A ti’a i ni’a i to oe Piiraa.
E arataʻi te Fatu ia outou na roto i te heheuraa mai Taʼna i pii ia outou. Mea titauhia ia ani outou i te heheuraa na roto i te faaroo no te ite e aha te mea ta outou e rave.
Aita i maoro aenei ua haafatata mai te hoê feia apî tamaroa iaʻu i roto i te hoê vahi taata roa ino. Ua parau maira oia iaʻu : « Elder Eyring, no pii-noa-hia aʻe nei au ei peresideni no te mau Peresibutero. E aha te tauturu ta oe e nehenehe e horoʻa mai naʻu ? » Ua papu iaʻu i te mea o taʼna e hinaaro ra, aita râ taʻu e nehenehe ia horoʻaʼtu i te reira ihoa taime no te rahiraa taata i pihaiiho ia maua. E no reira ua parau atu vau : « E horoʻa atu vau i te reira i roto i te Amuiraa Rahi. »
E ere o te reira anaʻe feia apî tera e hinaaro ra i te tauturu. Tau tauatini mau melo o te Ekalesia i te ao nei o te piihia i te mau hepetoma atoa no te tavini. E mau piiraa rahi anaʻe to ratou e e mau taata taaʻe anaʻe ratou. Mai te mea o outou tei pii ia ratou, e aore ra tei faaineine ia ratou, e aore ra te haapaʻo ia ratou, te vaira ïa te tahi mau mea e titauhia outou ia ite e mea nahea i te tauturu ia ratou ia manuia.
Ia hiʻo na mua roa e ia farii ratou i te hoê buka arataʻi, te mau buka haapiiraa, e aore ra te mau vahi rururaa. E hinaaro paha outou i te parau atu ia ratou e e itehia te tereraa o ta ratou mau ohipa na roto i te hiʻoraa i to ratou mau mata.
Tae noaʼtu i te melo apî roaae o te Ekalesia, ua taa oia e, te piiraa no te tavini mea na roto mai ïa i te aau na mua roa. Na roto i te horoʻaraa i to tatou mau aau atoa i te Fatu e te haapaʻoraa i Taʼna mau faaueraa, e ite ai tatou Iaʼna. I roto i te tau e na roto i te mana o te Taraehara, e tauihia to tatou aau e nehenehe tatou e riro mai mai Iaʼna ra. No reira te vai nei te raveʻa maitai atu no te tauturu ia ratou tei piihia i te faaite-noa-raa i ta ratou mau hopoiʻa.
Te mea o ta ratou e titau nei, hau atu i te haapiiraa ia ratou i niʻa i to ratou mau hopoiʻa, o te iteraa ïa na roto i te hiʻoraa varua e aha te auraa ia pii anaʻehia no te tavini i roto i te Ekalesia a Iesu Mesia i faahoʻi-faahou-hia mai. Teie te basileia o te Atua i niʻa i te fenua nei. Na roto i te reira, e mana hau roa i te rahi o ta te taata e nehenehe e faaô atu iaʼna i roto. E tera mana, tei te huru ïa o te faaroo o te feia e piihia no te tavini i roto iaʼna ra.
