, e i muri iho, haere mărû noaʼtu ai i te titauraa i te hoê opuaraa. A haaputu tamau i te moni, e maere outou.

Faaore i te tarahu, e a iriti ia outou i te mau ruuruuraa o te tarahu.

Te faaroo nei tatou i te parau no te piri hipotate i te fare e piti taime. I teie nei ua parauhia mai iaʻu, e toru ïa taime.

A faatere maitai ia outou i roto i te parau no te haamauʻaraa, te parau no te tarahuraa, te topatari, e tae noaʼtu i te mauiui i muri aʻe i te reira.

Ei faahopearaa, e au mau taeaʻe, te hinaaro nei au e hoʻi mai i niʻa i te hoê tufaa o taʻu i aʻo atu na e o tei tuatapapahia mai e Elder Ballard e te peresideni Monson i roto i teie putuputuraa. Te tiʻaturi nei au e, eita te reira e riro ei faataupupuraa i te mea o ta ratou i faahiti e o taʻu e hinaaro nei i te haapapu atu. Te parau nei au no te pae morare o te mau melo o te Ekalesia.

E rave rahi o ratou te faaô nei i roto i te mau tabula ohipa faufau i te pae morare i roto i te Vere e te mau hotu no roto i te reira. Ia outou na e te mau tamaroa tei tae mai i teie pô – outou te feia apî – te hinaaro nei au e parau atu ia outou ma te puai hope o toʻu reo, a faaatea ia outou i te mau ino i te pae morare. Ua ite outou eaha te mea maitai eaha te mea ino. Eita ta outou e nehenehe e parau e, aita outou i ite, ei otoheraa na outou no ta outou huru peu haapaʻoraa ore.

Nahea outou ia feruri e, e nehenehe ta outou e rave i te mau peu tiʻa ore i te pae morare e i muri iho, a tomo ai i roto i te ohipa misionare ei tiʻa no te Fatu ra o Iesu Mesia ? Te feruri ra anei outou e e mea tiʻamâ outou no te haere i te Fare o te Fatu, e ia faaipoipohia i reira no teie tau e no te tau a muri atu, mai te mea e te rave nei outou i te reira mau peu ?

Te taparu nei au ia outou e toʻu mau hoa feia apî, ia haapae i te reira peu. E ere i te mea ohie. E titauhia râ te haavîraa i te taata iho. E puai rahi to te mau tamataraa e e faatianiani mai hoʻi ia outou. Te puai te reira no te hoê enemi maramarama. E hinaaro outou i te puai e roaa na roto i te pure.

A faaatea ê ia outou i te mau mea faufau i roto i te Itenati. Na te reira e ume ia outou i raro. E arataʻi te reira ia outou i te haamouraa.

Eiaha ia moʻehia ia outou e, te mau nei outou i te autahuʻaraa o te Atua. I to Ioane Bapetizo horoʻaraa i te Autahuʻaraa a Aarona ia Iosepha Semita raua o Oliver Cowdery, ua parau oia e, teie autahuʻaraa « te mau nei ïa i te mau taviri no te utuuturaa o te mau melahi, e no te Evanelia no te tatarahapa, e no te bapetizo na roto i te utuhiraa no te haamatararaa i te hara » (PH&PF 13).

Te hinaaro ra anei outou i te utuuturaa a te mau melahi ?

E horoʻa mai taua utuuturaa ra i te mau haamaitairaa faito ore. A pee i te eʻa teitei i roto i to outou oraraa, e na te Atua e haamaitai mai, e faaamu mai ia outou, e « e arataʻi ia oe na to oe rima ra, e e horoʻaʼtu ia oe te pahonoraa i ta oe mau pure » (hiʻo PH&PF 112:10).

Outou e te feia paari, te faatae atoaʼtu nei au i teie nei taparuraa e teie faaararaa ia outou. Na te mau mea haʻihaʻi e arataʻi ia tatou i roto i te mau ati rarahi. Te tupu nei te reira i te mau taime atoa. Ua rahi roa hoʻi te aau oto, te riri, te taa-ore, e te faataaraa i rotopu ia tatou.

Te hinaaro nei â vau e faahiti faahou atu i te hoê parau o taʻu i parau e mea maoro i teie nei. Te parau nei au i te parau no te ino e te hara hairiiri o te ohipa hamani ino i te tamarii.

Eita e tiʻa ia tatou ia vaiiho noa i te reira. Eita tatou e faatiʻa i te reira. Te taata e hamani ino i te tamarii, e tuuhia oia i roto i te haavaraa a te Ekalesia e ta te tiribuna a te hau.

Te hamani-ino-raa i te tamarii, e ohipa faaoo ïa i te Atua. Ua paraparau mai Iesu i te parau no te nehenehe e te maitai o te tamarii. No te feia atoa te vai ra tera varua hamani ino tamarii i roto ia ratou, te parau atu nei au ma te reo puai, ia faatitiʻaifaro ia outou. E a titau i te tauturu hou a rave ino ai outou i te hoê tamarii e a hopoi mai ai i te pohe rahi i niʻa ia outou iho.

Outou e te mau tane te mau nei i teie autahuʻaraa faufaa rahi, a taamu maite i te reira i niʻa i to outou varua. Ia vai tiʻamâ noa outou no te reira i te mau taime atoa e i roto i te mau huru atoa.

Ia na reira hoʻi outou, e noaa ia outou taua « hau a te Atua o tei hau ê atu i te ite taata nei » (Philipi 4:7).

Ia haamaitai mai te Atua ia outou e taʻu mau taeaʻe here no te autahuʻaraa, te feia apî e te feia paari. E te mau metua tane, a faaite i te hoê hiʻoraa maitai no ta outou mau tamarii. E te mau tamaiti, a hiʻo i to outou metua tane no te paari e te arataʻiraa e te haroʻaroʻa.

Aue te faahiahia te mau fafauraa a te Fatu no te feia e haere ma te faaroo. Te vaiiho atu nei au i taʻu haamaitairaa ia outou na, toʻu here, e toʻu iteraa papu. Aue te rahi e te faahiahia te puai no te maitai e vai ra i roto i teie nei autahuʻaraa, mai te mea e, e vai hoê noa tatou, ma te haere amui i mua. Ia haamaitai mai te Fatu ia outou no te raveraa i te reira, taʻu ïa pure haehaa na roto i te iʻoa o Iesu Mesia ra, amene.