Te niu faahiahia no to tatou faaroo
Ia haamauruuruhia te Atua no te faahoʻiraahia mai te iteraa papu, te mana faatere, e te mau haapiiraa no niʻa i te faahoʻiraahia mai te Ekalesia a Iesu Mesia.
E toʻu mau taeaʻe e mau tuahine, te ani nei au i te faaûrûraa a te Fatu a aʻo atu ai ia outou. Eita teie i te hoê hopoiʻa ohie iaʻu ia aʻo atu i te mau melo no te Ekalesia. Te mauruuru nei au no to outou maitai e to outou faaoromaʻi. Te pure pinepine nei au ia vai tiʻamâ noa no te farii i te tiʻaturiraa o te mau taata.
Ua hoʻi mai nei au i te hoê tere huru maoro. E mea rohirohi roa, area râ e mea faahiahia roa ia haere atu i rotopu i te Feia Moʻa. Ahiri e tiʻa ua horoʻa vau i te faatereraa o te Ekalesia ia vetahi ê, e i reira e faaohipa vau i toʻu taime no te haere atu i rotopu i to tatou mau taata, e farerei haere i te mau melo i roto i te mau amaa iti e i roto atoa i te mau tĭtĭ rahi. Ua hinaaro vau ia amui atu i te Feia Moʻa i te mau vahi atoa. Ua feruri au e mea tiʻa roa i te mau melo atoa no teie Ekalesia ia hahaerehiaʼtu. Te oto nei au no te paruparu o toʻu nei tino aita e tiʻa faahou iaʻu ia aroha rima atu i te mau taata atoa. Area râ ua tiʻa iaʻu ia hiʻo atu i to ratou mata ma te oaoa i roto i toʻu aau e ia faaite atu i toʻu here e ia vaiiho atu i taʻu haamaitairaa.
Te tumu no teie tere taʻu i rave iho nei no te haamoʻa-faahou-raa ïa i te hiero i Freiberg, fenua Purutia, e te haamoʻaraa i te hiero i Hague Netherlands, i Europa. Ua haamoʻa vau i te hiero i Freiberg, Purutia, 17 matahiti i mairi aʻenei. E hiero naʻinaʻi tano te reira i hamanihia no te pae tiʻamâ o te fenua Purutia, no te mea i taua tau ra te vai atoa ra te pae tiʻamâ ore. Ua riro te hamaniraahia o te hiero ei semeio rahi. Ua manuïa te peresideni Monson, Hans Ringger, e te tahi atu feia faatere ia farii i te parau faatiʻa a te feia hau Purutia.
Ua faaohipa-maitai-hia teie hiero e rave rahi matahiti. I teie nei ua vavahihia te patu rahi no te fenua Purutia o tei faataaê i te tahi tufaa fenua i te tahi atu. E mea ohie i to tatou mau taata i teie nei ia haere atu i Freiberg. Ua tahito te hiero i teie nei e ua huʻahia.
Ua faarahihia teie hiero e ua nehenehe roa atu e ua tano maitai. Ua ravehia te ohipa haamoʻaraa i te hoê anaʻe iho taime. Ua tae mai te mau melo na te mau vahi atea mai. I roto i te piha rahi ta matou e parahi ra, e tiʻa ia matou ia hiʻo atu i te mau mata o taua mau melo puai e te itoito o tei faaoromaʻi i te mau matahiti e rave rahi i te huru no te faatereraa a te hau Purutia ; i teie nei ua tiʻamâ ratou, ua tapea maite ratou i te faaroo, e ua tavini maite i te Fatu, e ua riro ei mau aito no te Evanelia. Te oto nei au i te mea aita taʻu e tiʻa ia tauahi atu i teie mau taeaʻe e mau tuahine no te faaite atu i toʻu here ia ratou. Mai te mea te faaroo mai nei ratou iaʻu i teie nei, te tiʻaturi nei au e ite ratou i te huru no toʻu here e e farii mai hoʻi i taʻu tatarahaparaa no toʻu rû i te vaiihoraaʼtu ia ratou.
