E ere anei ahuru tei tamâhia ?
Mai te mea e hinaaro tatou e faaite i to tatou mauruuru mau i to tatou Metua i te Ao ra, mea tiʻa ïa ia na reira tatou ma to tatou aau, te manaʻo, te feruriraa, e te puai atoa.
I to te peresideni Thomas S. Monson aniraa i te mau melo apî no te Pŭpŭ Hitu Ahuru e te peresideniraa rahi no te Feia Apî Tamahine ia haere mai i mua nei no te parahi i to ratou ra mau parahiraa, haamanaʻo ihora vau i te avaʻe no eperera 1970, i toʻu piiraahia ei Mono no te Pŭpŭ no te Tino Ahuru Ma Piti Aposetolo – o tei riro ei hitimaʻueraa noʻu. Inaha tau hora noa iho na mua atu toʻu iteraa i tera piiraa. A titauhia ai au ia haere mai e parahi i mua i niʻa i te hoê o te mau parahiraa uteute i roto i te Fare Menemene tahito, ua himene ihora te pŭpŭ himene « O Divine Redeemer. » A faaroo ai au i taua himene nehenehe roa, ua ani au ma te aau haehaa i te Faaora ia farii iaʻu ia au i toʻu iho nei huru, ma te haamanaʻo ore i toʻu mau manuïa ore, toʻu mau paruparu, e taʻu mau hara (a hiʻo Salamo 25:7). Aue taua mahana ra i te popou e ! Ua hoʻi mai te aniraa a te peresideni Monson i roto i toʻu feruriraa a faatae ai oia i teie aniraa i teie nei mahana.
Ua faateitei-mau-hia vau i toʻu taeraa mai i ô nei i teie nei avatea ia faaea mai i rotopu ia outou no te hoê maa taime iti e ia faaite i toʻu nei iteraa papu e toʻu mau manaʻo no niʻa iho i teie ohipa nehenehe roa.
Ua parau vau ia Elder Neal A. Maxwell e, e haere au i mua ma te turu tootoo ore. Ua faaineine hoʻi oia i te reira, area râ, ua parau vau iaʼna, « Aita, e nehenehe taʻu e haere ma te turutootoo ore. E faaite au ia oe e, te tiʻaturi nei au e, e tupu mau â te reira. » Ia tupu vau i te ruhiruhiâ e a tere noaʼi te mau matahiti, ua faateiteihia vau no teie taime ia nehenehe iaʻu ia tiʻa atu e ia faaite ia outou i te mau haamaitairaa o te Evanelia o tei tae mai i roto i toʻu oraraa na roto i te mau matahiti e rave rahi i mairi. Aita vau i ite e, o vau ra anei te mea paari roa aʻe i roto i te fare amuiraa rahi i teie nei mahana, e 97 toʻu matahiti. I te faaite-raa-hia i teie nei poʻipoʻi e o te 172raa o te amuiraa afa matahiti a te Ekalesia, ua manaʻo vau e, eita e ore e ua hiʻo paha vetahi feia apî aʻe i te 172raa matahiti ei tau roa. Te faahaamanaʻo atu nei au i te 100raa o te matahiti fanauraa o te Ekalesia. I te reira taime, ua faaipoipohia maua o Ruby. Matahiti 1930 ra. Teie te 172raa o te matahiti o te Ekalesia, e ua faaipoipohia ïa maua a 72 matahiti i teie nei. Te parau noaʼtu nei au i teie parau ia numera noa outou e tera 172, e ere atoa i te mea rahi roa.
Te hinaaro nei au i teie nei taime e haamauruuru maitai i toʻu Metua Here i te Ao ra no te mau haamaitairaa o taʻu i farii no te mau matahiti atoa o toʻu nei oraraa – no toʻu fanauraahia mai i na metua maitai e ua paari au i roto i te hoê utuafare maitai. E a tere haere ai maua na tera fenua e tera fenua e i roto i te mau tereraa ohipa atoa ta maua i amui atu, ua mauruuru roa vau i te amuiraa atu i pihaiiho i te mau taata maitatai. E faaurû te mau taata maitai i to tatou oraraa e tauturu atoa mai ratou ia haapaari i to tatou huru taata e ia tauturu hoʻi ia tatou ia ora maitai i roto i te oraraa totaiete e mai te ora maite i te oraraa hau. E tauturu ratou ia outou ia rave i te mau ohipa rarahi, e faateitei ratou ia outou. E no reira ua mauruuru roa vau i toʻu Metua Here i te Ao ra no te mau haamaitairaa o taʻu i farii. Te faaite papu nei au Noʼna ra, e ua ite au e o Oia to tatou Metua Here i te Ao ra e o Iesu te Mesia, te Tamaiti a te Atua Ora, te Poiete, e te Faaora o te taata nei. Ua mauruuru roa vau no tera tiʻaraa Toʼna i roto i te Poieteraa e te haamauraa i te Evanelia i niʻa i te fenua nei e no te raveʻa o te horoʻahia i te taata, mai te mea e faaroo ratou, ia maramarama e ia farii i te mau haamaitairaa mai te raʻi mai mai te mea ua tano ia ratou ia farii e ia ora mai te au i te faanahoraa o te Evanelia e ia riro mai ei tuhaa rahi no to ratou oraraa.
