Te vai ra anei te faaroo i te fenua nei ?
Ia aifaito anaʻe to tatou faaroo i te hinaaro o to tatou Metua i te Ao ra e farii ïa tatou i te mau haamaitairaa o ta tatou e titau nei.
E faaauraa nehenehe mau teie no teie himene faahiahia, « Ua Farerei Pinepine ra Vau », o te himene herehia teie e te Peropheta Iosepha e toʼna taeaʻe Hyrum. Aue te nehenehe o te himene a te pûpû himene e te pûpû faataʻi upa.
Te pure nei au ia vai mai te Varua o te Fatu i niʻa iaʻu ia vai nâ hoʻi i pihaiiho ia tatou i roto i te amuiraa, ia nehenehe au ia parau i te mau mea e fanaʻo ai te mau melo o te Ekalesia e te mau melo ore. Te faahaehaa nei au iaʻu nei no teie tufaa ohipa.
I teie mahana e ui au i te hoê uiraa o ta te Faaora i ui a 2.000 matahiti i mairi : « Ia tae mai râ te Tamaiti a te taata nei, te vai ra anei te faaroo i te fenua nei ?1 »
Parau tumu matamua no te Evanelia
E aha te faaroo mau ? Te faaroo ia au i te tatararaa « faaroo e ia tiʻaturi e ia vai parau-tiʻa i te Atua ; … ei faaroo papu i roto i te tahi mea itea orehia2. » Te tiʻaturi nei tatou e « te Faaroo o te tiʻaturi ïa i te mau mea o te itea orehia, o tei ti’a ra … e o tei niuhia i niʻa ia Iesu Mesia. » Oia mau, te tiʻaturi nei tatou e « te faaroo ia Iesu Mesia o te parau tumu matamua ïa o te Evanelia3. »
Te faaroo o te hoê vahine ivi
Te vai nei o ratou o te nehenehe e haapii ia tatou i te parau no te faaroo mai te mea e iriti atu tatou i to tatou mau aau e to tatou mau feruriraa. O te huru ïa o te hoê vahine ua pohe te tane. O oia anaʻe iho no te faaamu i taʼna tamaiti, ua tamata oia i te imi i te mau raveʻa no te tururaa iaʼna, area râ, te ora ra oia i roto i te hoê tau oʻe o te maa. Mea varavara roa te maa e e rave rahi o tei pohe no te poʻia.
A iti noaʼtu ai te maa, te fifi noaʼtura te oraraa o teie nei vahine. I te mau mahana atoa e hiʻo oia i taʼna maa haaputu e te iti noaʼtura.
Ma te tiʻaturi i te tauturu aita ra hoê noaʻe tauturu, ite ihora oia e ua tae mai te mahana hoê noa tamaaraa toe e aita e maa faahou.
I te reira taime te hoê taata ratere i ui mai ai i teie uiraa maere. « Hopoi mai », te parau atura oia iaʼna, « i te tahi maa pane. »
Huri tiʻa tura te vahine nei i taua taata ra na ô atura : « Te ora ra to Atua o Iehova, aita roa aʻu e maa ama, maori râ, te hoê maa faraoa hoê rima e î tei roto i te hue, e te hoê maa hinu i roto i te farii. » Faaite atura oia e te faaineine nei oia i te maa hopea naʼna e a taʼna tamaiti, « e a amu ai maua, e pohe atu ai. »
Aita oia i ite e te taata e tiʻa mai ra i mua iaʼna o te Peropheta Elia ïa, ta te Fatu i tono atu iaʼna ra. Te parau a teie peropheta i parau iaʼna e riro paha i te maerehia e te feia i teie mahana o tei maramarama ore i te parau tumu mure ore no te faaroo.
« Eiaha e mătaʻu », taʼna ïa pahono i teie vahine. « E mata na ra i te hamani i te hoê vahi iti naʻu, a hopoi mai ai iaʻu nei, a hamani ai i ta oe e ta to tamaiti. »
E aha to outou manaʻo i te feruriraa i tupu i roto iaʼna ? Eaha toʼna huru ? Aita â oia i tuu i te pahono parau faahou maira taua taata ra. « Te na ô maira hoʻi te Atua o Iseraela a Iehova, e ore te hue faraoa e iti, e ore hoʻi e pau te farii hinu, e tae noaʼtu i te mahana e hopoi mai ai Iehova i te ûa i te fenua nei. »
I muri aʻe i to teie vahine faarooraa i teie fafauraa, haere atura ma te faaroo e rave atura mai ta Elia i faaue. « E ua amu ihora oia e o Elia, e toʼna atoa utuafare, e rave rahi aera te mahana. Aore hoʻi taua hue faraoa ra i iti, aore hoʻi te farii hinu i pau, ta Iehova hoʻi i parau mai, i te vaha o Elia ra4. »
I roto i te paari o to tatou nei tau, e manaʻo tatou e e mea tano ore e te au ore te titauraa a te peropheta. I roto i te paari o to tatou nei tau, eita e ore e pahonoraa maamaa e te paari ore ta teie vahine ivi. Te tumu maoti râ, te rave nei tatou i te mau faaotiraa i niʻa i te mau mea o te itehia e to tatou mata. E rave tatou i te mau faaotiraa niuhia i niʻa i te mau mea e tupu i mua ia tatou e mai te au i to tatou mau hinaaro.