E no reira, ia outou paatoa, te tane, te vahine, te tamahine e aore râ te tamaroa, o tei piihia no te tavini e aore ra o te piihia ra, te horoʻa tu nei au i taʻu aʻoraa. Te vai nei tau ohipa o te titauhia ia outou ia ite e parau mau te reira. E tamata vau i te parau atu i te reira. O te Fatu anaʻe râ, na roto i te Varua Maitai, o te nehenehe e tuu atu i te reira i roto i to outou aau. Teie taua mau ohipa nei :
Na mua roa, mea piihia outou e te Atua. Ua ite te Fatu ia outou. Ua ite Oia o vai te tavini atu i roto i te tiʻaraa i roto i Taʼna Ekalesia. Ua maiti Oia ia outou. Ua faaineine oia i te hoê raveʻa e nehenehe ai outou i te faatupu i to outou piiraa. Ua faahoʻi mai Oia i te mau taviri ia Iosepha Semita. Te reira mau taviri ua faahaere roahia mai na roto i te tau e ua tae mai i te peresideni Hinckley. Na roto i taua mau taviri ra, i horoʻahia ai i te tahi atu mau tavini o te autahuʻaraa te mau taviri no te peresideni i te mau tĭtĭ e te mau paroita, e te mau mataeinaa e te mau amaa. Na roto i taua mau taviri ra te Fatu e pii ai ia outou. E roaa mai te heheuraa na roto i taua mau taviri ra. E e tae mai te heheuraa no te pahono i te pure. Aita te taata i faauruhia no te tuu mai ia outou no teie piiraa i rave noa no te mea ua au oia ia outou e aore ra no te mea mea titauhia te hoê taata no te rave i tera ohipa. Ua pure ratou e ua farii i te pahonoraa e outou te tano ia piihia.
Te taata i pii ia outou aita i tuu noa i te piiraa no te mea ua faaitehia iaʼna, na roto i te uiuiraa ia outou, e taata tiʻamâ e te hinaaro i te rave i te ohipa outou. Ua pure oia ia ite i te hinaaro o te Fatu no outou ra. O te pure e te heheuraa a te feia i haamanahia e te Fatu i tae mai ai outou i ô nei. E hiʻoraa to outou piiraa no te mana hoê roa no te Ekalesia a te Fatu. Mea piihia te tane e te vahine e te Atua na roto i te heheuraa e na roto i te tuuraa rima ta te Atua i haamana.
Ua piihia outou ei tiʻa no te Faaora. To outou reo Ia faaite papu hoêâ ïa i Toʼna ra reo, to outou rima ia afaʻi i niʻa hoêâ i Toʼna rima. Taʼna ohipa no te haamaitai i te mau tamarii varua a Toʼna ra Metua ia nehenehe ia ratou ia maiti i te Ora Mure ore. No reira, to outou piiraa, no te haamaitai ïa i te mau oraraa. E parau mau ïa i roto i te mau huru piiraa atoa o ta outou e farii e i roto i te mau taime e rave ai outou i te mau ohipa noaʼtu e ere no roto i to outou piiraa. Na roto anei i to outou hohoʻa oaoa e to outou ra huru no te tauturu i te tahi ia patu i to ratou ra faaroo. E ia moʻe noaʼtu ia outou, o vai mau outou, na roto atoa i te huru o ta outou parauraa e ta outou mau peu e nehenehe outou e vavahi i te faaroo.
Hopearaa mure ore to to outou piiraa no vetahi ê e no outou iho. I roto i te ao amuri aʻe, rave rahi tauatini varua o te haamaitai i to outou ra iʻoa, hau atu a paha i te feia o ta outou e tavini i teie nei. O to outou ïa mau tupuna e te huaai o te feia o tei maiti i te Ora Mure ore no te tahi anei parau ta outou i parau, e aore ra i rave, e aore ra na roto i to outou na huru. Mai te mea e patoʻi te hoê i te aniraa a te Faaora no te mea aita outou i rave maitai i ta outou ohipa, e riro atoa to ratou oto no outou. Aita e piiraa naʻinaʻi ei tiʻa no te Fatu. Tei roto i to outou piiraa te hopoiʻa rahi. Tera râ eiaha outou e mătaʻu, no te mea na roto i to outou piiraa e tae mai ai te mau fafauraa rahi.