E mauruuru rahi toʻu i toʻu mau tupuna tei tomo i roto i te Ekalesia i te mau mahana matamua o te Ekalesia, o tei haere mai New York mai no te amui atu i pihaiiho i te Feia Moʻa no Navu e tei ô i roto i te paturaa i te Hiero no Navu e tei ô atoa i roto i te tere no te haere mai i te pae Tooa o te râ. No teie mau haamaitairaa atoa, e mauruuru rahi toʻu i teie nei mahana, a parau atu ai au i teie mau parau ia outou.
E mea tiʻa iaʻu ia faahiti no te peresideni Gordon B. Hinckley. Ua horoʻa mai oia i te hoê aʻoraa rahi i teie poʻipoʻi nei – te faaiteraa mai ia tatou i te mau mea tei tupu no te mau matahiti i mairi noa iho nei no niʻa ihoa râ i te mau ohipa i tupu i Navu te patu faahouraahia te reira hiero nehenehe roa. Te mau mea atoa i tupu i reira o te hoê ïa haamaitairaa i to te ao nei e i te taata nei.
Te hinaaro nei au ia ite te peresideni Hinckley e ua mataʻitaʻi noa vau iaʼna mai toʼna pii-raa-hia ei tauturu no te peresideni Spencer W. Kimball e ua amo maite oia i toʼna tiʻaraa i roto i te Peresideniraa Matamua. E ua tupu oia e ua paari e ua faaurûhia e ua arataʻihia i te raveraa i te mau ohipa i riro ai tatou ei mau ite ! E mea iti roa ta matou i rave i roto i te orama o taʼna i farii no te tupuraa o te Ekalesia, tae noaʼtu i te paturaa o te mau hiero, 114 rahiraa hiero teie e faaohipahia nei. E hopea teie no te arataʻiraa faaurûhia i te peresideni Hinckley. Ia haamaitaihia oia no te mea o taʼna i rave no te tautururaa i te Ekalesia ia tupu i te rahi e ia haere i mua na te ao taatoa nei. Te mauruuru rahi nei tatou no te mea o taʼna i rave, no te tiʻaraa o te Ekalesia i teie nei mahana, e no te faatereraa maitai.
Mai tei papaʻihia i roto i te Luka, i te hoê mahana ua tomo te Faaora i roto i te hoê vahi 10 lepera i reira. O tatou tei ora na e ere i te mea maoro roa, e mea iti roa paha o tatou tei ite no niʻa i te maʻi lepera. E maʻi ino roa te lepera, maʻi faauiʻui-roa-hia i te tau tahito ra. Ua haere mai teie 10 lepera i te Faaora e ua parau atura : « Te Orometua, e aroha mai ia matou ; aroha mai ia matou tei roohia i teie maʻi lepera ino roa. » E ua parau atura Oia i na lepera 10 ra, « A haere, a faaite i to outou tahuʻa, e naʼna e faaora mai ia outou » – ua na reira ihoa ratou. Haere atura ratou e farerei i to ratou mau tahuʻa, e ua faaorahia ratou, ratou 10 atoa ra. Taime poto noa i muri iho, ua hoʻi maira te hoê o ratou i te Faaora ra e tipapa ihora i raro e haamauruuru atura i te Faaora no te haamaitairaa iaʼna e te faaoraraaa iaʼna i teie maʻi ino. E ua parau atura te Faaora i taua taata hoê nei : « E ere anei tino ahuru atoa i tamahia nei ? Teihea iho nei ra e tooiva ? Teihea iho nei ratou ? » (A hiʻo Luka 17:11-19).