Area râ, « te faaroo, o te hoê ïa mea e tiʻaturihia, i te mau mea e itea orehia5. » E mata to te faaroo e ô i roto i te poiri, e ia ite i raro atu i te maramarama. « Eiaha to oe faaroo ia riro mai to te taata nei paari, mai te mana ara o te Atua6. »
Te oreraa e faaohipa i te faaroo
Pinepine roa i teie tau, e aita tatou e turuʻi nei i niʻa i te faaroo hau aʻe to tatou turuʻiraa i niʻa i to tatou iho puai no te tatara i te mau fifi. Ia maʻihia tatou, te vai nei te mau raveʻa ohie a te taote no te faaora. E nehenehe tatou e tere atea i roto i te hoê taime poto noa. Tei vai nei i pihaiiho noa ia tatou te mau haamaramarama-raa-atoa a 500 matahiti i mairi aʻenei eita roa teie mau mea e faariro i te hoê taata veve ei arii.
Te faaroo mau
« E faaroo to te taata parau-tiʻa7 », o tei parauhia i roto i te papaʻiraa moʻa. E ui â vau, E aha te faaroo ?
E vai mai te faaroo mai te mea e tupu mau te tiʻaturiraa papu i roto i te mea itea orehia i te mata e te raveraa i te mau ohipa mai te au i te hinaaro o te Metua i te Ao ra. Ia ore na mea e toru nei – na mua roa, te tiʻaturiraa papu ; te piti, te ohipa, e te toru, te rave-papu-raa – e ia ore teie na tuhaa e toru, te mea e tupu mai, o te paruparu ïa e te faaruʻeraa i te faaroo. Te hinaaro nei e tatara rii atu i na tuhaa e toru no te faaroo.
A tahi, mea titauhia te tiʻaturiraa papu i roto ia tatou i te mau mea itea orehia. I to Toma tapeʻaraa i te tapaʻo no te naero e te patiaraa i toʼna rima i roto i te putu i te aoʻao o te Faaora i tiʻa-faahou mai, i reira oia i te faaiteraa e a tahi nei oia a tiʻaturi ai.
« Ua parau maira Iesu iaʼna, no te mea te hiʻo mai nei oe iaʻu, e Toma, i faaroo ai oe ; e ao to te feia aore i ite iaʻu a faaroo mai ai8. »
Ua haaparare Petero i taua mau parau ra i toʼna pororaa i te mau pîpî matamua no to ratou faaroo ia Iesu te Mesia i te na ôraa :
« Ua here outou iaʼna o ta outou i ore i itea. Ua oaoa outou i roto Iaʼna i te oaoa faito ore, noaʼtu â aita outou i itea Iaʼna, no te mea ua tiʻaturi outou :
« E farii outou i te tumu no to outou faaroo, oia hoʻi te faaoraraa o to outou varua9. »
Te Piti, no te faatupuraa i to outou faaroo, mea titauhia tatou ia rave. Mea titauhia tatou ia rave ma to tatou puai atoa no te taui i te faaroo noa i roto i te faaroo ohipa, « te faaroo, aore e ohipa e faaroo pohe ïa10. »
I te matahiti 1998, ua faahiti te peresideni Gordon B. Hinckley i te hoê faaararaa i te Feia Moʻa no teie Ekalesia e tae noaʼtu i to te ao nei. Ua faateitei atoa oia i taua faaararaa i napô nei i roto i te putuputuraa a te autahuʻaraa. Te na ŏ ra oia : « Te parau nei au e, ua tae i te taime no te faanaho maiteraa i to tatou mau utuafare. Rave rahi mau taata e ora nei hau aʻe i te faufaa moni e roaa nei ia ratou. Oia, te ora nei te tahi pae i niʻa i te tarahuraa … Te peʻapeʻa nei au i te rahiraa o te tarahu e vai nei i niʻa i te mau taata o te fenua nei, tae noaʼtu i to tatou iho mau taata11. »
Te mau taeaʻe e te mau tuahine, i te parau-raa-hia teie mau parau tohu, ua faaohipa te tahi mau melo faaroo o te Ekalesia i to ratou faaroo e ua tiʻaturi i te aʻo a te peropheta. Ua mauruuru roa ratou i teie nei mahana i te mea o ta ratou i rave. Te tahi pae, penei aʻe paha ua tiʻaturi i te parau a te peropheta aita ra ua iti te faaroo, noaʼtu te faaroo e mea naʻinaʻi mai te huero tinapi ra te huru. Ua roaahia te tahi pae i te mauiui no te ravaʻi ore i te faufaa, no te taata iho, e ua peʻapeʻa te utuafare.