Mai reira ua rave matou i te manu reva no te haere atu i Farani no te tahi tufaa ohipa a te Ekalesia. Ua rave faahou matou i te manu reva no te haere atu i Rotterdam e ua horo atu na niʻa i te pereoo uira i The Hague. E ohipa rahi teie no te hoê mahana i roto e toru nunaa fenua na te hoê ruaau mai iaʻu nei.
I te mahana i muri iho ua haamoʻa matou i te hiero no The Hague Netherlands. Ua ravehia te reira e maha taime. Ua putapû roa te aau i teie ohipa faahiahia rahi i ravehia.
E hiero nehenehe roa teie i te hoê vahi maitai. Ua mauruuru roa vau no teie Fare o te Fatu i patuhia no te tauturu i te mau melo i Netherlands, Belgium, e te tahi mau vahi no Farani. Ua tonohia te mau misionare matamua i teie tufaa no Europa i te matahiti 1861. E rave rahi tauatini taata i tomo mai i roto i te Ekalesia. Ua faanuu mai to ratou pae rahi i te Fenua Marite. Area râ te vai nei i reira e rave rahi mau melo itoito, e ua tiʻa roa ia vai te hoê Fare no te Fatu i rotopu ia ratou.
No te mea tei reira matou, ua opua ihora vau ia haere atu i te tahi atu â mau vahi. Ua tere faahou atura matou i Kiev i te fenua Ukraine. Ua haere atu vau i reira e 21 matahiti i mairi aʻenei. Ua tiʻamâ teie nei fenua. Ua putapû roa toʻu aau ia farerei atu e 3.000 tiʻahapa mau melo. Ua haaputuputu mai te mau melo na te mau vahi atea mai, e ua faaoromaʻi ratou i te atearaa e te haamauʻaraa.
No te navaʻi ore aita te mau melo atoa no te hoê utuafare i tae mai. Ua faaea atu na metua i te fare e ua tono mai i ta raua mau tamarii, ia tiʻa ia ratou ia farerei ia matou.
Mai reira ua reva atu matou i Moscow, fenua Rusia. Ua tae atu vau i reira 21 atoa matahiti i mairi aʻenei, e ua ite au i te hoê tauiraa i reira, mai te uira te huru. Aita ta oe e tiʻa ia ite mata atu ; e taa râ ia oe. Ua tupu faahou te hoê aparauraa faahiahia roa i te feia faatere rahi o te hau fenua mai tei na reirahia i Ukraine.
Teie ïa te hoê ohipa faufaa rahi roa i tupu no te farerei atu i teie mau melo faahiahia o tei haaputuputu mai i roto i te nănă no Ziona « tataihoê no te oire hoê, e tataipiti i to te opu hoê » no te faatiʻa i te tohuraa a Ieremia (a hiʻo Ieremia 3:14). Eita to ratou oraraa i te mea ohie. E mea teiaha ta ratou mau hopoiʻa. E mea papu râ to ratou faaroo e e mea puai to ratou iteraa papu.
I teie mau vahi atea, ite-ore-hia e te pae rahi o te mau melo o te Ekalesia, te haere puai nei te Evanelia i mua, e te haamaramarama nei te reira i te eʻa o te mau taata e rave rahi tauatini.
Ua reva atu to matou manu reva i Iceland i muri iho. E mea nehenehe teie fenua e te mau taata atoa. Ua aparau maoro matou i te peresideni no teie nunaa ; e taata tuiroo oia e te aravihi atoa ; ua tae mai na oia i Utaha nei, e ua faahiti mai oia i te tahi mau parau faahiahia roa no niʻa i to tatou mau taata.
Ua farerei faahou matou i te mau melo no te Ekalesia. E mea faahiahia mau ia hiʻo atu i to ratou mau mata a haaputuputu mai ai ratou i roto i te fare pureraa i te oire no Reykjavik.
I teie mau vahi atoa e i te mau taime atoa vau i aʻo atu i te mau melo e rave rahi, hoê mea i ô pinepine i roto i toʻu feruriraa, oia hoʻi te faahiahia rahi o teie ohipa, e mea maere mau. Ua ô pinepine mai te mau parau no teie himene i himenehia mai e te pŭpŭ himene i teie poʻipoʻi i roto i toʻu feruriraa.