I toʻu taiʻo noaraa e ua na niʻa iho faahouâ i tera aamu, ua tae maira te hoê manaʻo puai i roto iaʻu. Eaha paʻi e, o outou aʻe tera « tooiva » ? Eaha ïa te huru – ia numerahia i rotopu i te feia tei ore i hoʻi e haamauruuru i te Faaora no te mau haamaitairaa o Taʼna i horoʻa na ratou ra ? Hoê anaʻe tei hoʻi.
Mea ohie roa na tatou ia farii i te mau haamaitairaa, e rave rahi o te ore e taiʻohia, te mau mea te tupu i roto i to tatou oraraa o te tauturu ia taui i to tatou oraraa, haamaitai i to tatou oraraa, e te faahaereraa mai i te Varua i roto i to tatou oraraa. Area râ, aita e tauʻahia. Aue tatou i te mauruuru no te mau haamaitairaa o ta te Evanelia a Iesu Mesia e hopoi mai i roto i to tatou aau e to tatou varua. Ei faahaamanaʻo ia outou paatoa, mai te mea e hinaaro tatou e faaite i to tatou mauruuru mau i to tatou Metua i te Ao ra, mea tiʻa ïa ia na reira tatou ma to tatou aau, te manaʻo, te feruriraa, e te puai atoa – no te mea Naʼna i horoʻa mai i te ora e te aho ora. Ua horoʻa mai Oia i te raveʻa no te oraraa o ta tatou e ora nei, te fariiraa i te Evanelia e i te fariiraa i te hiʻoraa maitai o te feia maitai mai te peresideni Hinckley i te arataʻiraa i te Ekalesia na te ao atoa nei e ia hiʻo te feia apî iaʼna ma te tura e te mauruuru no te hoê taata faatere tei riro ei hohoʻa e i te raveraa i te tufaa e i te faaite eaha ta te Varua o te Mesia e faatupu i roto i to tatou aau e to tatou varua. A faaitehiaʼi taua aau mehara ra a faarahihiaʼi e a haapararehiaʼi, e haamaitaihia to tatou aau to tatou mau manaʻo e to tatou varua i roto i te ohipa e titauhia ia tatou ia rave.
Ua purara to matou fetii i roto e 20 tuhaa no te Fenua Marite nei e i te fenua Peretane. Te ani nei au ia ratou e mai te mea te vaira te mau taime e titauhia outou ia paturu i te mau hui mana faatere rahi, te peresideni Hinckley ihoa râ e toʼna na tauturu – na roto anei i te ratio e aore râ, te vahi atoa e tupu ai te reira, ia rave ratou i te reira ma te popou i te afaʻiraa i to ratou mau rima i niʻa e ma te parau i roto ia ratou iho, « Ua riro atoa vau ei tufaa i te patururaa i te faatereraa o te Ekalesia. » Te hiʻo ra vau i teie mahana a afaʻi ai tatou i to tatou mau rima i niʻa, ua na reira atoa te mau tamarii – te mau tamarii o ta tatou e here nei – i te afaʻiraa i to ratou rima i niʻa i te ao atoa nei. Te tiʻaturi nei tatou e e haamau tatou i roto ia ratou te Varua o te Fatu e i te hinaaro ia haapii, ia ite, ia ora e ia riro ei tuhaa no te Evanelia a Iesu Mesia. Te tiʻaturi nei tatou e te oaoa nei ratou i te mau raveʻa atoa o ta ratou e fanaʻo nei no te faatupu i to ratou mau huru e ia imi i te faatupuraa e i te tauturu ia taui e ia faateitei i te aau o te tahi atu â mau taata.
Te ora nei te Atua. O Oia to tatou Metua Here i te Ao ra. Te faaite papu nei au e o Iesu te Mesia, te Tamaiti a te Atua ora, e te Peropheta Iosepha Semita o te pereopheta ïa no te Faahoʻi Faahouraa mai. O te peresideni Hinckley to tatou faatere faaurûhia i niʻa i teie nei Ekalesia i te ao taatoa nei i teie mahana. Ia haamaitaihia oia no te mau mea atoa o taʼna e rave nei e no te faaurûraa e te heheuraa e te orama o taʼna e farii nei a arataʻi ai oia i te ohipa ia tere i mua. Te vaiiho nei au i toʻu iteraa papu ia outou na roto i te iʻoa o Iesu Mesia ra, amene.