Te toru, ia aifaito te faaroo i te hinaaro o to tatou Metua i te Ao ra, tae noaʼtu i Taʼna mau ture no te natura. Eiaha râ, mai te manu o te tiʻaturi e nehenehe oia e rere na roto i te mataʻi rorofaʻi, teie râ, e tamau noa te ture no te natura i te haaputapu iaʼna ia faatura i te reira.
Ua hau atu anei to tatou paari i to te manu ? Pinepine roa te ao nei i te faariro i to ratou hinaaro ei faaroo e i muri mai e fifi. Mea peʻapeʻa ia hiʻo atu i te tahi mau taata i te farii oioiraa i te mau mea faufaa ore e te patoʻiraa i te mau mea no te mau parau tumu mure ore o te Evanelia a Iesu Mesia. Mea peʻapeʻa ia hiʻo anaʻe i te tahi pae i te horo noaraa i roto i te mau ohipa maamaa e aore râ, te mau mea au ore mai te tiʻaturiraa e faaora te Atua ia ratou i to ratou mau fifi. Ua tae roa ratou i te ani i te mau haamaitairaa mai te ite aita roa ta ratou ohipa e tuʻati nei i te hinaaro o te Metua.
Nahea tatou e ite ai e ua aifaito to tatou faaroo i te hinaaro o to tatou Metua i te Ao ra e ua farii Oia i te mea o ta tatou i titau ? E mea tiʻa ia ite tatou i te parau a te Atua. Te hoê tumu tatou e haamoʻe ai ia tatou i roto i te mau papaʻiraa moʻa ia ite ïa i te mau raveraa a to tatou Metua i te Ao ra i niʻa i te taata mai te haamataraa mai. Mai te mea e taaʻe to tatou hinaaro i te faaiteraa a te papaʻiraa moʻa, eiaha ïa e tamau i reira.
Te tahi â, mea titauhia tatou ia faaroo i te aʻo a te mau peropheta no te mau mahana hopea nei a horoʻaʼi ratou i te mau arataʻiraa faaurûhia.
Hau atu, mea titauhia tatou ia tuatapapa e ia pure no te imi i te arataʻiraa a te Varua. Mai te mea e na reira tatou, ua fafau mai te Fatu e : « E faaite atu vau i to outou feruriraa e to outou aau, na roto i te Varua Maitai o te haere mai i niʻa ia outou e o te tupu i roto i to outou aau12. »
Ia aifaito anaʻe to tatou faaroo i te hinaaro o to tatou Metua i te Ao ra e farii ïa tatou i te mau haamaitairaa o ta tatou e titau nei.
Te parau tumu no te mana
Te faaroo, ia maraamarama maitai e ia faaohipa papu anaʻehia, o te hoê ïa mana rahi e te hanahana o te mure ore. E mana puai roa aita e raeʻahia i to tatou maramarama. « Na roto i te faaroo … ua hamanihia te mau ao na roto i te parau a te Atua13. » Na roto i te faaroo, ua vahihia te mau pape, ua faaorahia te maʻi, ua mamu te paruparu, e ua roaa te ora.
To tatou faaroo e niu ïa i niʻa i te reira i haamauhiaʼi to tatou oraraa varua. Ia riro te reira e raveʻa faufaa roa no to tatou oraraa. E ere te faaroo mai te hoê noa mea o ta tatou ei tiʻaturi, te faaro o te hoê ïa mea o ta tatou e ora.