Auê te paari, te Feia Moʻa e,
Te niu i patu i te Evanelia.
(« Auê te Paari », Te mau Himene, no. 41)
Ua papu anei tatou e ua mauruuru anei tatou, e te mau melo, i te puai no to tatou tiʻaraa ? I roto i te mau haapaʻoraa atoa no te ao nei, e mea taaê e e mea faahiahia tatou.
Ua riro anei teie Ekalesia mai te hoê fare haapiiraa ? Oia mau. Te haapii tamau noa nei, te haapii nei, te haapii nei, e te haapii nei tatou i roto i te mau huru vahi atoa. E vahi faahoaraa anei ? Oia mau roa. E utuafare rahi teie no te mau hoa o te amui tahoê nei no te faatupu i te oaoa. E pŭpŭ tauturu anei teie ? Oia mau. Teie te hoê faanahoraa ohipa no te faatupu i te tiʻaturiraa ia oe iho e no te tauturu ia vetahi ê i roto i te ati. Teie ïa te huru o te Ekalesia e hau atu. Teie te Ekalesia e te basileia o te Atua i faatiʻahia e i arataʻihia e to tatou Metua i te Ao ra e e Taʼna Tamaiti Here, te Fatu o Iesu Mesia o tei tiʻa faahou mai, e e haamaitaihia te mau taata atoa o te tomo mai i roto i te reira.
Te faaite papu nei tatou e, ua fâ tino mai te Atua te Metua e Taʼna Tamaiti, te Fatu ra o Iesu Mesia i te tamaiti ra ia Iosepha Semita.
I toʻu uiuiraahia e Mike Wallace i roto i te faanahonahoraa ‹60 Minutes› , ua ani mai oia iaʻu, e ua tiʻaturi mau anei au i te reira. Ua pahono atu vau : « E. Tera ïa te hoê semeio rahi. »
Tera ïa toʻu tiʻaturiraa no niʻa i te reira. Tei niʻa to tatou puai atoa i te parau mau no taua orama ra. Ua tupu mau paha te reira e aore râ aita i tupu. Mai te mea e aita, e haavare ïa teie ohipa. Mai te mea e ua tupu mau te reira, o te reira ïa te ohipa faahiahia roa e te faufaa rahi roa i niʻa i te fenua nei.
A feruri maite i te reira e te mau taeaʻe e te mau tuahine. E rave rahi hanere matahiti ua tapirihia te mau raʻi. Ua tamata te mau taata maitai e te mau vahine maitai, e, e rave rahi ratou, ia faatano, ia haapuai, e ia haamaitai aʻe i ta ratou mau ohipa haamoriraa e ta ratou mau haapiiraa tumu. Te haapoupou nei e te faatura nei au ia ratou. Ua maitai te ao nei na roto i ta ratou ohipa maitai. Ua ite au e ua faaûrûhia ta ratou mau ohipa, aita râ te mau raʻi i iritihia mai ia ratou no te fâraa mai te Atua.
I te matahiti 1820 ua tae mai te faaiteraa hanahana ei pahono i te pure a te hoê tamaiti o tei taiʻo i teie mau parau a Iakobo i roto i te Bibilia : « Te ere ra râ te hoê o outou i te ite, e ani oia i te Atua… o tei horoʻa… mai i te maitai i te taata atoa… , ma te patoi ore ; e e horoʻahia mai taʼna » (Iakobo 1:5).
Na teie ohipa taaê i tupu i faaite papu mai i te parau mau no teie Ekalesia.
I roto i te mau aamu atoa i papaihia no te pae faaroo aita roa te hoê aʻe e au ia faaauhia i teie. Ua faaite mai te Faufaa Apî i te aamu no te bapetizoraa o Iesu e a faaroohia ai te reo o te Atua e a pou mai ai te Varua Maitai mai te uupa te huru. I niʻa i te Mouʻa no te Faahuru-ê-Raa, ua ite atu Petero, Iakobo, e Ioane i te Fatu i te faahuru-ê-raahia i mua ia ratou. Ua faaroo ratou i te reo o te Metua, aita râ i ite mata atu Iaʼna.