Hoê o teie mau fafauraa, o te piti ïa o te mea o te tiʻa ia outou ia ite. Oia hoʻi, e arataʻi te Fatu ia outou na roto i te heheuraa mai Taʼna i pii ia outou. Mea titauhia ia ani outou i te heheuraa, na roto i te faaroo, no te ite e aha te mea ta outou e rave. Na roto i to outou piiraa e tae atoa mai te fafauraa e farii outou i te mau pahonoraa. Tera râ, e tae mai teie arataʻiraa mai te mea ua papu i te Fatu i to outou haapaʻoraa. No te iteraa i Toʼna hinaaro mea titauhia outou ia rave i te reira. Tera parau, « Ia tupu to Oe hinaaro », ia papahia te reira i roto i te aau i reira te haamaramarama no te heheuraa e matara ai.
E tae mai te mau pahonoraa na roto mai i te Varua Maitai. E titau pinepine outou i te reira. No te fariiraa i te Varua Maitai mea titauhia outou ia tiʻamâ, e ua mâ outou na roto i te Taraehara a Iesu Mesia. Na ta outou haapaʻoraa i te mau faaueraa, te hinaaro outou i te rave i Taʼna ohipa e ta outou aniraa ma te faaroo, e faaite nahea te Fatu e arataʻi ia outou na roto i te mau pahonoraa i ta outou mau pure.
Mea pinepine te mau pahonoraa te tae mai na roto i te taiʻoraa i te mau papaʻiraa moʻa. Tei roto i reira te faaiteraa no te mau ohipa ta te Fatu i rave i roto i Taʼna misioni i te tahuti nei e te arataʻiraa o Taʼna i horoʻa i Taʼna mau tavini. Te vai nei te haapiiraa i roto i reira o te nehenehe ia faaohipa i te taime atoa e te huru o te ohipa. Tuatapapa maite i te mau papaʻiraa moʻa na te reira e arataʻi ia outou ia ani i te mau uiraa tano na roto i te pure. Mai te mau raʻi i te matararaa ia Iosepha Semita, i muri aʻe ïa i toʼna tuatapaparaa i te mau papaʻiraa moʻa na roto i te faaroo, e pahono mai te Atua i ta outou mau pure, e mau Oia i to outou rima no te arataʻi ia outou.
Te vai nei te toru o te ohipa o te tiʻa ia outou ia ite. Mai ta te Atua i pii ia outou e arataʻi hoʻi ia outou, e faahanahana Oia ia outou. Mea titauhia ia farii outou i taua hanahana ra. No te mea e tupu mai te patoʻiraa i roto i te piiraa. Tei roto outou i te ohipa a te Fatu. O outou Toʼna tiʻa. Tei niʻa ia outou te mau oraraa mure ore. Ua arai Oia i te patoʻiraa e ua parau Oia e, o te patoʻiraa te tuhaa a te feia o te piihia. Tera mau puai e patoʻi ia outou, e ere ïa no te haaparuparu noa i ta outou ohipa, no te faatopa râ ia outou i raro. Teie ta te Aposetolo Paulo i faaite mai : « E ere hoʻi i te taata anaʻe ra ta tatou e tô nei o te feia hau atoa ra, e te mana, e te mau tavana o teie nei ao poiri1. »
Te vaira te mau taime e teimaha mai outou. Te hoê o te mau raveʻa e arohia outou maoti râ te feruriraa e aita e tano ra ia outou i tera ohipa. Oia, e mea tano ore outou ia pahono i te piiraa ia riro ei tiʻa no te Atua na roto i to outou anaʻe ra puai. Te vai nei te mau raveʻa o ta outou e nehenehe e farii eita paʻi outou e rave i te ohipa e outou anaʻe ra.
E faahanahana te Fatu ia outou no te parau e no te rave i te ohipa i mua i te mata o te mau taata o ta outou e tavini. E tono atu Oia i te Varua Maitai no te faaite ia ratou e te parau o ta outou e parau ra e mea tano ïa. Te parau o ta outou e parau e te ohipa o ta outou e rave, e faatupu te reira i te tiʻaturiraa, e e horoʻa hoʻi i te arataʻiraa i te mau taata hau atu i to outou puai e to outou iteraa. O te tapaʻo te reira no te Ekalesia a te Fatu i roto i te mau tuuraa tau atoa. E tuhaa rahi roa to outou piiraa e rave outou i te reira ei haamaitairaa.