Haamanao i te mau parau a te Faaora : « I tiʻa ia oe ia faaroo ra, e tiʻa te mau mea atoa nei i te taata i faaroo14. » « O te faaroo mai iaʻu, e rave atoa oia i teie mau ohipa taʻu e rave nei ; e e rahi atu â taʼna e rave i teie15. »
Te haapiiraa i te parau tumu
O ratou o te haere na roto i te faaroo e ite ratou i roto i to ratou oraraa te maramarama e te mau haamaitairaa o te raʻi. E maramarama e e ite ratou area vetahi ra e ore ia. O ratou o te ore e haere na roto i te faaroo te manaʻo nei ratou e mea maamaa te mau mea o te Varua, no te mea e itehia te mau mea o te Varua na roto i te Varua16.
Eita te mau faaiteraa o te raʻi e horoʻahia e haamauhia i te ite o te feia aita e tiʻaturi. « Aore hoʻi te faaroo i roto i te tamarii a te taata nei », te parau a Moroni ia tatou, « Aore atoa e tiʻa i te Atua te raveraa i te semeio i rotopu ia ratou, no reira i ore ai oia i faaite mai iaʼna iho ia ratou e ia tupu to ratou faaroo iaʼna17. »
I roto i te aai, noaʼtu i te mau taime o te poiri te vai nei o ratou, na roto i te mata o te faaroo, e haaputa i te poiri ma te ite i te mau mea i roto i to ratou huru mau. Ua heheu o Moroni : « E rave rahi tei roto ia ratou te faaroo rahi roaʼtu … [o ratou] e ore e tiʻa ia tapeʻahia ia tae i roto i te paruru, ua itea ra i to ratou mata te mau mea tei hiʻohia e te mata o te faaroo ra, e ua oaoaʼtura18. »
E mea tiʻa ia faariro i to tatou mau fare ei vahi no te faaroo. E mea tiʻa ia haapii te mau metua vahine e te mau metua tane i te mau parau tumu no te faaroo i ta ratou mau tamarii. E nehenehe hoʻi ta te mau metua tupuna, e tauturu. Ia haere au i roto i te mau haaputuputuraa utauafare e tamata vau i te rave i te taime no te aparau i te tahi o ta maua mau mootua. E parahi vau i pihaiiho ia ratou e e uiui au i te tahi mau uiraa : « E aha to oe huru ? » « E aha te huru o te haapiiraa ? »
I reira, e ui atu vau ia ratou e aha to ratou manaʻo no te Evanelia e no te Ekalesia mau e mea faufaa roa hoʻi te reira iaʻu. E tamata vau i te imi i te hohonuraa o to ratou faaroo e to ratou iteraa papu. Mai te mea e ite au i te mau vahi papu ore, e ui au ia ratou, « E farii anei outou i te hoê opuaraa mai roto atu i to outou papa ruaau ? »
I muri mai e faaitoito atu vau ia ratou ia taiʻo i te mau papaʻiraa moʻa i te mau mahana atoa e ia tuturi i te mau poʻipoʻi e i te mau pô atoa e to ratou mau metua tane e to ratou mau metua vahine e ia pure. E titau vau ia haere ratou i ta ratou mau pureraa oroʻa. e titau vau ia vai mâ noa ratou e te viivii ore, e ia haere noa i te mau pureraa, e inaha, i roto i te tahi atu mau mea, ia tamau noa i te faaroo i omuhumuhu a te Fatu.
I te hoê taime i muri aʻe i te aparauraa ia Joseph, ta maua mootua tamaroa vaʻu matahiti, hiʻo tutono maira i roto i toʻu na mata e ui maira : « E nehenehe anei au e haere i teie nei, e papa ruau ? » Horo atura na roto atu i toʻu rima e manaʻo ihora vau, « Ua tiʻa anei ? » E au ra hoʻi e, e, no te mea i te mahana i muri mai parau maira oia, « Mauruuru no to taua aparauraa. »
Mai te mea e haafatata tatou ia ratou na roto i te here eiaha râ, na roto i te faahepo, e ite tatou e tupu rahi te faaroo o ta tatou mau mootua ei hopea no te mana e te iteraa papu o te hoê taata o tei here i te Faaora e i Taʼna Ekalesia hanahana.
Te mau tamataraa
Te tahi mau taime e au ra e poiri roa te ao nei. Te tahi mau taime e tamatahia to tatou faaroo. Te tahi mau taime mai te mea ra ua opanihia te mau uputa o te raʻi ia tatou. Eiaha ra e hepohepo. Eiaha roa tatou e faaruʻe i te faaroo. Eiaha roa e faaruʻe i te tiʻaturi.
Tau matahiti i mairi aʻe nei, ua haamata vau i te ite e te poiri nei te tahi mau mea e haaati nei iaʻu. Ua haapeʻapeʻa te reira iaʻu no te mea ia taiʻo vau i te mau papaʻi i roto i taʻu mau papaʻiraa moʻa aita e ite maitaihia. Ua maere au e aita paha te feia hamani mori e haamaitai faahou nei i ta ratou mau raveraa.