No te aha hoʻi te Metua e te Tamaiti i fâ mai ai i te hoê tamaiti apî, ahuru tiʻahapa matahiti noa ? Hoê tumu, ua haere mai raua no te haamata i teie tau tuuraa Evanelia rahi no te mau tau atoa, ia tahoêhia te mau tau tuuraa Evanelia atoa na mua atu.
E maere anei tatou ia ite e ua riro teie tau ta tatou e ora nei ei anotau faahiahia roa atu i roto i te aamu o te ao nei ? Ua tupu rahi te maramarama no te pae ite, no te pae raau, no te pae aparauraa, e no te pae ratereraa, e a tahi ra te reira a itehia ai i roto i te aamu o te taata nei. E mea hape anei ia feruri e ua tano atoa te reira no te mau mea pae varua ei tufaa no teie anotau maramarama rahi.
Te mauhaa i roto i teie ohipa a te Atua o te hoê ïa tamaiti o tei ore toʼna feruriraa ia haafifihia e te mau haapiiraa a te taata nei. E mea apî toʼna feruriraa e aita te reira haapiihia i te mau haapiiraa no toʼna mau mahana.
E mea ohie ia ite e no te aha aita te mau taata e farii i teie aamu. E mea fifi mau ia feruri. Area râ e mea papu maitai. Ua ite te mau taata i mâtau i te Faufaa Tahito e ua fâ mai Iehova i te mau peropheta i ora na i taua anotau ra. E tiʻa mau anei ia ratou ia parau e aita e faufaa i te Atua no te raʻi e i Taʼna Tamaiti o tei tiʻa faahou mai ia fâ mai i teie anotau ?
E ua haere mai Raua e piti atoa ra, e ua ite mata atu Iosepha ia Raua i roto i to Raua hanahana rahi roa, e ua paraparau mai Raua iaʼna, e ua faaroo e ua papai oia i ta raua mau parau – oia teie mau mea faahiahia rahi ta tatou e faaite papu nei.
Ua ite au i te hoê taata maramarama rahi o te parau nei, e aita teie aamu o te Ekalesia e tiʻaturihia e to te ao nei. Taʻu pahonoraa, ahiri aita e aamu ua faufaa-ore-hia tatou. Ua riro te parau mau no taua ohipa ra ei tufaa faufaa rahi roa no to tatou faaroo.
Ua riro râ teie orama hanahana ei haamataraa no te mau faaiteraa i te haamataraa o te aamu no teie ohipa.
Mai te mea e aita taua orama ra i navaʻi no te haapapu i te huru mau o te Faaora o te taata nei, te faaite atoa mai nei te Buka a Moromona i te parau mau no te reira. Teie ïa te hoê taoʻa ta te taata e tiʻa ia tapea i roto i toʼna na rima, e ia « rave » ite i te teiaharaa. E tiʻa iaʼna ia taiʻo i te reira. E tiʻa iaʼna ia pure no te reira no te mea tei roto i te reira te fafauraa, e e faaite mai te Varua Maitai i te parau mau no te reira ia anihia na roto i te pure.
Ua riro teie buka ei faaiteraa papu e te ora mau nei te Tamaiti a te Atua. Te faaite atoa nei te Bibilia e : « ia papu te mau parau atoa i te vaha o na ite toopiti e tootoru ra » (Mataio 18:16). Ua riro te Biblia ei hoê no te mau ite no te Ao Tahito. Ua riro hoʻi Te Buka a Moromona, ei hoê no te mau ite no te Ao Apî.
Aita vau i ite e no te aha aita te ao Teretetiano e farii i teie buka. Ua manaʻo vau e riro paha ratou i te imi i te hoê mea o te faaite papu mai i te huru mau e te moʻaraa o te Faaora o te ao nei.
I muri iho i te faahoʻiraahia mai te autahuʻaraa. Te matamua, te Autahuʻaraa a Aarona i raro aʻe i te rima o Ioane Bapetizo, o tei bapetizo ia Iesu i Ioridana.