Te mahana outou e haamuruuruhia e riro ïa ei haapiiraa rahi na outou. I te mahana i haamauruuruhia ai au ei epesikopo, ua haere maira te hoê o te mau melo o te paroita i toʻu fare i muri aʻe e ua parau maira, « ua ite au e, e ere oe i toʻu epesikopo faahou, tera râ, e nehenehe anei ta taua e paraparau rii hoê a’e taime toe ? Ua parau noa na oe i te mau parau o taʻu i hinaaro noa na e tei horoʻa mai i te tautururaa iaʻu. Aita te epesikopo apî i matau iaʻu mai ta oe i matau iaʻu. E nehenehe anei ta taua e paraparau hoê a’e taime toe ? »
Ua farii au. Ua parahi maira te melo i niʻa i te hoê parahiraa. E au ra mai tei matarohia e au i te mau taime e rave rahi a uiui ai au i te mau melo o te paroita ei haava no Iseraela. Ua haamata ihora maua i te paraparau. E tae tura i te taime e hinaarohia ai i te tauturu. Ua tiaʻi au i te mau manaʻo, te mau parau, e te mau mea e fâ mai i roto iaʻu, mai taʻu i matau noa na.
Aita hoê noaae mea i faura mai. Ua faaea muhu ore noa toʻu aau e toʻu feruriraa. I muri aʻe tau taime, ua parau atura vau, « eiaha oe e inoino mai. Mauruuru roa vau no to oe maitai e to oe tiʻaturiraa. Tera râ aita taʻu e nehenehe e tauturu ia oe. »
Ia haamauruuru anaʻehia outou i to outou piiraa, ei reira outou e ite ai i te mea o taʻu i ite. E faahanahana te Atua i te feia o Taʼna e pii, noaʼtu e, e mea haʻihaʻi roa te ohipa. E farii outou i te horoʻa ia ite i to outou taviniraa ia faahanahanahia. Haamauruuru maitai i te mea e, te mau ra outou i te reira i teie nei. E hau atu to outou iteraa i te faufaa no te reira i te taime te reira e tatarahia ai.
Eita te Fatu e faahanahana noa i te mana no ta outou mau ohipa. E ohipa atoa râ Oia e o outou. Toʼna reo i na misionare toomaha, tei piihia na roto atu i te Peropheta Iosepha Semita no te hoê ohipa fifi mau, o te riro ïa ei faaoitoito i te taata atoa o Taʼna e pii i roto i Toʼna Basileia : « E o vau iho te haere atoa i pihaiiho ia ratou e e vai noa hoʻi i rotopu ia ratou ra ; e o vau hoʻi to ratou arai i te Metua, e aore ratou e tapeahia e te hoê mea2. »
No te mea ua tiʻafaahou mai te Faaora e ua riro ei mea hanahana, aita Oia e tae tino atu i pihaiiho i te taatoaraa o Taʼna mau tavini hoê â taime. Ua ite maitai râ Oia ia ratou e ta ratou mau ohipa e nehenehe hoʻi ta ratou e faaohipa i Toʼna ra mana. No reira Oia e nehenehe ai ia fafau ia outou : « E o oia o te farii mai ia outou na, ei reira atoa ïa vau, no te mea e haere au na mua i to outou mata. E vai hoʻi au i to outou pae atau e i to outou pae aui, e i roto hoʻi i toʻu Varua i to outou mau aau, e taʻu mau melahi hoʻi e ati noaʻe ia outou na, ia haamaraa mai ia outou i niʻa3. »
Te vai atura te tahi atu raveʻa e nehenehe te Fatu e faahanahana ia outou e i to outou piiraa no Taʼna ra ohipa. E ite outou i te tahi taime, penei aʻe paha e rave rahi taime, e eita ta outou e nehenehe e rave i te mau mea atoa o ta outou e manaʻo ra e mea titauhia ia rave pauroa. E riro te teimaharaa o ta outou mau hopoiʻa ei mea rahi roa ino. E peʻapeʻa outou inaha eita outou e nehenehe ia faaea maoro i pihaiiho i to outou utuafare. E uiui outou e nahea râ te taime e te puai e roaa ai ia outou no te amo i ta outou mau hopoiʻa i te utuafare e i to outou piiraa. E riro paha outou i te paruparu e tae noaʼtu i te faahapa ia outou iho i muri aʻe i to outou raveraa i te mau mea atoa no to outou piiraa. Ua farerei au i tera mau mahana e tera mau aruʻi. E faaite atu vau ia outou e aha taʻu i haapii mai roto mai i te reira.