Ua mono vau i te mau mori i te mea puai aʻe. E ua mohimohi atoa. Ua pari atura e no te haapa’o ore o te hamaniraa o teie mau mori. Ua tae roa i te uiui e te mohimohi atoa ra te anaana o te mahana hou a puta mai ai te manaʻo e ere paha no te mori i roto i toʻu piha te fifi – te fifi no toʻu iho nei paha mata.
Aita i maoro noa iho, ua haere au e farerei i te taote mata tei haapapu mai iaʻu e aita te ao nei i mohimohi. Te vai nei râ te hoê iri o tei haapoiri i toʻu mata. Na te reira paha e iteahiaʼi ia outou toʻu matahiti. Ua tuu vau i toʻu faaroo i roto i te rima o teie nei taote aravihi, e ua tatarahia teie iri i toʻu mata, e inaha ! tae maira te maramara i roto i toʻu oraraa ! Aita ihoa te mori i mohimohi ; e fifi noa no toʻu mata.
Ua haapii mai te reira iaʻu i te parau mau hohonu. E mea pinepine tatou ia ite anaʻe te poiri ra te ao nei, e aore râ, te atea atura te raʻi ia tatou, e pari tatou i te mau mea e haaati nei ia tatou, area te tumu mau o te poiri ra o to tatou ïa ereraa i te faaroo.
Ia riro tatou ei feia oaoa. Ia vai te faaroo e te tiʻaturiraa. Eita te Fatu e haamoʻe ia outou.
Ua fafau mai te Fatu e : « A imi itoito noa, a pure noa i te mau taime atoa, e ia faaroo noa hoʻi, e e ohipa amui mai te mau mea atoa ei maitai no outou, mai te mea e haere tiʻa noa outou19. »
Ua ite au, mai ia Alama atoa i tahito ra e, « o te tiʻaturi i te Atua ra, e faatiʻahia ïa ratou i to ratou mau ati, e to ratou ahoaho, e to ratou mau pohe, e e faateteihia ratou i te mahana hopea ra20. »
E mana rahi to te Metua i te Ao ra, te tere nei, e te arataʻi nei Oia. I te tahi mau taime, e oto tatou, e tupu mai te mauiui, e te mihi ; e auta tatou ia maramarama i te mau tamataraa i te faaroo a ora ai tatou i roto i to tatou oraraa ; te tahi taime e oraraa hepohepo e te mauiui – na roto râ i te faaroo, e farii tatou i te haapapuraa e tei pihaiiho noa te hoê Metua i te Ao ra ia tatou.
Mai ta te Aposetolo Paulo i fafau mai : « E teie nei, ua tiʻahia tatou i te faaroo, e hau to tatou i te Atua ra, i to tatou Fatu ia Iesu Mesia ra21. »
E i te hoê mahana, e ite mau tatou na roto atu i te poiri i te maramarama. E maramarama tatou i Taʼna faanahoraa mure ore, Toʼna aroha, e Toʼna here.
« Ia tae maira te Tamaiti a te taata nei, te vai ra anei te faaroo i te fenua nei ? »
E riro paha,te mau melo o te Ekalesia i te tiʻaturi ma to ratou aau atoa, faariro i to ratou tiʻaturiraa e to ratou faaroo ei ohipa, e ia imi i te faaaifaitoraa ia ratou i te hinaaro o te Fatu, i reira te pahonoraa i te uiraa a te Faaora a 2000 matahiti aʻe nei e faaroohia ai, « e, e ite Oia i te faaroo, e ite Oia i te faaroo i rotopu i te feia tei rave i Toʼna iʻoa i niʻa iho ia ratou. E ite Oia i te reira i rotopu i te feia o te ora nei i Taʼna mau parau tumu. »
Iteraa papu
Te faaite papu nei au e na roto i to tatou peropheta, te hiʻo, e te heheu parau, te peresideni Gordon B. Hinckley, te Fatu te Faaora, oia o Iesu Mesia, e parauparau mai ai ia tatou paatoa i teie mahana. Te faaite papu nei au e ua faahoʻihia mai te îraa o te Evanelia na roto mai i te Peropheta Iosepha Semita. Te faaroo, e mana mure ore ei ô na to tatou Metua i te Ao ra i te taata nei. Na roto i teie parau mau mure ore vau e vaiiho ai i toʻu nei iteraa papu na roto i te i’oa o Iesu Mesia, amene.