I muri iho ua haere mai Petero, Iakobo, e Ioane, te mau aposetolo a te Fatu o tei faahoʻi mai i teie anotau i te mau taviri ta ratou i farii no ô mai i te Fatu ra a ora ai ratou i pihai iho Iaʼna, oia hoʻi, « te mau taviri o te basileia o te ao ra » e te mana faatere no te taati i niʻa i te mau raʻi i te mau mea ta ratou i taati i niʻa i te fenua nei (a hiʻo i te Mataio 16:19).
I muri iho ua faahoʻi mai Mose, Elia, e Eliaha i te tahi atu mau taviri no te autahuʻaraa.
A feruri na i te reira, e toʻu mau taeaʻe e mau tuahine. A feruri na i te faahiahia rahi o te reira.
Teie te Ekalesia a Iesu Mesia i faahoʻihia mai. Ua riro tatou ei mau melo no te reira, oia hoʻi, ei Feia Moʻa i te Mau Mahana Hopea Nei. Te faaite papu nei tatou e, ua iritihia mai te mau uputa no te ao ra, ua tatarahia te mau paruru, ua paraparau mai te Atua, ua faaite mai Iesu Mesia Iaʼna iho, e ua faahoʻihia mai te mana faatere.
O Iesu Mesia te tihi rahi no teie ohipa, e ua patuhia te Ekalesia i niʻa iho i te « niu o te mau aposetolo e te mau peropheta » (Ephesia 2:20).
Na roto i te faahoʻiraahia mai te Ekalesia ua tiʻa roa ia tatou ia riro ei feia faaoromaʻi, ei mau taata-tupu maitai, ei feia mauruuru e te hamani maitai ia vetahi ê. Eiaha tatou ia riro ei feia faaahaaha e te teʻoteʻo. Ia riro tatou ei feia mauruuru e te haehaa.
Ua here tatou i te mau melo no te tahi atu mau ekalesia. Ua rave amui tatou e ratou i te mau ohipa maitai. Ua faatura tatou ia ratou. Eiaha râ ia moʻehia ia tatou te huru no to tatou haamataraa mai. E mea papu te reira i te omuaraa no teie tau tuuraa Evanelia hopea, te tau tuuraa Evanelia no te îraa o te mau tau.
E mea faahiahia mau ia hiʻo atu i te mata o te mau tane e te mau vahine na roto i te ao nei o tei farii i roto i to ratou aau i te iteraa papu no niʻa i te parau mau o teie mau mea.
Ua riro te mana faatere no ô mai i te Atua ra ei mea faufaa rahi roa no teie ohipa.
Ia haamauruuruhia te Atua no te faahoʻiraahia mai te iteraa papu, te mana faatere, e te mau haapiiraa no niʻa i te faahoʻiraahia mai te Ekalesia a Iesu Mesia.
Teie ïa ta tatou parau poroʻi rahi roa i to te ao nei. Aita tatou e parau nei i te reira ma te teʻoteʻo. Te faaite papu nei tatou i te reira ma te haehaa e te parau mau. Te ani nei tatou i to te ao atoa nei ia faaroo mai i teie mau mea e ia imi i te parau mau no te reira. Ia haamaitai mai te Atua ia tatou o te tiʻaturi nei i te mau mea Taʼna i faaite mai, e ia tauturu mai oia ia tatou ia faatae atu i te ite no teie mau mea faahiahia ia ratou atoa o te faaroo mai. Ia ratou, te parau atu nei matou, ma te varua o te here, a afaʻi mai na muri ia outou te mau mea maitai e te parau mau o ta outou i farii noaʼtu te vahi no reira mai te reira, e e amui atu matou i ta matou i te reira. Te faatae nei au i teie aniraa i te mau taata i te mau vahi atoa, ma te faaite atu i toʻu iteraa papu e parau mau teie, no te mea ua ite au i te parau mau no te reira na roto i te mana o te Varua Maitai, na roto i te iʻoa o Iesu Mesia, amene.