O teie ïa. Mai te mea e hiʻo vau i te huru no toʻu raveraa i te ohipa, e rahi roaʼtu toʻu peʻapeʻa. Ia feruri râ vau e, ua fafau mai te Fatu e haere mai Toʼna mana i pihaiiho iaʻu, ei reira vau e hiʻo ai i te mea o Taʼna i rave i roto i te oraraa o te mau taata o taʻu e tavini atu. E pure au ia ite i te mau hopea o toʼna mana ma te hiʻoraa varua.
I reira, e vai mai te mau mata o te mau taata i roto ia outou. Te haamanaʻo nei au i te anaana i roto i te mau mata o te hoê tamarii tei tamărûhia toʼna aau, te roimata oaoa i niʻa i te mata o te hoê tamahine e parahi ra i muri roa i te piha Haapiiraa Sabati taʻu i haapii na, e aore ra te mau parau popou, a te hoê raatira, tei ite i te hoê maitai i roto i taʻu ohipa. Ua ite au i reira e ua rave au mai te fafauraa i ravehia e Iosepha Semita : « Ia rave tatou i te mau mea atoa i roto i to tatou mana, ia rave râ ma te oaoa ; ei reira e tiaʻi ia tatou ia tiʻa noa mai ai, mai te papu roaraa, no te ite i te ora o te Atua ra, e no te faaiteraa mai i toʼna ra rima4. »
E farii papu mau outou i te haapapuraa e faarahihia to outou mana e rave rahi taime e te Fatu. Te mea noa o Taʼna e ani oia hoʻi ia horoʻa outou i to outou puai mau e te taatoaraa o to outou aau. A rave na roto i te oaoa e na roto i te pure faaroo. E tono mai te Metua e Taʼna Tamaiti Herehia i te Varua Maitai ei hoa no te arataʻi ia outou. E itehia ta outou ohipa i roto i te oraraa o te mau taata o ta outou e tavini atu. E ia hiʻo anaʻe outou i muri, e au ra ei mau taime tamataraa te reira no te tavini, no te tusiaraa, e o te riro mai ei haamaitairaa , e ite outou e ua toro mai te rima o te Atua no te amo i te feia o ta outou i tavini Noʼna ra, e tei amo ia outou.
Ua ite au e te ora nei te Atua te Metua. Te faaroo nei e te pahono nei Oia i ta tatou mau pure. O ratou o ta tatou e tavini nei, e mau tamarii varua ïa Naʼna. Teie te Ekalesia mau a Iesu Mesia. Toʼna anaʻe te iʻoa e na reira ai te mau tamarii a to tatou Metua i te haamoʻahia e farii ai i te ora mure ore. Te mau taviri no te autahuʻaraa, e faaohipa ïa te reira e te peropheta ora a te Fatu, o Gordon B. Hinckley.
Te faaite papu nei au e te ora nei te Faaora e te arataʻi nei i Taʼna Ekalesia ora. Ua ite au i te reira. E ite au Noʼna ra, e Naʼna ra. Ua ite e te mauruuru nei Oia i ta outou taviniraa na roto i te faaroo i te ohipa i piihia ai outou.
Na roto i te iʻoa o Iesu Mesia, amene.